PONJI MI 46
Pirang’o ukwayu ithier kwo peri ni Yehova man ilim batizo?
Nithiero kwo peri ni Yehova tie ning’olo ire i rwo nia ibitimo ire kende man ibiketho yeny pare i kabedo ma kwong’a i kwo peri. (Zaburi 40:8) I ng’eye, ubekwayu ilim batizo. Kinde m’ibelimo, nwang’u ibenyutho i wang’ dhanu ceke nia idaru thieriri ni Yehova Mungu. Eno tie yub ma pire tek nisagu yub mange ceke m’iromo maku. Bende, etie yub ma biloko kwo peri zoo. Dong’ ang’o ma copo cweli nimaku yubne?
1. Ang’o ma romo cwalu ng’atini nithiero kwo pare ni Yehova?
Mer re ma cwaluwa nithiero kwo mwa ni Yehova. (1 Yohana 4:10, 19) Biblia ubeyero kumae: “Icikiri nimaru Yehova Mungu peri kud adundeni ceke, ku ng’eyong’ec peri ceke, ku pidoic peri ceke, man ku tegoni ceke” (Marko 12:30) Wanyutho nia wamaru Mungu, ungo kende kende nikadh’i wec mwa, re bende nikadh’i lembe ma wabetimo. Ka nico ku nyaku moko gimariri andhandha, gigamiri. Kumeno bende, mer ma wamaru ko Yehova bicwaluwa nithiero kwo mwa giwa ire man nilimo batizo.
2. Mugisa ma kani ma Yehova ubemiyo ni Jumulembe pare ma gilimo batizo?
Kan ilimo batizo, ibidoko acel m’i kind juruot pa Yehova ma gitie weg anyong’a. Ibineno ku weng’i mer pare i kwo peri i yore dupa, man ibidoko jarimbe ma ceng’ini nisagu ma tin. (Som Malaki 3:16-18.) Bende, Yehova bibedo Wuru andhandha. M’umedo maeno, i ng’om zoo, ibidoko kud umego ku nyimego dupa m’umare man m’umeri. (Som Marko 10:29, 30.) Re lembe moko nuti m’ukwayu ilar itim i wang’ nilimo batizo. Lembang’o? Ubekwayu iponj lembe iwi Yehova, imare, man inyuth yiyoyic i Wode. M’umedo maeno, icikiri nithiero kwo peri ni Yehova. Kan itimo lembe maeno ceke man ilimo batizo, ibibedo ku genogen mi nwang’u kwo ma rondo ku rondo. Lembe pa Mungu uwacu kumae: “Batizo bende ubebodhowu kawoni.”—1 Pethro 3:21.
MED NYANG’ PERI
Wakenen nia pirang’o pire tek ya ithier kwo peri ni Yehova man ilim batizo.
3. Wan ceke wacikara ning’iyo ng’atu ma wabitimo ire
I Israel ma con, dhanu moko gibed giparu nia gicopo timo ni Yehova man bende ni Baal ma Mungu m’araga. Ento Yehova ugam uoro jabila pare Eliya ucidh utwinyo paru migi ma racne cen. Som 1 Ubimo 18:21, man i ng’eye wuwec iwi penji m’ulubo e:
-
Nyithindho mir Israel gibino i wang’ ng’iyong’ic ma kani ma gicikiri nitimo?
Calu nyithindho mir Israel, wan bende wacikara ning’iyo ng’atu ma wabitimo ire. Som Luka 16:13, man i ng’eye wuwec iwi penji m’ulubo e:
-
Pirang’o ecopere ngo nia watim ni Yehova man bende ni ng’atu kunoke piny moko mange?
-
Wacopo nyutho nenedi ni Yehova nia wang’iyo mwa nitimo ire kende?
4. Par pi mer ma Yehova umeri ko
Yehova umiyo iwa giramiya dupa ma beco. Ka wan ke wacopo miyo ire ang’o? Nen VIDEO.
Yehova unyutho iri mer pare i yore moko ma kani? Som Zaburi 104:14, 15 man 1 Yohana 4:9, 10, man i ng’eye wuwec iwi penji m’ulubo e:
-
I kind giramiya ceke pa Yehova, ma kani m’imaru nisagu?
-
Giramiya parene uketho itie ku paru ma kani i wiye?
Ka ng’atu moko umiyo iwa giramiya ma wamaru akeca, wan bende wamito wanyuth ire foyofoc mwa. Som Poi mi Cik 16:17, man i ng’eye wuwec iwi penji m’ulubo e:
-
Kan ibeneno piny ceke ma Yehova umiyo iri, adundeni cweli nimiyo ire bende ang’o?
5. Nithiero kwo peri ni Yehova miyo mugisa dupa
Dhanu ma dupa giyiyo nia ka piri yik lee, itie ku tic ma cuu, kunoke ipong’ ku sente, ibikwo kud anyong’a. Nyo eno tie lemandha? Nen VIDEO, man i ng’eye wuwec iwi penji m’ulubo e:
-
Kadok ng’atu mi video maeni ugam umaru goyo mupira lee, re pirang’o eng’iyo niweko?
-
Ethiero kwo pare, ungo ni mupira, ento ni Yehova. Nyo ibeparu nia emaku yub m’atira? Pirang’o?
I wang’ nidoko Jakristu, jakwenda Paulo ubedo lubo lembe ma romo ketho pire yik lee. Egam esomo cik mi Juyahudi cuu man japonjo pare ubino ng’atu ma rwonge yik lee. Re Paulo uweko lembuno ceke pi nidoko Jakristu. Nyo ang’eyang’o moko umondo i iye de? Som Jufilipi 3:8, man i ng’eye wuwec iwi penji m’ulubo e:
-
Pirang’o Paulo uyero nia gin m’ebed etimo i wang’ nidoko Jakristu ubino ve “susu”?
-
Edok enwang’u ang’o kaka gin m’eweko?
-
I kind timo ni Yehova ku timo lembe mange i kwo peri, ma kani ma cuu nisagu? Pirang’o iyero kumeno?
Bero ma Paulo udok unwang’u kinde m’edoko Jakristu, usagu bor dit gin m’elar eweko
DHANU MOKO BEYERO KUMAE: “Ang’eyo nia eni tie lemandha, re fodi atie ngo ayika nilimo.”
-
Pirang’o iparu nia etie lembe ma cuu nithiero kwo peri ni Yehova?
I ADUNDO
Mer re ma cwaluwa nithiero kwo mwa ni Yehova man nilimo batizo.
Penji mi poyowic
-
Pirang’o Yehova uromo nia wamare man watim ire kud adundewa ceke?
-
Mugisa ma kani ma Yehova ubemiyo ni Jumulembe pare ma gilimo batizo?
-
Nyo icopo maru nithiero kwo peri ni Yehova?
TIM SAYUSAC
Jagoy mizik man jagoy mupira moko ging’iyo nithiero kwo migi ni Yehova. Kenen gin m’ucwalugi nitimo kumeno.
Penji m’aradu gipenjiri ko: Abitimo ang’o ku kwo para?—Gibepoy (6:54)
Nen thelembe mange ma copo cweli nithiero kwo peri ni Yehova.
“Pirang’o ukwayu ithier kwo peri ni Yehova?” (Otkur ma Wiw, nindo 15, dwi mi 1, 2010, mi français)
I video ma e mi mizik, kenen anyong’a ma ju m’uthiero kwo migi ni Yehova gitie ko.
I kpawa mi kwo ma thiwie tie, “Pi oro dupa abed apenjara nia pirang’o wabekwo i ng’om keni,” kenen gin m’ucwalu dhaku moko ning’iyo gin ma pire tek nisagu i kwo pare.
