OZUMALƐDƖYƐ 46
Mɩnla Ti Mɔɔ Ɩsɛ Kɛɛ Eyila Wʋ Nwʋ Zʋ Na Onuma a?
Eyila wʋ nwʋ zʋ ɛma Gyehova iluwa mpayɩwɔlɛ mɔɔ oduwa zʋ bɔ anʋhʋba kɛɛ ɔkɔzʋ̃mɩ yɩzayɩ nkʋ̃ kyenyii na wʋava yɩ wʋali bɔmʋnlɩ wɔ wʋ ɛbɩlawɔlɛ nu nɩ zʋ. (Ndwomi 40:8) Mɛyɩ mɛda nɩ, onuma. Ɛyɛ ɔzɔ a, ɛma mmenii nwʋ yɩ kɛɛ eyila wʋ nwʋ zʋ. Pɔkɔ mɔɔ yesi kɛɛ yekeyila yɛ nwʋ zʋ yɛkɛma Gyehova yɛ lɛ pɔkɔzilɛ mɔɔ nwʋmɔ hyinyia tɛla ebiyela. Mɩnla yɛ ɩkɛhã wʋ ma ekezi pɔkɔ eyi mɔɔ ɩkɔhʋla ɩkɛzɩnza wʋ ɛbɩlawɔlɛ a?
1. Mɩnla yɛ ɩkã abiye ma iyila yɩ nwʋ zʋ a?
Ɔlɔlɛ mɔɔ yɛlɛ yɛma Gyehova nɩ yɛ ɩkã yɛ ma yeyila yɛ nwʋ zʋ a. (1 Dwɔɔnʋ 4:10, 19) Bayɩbʋlʋ ɩhyɛ yɛ ɛzɩzɩbɛ kɛɛ: ‘Yɛvá yɛ ahʋnlɩnɩ munwatĩĩ ɩ nɩɩ yɛ ɛkɛla munwatĩĩ ɩ nɩɩ yɛ adwɩnɩ munwatĩĩ ɩ nɩɩ yɛ anwʋzɩzɩbɛ munwatĩĩ yɛlɔ́ Niibenyia Nyamɩnlɩ nɩ.’ (Maakɩ 12:30) Yeduwa mɔɔ yɛkã nɩɩ mɔɔ yɛyɛ zʋ yɛda yɩ ali kɛɛ yɛdɔ Nyamɩnlɩ. Kɛmɔ mmenii anwɩ̃ mɔɔ bɔdɔ bɔ nwʋ baaba paa bekyia nɩ, ɔzɔ la yɛ ɔlɔlɛ mɔɔ yɛlɛ yɛma Gyehova nɩ ɩkã yɛ ma yeyila yɛ nwʋ zʋ yɛma yɩ na yenuma a.
2. Mɩnla nyilalɛ yɛ Gyehova ɩfa ɩma yɩ Dasɩvʋlɔmaa mɔɔ bonluma nɩ a?
Sɛ onuma a, ɛkɛɣa ɛkɛhɩnla Gyehova yɩ abusunwa mɔɔ anyɩnlɩlelɛ wɔ numɔ nɩ nwʋ. Ɩkɛla yɩ ɔlɔlɛ ali ikehile wʋ wɔ ahʋanɩ azʋlɔtʋ nu, na ɔkɔhwɩ̃ ekeɣike yɩ baaba paa ɛkɛdɛla kɛmɔ ɩdɩ sikalɛyɩ nɩ. (Kɩnga Malaki 3:16-18.) Sɛ ɛfa Gyehova mɔɔ ɩkɛɣa ɩkɛyɛ wʋ Zɩ nɩ etiã ahanlɩ a, sa enyia sunzuma ɔfʋã nu abusunwa mɔɔ mmeliyema mmenyia nɩɩ mmaalɛ mɔɔ bɔwɔ numɔ nɩ dɔ yɩ na bɔdɔ wʋzawʋ sʋ̃. (Kɩnga Maakɩ 10:29, 30.) Naasʋ̃ nninyeni azʋlɔtʋ be wɔ ɛkɛnɩ mɔɔ ɩsɛ kɛɛ yedi bɔmʋnlɩ yɛyɛ ansaana bɛanluma yɛ. Ɩsɛ kɛɛ yesuma Gyehova nwʋ dɩyɛ, yɛdɔ yɩ, na yenyia yɩ Ɣa yi nu dedi. Akʋ̃ sʋ̃ ɩsɛ kɛɛ yeyila yɛ nwʋ zʋ yɛma Gyehova. Sɛ ɛyɛ nninyeni eyimmɔ na onuma a, ɔkɔhʋla ekenyia ɛbɩlawɔlɛ mɔɔ anyɩnlɩlelɛ wɔ numɔ daabaa. Nyamɩnlɩ yɩ odwokɔ yɩ ɩkã kɛɛ: ‘Onlumanlɛ ɩma Nyamɩnlɩ ide mʋnlʋmmɔ nnwʋanlɩ.’—1 Pita 3:21.
SUMÁ SƲ̃MAA
Sunzú sianti mɔɔ nwʋmɔ ihyinyia kɛɛ ekeyila wʋ nwʋ zʋ ɛkɛma Gyehova na wʋanluma nɩ nwʋ.
3. Ɩsɛ kɛɛ ye munwala yɛyɩ enii mɔɔ yɛkɔzʋ̃mɩ yɩ
Wɔ tɩɩtɩɩ Yizilaya nɩ, nɩ abiyemmɔ lɛ adwɩnɩ kɛɛ bɔkɔhʋla bɔkɔzʋ̃mɩ Gyehova na bɛazia bɛazʋ̃mɩ awohwi nyamɩnlɩ Baalɩ. Naasʋ̃ Gyehova zʋ̃manlɩ yɩ nkɔmɩhyɛnii Ilayɩgya ma ɩdɩnɣɛnlɩ ɔzɔ adwɩnɩ tanɩ mɔɔ benyia nɩ. Kɩnga 1 Awulombunli 18:21, na akʋ̃ bozunzú odwokɔɣizialɛ eyi nwʋ:
-
Mɩnla pɔkɔ yɛ nɩ ɩsɛ kɛɛ Yizilayamaa nɩ si a?
Ɩsɛ kɛɛ amɩyɛ sʋ̃ yɛyɩ enii kʋ̃ mɔɔ yɛkɔzʋ̃mɩ yɩ kɛmɔ Yizilayamaa yɛlɩ nɩ. Kɩnga Luuku 16:13, na akʋ̃ bozunzú ndwokɔɣizialɛ eyimmɔ nwʋ:
-
Mɩnla ti mɔɔ yɛlɔ́kʋla yɛkɔzʋ̃mɩ Gyehova na yeazia yɛazʋ̃mɩ enii fʋlɔ anzɛnyɩɩ dɩyɛ fʋlɔ be a?
-
Kɛ ɩkɛyɛ na yɛama Gyehova ɩanwʋ kɛɛ yezi pɔkɔ kɛɛ yɛkɔzʋ̃mɩ yɩ a?
4. Dwɩnɩndwɩnɩ́ Kezimɔ Gyehova ɩdɔ wʋ nɩ nwʋ
Gyehova ɩhyɛ nninyeni sʋ̃maa yɛ. Mɩnla yɛ amɩyɛ sʋ̃ yɛkɔhʋla yɛkɛva yɛkɛma yɩ a? Yɩ́ VIDIYO nɩ.
Mɩnla ahʋanɩ azʋlɔtʋ zʋ yɛ Gyehova ɩla ɔlɔlɛ ali ihile wʋ a? Kɩnga Ndwomi 104:14, 15 nɩɩ 1 Dwɔɔnʋ 4:9, 10, na akʋ̃ bozunzú ndwokɔɣizialɛ eyimmɔ nwʋ:
-
Gyehova yɩ akyɛdɩ mɔɔ ɩva ɩma wʋ nɩ, numɔ ɛhɩnla dɩyɛ yɛ wʋ anyɩ ɩsɔ baaba paa?
-
Mɩnla yɛ akyɛdɩ eyimmɔ ɩma ɔnwʋ ɛfalɩ Gyehova nwʋ a?
Sɛ yɛ sa kã akyɛdɩ be mɔɔ yɛ anyɩ ideli nwʋmɔ paa a, yɛyɛ dɩyɛ be ma enii kʋ̃ nɩ ɩnwʋ kɛɛ yɛ anyɩ ɩsɔ yɩ. Kɩnga Ditilonɔmi 16:17, na akʋ̃ bozunzú odwokɔɣizialɛ eyi nwʋ:
-
Sɛ ɔdwɩnɩndwɩnɩ nninyeni mɔɔ Gyehova ɩyɛ ɩma wʋ nɩ nwʋ a, mɩnla yɛ ɩkã wʋ kɛɛ ɛyɛ́ ma yɩ a?
5. Sɛ eyila wʋ nwʋ zʋ ɛma Gyehova a, ekenyia nyilalɛ sʋ̃maa
Mmenii sʋ̃maa de di kɛɛ dimalelɛ, egyima baaba anzɛnyɩɩ ozukua kɔhʋla kɛma bɛ anyɩ kele. Asʋ̃ eyi ɩdɩ nɔhʋanlɛ a? Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
-
Ɩwɔ numɔ kɛɛ benyia mɔɔ ɩwɔ vidiyo yi nu nɩ yɩ anyɩ ideli bɔɔlʋwɔlɛ nwʋ dɩyɛ, naasʋ̃ mɩnla ti mɔɔ iyiakili a?
-
Izili pɔkɔ kɛɛ ikeyila yɩ nwʋ zʋ ɩkɛma Gyehova, na kɛ bɔɔlʋwɔlɛ a. Asʋ̃ ekila a, izili pɔkɔ baaba a? Mɩnla ti a?
Ansaana sʋ̃mavʋlɔ Pɔɔlʋ ɩbayɛ Kilisinyianii nɩ, nɩ ɩyɛ egyima be mɔɔ mmenii bu yi kɛɛ annidi wɔ numɔ paa. Nɩ izuma Dwuumaa bɛ mmɛla wɔ kilehilevʋlɔ be mɔɔ nɩ ile dima ɛkɛ. Naasʋ̃ iyiakili eyimmɔ munwatĩĩ ɛkɛ ɩɣa ɩyɛlɩ Kilisinyianii. Asʋ̃ Pɔɔlʋ nlunli yɩ nwʋ a? Kɩnga Fɩlɩpɩmaa 3:8, na akʋ̃ bozunzú ndwokɔɣizialɛ eyimmɔ nwʋ:
-
Mɩnla ti mɔɔ Pɔɔlʋ ɩhanlɩ kɛɛ nninyeni mɔɔ ɩyɛlɩ ansaana ɩbayɛ Kilisinyianii nɩ, ɩdɩ kɛɛ “owula zʋ nninyeni” a?
-
Mɩnla mfasʋ yɛ inyianlɩ a?
-
Ekila a, sɛ ɛfa wʋ nnwʋanlɩ sʋ̃mɩ Gyehova a, ikezi wʋ bʋwɔ a?
Mmɩlɩ mɔ Pɔɔlʋ ɩɣa ɩyɛlɩ Kilisinyianii nɩ, inyianlɩ nyilalɛ sʋ̃maa ɩdɛlalɩ nninyeni mɔɔ ɩva ɩwɔlɩ afɔlɩ nɩ
ABIYEMMƆ BƐKÃ KƐƐ: “Mizi kɛɛ nɔhʋanlɛ yɩ ɛdɩ, naasʋ̃ mɩábɛ kɛɛ mukonluma sikalɛyɩ.”
-
Mɩnla ti mɔɔ mfasʋ wɔ zʋ kɛɛ ekeyila wʋ nwʋ zʋ ɛkɛma Gyehova a?
YƖ DƆKƆWƆLƐ
Ɔlɔlɛ yɛ ɩkã yɛ ma yeyila yɛ nwʋ zʋ yɛma Gyehova na yenuma a.
Kɛ Okowuwa Ekeze a?
-
Mɩnla ti mɔɔ ɩsɛ kɛɛ yɛzʋ̃ yɛ ahʋnlɩnɩ munwatĩĩ nu yɛdɔ Gyehova na yɛsʋ̃mɩ yɩ a?
-
Mɩnla nyilalɛ yɛ Gyehova ɩfa ɩma yɩ Dasɩvʋlɔmaa mɔɔ bonluma nɩ a?
-
Asʋ̃ ɛkɛbɛ kɛɛ ekeyila wʋ nwʋ zʋ ɛkɛma Gyehova a?
PƖBƐ́ SƲ̃MAA
Kilá mɔɔ ɩmanlɩ ndwomidʋlɛvʋlɔ be nɩɩ bɔɔlʋwɔlɛvʋlɔ be zili pɔkɔ kɛɛ bekeyila bɔ nwʋ zʋ bɛkɛma Gyehova.
Kilá sianti fʋlɔ ti mɔɔ ɩsɛ kɛɛ eyila wʋ nwʋ zʋ.
“Mɩnla Ti Mɔɔ Ɩsɛ Kɛɛ Eyila Wʋ Nwʋ Zʋ Ɛma Gyehova a?” (Ɔwɩɛnɩlɛ Aɣanɩ, January 15, 2010)
Wɔ ndwomi mɔɔ bɛyɛ yɩ vidiyo yi nu nɩ, kila kezimɔ mmenii mɔɔ beyila bɔ nwʋ zʋ bɛma Gyehova nɩ bɛ anyɩ ide.
Wɔ odwokɔ mɔɔ ise, “Mɩvalɩ Alʋbɔ Sʋ̃maa Miɣizialɩ Mʋ Nwʋ Kɛɛ, ‘Mɩnla Ti Mɔɔ Yɛda Azɩ a?’” yi nu nɩ, kila mɔɔ ɩwʋwalɩ baalɛ be ma izunzunli nninyeni mɔɔ nwʋmɔ ihyinyia baaba nɩ nwʋ.
“Bayɩbʋlʋ Ɩsɩnza Ɛbɩlawɔlɛ” (Ɔwɩɛnɩlɛ Aɣanɩ, November 1, 2012)
