ISHOMO RYA 46
Ahabw’enki oshemerire kweha Yehova kandi okabatizibwa?
Nitweha Yehova omu shara, turi kumuraganisa ku ni we owu turije kuramya wenka, kandi tukata ebi ari kwenda omu mwanya g’okubanza omu kubaho kwitu. (Zaaburi 40:8) Bwanyima nituba tushemerire kubatizibwa. Eco ku turi kukikora, nituba twayereka abandi ku twayehire Yehova. Ensharamu y’okweha Yehova, ni yo nsharamu y’omugasho munonga omu nsharamu ezi turi kubasa kukora zona. Ni enki ekiri kubasa kukukwasa kukora eyo nsharamu y’amani kandi eri kuhindura amagara gawe?
1. Ni enki ekiri kuhiga abamwe kweha Ruhanga?
Rukundo eyi turi kukunda Yehova ni yo eri kutuma twamweha. (1 Yohaana 4:10, 19) Bibuli netugambira ngu: ‘Okunde [Yehova] Ruhanga wawe n’omutima gwawe gona, n’amagara gawe gona, n’obwenge bwawe bwona, kandi n’amani gawe gona.’ (Mako 12:30) Nitwereka ku turi kukunda Ruhanga omu bigambo n’omu bikorwa. Nk’oku omushija n’omukazi abari kukundana bari kugitwa, ni ko rukundo eyi turi kukunda Yehova eri kutuma twamweha kandi tukabatizibwa.
2. Ni eha migisha eyi Yehova ari kuha Abahamya ba Yehova ababatizibwe?
Ku ori kubatizibwa, noba waba ow’omu ka ya Yehova. Noyija kukizaho kureba oku ari kukukunda kandi okizeho kuba munywani weye kukira oku kiri hati. (Shoma omuri Malaki 3:16-18.) Oyihireho eco, noyija kuba omu ka y’eby’omwika ya benetata na banyanyazi omu nsi yona, abari kukunda Yehova kandi abari kukukunda. (Shoma omuri Mako 10:29, 30.) Konka, hine ebintu ebi ori kuba oshemerire kukora kugira ngu ohike aha kubatizibwa. Oshemerire kwega ebiri kukwata ahari Yehova, okamukunda kandi okikiriza Omwana weye. Bwanyima, noba oshemerire kuha Yehova amagara gawe. Wamara kutera ezo ntambwe kandi okabatizibwa, noba watandika kutora omu muhanda gw’amagara agatahwaho. Ekigambo ca Ruhanga nikigira ngu: Nambwenu okubatizibwa nikukiza amagara.—1 Petero 3:21.
YEGA BYINGI
Shwijuma enshonga ahabw’enki kiri ec’omugasho kweha Yehova kandi okabatizibwa.
3. Twena tushemerire kusharamu owu turije kuhereza
Omuri Isirayeli ya kare abantu bamwe bakaba bari kutekateka ku bari kubasa kuramya Yehova na Bayali ruhanga w’ekishuba. Konka Yehova akohereza omuhanuzi weye Eliya kugira ngu abakwase kureka eyo mitekatecere mibi. Shoma omu 1 Bagabe 18:21, rero muganire ahari eki kibuzo:
-
Ni eha nsharamu eyi Abisirayeli babire bashemerire kukora?
Nk’Abisirayeli, n’itwe tushemerire kucwamu owu turije kuhereza. Shoma omuri Luka 16:13, rero muganire ahari ebi bibuzo:
-
Ahabw’enki tutari kubasa kuramya Yehova n’ondijo muntu ninga shi ekindi kintu?
-
Ni bata oku turi kubasa kwereka Yehova ku twashaziremu kumuhereza?
4. Tekateka ahari rukundo eyi Yehova ari kukukunda
Yehova akatuha ebiconco byingi by’omuhendo. Itwe ni enki eki turi kubasa kumuha? Zana VIDIYO.
Ni buha buryo bumwe obu Yehova yayerekiremu ku nakukunda munonga? Shoma omuri Zabuuri ya 104:14, 15 na 1 Yohaana 4:9, 10, rero muganire ahari ebi bibuzo:
-
Ni biha biconco ebi Yehova yakuhire ebiri kukushemeza munonga?
-
Ebyo biconco nibituma wareba ota Yehova?
Ku turi kuhebwa ekiconco eki turi kuba turi kwetenga nituba tushemerire kwereka ku nitusima owakituha. Shoma omu Ky’Ebiragiro 16:17, rero muganire ahari eki kibuzo:
-
Ku ori kutekateka aha bintu byona ebi Yehova yakukorire, nohurira oshemerire kumuha ki?
5. Kweha Yehova nikituma watunga emigisha myingi
Abantu bingi nibatekateka ku kuba ruranganwa, kugira omurimo murungi ninga shi esente nyingi biri kureta okushemererwa. Mbehi eco ni amazima? Zana VIDIYO, rero muganire ahari ebi bibuzo.
-
Omushija ori kugambwa omuri vidiyo n’obu yabire nakunda kuzana omupira munonga, ahabw’enki yagurekire?
-
Mbehi notekateka ngu ensharamu eyi yakozire ekaba ehikire? Ahabw’enki?
Entumwa Pawulo atakabire Omukristo, nabasa kuba yabire ayine omurimo murungi munonga. Akegesibwa ebiragiro by’Abayudaya n’omushija owabire ari ruranganwa. Konka, akeferereza ebyo byona kugira ngu abe Omukristo. Mbehi Pawulo akefuza ahabw’ebi yakozire? Shoma omu Bafilipi 3:8, rero muganire ahari ebi bibuzo:
-
Ahabw’enki Pawulo yagambire ku ebi yakozire atakabire Omukristo byabire biri nk’ebisingwe?
-
Ni eha migisha eyi yatungire?
-
Mbehi notekateka ngu amagara gawe nigija kuba marungi ku orasharemu kuhereza Yehova? Ahabw’enki?
Obu Pawulo yahindukire Omukristo akatunga emigisha myingi eri kukira ebintu byona ebi yayefererize
ABANTU ABAMWE NIBAGAMBA NGU: “Nimanya ku ebi ndi kwega biri amazima konka tinkahikize obwire bw’okubatizibwa.”
-
Ahabw’enki ori kutekateka ku kiri ec’omugasho kweha Yehova?
EMPINYE
Rukundo netuma twayeha Yehova kandi etuma twabatizibwa.
Wayega ki?
-
Ahabw’enki Yehova ari kutushaba kumuhereza n’omutima gwitu gona kandi tukamuramya?
-
Ni bata oku Yehova ari kuha emigisha abahereza beye ababatizibwe?
-
Mbehi nohurira ori kwenda kweha Yehova?
CONDOZA
Shwijuma enshonga ahabw’enki omweshongozi hamwe n’omwiruki bashaziremu kweha Yehova.
Ebibuzo by’eminyeto—Ni enki eki ndije kukoresa amagara gange?—Garura amisho enyuma (6:54)
Shwijuma ebindi bintu ebishemerire kutuma wayeha Yehova.
“Ahabw’enki oshemerire kweha Yehova?” (Omunara g’Omurinzi, 15 Okokubanza , 2010)
Omuri eyi vidiyo y’omuziki reba oku abari kweha Yehova bari kutunga okushemererwa.
Omu nkuru eri kugamba ngu “Nkamara emyaka myingi ndi kwebuza enshonga ahabw’enki ndiho,” yetegereze ecahigire omukazi omwe kutekateka aha bigendererwa byeye
“Bibuli nehindura amagara g’abantu” (Omunara g’Omurinzi, 1 Okwikuminakumwe, 2012)
