KALANSEN 46
Mun na k’i yɛrɛbakun di Jehova ma ani ka batise?
I b’i yɛrɛbakun di Jehova ma i kɛtɔ ka layidu ta a ye delili kɔnɔ ko i bɛna ale kelenpe de bato ani ka a sago kɛli bila fɛn bɛɛ ɲɛ i ka ɲɛnamaya kɔnɔ. (Zaburu 40:9) O kɔ, i bɛ batise. I ka batɛmu fɛ, i b’a jira tɔw la ko i ye i yɛrɛbakun di Jehova ma. An bɛ latigɛli min kɛ ka an yɛrɛbakun di Jehova ma, o ye an ka latigɛliw bɛɛ la ɲumanw dɔ la kelen de ye. O ye latigɛliba ye min bɛna i ka ɲɛnamaya yɛlɛma. Mun bɛ se ka i bila i ka o latigɛli sugu kɛ?
1. Mun bɛ mɔgɔ bila a k’a yɛrɛbakun di Jehova ma?
Kanuya de bɛ an bila an ka an yɛrɛbakun di Jehova ma. (1 Yuhana 4:10, 19) Bibulu bɛ dusu don an kɔnɔ ko: “I ka i Matigi Ala kanu ni i dusukun bɛɛ ye, ani i ni bɛɛ, ni i hakili bɛɛ ni i barika bɛɛ.” (Marka 12:30) An b’a jira ko an bɛ Jehova kanu, an tɛ o jira an kumakan dɔrɔn fɛ nka an b’o jira an ka kɛwalew fana fɛ. Iko mɔgɔ fila minnu bɛ ɲɔgɔn kanu tiɲɛ yɛrɛ la bɛ furu ɲɔgɔn ma cogo min na, o cogo kelen na, kanuya min bɛ an na ka ɲɛsin Jehova ma, o bɛ an bila an ka an yɛrɛbakun di a ma ani ka batise.
2. Jehova bɛ duba jumɛnw di a Seerew ma minnu batisera?
Ni i ye batɛmu ta, i bɛ kɛ Jehova ka denbaya nisɔndiyalen kɔnɔmɔgɔ dɔ ye. O la, i bɛna Jehova ka kanuya ye ka ɲɛsin i ma sira caman fɛ, ani i bɛna gɛrɛ a la kosɛbɛ o waati la ka tɛmɛn sisan kan. (Malaki 3:16-18 kalan.) Jehova bɛna kɛ i Fa ye, nka o dɔrɔn tɛ, i bɛna denbaya sɔrɔ alako ta fan fɛ minnu kɔnɔmɔgɔw bɛ kɛ i balimakɛw ani i balimamusow ye ka bɔ diɲɛ fan bɛɛ. Olu bɛ Jehova kanu ani u bɛ e fana kanu. (Marka 10:29, 30 kalan.) Siga t’a la ko, i ka kan ka fɛn dɔw kɛ fɔlɔ sani i ka batise. I ka kan k’a ɲini ka fɛn caman dɔn Jehova kan, ka a kanu, ani ka dannaya da a Denkɛ kan. A laban na, i bɛ i ka ɲɛnamaya di Jehova ma. Ni i ye o fɛnw kɛ ani o kɔ ka batise, o bɛ se ka sababu di i ma ka ɲɛnamaya kɛ fo badaa. Ala ka Kuma b’a fɔ ko: “Batiseli . . . bɛ aw kisi sisan.”—1 Piɛrɛ 3:21.
DƆ FARA I KA DƆNNIYA KAN
An k’a sɛgɛsɛgɛ kun min na a nafa ka bon i k’i yɛrɛbakun di Jehova ma ani ka batise.
3. An bɛɛ ka kan k’a sugandi an bɛna min bato
Israɛl-kɔrɔ la, mɔgɔ dɔw tun b’a miiri ko u bɛ se ka Jehova ani ala nkalonma Baal bato ɲɔgɔn fɛ. Nka Jehova ye a ka kira Eli ci ka na o hakilina kolon latilen. 1 Masakɛw 18:21 kalan, o kɔ aw ka baro kɛ nin ɲininkali kan:
-
Israɛldenw tun ka kan ka sugandili jumɛn de kɛ?
Iko Israɛldenw cogo, anw fana ka kan k’a sugandi an bɛna min bato. Luka 16:13 kalan, o kɔ aw ka baro kɛ nin ɲininkaliw kan:
-
Mun na an tɛ se ka Jehova ani mɔgɔ wɛrɛ walima fɛn wɛrɛ bato ɲɔgɔn fɛ?
-
An b’a jira Jehova la cogo di ko an y’a sugandi ka ale de bato?
4. Kanuya min bɛ Jehova la ka ɲɛsin i ma, i hakili jagabɔ o kan
Jehova ye nilifɛn ɲumanba caman di an ma. Anw bɛ se ka mun de di a ma? A’ye WIDEYO lajɛ.
Sira minnu fɛ Jehova ye kanuya jira i la, olu dɔw ye jumɛnw ye? Zaburu 104:14, 15 ani 1 Yuhana 4:9, 10 kalan, o kɔ aw ka baro kɛ nin ɲininkaliw kan:
-
I bɛ waleɲumandɔn jira kɛrɛnkɛrɛnnenya la Jehova ka nilifɛn jumɛnw de ko la?
-
O nilifɛnw bɛ i bila ka mun miiri a ko la?
Ni mɔgɔ dɔ ye nilifɛn dɔ di an ma min ko ka di an ye tiɲɛ yɛrɛ la, an b’a fɛ ka waleɲumandɔ jira a tigi la. Dutɛrɔnɔmɛ 16:17 kalan, o kɔ aw ka baro kɛ nin ɲininkali kan:
-
Jehova ye fɛn minnu bɛɛ di i ma, ni i ye i hakili jagabɔ olu kan, o bɛ i bila ka mun di a ma?
5. Yɛrɛbakundili bɛ na ni duba caman ye
Mɔgɔ caman b’a miiri ko nin fɛnw de bɛ nisɔndiya di u ma: Tɔgɔba, baara ɲuman u bɛ min kɛ u ka ɲɛnamaya bɛɛ kɔnɔ, walima wari. Yala o ye tiɲɛ ye wa? A’ye WIDEYO lajɛ, o kɔ aw ka baro kɛ nin ɲininkaliw kan:
-
Hali k’a sɔrɔ balontan tun ka di balontanna ye min ko fɔra wideyo kɔnɔ, mun na a ye o baara dabila?
-
A m’a latigɛ ka a yɛrɛbakun di balontan ma, nka a y’a latigɛ k’a di Jehova de ma. Yala i hakili la, a ye latigɛli ɲuman kɛ wa? Mun na?
Sani ciden Paul ka kɛ krecɛn ye, a tun bɛ baara ɲumanba la. A ye Yahutuw ka sariya kalan karamɔgɔ kodɔnnaba dɔ fɛ. Nka a ye o to yen walasa ka kɛ krecɛn ye. Yala Paul nimisara o ko la wa? Filipekaw 3:8 kalan, o kɔ aw ka baro kɛ nin ɲininkaliw kan:
-
Mun na Paul y’a fɔ ko ale tun bɛ ka fɛn minnu kɛ sani a ka kɛ krecɛn ye, ko olu bɛɛ tun ye “ɲamanɲaman ye”?
-
A ye mun de sɔrɔ o fɛnw nɔ na?
-
Jehova batoli ani i bɛ se ka baara kɛ ni i ka ɲɛnamaya ye sira wɛrɛ min fɛ, i bɛ olu sanga ɲɔgɔn ma cogo jumɛn na?
Tuma min na Paul kɛra krecɛn ye, a ye fɛn minnu sɔrɔ, olu cayara kosɛbɛ ka tɛmɛn fɛnw kan a ye minnu to yen
MƆGƆ DƆW B’A FƆ KO: “Kun t’a la ka i ka ɲɛnamaya di Ala ma.”
-
E hakili la, mun na hakilitigiyako don ka i yɛrɛbakun di Jehova ma?
BAKURUBAFƆLI
Kanuya de bɛ an bila an ka an yɛrɛbakun di Jehova ma ani ka batise.
Seginnkanni
-
Mun na an ka kan ka Jehova kanu ani ka a bato ni an dusukun bɛɛ ye?
-
Jehova bɛ a ka Seere batiselenw sara cogo di?
-
Yala i b’a fɛ ka i yɛrɛbakun di Jehova ma wa?
NINNU LAJƐ
A lajɛ dɔnkilidala dɔ ani bolikɛla dɔ y’a latigɛ ka u yɛrɛbakun di Jehova ma cogo min na.
Funankɛw bɛ ɲininkali minnu kɛ—Ne bɛna mun de kɛ n’ka ɲɛnamaya kɔnɔ?—Hakilijiginw (6:54)
Minnu ye u yɛrɛbakun di Jehova ma, olu ka nisɔndiya lajɛ nin fɔlikan wideyolama kɔnɔ.
Nin ɲɛfɔli in kɔnɔ: “San caman kɔnɔ, ne tun bɛ to ka n’yɛrɛ ɲininka ko, ‘Mun na an bɛ dugukolo kan?’” a lajɛ fɛn min ye muso dɔ bila a k’a hakili jagabɔ fɛn kan min nafa ka bon ni fɛnw bɛɛ ye a bolo.
