IRUẸMWI 46
Vbọzẹ Nọ Na Khẹke Ne U Ya Egbe Fiohan Kevbe Ne U Dinmwiamẹ?
U gha tama e Jehova vbe erhunmwu wẹẹ, irẹn ọkpa ẹre u khian ya arrọọ ruẹ ga kevbe wẹẹ, ahoo ọghẹe ẹre u khian gha mu ye okaro vbe arrọọ ruẹ, te uwẹ ya egbe fiohan nẹẹn nii. (Psalm 40:8) Iyeke ọni, u ghi dinmwiamẹ. Ọna ẹre ọ khian ghi ya emwa ọvbehe rẹn wẹẹ, u ya egbe fiohan ne Osanobua nẹ. Azẹ nọ ghi ru ekpataki sẹ ne ọmwa gha ru, ọre nọ ya egbe ẹre fiohan ne Jehova. Sokpan, de emwi nọ gua ọmwa kpa ya ru azẹ nọ hin usi vbenian, kevbe nọ fi ẹdagbọn ọmwa werriẹ?
1. De emwi nọ gua ọmwa kpa ya ya egbe fiohan?
Ahoẹmwọmwa ẹre ọ gua ima kpa ya ya egbe fiohan ne Jehova. (1 Jọn 4:10, 19) E Baibol khare wẹẹ: “Ya ekhọe ruẹ hia, orhiọn ruẹ hia, ẹko ruẹ hia, kevbe ẹtin ruẹ hia hoẹmwẹ e Nọyaẹnmwa Osanobua ruẹ.” (Mak 12:30) Ẹi re ẹmwẹ ne ima ta ọkpa, ẹre ima ya rhie ẹre ma wẹẹ ima hoẹmwẹ e Jehova, ma vbe rhie ẹre ma vbe uyinmwẹ. Okpia vbe okhuo gha gele hoẹmwẹ egbe, iran ghi rọnmwẹ egbe, erriọ ẹre ahoẹmwọmwa ne ima mwẹ ne Jehova vbe ya gua ima kpa ya ya egbe fiohan nẹẹn, ma ghi vbe dinmwiamẹ.
2. De afiangbe ne emwa ni dinmwiamẹ nẹ miẹn vbe obọ e Jehova?
U gha dinmwiamẹ nẹ, u ghi do gha re ọkpa vbe ẹgbẹe ọghe Jehova nọ sọyẹnmwẹ. U ghi do bẹghe odẹ ughughan ne Jehova ya rhie ẹre ma wẹẹ irẹn hoẹmwẹ ruẹ, u ghi vbe do kakabọ sikẹ ọre. (Tie Malakai 3:16-18.) E Jehova ghi do gha re Erhaa. Yevbesọni, u ghi do gha mwẹ erha, iye kevbe etẹn nibun ne uwa gba ga Osanobua vbe uhunmwu otagbọn hia, ni hoẹmwẹ e Jehova kevbe ni hoẹmwẹ ruẹ. (Tie Mak 10:29, 30.) Vbọrhirhighayehẹ, ọ mwẹ emwi eso nọ khẹke ne u ru, u ke dinmwiamẹ. U ghi ka ruẹ emwi vbekpa e Jehova, u ghi hoẹmwẹ ọnrẹn, u ghi vbe mu ẹtin yan Ovbi ẹre. Vbe okiekie, u ghi ya egbuẹ fiohan ne Jehova. U gha ghi ru ena hia nẹ, u ghi do dinmwiamẹ. Ẹghẹ nii, ẹkpotọ ghi kie nuẹn ya sọyẹnmwẹ arrọọ vbe etẹbitẹ. Ẹmwẹ Osanobua khare wẹẹ: “Idinmwiamẹ vbe . . . miẹn uwa fan nia.”—1 Pita 3:21, NW.
GUALỌ OTỌ RE SAYỌ
Gia ziro yan evbọzẹe nọ na ru ekpataki ne u ya egbe fiohan ne Jehova kevbe ne u dinmwiamẹ.
3. Te ima hia gha zẹ ọmwa ne ima gha ga
Ivbi Izrẹl eso ni ghaa rrọọ vbe ẹghẹ nẹdẹ kegha roro ẹre wẹẹ, iran gha sẹtin gha ga e Jehova, iran ghi vbe gha ga ẹbọ na tie ẹre Bel ba re. Sokpan e Jehova keghi gie akhasẹ Ẹlaija nọ ya dia iziro nọ ma gba nii. Tie 1 Ọba 18:21, iyeke ọni, uwa ghi ziro yan inọta na:
-
De ẹkpotọ nọ kie ne Ivbi Izrẹl vbe ako ọghe Baibol na?
Vbe na ghee Ivbi Izrẹl, te ima gha vbe zẹ ọmwa ne ima gha ga. Tie Luk 16:13, iyeke ọni, uwa ghi ziro yan avbe inọta na:
-
Ma ghaa ga e Jehova, vbọzẹ nọ ma na khẹke ne ima vbe gha rhie ugamwẹ nọ khẹke Jehova ne ọmwa ọvbehe ra emwi ọvbehe?
-
Vbe ima khian ya rhie ẹre ma hẹ wẹẹ, e Jehova ẹre ima khian ga?
4. Gha mu ahoẹmwọmwa ne Jehova mwẹ nuẹn roro
Emwi ni hin usi nibun ẹre Jehova he ya ru ima ẹse. De emwi ne ima gha sẹtin ru nẹẹn? Kpee VIDIO na.
De odẹ eso ne Jehova he ya rhie ẹre ma wẹẹ irẹn hoẹmwẹ ruẹ? Tie Psalm 104:14, 15 kevbe 1 Jọn 4:9, 10, iyeke ọni, uwa ghi ziro yan avbe inọta na:
-
De ẹse ne Jehova he ru nuẹn nọ ghi yẹẹ ruẹ sẹ?
-
De vbene ẹmwẹ e Jehova ye hẹ vbe ekhọe ruẹ, rhunmwuda ẹse nibun nọ ru nuẹn?
Ọmwa gha ru ima ẹse nọ gele gbe ima otiti, ma ghi gi ẹre rẹn wẹẹ, ma gele gbọyẹmwẹ ye ẹse nọ ru nii. Tie Diuteronomi 16:17, NW, iyeke ọni, uwa ghi ziro yan inọta na:
-
Deghẹ u na gha muẹn roro, emwi hia ne Jehova he ru nuẹn, vbọ khian gua ruẹ kpa ya ru?
5. Afiangbe nibun ẹre a lae miẹn vbe a gha ya egbe fiohan
Emwa nibun yayi wẹẹ, irọnmwa, iwinna nọ maan kevbe igho, ẹre ọ ya ọmwa mwẹ oghọghọ. Ẹmwata ẹre ọna khin ra? Kpee VIDIO na, iyeke ọni, uwa ghi ziro yan inọta ni lelẹe.
-
Vbọ ghi ya okpia na sẹ ebọru na gbe rae, agharhemiẹn wẹẹ, emwi nọ te mu ye okaro vbe arrọọ ọghẹe ẹre nọ?
-
Ọ na ghi ta mu olọ yan rẹn wẹẹ, e Jehova ẹre irẹn khian ya egbe fiohan na, ẹi re ebọru na gbe. Uwẹ yayi wẹẹ ẹwaẹn rre emwi ne irẹn ru nii ra? Vbua gu kha vberriọ?
Vbene ukọ e Pọl ke do gha re Ovbiotu e Kristi, ukpo nọ yo ẹre ọ ghaa ye. Uhi ọghe Ivbi e Ju, ẹre ọ tie re vbe owebe, ọmamwaemwi na wa họn usi ẹre rre, ẹre ọ maa re emwi. Sokpan, ọ keghi sẹ enii hia rae do gha re Ovbiotu e Kristi. Ọ mwẹ ẹghẹ ne Pọl ya gbe I ma rẹn ra? Tie Filipai 3:8, iyeke ọni, uwa ghi ziro yan avbe inọta na:
-
Vbọzẹ ne Pọl na kha wẹẹ, emwi hia ne irẹn ghaa mwẹ kevbe ne irẹn ru, a te miẹn wẹẹ irẹn khian Ovbiotu e Kristi, keghi re “emwi nẹi mwẹ esa”?
-
De afiangbe nọ ghi lae miẹn?
-
U gha mu ugamwẹ e Jehova ye okaro vbe arrọọ ruẹ, ra u na mu emwi ọvbehe ye okaro, de ne u yayi ighẹ ọ maan sẹ? Vbua gu kha vberriọ?
Afiangbe ne Pọl miẹn vbe ọ khian Ovbiotu e Kristi nẹ, sẹ emwi hia nọ sẹrae
EMWA ESO KEGHI KHA WẸẸ: “Ọmwa ne ẹwaẹn gba na i khian sẹtin ya arrọọ ọghẹe fiohan ne Osanobua.”
-
Vbọzẹ ne uwẹ na yayi wẹẹ emwi nọ khẹke nọ, ne ọmwa ya egbe ẹre fiohan ne Jehova?
OLIKA ẸMWẸ
Ahoẹmwọmwa ẹre ọ gua ima kpa ya ya egbe fiohan ne Jehova, ẹre ọ vbe gua ima kpa ya dinmwiamẹ.
Ogbewerriẹ
-
Vbọzẹ ne Jehova na re ọmwa nọ khẹke ne ima ya ekhọe hia hoẹmwẹ ọnrẹn kevbe ne ima gha ya ekhọe hia ga?
-
De odẹ ne Jehova ya fiangbe emwa ni dinmwiamẹ nẹ?
-
Uwẹ gha hoo ne u ya egbe fiohan ne Jehova ra?
RUẸ SAYỌ
Ghee evbọzẹe ne okhuo ọkpa nọ so ihuan kevbe okpia ọkpa nọ ku iku isasegbe na ya egbe iran fiohan ne Jehova.
Inọta Ne Igbama Nọ—De Emwi Ne I Khian Ya Ẹdagbọn Mwẹ Ru?—I Gha Ya Yerre (6:52)
Ghee emwi ọvbehe nọ zẹe nọ na khẹke ne u ya egbuẹ fiohan ne Jehova.
“Vbọzẹ Nọ Na Khẹke Ne U Ya Egbuẹ Fiohan Ne Jehova?” (The Watchtower, January 15, 2010)
Vbe vidio ọghe ihuan na, u gha bẹghe ọyẹnmwẹ nọ sẹ emwa ni ya egbe iran fiohan ne Jehova.
Vbe okha nọ mwẹ uhunmwuta na, “Ukpo Nibun Ẹre I Ya Gha Nọ Wẹẹ, ‘Vbe Ima Do Ru Vbe Agbọn?’” u gha miẹn evbọ ya okhuo ọkpa werriegbe mu ukpa mu uwerhẹn ghee emwi nọ ru ekpataki sẹ vbe arrọọ ọghẹe.
“E Baibol Fi Arrọọ Werriẹ” (The Watchtower, November 1, 2012)
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
