NGUDO 45

Zwi Amba Mini U Sa Dzhia Sia?

TAMBANI

Yesu o funza uri vhatevheli vhawe a vho ngo fanela u vha “tshipiḓa tsha shango.” (Yohane 15:19) U sa dzhia sia zwi amba u sa ḓidzhenisa kha mafhungo a politiki na kha dzinndwa dza shango. Fhedzi a zwo ngo leluwa u sa dzhia sia. Vhathu vha nga ri kolela nga nṱhani ha uri a ri dzhii sia. Ri nga dzula hani ri sa dzhii sia na u dzula ri tshi fhulufhedzea kha Yehova Mudzimu?

1. Vhakriste vha vhukuma vha dzhia hani mivhuso ya vhathu?

Vhakriste vha a ṱhonifha muvhuso. Ri ita zwe Yesu a amba musi a tshi ri: “Kesare mu ṋeeni zwi re zwawe.” Zwenezwi zwi amba uri ri ṱhonifha milayo ya shango, u katela na u badela mithelo. (Marko 12:17) Bivhili i funza uri mivhuso ya vhathu i khou vhusa nga nṱhani ha uri Yehova o i tendela i tshi vhusa. (Vharoma 13:1) Nga zwenezwo, ri a zwi ḓivha uri maanḓa ane mivhuso ya vhathu ya vha nao ndi maṱuku musi a tshi vhambedzwa na a Mudzimu. Ri fhulufhela uri ndi Mudzimu ane a ḓo tandulula thaidzo dzoṱhe dza vhathu a tshi shumisa muvhuso wawe u re ṱaḓulu.

2. Ri nga sumbedza hani uri a ri dzhii sia?

U fana na Yesu, a ri ḓidzhenisi kha zwa politiki. Musi vhathu vha tshi vhona vhuṅwe ha vhuṱolo he Yesu a vhu ita, vho ṱoḓa u mu ita khosi kha ḽifhasi, fhedzi o hana. (Yohane 6:15) Ndi ngani o hana? Ndi nga nṱhani ha zwe a zwi amba nga murahu, o ri: “Muvhuso wanga a si tshipiḓa tsha ḽino shango.” (Yohane 18:36) Samusi ri vhafunziwa vha Yesu, ri sumbedza nga nḓila dzo vhalaho uri a ri dzhii sia. Sa tsumbo, a ri yi nndwani. (Vhalani Mika 4:3.) Ri ṱhonifha zwiga zwa lushaka zwi ngaho fulaga, fhedzi a ri zwi gwadameli. (1 Yohane 5:21) A ri tikedzi kana u lwisana na ḽihoro ḽa politiki kana muthu ane a khou ṱoḓa u vouthelwa. Musi ri tshi ita zwenezwi na zwiṅwe, ri vha ri tshi khou sumbedza uri ri tikedza Muvhuso wa Mudzimu nga ho fhelelaho.

GUDANI ZWO ENGEDZEAHO

Ṱhogomelani vhuṅwe vhuimo vhune ha nga ita uri zwi konḓe u sa dzhia sia, ni vhone uri ni nga ita hani phetho dzine dza ḓo takadza Yehova.

3. Vhakriste vha vhukuma a vha dzhii sia

Yesu na vhatevheli vhawe vho ri vhetshela tsumbo. Vhalani Vharoma 13:1, 5-7 na 1 Petro 2:13, 14. Ni ṱalele VIDIO, ni kone u fhindula mbudziso dzi tevhelaho.

VIDIO: Vhakriste Vha Vhukuma A Vha Dzhii Sia—Tshipiḓa 1 (4:28)

Ndi ngani ri tshi tea u ṱhonifha mivhuso ya vhathu?
Ndi dzifhio dziṅwe nḓila dzine ra nga sumbedza ngadzo uri ri a ḓiṱukufhadza kha yeneyo mivhuso?

Musi hu na nndwa, maṅwe mashango a nga amba uri ha dzhii sia, fhedzi a thusa zwigwada zwoṱhe zwine zwa khou lwa. Zwi amba mini u sa dzhia sia? Vhalani Yohane 17:16. Ni ṱalele VIDIO, ni kone u fhindula mbudziso i tevhelaho.

VIDIO: Vhakriste Vha Vhukuma A Vha Dzhii Sia—Tshipiḓa 2 (3:11)

Zwi amba mini u sa dzhia sia?

Hu pfi mini arali muvhuso u tshi ṱoḓa uri ni ite zwiṅwe zwithu zwine zwa lwisana na mulayo wa Mudzimu? Vhalani Mishumo 5:28, 29. Ni ṱalele VIDIO, ni kone u fhindula mbudziso dzi tevhelaho.

VIDIO: Vhakriste Vha Vhukuma A Vha Dzhii Sia—Tshipiḓa 3 (1:18)

Arali mulayo wa vhathu na wa Mudzimu i tshi lwisana, ri fanela u thetshelesa ufhio?
Naa ni nga humbula nga vhuimo vhune ha nga ita uri Vhakriste vha si thetshelese milayo ya vhavhusi?

4. Zwine na zwi humbula na zwine na zwi ita zwi tea u sumbedza uri a ni dzhii sia

Vhalani 1 Yohane 5:21. Ni ṱalele VIDIO, ni kone u fhindula mbudziso dzi tevhelaho.

VIDIO: Zwi Itaho Uri Vhakriste Vha Vhukuma Vha Ṱoḓe Tshivhindi—U Sa Dzhia Sia (2:49)

Kha vidio, ndi ngani Vho-Ayenge vho hana u vha muraḓo wa ḽihoro ḽa politiki kana u shela mulenzhe kha vhuṱambo ha lushaka vhu ngaho u losha fulaga?
Naa ni vhona u nga vho ita phetho yavhuḓi?

Ndi vhufhio vhuṅwe vhuimo vhune ha nga linga u sa dzhia hashu sia? Ṱalelani VIDIO, ni kone u fhindula mbudziso dzi tevhelaho.

VIDIO: Ngudo Dzi Bvaho Kha Tshiingamo—Ni Songo Dzhia Sia Kha Ḽino Shango (5:16)

Ri nga dzula hani ri sa dzhii sia arali ri tshi ṱalela mutambo u re na vhatambi vhane vha bva kha mashango o fhambanaho?
Ri nga dzula hani ri sa dzhii sia naho ri tshi nga vhaiswa kana u vhuyelwa nga phetho dza vhorapolitiki?
Zwithu zwine ra zwi pfa kha mafhungo kana kha vhathu vhane ra ṱwa navho, zwi nga kwama hani u sa dzhia hashu sia?

Ndi kha vhuimo vhufhio vhune khaho Mukriste a nga sumbedza uri ha dzhii sia nga zwine a zwi humbula na zwine a zwi ita?

MUṄWE MUTHU A NGA VHUDZISA URI: “Ndi ngani ni sa loshi fulaga kana u imba luimbo lwa lushaka?”

Inwi ni nga ri mini?

NO GUDA MINI?

Vhakriste vha ita zwoṱhe zwine vha nga kona uri zwine vha zwi humbula, zwine vha zwi amba kana zwine vha zwi ita, zwi sumbedze uri a vha dzhii sia kha zwa politiki.