KALANSEN 46
Mun na an ka ɲi k’an yɛrɛkun di Ala ma ani ka batize?
K’i yɛrɛkun di Jehova ma, o kɔrɔ ko k’i daa di a ma delili la ko i bena ale dɔrɔn lo bato ani ko i bena a sago kɛ i ɲɛnako fɔlɔ ye (Zaburuw 40:9). O kɔ le, i be batize k’a yira jama na ko i ye i yɛrɛkun di Ala ma. K’a latigɛ k’i yɛrɛkun di Ala ma, desizɔn si kɔrɔtanin tɛ ka se o ma. Mun lo be se k’i lasun k’o desizɔn ta?
1. Mun lo be mɔgɔ lasun k’a yɛrɛkun di Ala ma?
Kanuya lo be mɔgɔ lasun k’a yɛrɛkun di Jehova ma (1 Zan 4:10, 19). Bibulu b’an jija ko: “I ka Matigi i ka Ala kanu n’i dusu bɛɛ ye, an’i kɔnɔ bɛɛ ye, n’i hakili bɛɛ ye, an’i barika bɛɛ ye.” (Mariki 12:30). An b’a yira an ka kumaw fɛ ko an be Ala kanu. Nka o dɔrɔn tɛ. An ka kɛwalew fana ka ɲi k’a yira ko an b’a kanu. I ko kanuya sɔbɛ be cɛɛ ni muso lasun cogo min na ka ɲɔgɔn furu, o cogo kelen na, an be ni kanuya min ye Jehova koo la, o lo b’an lasun k’an yɛrɛkun di a ma ani ka batize.
2. Jehova Seere minw batizera, Jehova be duga jumanw lase u ma?
N’i batizera, i bena kɛ Jehova ka denbaya hɛɛrɛman mɔgɔ dɔ ye. O la, i ben’a ye a b’a ka kanuya yira i la cogo caaman minw na. Ani, i bena se k’i magwɛrɛ a la kosɔbɛ (Malasi 3:16-18 kalan). Jehova bena kɛ i Faa ye. Ka fara o kan, i bena balimacɛw ni balimamusow sɔrɔ duniɲa kuru bɛɛ kɔnɔ. O balimaw be Jehova kanu ani u b’i kanu fana (Mariki 10:29, 30 kalan). Tiɲɛn lo ko i ka ɲi ka sarati dɔw dafa ka sɔrɔ ka batize: i ka ɲi ka lɔnniya sɔrɔ Jehova koo la, k’a kanu, ani ka limaniya a Dencɛ la. O kɔ, i ka ɲi k’i yɛrɛkun di Jehova ma. N’i y’o koow bɛɛ kɛ ani ka batize, o ben’a to i be kɛ ɲɛnamaya banbali sira kan. Ala ka Kuma b’a fɔ ko: “Batizeli . . . b’aw kisi bii.”—1 Piyɛri 3:21.
A ƝINI KA DƆ LƆN TUGUN
An k’a filɛ fɛɛn min kama a kɔrɔtanin lo i k’i yɛrɛkun di Jehova ma ani ka batize.
3. An kelen kelen bɛɛ ka ɲi k’a latigɛ an bena jɔn lo bato
Galen, Israɛlden dɔw tun b’a miiri k’u be se ka Jehova bato ani ka ngalon ala Baali bato fana. Nka, Jehova y’a ka kira Eli ci walisa k’u ka miiriya yɛlɛma. 1 Masacɛw 18:21 kalan. O kɔ, a’ ye ɲiningali nin kɛ ani ka baro kɛ o kan:
-
Israɛldenw tun ka kan ka desizɔn juman lo ta?
I ko Israɛldenw, an fana ka kan k’a latigɛ an bena jɔn lo bato. Luka 16:13 kalan. O kɔ, a’ ye ɲiningali nunu kɛ ani ka baro kɛ u kan:
-
Mun na an tɛ se ka mɔgɔ wɛrɛ wala fɛɛn wɛrɛ bato ka fara Jehova kan?
-
An b’a yira Jehova la cogo di ko an y’a latigɛ k’ale lo bato?
4. Jehova y’a yira cogo minw na ko a b’i kanu, miiri o la
Jehova ye fɛɛn nafaman caaman di an ma. An fana be se ka mun lo di ale ma? A’ ye VIDEWO filɛ.
Jehova y’a yira cogo jumanw na ko a b’i kanu? Zaburuw 104:14, 15 ani 1 Zan 4:9, 10 kalan. O kɔ, a’ ye ɲiningali nunu kɛ ani ka baro kɛ u kan:
-
Jehova ka nilifɛnw na, jumanw lo ka di i ye kosɔbɛ?
-
O nilifɛnw b’i lasun ka mun lo miiri Jehova koo la?
Ni mɔgɔ dɔ ye kado dɔ di an ma min diyara an ye kosɔbɛ, an b’a fɛ k’a yira a tigi la ko an b’a waleɲuman lɔn kosɔbɛ. Deteronɔmu 16:17 kalan. O kɔ, a’ ye ɲiningali nin kɛ ani ka baro kɛ o kan:
-
Jehova ye min bɛɛ kɛ i ye, n’i miirila o la, i b’a fɛ ka mun lo di a ma?
5. K’i yɛrɛkun di Jehova ma, nafa caaman b’o la
Mɔgɔ caaman b’a miiri ko tɔgɔba, baloɲini baara ɲuman, wala wari lo b’a to mɔgɔ be hɛɛrɛ sɔrɔ. O ye tiɲɛn ye wa? A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
-
Hali ni balɔntan tun ka di Andreï ye, mun na a y’o baara dabila?
-
A y’a latigɛ k’a seko bɛɛ kɛ Jehova sago kɛli lo la. E ka miiri la, o ye desizɔn ɲuman ye wa? Mun na i ko ten?
Sanni ciden Pol ka kɛ kerecɛn ye, a tun ye Yahutuw ka sariya kalan u ka karamɔgɔba dɔ fɛ. A tun be ni baloɲini baara ɲuman ye. Nka, a y’o bɛɛ to yen walisa ka kɛ kerecɛn ye. A nimisara kɔfɛ wa? Filipikaw 3:8 kalan. O kɔ, a’ ye ɲiningali nunu kɛ ani ka baro kɛ u kan:
-
Pol ye min bɛɛ kɛ sanni a ka kɛ kerecɛn ye, mun na a y’a fɔ ko a b’o “bɛɛ filɛ i n’a fɔ ɲamaɲama”?
-
A ye mun lo sɔrɔ o nɔɔ na?
-
E ka miiri la, mun lo bena i dɛmɛ ka hɛɛrɛ sɔbɛ sɔrɔ: ka baara kɛ Jehova ye wala k’i ka ɲɛnamaya kɛ cogoya wɛrɛ la?
Pol kɛnin kɔ kerecɛn ye, a ye nafa min sɔrɔ, o ka ca ni a bɔnɛna min na
NI MƆGƆ DƆ Y’A FƆ I YE KO: “Diinanko man kan ka mɔgɔ kuun bɛɛ ta. Kan’a to i ka Alako k’a dama tɛmɛ.”
-
E ka miiri la, mun na a bɛnnin lo i k’i yɛrɛkun di Jehova ma?
MIIRIYA JƆNJƆN
Kanuya lo b’an lasun k’an yɛrɛkun di Jehova ma ani ka batize.
I ye mun lo faamu?
-
An ka ɲi ka Jehova kanu ani ka baara kɛ a ye n’an dusu bɛɛ ye. Mun na a ka kan n’o ye?
-
Jehova Seere minw batizera, Jehova b’u sara cogo di?
-
A bena diya i ye k’i yɛrɛkun di Jehova ma wa?
NUNU LAJƐ FANA
A filɛ fɛɛn min kama dɔnkililabaga dɔ ani farikoloɲanagwɛla dɔ y’a latigɛ k’u yɛrɛkun di Jehova ma.
Les jeunes s’interrogent . . . Que vais-je faire de ma vie ? - Souvenirs (6:54)
Fɛɛn wɛrɛ minw kama mɔgɔ ka ɲi k’a yɛrɛkun di Jehova ma.
“Pourquoi se vouer à Jéhovah ?” (Saan 2010, zanwiyekalo tile 15 ka Kɔrɔsili Sangaso)
Minw b’u yɛrɛkun di Jehova ma, a filɛ u ninsɔndiyanin lo cogo min na.
Muso dɔ tun be fɛɛn min jati a ɲɛnako fɔlɔ ye, a filɛ fɛɛn min y’a lasun ka yɛlɛmani don o la. A ka koo lajɛ barokun nin na: “Pendant des années, je me suis demandé pourquoi on existe.”
“La Bible transforme des vies” (Saan 2012, novanburukalo tile fɔlɔ ka Kɔrɔsili Sangaso)
