PELAJAREN 46
Engkai maka Perlu Kam Mbaktiken Diri ras Iperidiken?
Adi enggo kam ertoto janah erjanji man Jahwe maka Ia ngenca sembahndu janah utamakenndu peratenNa bas geluhndu, e ertina kam enggo mbaktiken diri man Jahwe. (Masmur 40:8) Kenca si e iperidiken me kam. Alu iperidiken, tuduhkenndu man kalak si deban maka kam enggo mbaktiken diri. Mbaktiken diri man Jahwe eme keputusen si pentingna si banci lakokenndu, janah e banci erban geluhndu reh ulina. Kai nge si ngiahken kam guna mbaktiken diri?
1. Kai si ngiahken kita mbaktiken diri man Jahwe?
Mbaktiken diri ras iperidiken eme bukti kekelengenta man Jahwe. (1 Johanes 4:10, 19) Bas Pustaka si Badia ikataken, “Arus kelengindu Jahwe Dibatandu alu kerina pusuhndu, kegeluhenndu, perukurenndu, ras gegehndu.” (Markus 12:30) Adi keleng ateta Dibata Jahwe, labo bias cakap saja. Misalna, bali bagi sekalak dilaki si ngena atena sekalak diberu, labo bias katakenna ngena atena diberu e, tapi perlu ka ibuktikenna arah perbahanenna alu ngempoi diberu ndai. Bage ka pe, adi keleng ateta Dibata Jahwe, arus ka sicidahken arah perbahanenta. Carana eme alu mbaktiken diri ras iperidiken.
2. Kai saja pasu-pasu si bereken Jahwe man bandu adi kam iperidiken?
Kenca kam iperidiken, kam jadi bagin anggota keluarga Jahwe. Banci kam ermeriah ukur, igejapkenndu kekelengen Jahwe, janah banci kam reh deherna ras Ia. (Baca Maleaki 3:16-18.) Selain si e, perban Jahwe enggo jadi Bapakndu, keluargaNa pe jadi keluargandu. Kalak e lit i belang-belang doni. Keleng ate kalak e Jahwe janah keleng atena kam. (Baca Markus 10:29, 30.) Tapi lit si perlu lakokenndu. Perlu kam terus erlajar kerna Jahwe, kelengindu Ia, janah erkiniteken kam man AnakNa, Jesus Kristus. Kenca lakokenndu e, perlu ka baktikenndu dirindu man Jahwe ras iperidiken. Alu bage banci lit arapenndu nggeluh ermeriah ukur seh rasa lalap. Janah nina Pustaka si Badia, “Peridin . . . nelamatken kena gundari.”—1 Petrus 3:21.
PELAJARI TERBAGESEN
Sibahas kari engkai maka perlu kam mbaktiken diri man Jahwe ras iperidiken.
3. Arus sipilih ise kin ateta sisembah
Mbarenda, piga-piga kalak Israel erpengakap maka banci layanina Jahwe ras Baal. Tapi iutus Jahwe Nabi Elia guna mpersingeti kalak e maka perukurenna e enggo salah. Bacalah 1 Raja-Raja 18:21, kenca si e bahas penungkunen enda:
-
Pilihen kai nge si arus iban kalak Israel?
Bagi bangsa Israel, kita pe arus sipilih ise ateta silayani. Bacalah Lukas 16:13, kenca si e bahas penungkunen enda:
-
Engkai maka la banci sisembah Jahwe janah sisembah ka si deban?
-
Uga carata mbuktiken man Jahwe maka Ia ngenca sisembah?
4. Ukurilah kekelengen Jahwe man bandu
Enggo melala si ibereken Jahwe man banta. Kai si banci sibereken man Jahwe? Putar VIDEO.
Kai saja si bereken Jahwe man bandu bukti keleng ateNa kam? Bacalah Masmur 104:14, 15 ras 1 Johanes 4:9, 10, kenca si e bahas penungkunen enda:
-
Arah kerina si enggo bereken Jahwe, si apai saja nge kapndu si mehergana?
-
Kenca datndu kerina pemere arah Jahwe, uga nge kapndu Dibata Jahwe e?
Sanga sidat hadiah, pasti ngata bujur kel ateta man kalak si merekenca. Bacalah Ulangen 16:17, kenca si e bahas penungkunen enda:
-
Kita pe ngata bujur kel ateta man Jahwe perban enggo melala si iberekenNa. Kai nge si mehergana si banci sibereken man Jahwe?
5. Adi sibaktiken dirita man Jahwe, pasti melala sidat pasu-pasu
Enterem kalak erpengakap adi terkenal ia, mejile pendahinna, ntah pe melala senna, pasti meriah ukurna. Tuhu nge bage? Putar VIDEO, kenca si e bahas penungkunen enda:
-
Pemain sepak bola bas video e, meriah kapna sepak bola. Tapi engkai maka nggit ia nadingkenca?
-
Enggo pilihna mbaktiken geluhna man Jahwe, labo man sepak bola. Menurutndu, enggo nge pas keputusenna e? Engkai?
Rasul Paulus pernah erlajar kerna hukum Jahudi arah guru si terkenal. Emaka, lit kesempatenna ndatken pendahin si mejile. Tapi tadingkenna si e kerina gelah banci ia jadi kalak Kristen. Menyesal nge ia? Bacalah Pilipi 3:8, kenca si e bahas penungkunen enda:
-
Engkai maka ianggap Paulus kerina si enggo itadingkenna e “sampah”?
-
Kai nge si datna kenca ia jadi kalak Kristen?
-
Menurutndu, reh riahna nge kari ukurndu adi pilihndu ngelayani Jahwe? Engkai maka bage nindu?
Kenca Paulus jadi kalak Kristen, pasu-pasu si alokenna ndauh buen asangken si enggo tadingkenna
LIT SI NGATAKEN: “Kuteh nge enda kebenaren. Tapi lenga aku siap iperidiken.”
-
Menurutndu, engkai maka perlu sibaktiken dirita man Jahwe janah iperidiken?
KESIMPULEN PELAJAREN ENDA
Adi keleng ateta Jahwe, tersuruh ukurta mbaktiken diri man baNa ras iperidiken.
Kai si Enggo Sipelajari?
-
Engkai maka Jahwe ngenca si patut sisembah ras sikelengi alu bulat ukurta?
-
Kai saja nge pasu-pasu si bereken Jahwe man umatNa si enggo iperidiken?
-
Lit nge sura-surandu mbaktiken diri man Jahwe?
DARAMI TERBUEN
Engkai maka sekalak penyanyi ras sekalak atlet pilihna mbaktiken dirina man Jahwe?
Penungkunen Anak Muda—Kai si Kulakoken bas Kegeluhenku?—Nginget Mulihi (6:54)
Kai ka nge alasenna maka perlu baktikenndu dirindu man Jahwe?
“Mengapa Saudara Membaktikan Diri kepada Yehuwa?” (Menara Pengawal 15 Januari 2010)
Bas video musik enda, perdiatekenlah maka kalak si mbaktiken diri man Jahwe meriah ukurna.
Bas pengalamen “Saya Selalu Bertanya-tanya, ‘Untuk Apa Kita Hidup?’” perdiatekenlah engkai maka sekalak diberu ukurina mulihi kai si pentingna bas geluhna.
“Alkitab Mengubah Kehidupan” (Menara Pengawal 1 November 2012)
