Yesu wukamba balonguki bandi ti babika kota ‘mu mambu ma nza yayi.’ (Yowani 15:19) Yawu yimmonisa ti balendi ko kota mu mambu ma politiki ayi mambu ma zimvita. Wufueti zaba ti phasi yikala mu kondo kota mu mambu ma nza yayi. Malenda kutunatina mimvuezolo ayi balenda kutuseva. Bue tufueti tudila ngolo mu kondo kota mu mambu ma nza yayi ayi simbidila kuikama kueto kuidi Yehova?

1. Bue bakristu bakiedika beta tadila bimfumu bi nza yayi?

Bambangi zi Yehova beta zitisa bimfumu bio bilembo bayadila. Banga phila Yesu kalombila, ‘mukristu kafueti vana Bisezali kuidi Sezali,’ yintia tuba zitisanga minsiku mi tsi ayi futanga ziphaku. (Malako 12:17) Bibila kisudikisidi ti bimfumu bi batu bieta yadila batu bila Nzambi wubibikidi nzila. (Loma 13:1) Mbiadulu’awu ndilu yidi. Nzambi tueta tudila ntima ayi Kimfumu kiandi ki mazulu mu diambu di manisa ziphasi zi batu va nza yayi.

2. Bue mukristu kafueti monisina ti kalendi kota ko mu mambu ma nza yayi?

Bambangi zi Yehova bakotanga ko mu mambu ma politiki. Mu diawu, beta landakana fuanusu ki Yesu. Lumbu kimosi thangu batu bamona bikuma bio kavanga, bedi katomba kuntula ntinu vayi niandi wumanga. (Yowani 6:15) Bila mbi kamangina? Mu diluaku dimosi Yesu wusudikisa ti: “Kimfumu kiama kisi ki nza yayi ko.” (Yowani 18:36) Lumbu kiaki mukristu kalenda monisa mu phila ziwombo ti kakotanga ko mu mambu ma nza yayi: Kabuelanga ko mioko mu mambu matadidi zimvita. (Tanga Mika 4:3.) Tueta zitisa drapo ayi bidimbu binkaka bi tsi, vayi tuvanganga ko mambu mo mammonisa ti tueta kubisambidila. (1 Yowani 5:21) Mu thangu zivoti tubanga ko ku ndambusu mutu ayi lenda wunkaka voti tusangananga ko mu kimvuka kimosi ki politiki. Mu ziphila beni ziozi voti zinkaka tueta monisa ti tuidi bakuikama mu kimfumu kuandi kimosi ki Nzambi.

 TUVISA MBOTI MBOTI

3. Bakristu bakiedika bakotanga ko mu mambu ma nza

Yesu ayi balonguki bandi batubikila kifuani kio tufueti landakana. Tanga Loma 13:1, 5-7 ayi 1 Piela 2:13, 14. Ayi tala VIDEO ayi vana mimvutu mu biuvu biabi bilandikini.

• Bila mbi tufueti kinzikilanga bamfumu zi Leta?

• Phila mbi tufueti monisina ti tueta tumukina bamfumu beni?

Mu thangu zitsi ziwadi zilembo nuani mvita, zitsi ziwombo zieta tuba ti baba buelanga ko mioko vayi mu tuba kiedika beta babuela mioko. Kambu ba ndambusu mosi mbi yinsundula? Tanga Yowani 17:16. Ayi tala VIDEO ayi vana mvutu mu kiuvu kiaki kilandikini.

• Kambu ba ndambusu mosi mbi yinsundula?

A buabu enati bamfumu zi Leta beka nkuika batu mu kingolo bavanga diambu dimosi dimvonda minsiku mi Nzambi? Tanga Mavanga 5:28, 29. Ayi tala VIDEO ayi vana mimvutu mu biuvu biabi bilandikini.

• Buabu enati nsiku mosi wu Leta wuvuezidi nsiku mosi wu Nzambi, we wutumukina?

• Nduka nduka mu mambu mbi bakristu ka balendi tumukina ko bamfumu zi Leta?

 4. Kadi kota mu mambu ma nza yayi buba mu mayindu voti mu mavanga

Tanga 1 Yowani 5:21. Ayi tala VIDEO ayi vana mimvutu mu biuvu biabi bilandikini.

• Bila mbi Ayenge kamangina kotila mu mambu ma kimvuka ki politiki ayi kamangina kota mu minyengo mi tsi?

• Bue wum’banzila, nzengolo yoyi kabaka yiba yimboti?

Mu mambu mbi mankaka yilenda bela phasi mu monisa ti tukotanga ko mu mambu ma nza yayi? Tala VIDEO ayi vana mimvutu mu biuvu biabi bilandikini.

• Bue tulenda mangina bela ndambusu mosi mu thangu batu bam’bula ndimbu yi zitsi?

• Bue tufueti mangina kotila mu mambu ma kimfumu ki tsi yoyi tuvuendi, buba ti nzengolo yoyi babeki mu diambu dieto yimboti yidi voti yimbimbi?

• Mambu momo tunwa mu ziladio ayi momo tunwa kuidi batu bo tueta solula yawu, mbi malenda kututula mu diambu ditedi kambu kota mu mambu ma nza yayi?

 MU BUKHUFI

Mu mayindu, mu thubulu, mu mavanga, mukristu kafueti keba kabika kota mu mambu ma politiki.

Phutukulu

• Bumutu mbi tufueti ba va ntuala bamfumu bo ba kutuyadila?

• Bila mbi mukristu kalendi kotila ko mu mambu ma nza yayi mu diambu ditadidi mambu ma politiki?

• Mu mambu mbi thangu zinkaka yilenda bela phasi mu kondo kota mu mambu ma nza yayi?