NÍ KASEMI 46
Mɛni He Je Nɛ E Sa Nɛ O Jɔɔ O He Nɔ Nɛ O Ha Nɛ A Baptisi Mo ɔ?
O he nɔ nɛ o maa jɔɔ ha Yehowa a tsɔɔ kaa o maa wo lɛ si ngɛ sɔlemi mi kaa o ma ja lɛ pɛ, nɛ o kɛ e suɔmi nya ní peemi maa ye kekle blɔ he ngɛ o si himi mi. (La 40:8) Lɔ ɔ se ɔ, a ma nyɛ maa baptisi mo. Enɛ ɔ ma ha nɛ́ ni kpahi nɛ a na kaa o jɔɔ o he nɔ kɛ ha Yehowa. Yi mi kpɔ nɛ wa maa mwɔ kaa wa maa pee Yehowa suɔmi nya ní ɔ ji yi mi kpɔ nɛ he hia pe kulaa nɛ wa maa mwɔ ngɛ wa si himi mi. Yi mi kpɔ nɛ ɔ nɛ o maa mwɔ ɔ ma tsake o si himi kulaa. Mɛni lɛ maa wo mo he wami konɛ o mwɔ yi mi kpɔ nɛ he hia nɛ ɔ?
1. Mɛni lɛ maa wo nɔ ko he wami konɛ e jɔɔ e wami nɔ kɛ ha Yehowa?
Suɔmi ji nɔ́ nɛ woɔ wɔ he wami nɛ wa jɔɔ wa he nɔ kɛ haa Yehowa. (1 Yohane 4:10, 19) Baiblo ɔ de ke: ‘E sa nɛ o suɔ Yehowa o Mawu ɔ kɛ o tsui tsuo, kɛ o susuma tsuo, kɛ o juɛmi tsuo, kɛ o he wami tsuo.’ (Maako 12:30) Pi níhi nɛ wa deɔ ɔ pɛ nɛ tsɔɔ kaa wa suɔ Mawu, mohu ɔ, waa kɛ wa ní peepee hu tsɔɔ jã. Kaa bɔ nɛ nyumu kɛ yo nɛ a suɔ a he wawɛɛ ɔ sɛɛ gba si himi mi ɔ, jã nɔuu nɛ suɔmi nɛ wa ngɛ kɛ ha Yehowa a woɔ wɔ he wami nɛ wa jɔɔ wa wami nɔ kɛ haa lɛ, nɛ wa haa nɛ a baptisiɔ wɔ.
2. Mɛni jɔɔmihi nɛ Yehowa haa e we Odasefohi nɛ a baptisi mɛ ɔ?
Ke a baptisi mo ɔ, o ma ba piɛɛ Yehowa weku nɛ e mi bimɛ ngɛ bua jɔmi ɔ he. O ma ba na blɔ slɔɔtohi a nɔ nɛ Yehowa maa gu kɛ je e suɔmi ɔ kpo kɛ tsɔɔ mo, nɛ huɛ bɔmi nɛ ngɛ o kɛ lɛ nyɛ kpɛti ɔ mi maa wa po pe amlɔ nɛ ɔ. (Kane Malaki 3:16-18.) Yehowa ma ba pee o Tsɛ, nɛ jehanɛ hu ɔ, o ma ba ná nyɛmimɛ nyumuhi kɛ yihi ngɛ je kɛ wɛ nɛ a suɔ Yehowa, nɛ́ a suɔ mo hulɔ. (Kane Maako 10:29, 30.) Se e sa nɛ o pee ní pɔtɛɛ komɛ loko a maa baptisi mo. E sa nɛ o kase Yehowa he ní, nɛ́ o suɔ lɛ, nɛ́ o ná hemi kɛ yemi ngɛ e Bi ɔ mi. Nyagbe ɔ, e sa nɛ o jɔɔ o wami nɔ kɛ ha Yehowa. Ke o pee ní nɛ ɔmɛ tsuo nɛ a baptisi mo ɔ, lɔ ɔ ma nyɛ ma ha nɛ o ná neneene wami. Mawu Munyu ɔ de ke: ‘Baptisimi . . . hu ngɛ nyɛ yi wami hee.’—1 Petro 3:21.
MOO KASE BABAUU
Moo hyɛ nɔ́ he je nɛ e he hia nɛ o jɔɔ o wami nɔ kɛ ha Yehowa nɛ a baptisi mo ɔ.
3. E sa nɛ wɔ tsuo waa hla nɔ nɛ wa ma sɔmɔ
Ngɛ blema Israel ɔ, ni komɛ susu kaa a ma nyɛ ma ja Yehowa kɛ lakpa mawu nɛ ji Baal ɔ tsuo. Se Yehowa tsɔ gbalɔ Eliya konɛ e ya dla a susumi nɛ dɛ nɛ ɔ. Nyɛɛ kane 1 Matsɛmɛ 18:21, nɛ nyɛ susu sane bimi nɛ ɔ he:
-
Mɛni e he ba hia nɛ Israel bi ɔmɛ nɛ a hla kaa a maa pee?
Kaa bɔ nɛ e ji ngɛ Israel bi ɔmɛ a blɔ fa mi ɔ, wɔ hu e sa nɛ waa hla nɔ nɛ wa ma sɔmɔ. Nyɛɛ kane Luka 16:13, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛni he je nɛ wa be nyɛe ma ja Yehowa kɛ nɔ kpa ko loo nɔ́ kpa ko ɔ?
-
Mɛni wa maa pee konɛ Yehowa nɛ na kaa wa hla kaa wa ma ja lɛ?
4. Mo susu suɔmi nɛ Yehowa ngɛ kɛ ha mo ɔ he
Yehowa ha wɔ nike níhi fuu nɛ a se be. Mɛni wa ma nyɛ ma ha lɛ? Mo je VIDEO ɔ.
Mɛni blɔ komɛ a nɔ nɛ Yehowa je suɔmi kpo kɛ tsɔɔ mo ngɛ? Nyɛɛ kane La 104:14, 15 kɛ 1 Yohane 4:9, 10, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛni nike ní komɛ nɛ́ je Yehowa ngɔ lɛ o bua jɔ he wawɛɛ?
-
Kɛ nike ní nɛ ɔmɛ haa nɛ o naa Yehowa ha kɛɛ?
Ke wa nine su nike ní ko nɛ wa bua jɔ he wawɛɛ nɔ ɔ, wa suɔ kaa wa maa na nɔ nɛ ha wɔ ɔ si. Nyɛɛ kane 5 Mose 16:17, nɛ nyɛ susu sane bimi nɛ ɔ he:
-
Ke o susu nɔ́ fɛɛ nɔ́ nɛ Yehowa pee ha mo ɔ he ɔ, mɛni lɔ ɔ woɔ mo he wami nɛ o ha lɛ?
5. Ke o jɔɔ o he nɔ kɛ ha Yehowa a, o ma ná jɔɔmihi fuu
Nihi fuu susu kaa biɛ hemi, ní tsumi kpakpa aloo sika ma ha nɛ a ná bua jɔmi. Anɛ e ngɛ mi jã lo? Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
-
E ngɛ mi kaa bɔɔlu fialɔ nɛ ngɛ video ɔ mi ɔ bua jɔ bɔɔlu fiami he mohu lɛɛ, se mɛni ha nɛ e kpa e ní tsumi kaa bɔɔlu fialɔ ɔ?
-
E ma e juɛmi nya si kaa e kɛ e wami tsuo ma sɔmɔ Yehowa, se pi bɔɔlu fiami. Anɛ o susu kaa yi mi kpɔ nɛ ɔ nɛ e mwɔ ɔ da lo? Mɛni he je?
Loko bɔfo Paulo ma ba pee Kristofo no ɔ, jinɛ e tsuɔ ní tsumi ko nɛ nihi buɔ wawɛɛ. E kase Yuda bi a mlaa a kɛ je tsɔɔlɔ ko nɛ e he biɛ ɔ ngɔ. Se e ngmɛɛ lɔ ɔ he konɛ e ba pee Kristofo no. Anɛ e pia e he lo? Nyɛɛ kane Filipi Bi 3:8, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛni he je nɛ Paulo de ke, níhi tsuo nɛ e ngmɛɛ a he loko e ba pee Kristofo no ɔ ji “dwɔmi babauu” aloo kuku ɔ?
-
Mɛni se e ná?
-
Ke o hyɛ ɔ, anɛ o si himi maa pee kpakpa ke o hla kaa o ma sɔmɔ Yehowa lo? Mɛni he je?
Benɛ Paulo ba pee Kristofo no ɔ, e nine su níhi fuu a nɔ pe níhi nɛ e ngmɛɛ a he ɔ
NI KOMƐ DEƆ KE: “E he hia we nɛ o jɔɔ o wami nɔ kɛ ha Mawu.”
-
Mɛni he je nɛ o susu kaa nile ngɛ mi kaa o maa jɔɔ o wami nɔ kɛ ha Yehowa a?
NYA MWƆMI
Suɔmi haa nɛ wa jɔɔ wa wami nɔ kɛ haa Yehowa nɛ a baptisiɔ wɔ.
Mi Nylɔmi
-
Mɛni he je nɛ e sa nɛ waa suɔ Yehowa nɛ wa ja lɛ kɛ wa tsui tsuo ɔ?
-
Ngɛ mɛni blɔhi a nɔ nɛ Yehowa jɔɔ e we Odasefohi nɛ a baptisi mɛ ɔ?
-
Anɛ o maa suɔ nɛ o jɔɔ o he nɔ kɛ ha Yehowa lo?
NÍ KPAHI NƐ MAA YE BUA MO
Moo hyɛ nɔ́ he je nɛ la polɔ ko kɛ bɔɔlu fialɔ ko mwɔ a yi mi kpɔ kaa a maa jɔɔ a he nɔ kɛ ha Yehowa.
Nihewi Kɛ Yihewi Biɔ Ke—Mɛni I Kɛ Ye Wami Maa Pee?—A Ngmɛɛ Ní Komɛ A He (6:54)
Moo hyɛ yi mi tomi kpahi a he je nɛ e sa nɛ o jɔɔ o he nɔ kɛ ha Yehowa.
“Mɛni He Je Nɛ E Sa Nɛ O Jɔɔ O He Nɔ Kɛ Ha Yehowa a?” (Hwɔɔmi Mɔ, January 15, 2010)
Ngɛ la nɛ ɔ mi ɔ, moo hyɛ bɔ nɛ ni komɛ nɛ a jɔɔ a wami nɔ ha Yehowa a ná bua jɔmi ha.
Ke o ngɛ munyu nɛ ji “I Bi Jehahi Babauu Ke, ‘Mɛni He Je Nɛ Wa Ngɛ Si Himi Mi ɔ?’” kanee ɔ, mo kadi nɔ́ nɛ ye bua yo ko nɛ e susu níhi nɛ a he hia lɛ ngɛ e si himi mi ɔ he ɔ.
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
