BAG I 46

Numke a mbètte nefà wut Nsi mbèn ngù nyuʼntse à?

O num mfà wul o Yaweh Nsi ngelañ o leʼdʼé, ntshob yi mbe oaʼ ghamdʼà ndaʼ yi mbèn njab ze nekô mbwe dùʼ ntùm yôg so là. (Yobkwi 40:8) Mbe nèn mbwe, o ghù nyuʼntse nelaʼde tsemoʼ mbʼo fà wul o Yaweh Nsi. Nefà wut Nsi bʼa taʼ mfiʼ ndùb ze be mènntùn loʼ là. Ke ze bʼa tèndʼo neloʼ yen mfiʼ ndùb zʼa bade yôg so lʼà?

1. Ke zʼa be ntènde mènntùn nefà wul i Nsi à?

A nkôni bèn ntènde mènntùn nefà wul i Yaweh Nsi. (1 Yohané 4:10, 19) Ñwaʼni Nsi tshwèt ntshob ben mbe: “Ke nkô [Yaweh Nsi] o, njoñ ntù o fa, njoñ zwiag so fa, njoñ nkwadenu mu fa, mba njoñ yu neta fa.” (Marko 12:30) Be nke ndaʼde zebe nkôni mfà num Nsi ntùm ntshob ben, mba ntùm ngùninu ben. Ndañndañ mba taʼ mandum bo taʼ mènnzwi tse bo kô wut tshob bo bo num na ndà là, nkôni ze be ghù mfà num Yaweh Nsi là num ntènde ben nefà wut ben yi mbèn ngù nyuʼntse.

2. Tsit mbotni Yaweh Nsi num mfà ghakwénta mi tse bo ghù nyuʼntse à?

Ngelañ o num ngù nyuʼntse là, o tsho ntùm tunndà ndùb Yaweh Nsi. Aʼ laʼdʼo ze nkôni ntùm mat nzenze, yu kushun bo yi bèn nta ntshùa mbʼa be sènni là. (Siañ Malaki 3:16-18.) Nekwiʼde num neghù Yaweh Nsi mba tàan nà, oaʼ bèn ngù taʼ tunndà fètfèt tse bandum mba tse bènnzwi num bag ywèt tse bo kô Yaweh Nsi, mbèn nkô o là. (Siañ Marko 10:29, 30.) Là, tsemoʼ tshu be là tsʼa bètte o ghù kà ngù nyuʼntse là. A bètte o ziʼde nelèn Yaweh Nsi, nkô i, mbèn ngù bamntù mfà num Mén i. Nemiagde, a bètte o fà wul o Yaweh Nsi. O ghù tshen tshu là fa mbèn ngù nyuʼntse, mba oaʼ be num manze nejù bin yôg matmat. Ntshob Nsi mbe: “[nyuʼntse] . . . tshwèt njôg zin ndonni.”—1 Pétro 3:21.

TSWEʼ NTUN MI

Yen ju zʼa ghù a be ju ndùb nefà wul o Yaweh Nsi mbèn ngù nyuʼntse là.

3. Mba we lo ghù netshoʼ mèn a ghamdʼé là

Ntùm Israél ngelañ mbwe, tsemoʼ benntùn naʼ nke nkwade mbe bo kuʼni neghamde Yaweh Nsi mba ba fe nsi Baal. Là, Yaweh Nsi naʼ tshag ngatshob ntshob ndamnjù Elia a seʼ mbade yub mat nekwade. Siañ 1 Fenfen 18:21, mbèn mbùnde yen bètte li:

Zit mfiʼ ba Israél naʼ ngù neloʼ à?

Ndañndañ mba bon Israél là, a bètte mba we lo tshoʼ mèn zʼa ghamdʼé là. Siañ Lukas 16:13, mbèn mbùnde tshen mbètte li:

Numke be ke kuʼni neghamde Yaweh Nsi mbèn ngamde moʼ mènntùn ke moʼ ju ghuà à?
Be nke ndaʼde Yaweh Nsi mbe be tshoʼ neghamdʼà ndaʼ yi à ndùke?

4. Siañde nu mfà num nkôni Yaweh Nsi ghù mfà num o là

Yaweh Nsi fà mbeʼyàm mbwô mbwô ndaʼ ben. Ke ze bag bin kuʼni nefà yi à? Lôde LAʼDE NETSHAÑ.

LAʼDE NETSHAÑ: Offrons des cadeaux à Dieu (3:04)

Ba mat nzenze tse Yaweh Nsi tshùade bwe ndaʼde ze nkôni wù là bʼa tsile? Siañ Yobkwi 104:14, 15 bo 1 Yohané 4:9, 10, mbèn mbùnde tshen mbètte li:

O nyàmde Yaweh Nsi neshu mfà à num tsit ndaʼ tsʼa fà wù à?
Tshen ndaʼ là tshwèt ngù o yen Yaweh Nsi à ndùke?

Mènntùn fà taʼ ndaʼ wù zʼa bwô o neshu là, mbʼoaʼ kù ntù nelabtʼé num bwe. Siañ Nebwôgde 16:17, mbèn mbùnde yen bètte li:

Ngelañ o num nsiañde nu num njoñ tshu fa tse Yaweh Nsi ghù wù là, a tèndʼo nefà à ke yi à?

5. Nefà wut ben Yaweh Nsi num ndoʼ mbotni yàm nseʼ yi

Mbeʼyàm benntùn num nkwade mbe neghù mbwô lén ntùm njù, taʼ mbwô faʼ bo nkàb yàm bèn nke mfà tsiañde. A nenùn ké? Lôde LAʼDE NETSHAÑ, mbèn mbùnde tshen mbètte li.

LAʼDE NETSHAÑ: Le Football était toute ma vie (5:45)

Mba tà ndù Andrey naʼ kô sa tam nku neshu, numke a naʼ ntsin à?
A naʼ loʼ mfiʼ nefà wul i ke bʼa sa tam nku, là, Yaweh Nsi. O kwade mbʼa naʼ ndoʼ à mbwô mfiʼ ké? Numke?

Kà a be mènkristô, ngantum Paulo naʼ be ndù aʼ be mèn ndùb ntùm njù. A naʼ nke nziʼde ntshùʼ ba Yuda bo taʼ ngatswide ndùb. Ndaʼndù, a fañ yennà num nebe mènkristô. Paulo naʼ nke mfém num mfiʼ a naʼ ndoʼ là ké? Siañ Filipi 3:8, mbèn mbùnde tshen mbètte li:

Numke Paulo naʼ ntshob mbe tshu tsʼa ghù kà mbe mènkristô là bʼa ju neghuaʼ ke ndôtsit lo à?
A naʼ njù à tsit bin à?
Num yu tu, ke zʼa ghù o juʼ tsiañde à: neghamde Yaweh Nsi ké, ke netaʼ fuʼ yàm à?