ZANNOO 46
Bonso Aŋ Seŋ Ka Ho De Ho Meŋɛ Ko Jehoova A De Suobu?
Ka ba naŋ yelka neɛ de la o meŋɛ ko Jehoova, wala ka lɛ wuli? A wuleeŋ ka o soba puore ko la Jehoova a yelkoo ka, ona yoŋ oŋ na puoro, a kyɛ de o boɔbo de weɛ o zemmo yɛlɛ zaa poɔŋ. (Yieme 40:8) Ka hooŋ yel lɛ ko Jehoova puoro poɔŋ, lɛ wuleeŋ ka ho de la ho meŋɛ ko Jehoova. Ka neɛŋ wa e lɛ, o na toɔ̃ de la suobu. Ho suobu deebo maŋ vɛmeŋ ka neɛzaa baŋ ka ho de la ho meŋɛ ko Jehoova. Ka neɛŋ de o meŋɛ ko Jehoova, o e la yɛlɛ naŋ e nimizeɛ yaga zaa, a gbɛre na oŋ de na na toɔ̃ leɛrɛɛ o zemmo yɛlɛ. Kyɛ, boŋ maŋ eŋ neɛ faŋa oŋ de a gbɛre ŋa?
1. Boŋ maŋ toɔ̃ eŋ neɛ faŋa oŋ de o meŋɛ ko Jehoova?
Nɔmmoŋ maŋ vɛŋ teŋ de te menne a ko Jehoova. (1 Gyɔɔn 4:10, 19) A Baabole yeleeŋ ka: “Nɔŋ [Jehoova] ho Naaŋmen ne ho sukyiri zaa, ane ho [nyɔvore] zaa, ane ho yɛŋ zaa, ane ho faŋa zaa.” (Marko 12:30) Te na baŋ de la te yelyaga a wuli ka te nɔnɔ la Naaŋmen, kyɛ lɛ yoŋ naane, te na baŋ lɛ de la te yel-erre meŋ wuli ka te nɔnɔ la Jehoova. Ka dɔɔ neŋ pɔgeŋ wa nɔŋ taa yaga zaa, ba maŋ kulee taa. Lɛ neŋ o zu la, ka teneeŋ taa nɔmmo naŋ e zuluŋ a ko Jehoova, te na de la te menne koo a kyɛ de suobu meŋ.
2. Bo maaloo ka Jehoova maŋ ko o puorebiiri zaa naŋ de suobu?
Ka hooŋ wa de suobu, ho maŋ wa poɔ la Jehoova booree deme naŋ taa popeɛloŋ na poɔ. Jehoova na tu la soe yaga poɔŋ a kyɛ wulo bo nɔmmo, lɛ na vɛmeŋ ka ho tage peɛloo yaga zaa a gaŋ saŋa zaa naŋ pare. (Kanne Maalakai 3:16-18.) Jehoova na wa e la ho Saa, kyɛ lɛ yoŋ naane, ho yɔɔdɔba ane ho yɔɔpɔgeba naŋ be a donɛɛ lombori zaa na wa e la ho siiloŋ poɔ booree deme. Ho yɔɔmine ŋa nɔŋ la Jehoova, ba nɔŋ la ho meŋ. (Kanne Marko 10:29, 30.) Bo yɛlɛ aŋ seŋ ka ho e a toɔ̃ wa de suobu? Aseŋ ka ho zanne a Baabole a wa baŋ Jehoova soŋ, lɛ na vɛmeŋ ka ho wa nɔmoo yaga zaa, a kyɛ lɛ taa sagediibu meŋ o Bidɔɔ na eŋɛŋ. A baaraa zaa, aseŋ ka ho de ho meŋɛ ko Jehoova. Ka hooŋ e a yɛlɛ ŋa zaa a toɔ̃ de suobu, ho na kyɛnɛɛ a nyɔvore naŋ ba taa baara sori na zuŋ. Naaŋmen Yelbiri na yelka: ‘Suobu deebo la na faa yɛ.’—1 Piita 3:21.
ZANNE YƐLƐ YAGA POƆ
Ho na zanne nyɛɛ bon naŋso aŋ e nimizeɛ yaga zaa ka ho de ho meŋɛ ko Jehoova a de suobu.
3. A be la te kaŋa zaa zieŋ ka te kaa iri neɛ na teŋ na puoro
A takoreŋ saŋa Izerayɛl paaloŋ na poɔŋ, noba mine da teɛre ka ba na toɔ̃ puoree Jehoova ane a zirii ŋmen na baŋ boɔlɔ Beaal na zaa lantaa. Kyɛ, Jehoova da toŋɛɛ daŋyele Elaagya ka o te yelko a noba ka, teɛroŋ na baŋ taa na ba tori. Kanne 1 Namine 18:21, a kyɛ gyieli a soorebiri naŋ tu na yɛlɛ:
-
Bo gbɛre aŋ da seŋ ka a Izerayɛl biiri zaa de?
Aŋa lɛ na aŋ da fɛre ka a Izerayɛl biiri kaa iri neɛ na baŋ na puoro na, lɛ meŋ la aŋ fɛre ka te meŋ kaa iri neɛ na teŋ na puoro. Kanne Luka 16:13, a kyɛ gyieli a soorebie naŋ tu na yɛlɛ:
-
Bonso teŋ koŋ baŋ puoro Jehoova ane neɛ kaŋa, bee bonkaŋa zaa lantaa?
-
Wala teŋ na toɔ̃ e a wuli ka te boɔrɔŋ ka te puoro Jehoova yoŋ?
4. Teɛre lɛ na Jehoova naŋ nɔŋ bo na yɛlɛ gaa tɔɔre
Jehoova ko teŋ kyɔɔtaare naŋ e nanee yaga. Boŋ teŋ meŋ taa a na toɔ̃ de koo? Ŋmɛ a VIDIO.
Bo yɛlɛ mine la ka Jehoova e a wuli ka o nɔnɔ boŋ? Kanne Yieme 104:14, 15 ane 1 Gyɔɔn 4:9, 10, a kyɛ gyieli a soorebie ŋa yɛlɛ:
-
Jehoova ko teŋ kyɔɔtaare yaga, a bobo la pɛlɛ ho poɔ yaga zaa?
-
Bo teɛroŋ ka a kyɔɔtaare ŋa vɛŋ hoŋ taa kyaare Jehoova?
Ka neɛ kaŋaŋ wa ko te kyɔɔtaa kaŋa te naŋ boɔrɔ yaga zaa, te maŋ mɔɔ la te mɔɔbo zaa a wuli o soba ka te niŋe paalɛɛ yɛlɛ na oŋ e ko te na. Kanne Duturoonomi 16:17, a kyɛ gyieli a soorebiri naŋ tu na yɛlɛ:
-
Ka hooŋ wa zeŋ a teɛre yɛlɛ na zaa Jehoova naŋ e ko bo na, bo aŋ maŋ vɛŋ hoŋ boɔrɔ ka ho e a ko Jehoova?
5. Ka hooŋ de ho meŋɛ ko Jehoova, o na ko boŋ maaloo yaga zaa
Noba yaga maŋ teɛreŋ ka, ka ba yuoriŋ do, bee ka ba naŋ taa toma naŋ soma a tonɔ, bee ka ba naŋ taa libie yaga, ba na taa la popeɛloŋ. A yɛlɛ ŋa e la yelmeŋɛ? Ŋmɛ a VIDIO, a kyɛ gyieli a soorebie naŋ tu na yɛlɛ.
-
Aneazaa ka a dɔɔ da nɔŋ la bɔɔl ŋmeɛbo yaga zaa, kyɛ boŋ vɛŋ oŋ da bare a bɔɔl ŋmeɛbo?
-
O da barɛɛ a bɔɔl ŋmeɛbo a kyɛ de o meŋɛ a ko Jehoova. Ho teɛre ka gbɛre na oŋ da de na somaŋ bee? Bonso hoŋ yel lɛ?
Sɛre ka bitontona Pɔɔl na wa leɛ Kristabie na, o da tonɛɛ toma naŋ taa yuori yaga. O da zannɛɛ a Gyuu noba bege na a yi dɔɔ kaŋa yuori naŋ da do yaga zaa zie. Kyɛ, o da barɛɛ a lɔɔya toma ŋa a kyɛ e Kristabie. Pɔɔl da eɛ kaŋdabaŋkalɛ a kyaare gbɛre na oŋ da de na bee? Kanne Filipae 3:8, a kyɛ gyieli a soorebie naŋ tu na yɛlɛ:
-
Bonso ka Pɔɔl da yelka yɛlɛ na zaa oŋ da erɛ sɛre kyɛ wa leɛ Kristabie na da “ba taa tɔnɔ”?
-
Bo maaloo ka Pɔɔl da leɛ nyɛ?
-
Ka hooŋ de ho nyɔvore zaa a puoro Jehoova ane hoŋ na erɛ yel yobo mine ho zemmo poɔŋ, buo sobaŋ soma yaga zaa?
Saŋa na Pɔɔl naŋ wa leɛ Kristabie na, o da nyɛɛ maaloo yaga zaa a gaŋ bon na zaa oŋ da de iri sareka na
NOBA MINE MAŊ YELEŊ KA: “N baŋɛɛŋ ka a yelmeŋɛ puoruu la ŋa, kyɛ N ba e siri ka N de suobu sɛre.”
-
Bonso hoŋ teɛre ka a somaŋ yaga zaa ka ho de ho meŋɛ ko Jehoova a de suobu?
A ZANNOO YELNIMIZEERE
Nɔmmoŋ maŋ vɛŋ teŋ de te menne ko Jehoova a de suobu.
Bo Hoŋ Zanne
-
Bonso aŋ seŋ ka ho nɔŋ Jehoova neŋ ho sukyiri zaa, a kyɛ de ho sukyiri zaa puoroo meŋ?
-
Bo maaloo ka Jehoova maŋ ko o puorebiiri naŋ de suobu?
-
Ho boɔrɔŋ ka ho de ho meŋɛ ko Jehoova bee?
YƐLƐ MINE NAŊ LƐ BEBE
Kaa a vidio ŋa a nyɛ bon naŋso ka yieli yiele kaŋa ane dɔɔ kaŋa naŋ da erɛ kɔbɔ-dɛnnoo yɛlɛ naŋ de gbɛre a de ba menne ko Jehoova.
Baapaalba Maŋ Sooreŋ Ka—Bo Yɛlɛ Aŋ Seŋ Ka N De N Nyɔvore A E Neŋ?—Gbɛɛ Ba Mine Naŋ Da De (6:54)
Bo yɛlɛ mine zuŋ aŋ seŋ ka neɛ de o meŋɛ a ko Jehoova? Kanne a yɛlɛ ŋa a nyɛ a noɔre iribo.
“Bonso Aŋ Seŋ Ka Ho De Ho Meŋɛ A Ko Jehoova?” (A Watchtower, January 15, 2010)
A yi a yieloŋ vidio ŋa poɔŋ, ho na nyɛɛ lɛ na noba naŋ de ba menne a ko Jehoova naŋ maŋ taa popeɛloŋ a seŋ.
Kanne a yelzu naŋ la “Gbɛɛ Yaga N Da Maŋ Soorɛɛ N Meŋɛ Ka, ‘Bonso Teŋ Be Kyɛ?’” a nyɛ bon naŋ da soŋ pɔge kaŋa oŋ peɛre baŋ yɛlɛ naŋ seŋ ka a e nimizeɛ koo yaga zaa o zemmo poɔŋ.
“A Baabole Soŋ Baŋ Baŋ Leɛre Ba Zemmo Yɛlɛ” (A Watchtower, November 1, 2012)
