GURUY NI 45
N’en Be Yip’ Fan ni Ngan Par u Mathilin
I yog Jesus nsusun e nge par pi gachalpen ni gathi yad bang ko “fayleng.” (John 15:19) Re n’ey e ba muun ngay ni ngar pared u mathilin ngongolen e am ko re fayleng ney ma dab ra uned ko mahl. Machane gathi gubin ngiyal’ nib mom ni ngan rin’ e re n’ey, ya rayog ni nga i moningnagdad e girdi’. Ere uw rogon ni ngad pared u mathilin ngongolen e re fayleng ney ma gad par ni gad ba yul’yul’ ngak Jehovah Got?
1. Uw rogon e am ko girdi’ u wan’ e tin riyul’ e Kristiano?
Piin Kristiano e yad ma tayfan e am. Gad ma rin’ e n’en ni yog Jesus ni aram e ngad ‘pied ngak e pilung nu Roma e tirok ban’en.’ Re n’ey e be yip’ fan ni ngad folgad ko pi motochiyel ko nam ni bod e tin be yog ni ngad pied e tax. (Mark 12:17) Be yog e Bible ni fan ni be gagiyeg e am ko girdi’ e bochan ni be pagrad Jehovah ni ngar gagiyeggad. (Roma 13:1) Ere gad manang ni pi am ney e bay e gin nra mus mat’awrad riy. Gad ma sap ngak e Got rodad nge Gil’ilungun ni bay u tharmiy ni nge pithig e pi magawon ko girdi’.
2. Uw rogon ni ngad daged ni gad be par u mathilin ngongolen e re fayleng ney?
Darud uned nga ngongolen e am ni bod Jesus. Nap’an ni guy e girdi’ reb e maang’ang ni ngongliy Jesus, ma aram mar guyed rogon ni nge mang pilung rorad. Machane de pagrad ni ngar rin’ed e re n’ey. (John 6:15) Mang fan? Ya yog boch nga tomuren ni ‘gin nsuwon e dariy u roy u fayleng.’ (John 18:36) Bochan ni gadad pi gachalpen Jesus, ma aram e boor e kanawo’ ni gad ma par u mathilin ngongolen e re fayleng ney. Bod ndarud uned ko mahl. (Mu beeg e Mikah 4:3.) Ku gad ma tayfan e pi pow ko nam ni bod e flak, machane darud siro’gad ngay. (1 Kor. 10:14) Ku darud ayuweged ara da togopuluwgad nga reb e ulung ko am ara be’ ni yibe towaliy. Ireray boch e kanawo’ ni gad ma dag riy ni kemus ni yigoo Gil’ilungun Got e ir e gad be par ni gad ba yul’yul’ ngay.
KUM FIL BOCH BAN’EN U MURUNG’AGEN
Mu fil murung’agen boch ban’en nrayog ni nge mo’maw’nag ngom ni ngam par u mathilin, nge rogon ni ngam dugliy boch ban’en nra m’agan’ Jehovah ngay.
3. Tin riyul’ e Kristiano e yad ma par u mathilin ngongolen e fayleng
I dag Jesus nge pi gachalpen e kanawo’ nrayog ni ngad folwokgad riy. Mu beegew e Roma 13:1, 5-7 nge 1 Peter 2:13, 14. Tomuren mi gimew yaliy e re VIDEO ney mi gimew weliy e fulweg ko gal deer ni baaray.
-
Mang fan nsusun e ngad ted fan e am ko girdi’?
-
Mang boch e kanawo’ ni gad ma dag riy ni gad be fol rorad?
Nap’an nra mahl l’agruw e nam, ma sana ra yog boch e nam ni yad be par u mathilin, machane bin riyul’ riy e ra boch i yad ma be ayuweg reb fa gal nam. Mang e ri be yip’ fan ni ngan par u mathilin? Mu beegew e John 17:16. Tomuren mi gimew yaliy e re VIDEO ney mi gimew weliy e fulweg ko re deer ni baaray.
-
Mang e be yip’ fan ni ngan par u mathilin ngongolen e re fayleng ney?
Uw rogon ni faanra ke yog e am ni ngam rin’ ban’en nib togopuluw ko motochiyel rok Got? Mu beegew e Acts 5:28, 29. Tomuren mi gimew yaliy e re VIDEO ney mi gimew weliy e fulweg ko gal deer ni baaray.
-
Faanra be togopuluw e motochiyel ko girdi’ ko motochiyel rok Got, ma bin ngan e susun ni ngad folgad riy?
-
Mang ban’en nrayog ni nge buch ma aram e susun e dabi fol e piin Kristiano ko am?
4. Nge m’ug ko lem nge ngongol rom ni ga be par u mathilin
Mu beegew e 1 Korinth 10:14. Tomuren mi gimew yaliy e re VIDEO ney mi gimew weliy e fulweg ko gal deer ni baaray.
-
Mang fan ni dugliy Ayenge ndabi un ko fare raba’ i ulung ko am ara un nga boch ban’en ni yima rin’ ni bod ni ngan siro’ ko flak?
-
Ga be lemnag nib fel’ e n’en ni dugliy ni nge rin’, fa?
Ku mang boch ban’en ni ma buch nrayog ni nge mo’maw’nag ngodad ni ngad pared u mathilin? Mu yaliyew e re VIDEO ney, mi gimew weliy e fulweg ko pi deer ni baaray.
-
Faanra gad be yaliy girdien l’agruw e nam ni yow be un ngab mit e gosgos, ma uw rogon ni ngad pared u mathilin?
-
Faanra be yib angin ara wenegan e n’en be dugliy boch i girdien e am ngodad, ma uw rogon ni ngad pared u mathilin?
-
Uw rogon ni pi n’en gad ma rung’ag ko news nge piin gad ma chag ngorad e rayog ni nge mo’maw’nag ngodad ni ngad pared u mathilin ngongolen e re fayleng ney?
RAYOG NI NGE GAAR BE’: “Mang fan ndamur siro’ ko flak ara mu un i yon’ e tang ko nam?”
-
Uw rogon ni ga ra fulweg?
N’EN KAN FIL
Ma athamgil e piin Kristiano ni nge m’ug ko lem, nge thin, nge ngongol rorad ni yad be par u mathilin ngongolen e am.
Ngan Sul u Daken
-
Mang e bay mat’awun e am ko girdi’ ni nga rogned ngodad ni ngad rin’ed?
-
Mang fan ni gad ma par u mathilin ngongolen e am?
-
Mang boch ban’en ni ma buch nrayog ni nge mo’maw’nag ngodad ni ngad pared u mathilin?
MU GAY MURUNG’AGEN
Mang boch ban’en nsana ba t’uf ni ngad paged fan ya nge yag nda pared u mathilin ngongolen e re fayleng ney?
Mang e rayog ni nge rin’ chon e tabinaw ya ngar fal’eged rogorad ni fan nga boch ban’en ni ma buch nrayog ni nge mo’maw’nag ngorad ni ngar pared u mathilin?
Mang fan ni faanra rin’ be’ boch ban’en ni fan ko nam rok ma gathi aram e bin th’abi fel’ e kanawo’ ni yira tayfan riy?
Mu lemnag rogon nra m’ug riy ni gathi gur bang ko re fayleng ney u nap’an ni ga be dugliy boch ban’en ni bay rogon ko maruwel ni ngam un ngay.
“Ra Be’ Ma Ba’ Gilban Ni Be Fek” (Fare Wulyang Ntagil’ E Damit, June 1, 2006)