Jesúseʼ tu yaʼaleʼ u discípuloʼobeʼ ‹maʼ yóokʼol kaabiloʼobiʼ› (Juan 15:19). Leloʼ u kʼáat u yaʼaleʼ chéen u gobierno Dios ku apoyarkoʼob, le oʼolal maʼatech u táakpajloʼob tiʼ política mix tiʼ guerra. Pero u jaajileʼ maʼ chéen chʼaʼabil jeʼel k-beetik leloʼ tumen le máakoʼoboʼ jeʼel u burlarkoʼoneʼ. ¿Baʼax túun jeʼel k-beetik utiaʼal u chúukpajal k-óol tiʼ Jéeoba yéetel k-apoyartik u gobiernoeʼ?

1. ¿Bix unaj k-ilik u gobierno wíinik?

Toʼon k-meyajtik Dioseʼ k-respetartik le gobiernoʼoboʼ. Jesúseʼ tu yaʼalaj: «Boʼoteʼex tiʼ César le baʼaxoʼob u tiaʼal Césaroʼ». Le oʼolal toʼoneʼ k-beetik baʼax ku yaʼalik le leyoʼob yaan teʼ luʼum tuʼux kajaʼanoʼonoʼ, por ejemploeʼ k-boʼotik impuesto (Marcos 12:17). Le Bibliaoʼ ku yaʼalikeʼ Dios tsʼaamil le autoridadoʼob utiaʼal u gobernaroʼoboʼ (Romanos 13:1). Jeʼex k-ilkoʼ chéen tiʼ Dios yaan tuláakal autoridad maʼ tiʼ wíinikiʼ, le oʼolal chéen u gobierno Dios kun páajtal u yutskíintik tuláakal le problemas yaan way yóokʼol kaabeʼ.

2. ¿Bix jeʼel k-eʼesik chéen u gobierno Dios k-apoyarkeʼ?

Toʼoneʼ k-kʼáat k-beet jeʼex Jesúseʼ, le oʼolal maʼatech k-oksikba tiʼ política. Juntéenjeakeʼ Jesúseʼ tu beetaj junpʼéel milagro, le ka tu yilaj le máakoʼob le baʼax tu beetoʼ taakchaj u tsʼáaikoʼob u beet u reyil, chéen baʼaleʼ Jesúseʼ maʼ tu yóotiʼ (Juan 6:15). ¿Baʼaxten? Letiʼeʼ tu yaʼalaj: «In reinoeʼ maʼ yóokʼol kaabiliʼ» (Juan 18:36). U discípuloʼob Jesúseʼ ku yeʼeskoʼob chéen u gobierno Dios ku apoyarkoʼob, le oʼolal maʼ tu táakpajloʼob tiʼ guerraʼob (xok Miqueas 4:3). Toʼoneʼ k-respetartik baʼaloʼob jeʼex le banderaoʼ, chéen baʼaleʼ maʼ t-saludartik tumen bey jeʼex ka k-adorarteʼ (1 Juan 5:21). Tsʼoʼoleʼ maʼ t-apoyartik mix junpʼéel partido yéetel mix juntúul candidato yaan yil yéetel política. Beyoʼ k-eʼesik chéen u gobierno Dios k-apoyartik.

 UTIAʼAL A MAAS NAʼATIK

3. Toʼoneʼ k-apoyartik u gobierno Dios

Jesús yéetel u discípuloʼobeʼ bey tu beetiloʼoboʼ. Xokeʼex Romanos 13:1, 5-7 yéetel 1 Pedro 2:13, 14. Kéen tsʼoʼokkeʼ ka chaʼantikeʼex le VIDEOOʼ yéetel ka tsikbaltikeʼex lelaʼ:

• ¿Baʼaxten kʼaʼabéet k-respetartik le gobiernoʼoboʼ?

• ¿Bix jeʼel k-eʼesik k-respetarkoʼobeʼ?

Le kéen yanak guerraeʼ yaan kaajoʼobeʼ ku yaʼalikoʼobeʼ maʼatech u apoyarkoʼob le máaxoʼob ku baʼateloʼoboʼ. Chéen baʼaleʼ yéetel le baʼaxoʼob ku beetkoʼoboʼ ku yeʼeskoʼob maʼ beyiʼ. Le kéen úuchuk beyoʼ, ¿baʼax unaj u beetik le máaxoʼob meyajtik Diosoʼ? Xokeʼex Juan 17:16. Kéen tsʼoʼokkeʼ ka chaʼantikeʼex le VIDEOOʼ yéetel ka tsikbaltikeʼex lelaʼ:

• ¿Bix jeʼel k-eʼesik maʼ t-oksikba tiʼ políticaeʼ?

Yaan kʼiineʼ le autoridadoʼoboʼ ku yaʼalikoʼob ka k-beet baʼaloʼob ku bin tu contra le baʼaxoʼob ku yaʼalik Diosoʼ. ¿Baʼax unaj k-beetik teʼ súutukiloʼob beyoʼ? Xokeʼex Hechos 5:28, 29. Kéen tsʼoʼokkeʼ ka chaʼantikeʼex le VIDEOOʼ yéetel ka tsikbaltikeʼex lelaʼ:

• Wa junpʼéel gobierno ku yaʼalik ka k-beet junpʼéel baʼal ku bin tu contra u ley Dioseʼ, ¿baʼax unaj k-beetik?

• ¿Bey tiʼ baʼax súutukiloʼob maʼ unaj k-uʼuyik u tʼaan le autoridadoʼoboʼ?

 4. Eʼes ka apoyartik u gobierno Dios yéetel baʼax ka tuklik bey xan yéetel baʼax ka beetik

Xokeʼex 1 Juan 5:21. Kéen tsʼoʼokkeʼ ka chaʼantikeʼex le VIDEOOʼ yéetel ka tsikbaltikeʼex lelaʼ:

• ¿Baʼaxten Ayengeeʼ maʼ táakpaj tiʼ políticaiʼ yéetel maʼ tu saludartaj le banderaoʼ?

• Techeʼ bix a wilik, ¿maʼalob wa le baʼax tu beetoʼ?

¿Tiʼ baʼax uláakʼ súutukil jeʼel u probartaʼal wa k-apoyartik chéen u Reino Dioseʼ? Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:

• ¿Bix jeʼel k-eʼesik chéen u gobierno Dios k-apoyartik tiʼ baʼaloʼob yaan yil yéetel deporteʼobeʼ?

• ¿Bix jeʼel k-eʼesik chéen u gobierno Dios k-apoyartik le kéen u afectartoʼon le baʼaxoʼob ku beetik le políticoʼoboʼ?

• Le noticiaʼob yaan yil yéetel políticaoʼ, ¿jeʼel wa u beetik u káajal k-tuukul jeʼex u maasil le máakoʼoboʼ? ¿Baʼaxten?

 BAʼAX TSOʼOLI

Le máaxoʼob meyajtik Diosoʼ ku yeʼeskoʼob chéen u gobierno Dios ku apoyarkoʼob. Lelaʼ ku yeʼeskoʼob yéetel baʼax ku tuklikoʼob, baʼax ku yaʼalikoʼob bey xan yéetel baʼax ku beetkoʼob.

Baʼax ta kanaj

• ¿Bix unaj k-ilik u gobierno wíinik?

• ¿Baʼaxten maʼatech k-oksikba tiʼ política?

• ¿Tiʼ baʼax súutukiloʼob jeʼel u probartaʼal wa k-apoyartik chéen u Reino Dioseʼ?