Yesu wa longisa okuti olondonge viaye ‘ka vi pangi onepa koluali.’ (Yoano 15:19) Oku yuvula oku panga onepa kopulitika, mua kongela oku yuvula oku tiamẽla kocitundo cimue kuenda kovoyaki. Ocili okuti, olonjanja vimue ka ci leluka oku yuvula oku panga onepa kopulitika. Pamue tu yoliwa epembe omo lioku yuvula oku panga onepa kopulitika. Tu yuvula ndati oku panga onepa kopulitika kuenda oku amamako oku kakatela ku Yehova Suku?

1. Akristão vocili va tenda ndati olombiali viomanu?

Akristão vocili va sumbila olombiali. Etu tu linga ndeci Yesu a popia kuenda tu ‘eca ku Kaisare ovina via Kaisare’—okuti oku pokola kovihandeleko viofeka, vina vi tu kisika oku feta elisimu. (Marko 12:17) Embimbiliya li longisa okuti, olombiali viomanu, vi kasi lika oku viala omo okuti, Yehova o vi ecelela oku viala. (Va Roma 13:1) Tua kũlĩha okuti, olombiali viomanu vi kuete ongave, ale omoko yavo yoku viala yi sule, ya Suku ya velapo. Tu kuete elavoko liokuti, Suku yetu pocakati Cusoma waye wo kilu, o ka tetulula ovitangi viomanu.

2. Tu lekisa ndati okuti tu yuvula oku panga onepa kopulitika?

Ndeci Yesu, etu ka tu litengi vopulitika. Eci omanu va mola cimue pokati kovikomo Yesu a linga, va seteka oku u lingisa osoma yavo palo posi, pole, eye ka va ecelele. (Yoano 6:15) Momo lie? Momo noke eye wa popia hati: “Usoma wange ka wa tiamẽlele koluali lulo.” (Yoano 18:36) Omo okuti tulondonge via Yesu, tu yuvulavo oku litenga vopulitika volonjila vialua. Ndeci, ka tu endi kuyaki. (Tanga Mika 4:3.) Tua sumbila olondimbukiso viofeka ndeci,—apandela—pole, ka tu a fendela. (1 Yoano 5:21) Ka tua tiamẽlele kocitundo lacimue, ale kusongui wocitundo cimue. Lolonjila evi kuenda vikuavo, tu lekisa okuti tua kakatela lika kuviali wa Suku,—Usoma waye.

 LILONGISA ONDONGOSI

3. Akristão vocili ka va pangi onepa kopulitika

Yesu kumue lolondonge viaye, va tu sila ongangu yiwa. Tanga Va Roma 13:1, 5-7 kuenda 1 Petulu 2:13, 14. Kuenje, tala OVIDEO noke konomuisa apulilo a kuãimo.

• Momo lie tu sukilila oku sumbila olombiali viomanu?

• Vipi olonjila vimue vioku lekisa okuti tua liketisa kokuavio?

Vapuluvi wuyaki, olofeka vimue vi popia okuti ka vi litengimo, pole, vi kuatisa kolonele vivali vi kasi oku liyaka. Nye ci lomboloka muẽle oku yuvula oku litenga vopulitika? Tanga Yoano 17:16. Kuenje, tala OVIDEO noke konomuisa epulilo li kuãimo.

• Nye ci lomboloka oku yuvula oku litenga vopulitika?

Nye o linga nda olombiali vi ku kisika oku linga cimue ka ci likuata lovihandeleko via Suku? Tanga Ovilinga 5:28, 29. Kuenje, tala OVIDEO noke konomuisa apulilo a kuãimo.

• Nda ovihandeleko viomanu ka vi likuata locihandeleko ca Suku, ocihandeleko cipi tu sukila oku pokola?

• O pondola hẽ oku sokolola kocina cimue ci kisika Akristão vocili oku likala oku pokola kolombiali viomanu?

 4. Yuvula oku litenga vopulitika kovisimĩlo kuenda kovilinga

Tanga 1 Yoano 5:21. Kuenje, tala OVIDEO noke konomuisa apulilo a kuãimo.

• Ndomo ca lekisiwa vovideo, momo lie Ayenge a nõlelapo okuti ka pangi onepa kocitundo cimue ale kovihilahila viofeka ndeci oku fendela epandela?

• Ove o sima okuti eye wa lekisa olondunge poku nõla onjila yaco?

Ovitangi vipi vikuavo vi pondola oku tu seteka poku yuvula oku litenga vopulitika? Tala OVIDEO, noke konomuisa apulilo a kuãimo.

• Tu yuvula ndati oku litenga vopulitika catiamẽla kondaka yolomapalo violofeka?

• Tu amamako ndati oku yuvula oku litenga vopulitika, ndaño ceci tu kuatisiwa ale sio lolonjila vakuapulitika va nõlapo?

• Asapulo tu yeva vovingungu, ale komanu tua siata oku kala lavo, a tu kuatisa ndati ale oku kapa kohele onjila tua nõlapo yoku yuvula oku litenga vopulitika?

 NYE WA LILONGISA?

Akristão vocili va likolisilako calua oco ka va ka litenge vopulitika vovisimĩlo viavo, kolondaka kuenda kovilinga.

Oku Pitulula

• Nye tu sukila oku eca kolombiali viomanu?

• Momo lie tu sukilila oku amamako oku yuvula oku litenga vopulitika?

• Ovitangi vipi vi pondola oku tu seteka poku yuvula oku litenga vopulitika?