SHIRONGWA 46

Morwanke u kutapera nakuwana liyoghero?

PLAY

Ove kukutapa kwaJehova pakumutwenyidira mundaperero ashi ngau mu karera mpantjendi ntani nakutura mpango dendi muhovo muliparu lyoye. (Pisalme 40:8) Muruku yovyo, ntani ngoli u wana liyoghero. Pakuwana liyoghero, vyavyo kunegheda kuvantu ashi wa kutapa kwaJehova. Litokoro lyakukutapa naumwetu kwaJehova ndyo lyamulyo po unene muliparu lyetu. Vinke vi kutumangedo u ture po litokoro lino lya rundururango liparu lyamuntu?

1. Vinke vi tumangedango umwe a kutape kwaJehova?

Shihoro ntjo sha tu tumangedango tu kutape kwaJehova. (1 Johannes 4:10, 19) Bibeli ku tu korangeda ashi: “Hora Jehova Karunga woye namushima woye nauntje namonyo woye nauntje nandunge doye nadintje ntani nankondo doye nadintje.” (Markus 12:30) Atwe kunegheda ashi twa hora Karunga kapishi pakuvighamba tupu ngoli muvirughana vyetu. Yira momo vantu vaviri vakuhoro ngudu va tokoranga kukukwara, shihoro shetu kwaJehova nasho kututumangeda tu kutape kwendi nakuwana liyoghero.

2. Matungiko munke Jehova a tapanga kuvaMbangi vendi va wano liyoghero?

Pakuwana liyoghero, ove ngau ya kara umwe wamulipata lyaJehova lyaruhafo. Ove ngau kumonena shihoro shendi munkedi dakukushuva-shuva ntani ngau mu shweghenena pepi kupitakana paweno. (Varura Malakia 3:16-18.) Jehova nga kara Vasho ntani ngau ya kara nalikoro lyapampepo lyavanavanyokwetu udjuni nauntje lyavantu vamuhoro ntani ovo va ku horo. (Varura Markus 10:29, 30.) Ngoli, mpovili una hepa tanko kurughana kumeho yakuwana liyoghero. Una hepa tanko kukushonga kuhamena Jehova, kumuhora ntani kutura lipuro mwaMonendi. Una hepa nka kukutapa kwaJehova. Ntjene a u tikita mo ovyo ntani ngoli u wana liyoghero makura ngau kara mundjira yakuhafera liparu naruntje. Nkango daKarunga kwa ghamba ashi: “Liyoghero olyo lina kumuparuro.”—1 Petrus 3:21.

TEDA KO

Kona-kona ovyo vi karera mulyo koye u kutape kwaJehova nakuwana liyoghero.

3. Natuvantje tuna hepa kutovorora ogho tu karera

Mushirugho shavaIsrael vakare, vamwe kwa ghayalire ashi kuvhura va karere Jehova ntani nakarunga wavipempa Bara. Ngoli Jehova a tumine muporofete wendi Eliya a va pukurure. Varura 1 Vahompa 18:21, makura timwitirenu lipuro lino:

Litokoro munke va hepire kutura po Vaisrael?

Yira Vaisrael, natweshi tuna hepa kutovorora ogho tu karera. Varura Lukas 16:13, makura timwitirenu mapuro ghano:

Nke tu pilira kukarera Jehova nakukarera nka muntu ndi shininke shapeke?
Weni tu negheda Jehova ashi ndje tuna tovorora tu karere?

4. Ghayadara ko omo a kuhora Jehova

Jehova kwa tupa maushwi ghamawa ghamangi. Atwe ne nke ngoli tu mu pa? Kengera VIDIYO.

VIDIYO: Kutapa ndjambo yoye kwa Karunga (3:04)

Nkedi munke dimwe Jehova a kunegheda shihoro? Varura Pisalme 104:14, 15 ntani 1 Johannes 4:9, 10, makura timwitirenu mapuro ghano:

Maushwi munke ghakutunda kwa Jehova wa hafera po ngudu?
Weni maushwi ogho ghakurenkitanga u kuyuvhe kumuhamena?

Opo twa wananga uswhi twa hora, atwe kehe pano kushana kutapa mpandu kogho a ghu tu po. Varura Deuteronomi 16:17, makura timwitirenu lipuro lino:

Pa kukona-kona navintje a kurughanena Jehova, nke vina kukutumangeda u mu rughanene?

5. Kukutapa kwaJehova kuyita matungiko ghamangi

Shingi shavantu kwa pura ashi kufumana, virughana vyaviwa ndi kukara namaliva ghamangi nga vi va yitira ruhafo. Ovyo ushiri ndi? Kengera VIDIYO, makura timwitirenu mapuro ghano.

VIDIYO: Udano wambara kwa kalire liparu lyande (5:45)

Mpiri momo mudani a holire ngudu kudana mbara, nke vyamurenkitiro a shuve udano unya?
A tokwire kukutapa mwene kwaJehova ngoli kapishi kuudano wambara. Weni una kughayara, a tokolire nawa ndi? Morwanke?

Kumeho mupostoli Paulus aya kalire Mukriste, uye a kondjelire shirughana shakufumana. Uye kwa mushongire mushongi wakufumana vyaveta yaVayuda. Ngoli a vi shuvire mposhi a kare Mukriste. Paulus a kuvelire ndi? Varura Filipi 3:8, makura timwitirenu mapuro ghano:

Morwanke Paulus a kengire ovyo karughananga kumeho a kare Mukriste ashi “vihando” ndi ndova?
Vinke a wanine mulivango lyovyo?
Weni liparu lyakurughanena Jehova pakulishetakanita naliparu lyakurughana vyapeke?