ADZESUA 46
Ebɛnadze Ntsi Na Ɔsɛ Dɛ Ihyira Woho Do Na Wonuma Wo?
Ansaana wobonuma wo no, ɔsɛ dɛ ihyira woho do ma Jehovah. Ɔno kyerɛ dɛn? Dza ɔkyerɛ nye dɛ, ɔsɛ dɛ ebɔ mpaa na eka kyerɛ Jehovah dɛ, edze wo nkwa nda nyina bɔsom ɔno nkotsee na edze n’apɛdze bedzi kan wɔ w’asetsena mu. (Ndwom 40:8) Sɛ eyɛ dɛm wie a, wobotum enuma wo. Sɛ wonuma wo a, ɔbɛma afofor ehu dɛ ehyira woho do ama Jehovah. Gyinae a no ho hia paa a obi botum esi wɔ n’asetsena mu nye dɛ obehyira noho do ama Jehovah. Iyi yɛ gyinae a no ho hia paa na ɔbɛsesa w’abrabɔ. Ntsi, ebɛnadze koraa na ɔbɛma obi esi dɛm gyinae yi?
1. Ebɛnadze na ɔma obi si gyinae dɛ obehyira noho do ama Jehovah?
Yehyira hɛnho do ma Jehovah osiandɛ yɛdɔ no. (1 John 4:10, 19) Bible no tu hɛn fo dɛ: “Dɔ [Jehovah] wo Nyankopɔn wɔ w’akoma nyina mu, nye wo kra nyina mu, nye w’adwen nyina mu, nye w’ahoɔdzen nyina mu.” (Mark 12:30) Yerunntum mmfa hɛn ano nkotsee nnka dɛ yɛdɔ Nyankopɔn. Mbom ɔwɔ dɛ yɛdze hɛn abrabɔ so kyerɛ dɛ yɛdɔ no. Dɛ mbrɛ sɛ ɔbarimba na ɔbaa bi dɔ hɔnho a, wɔwar no, dɛmara na hɛn so sɛ yɛdɔ Jehovah a, yebehyira hɛnho do ama no na yeenuma.
2. Ebɛn nhyira na Jehovah dze ma hɔn a wonuma na wɔbɛyɛ n’Adasefo no?
Sɛ wonuma wo a, ebɛba abɛka Jehovah n’ebusua a enyigye wɔ mu no ho. Ibohu dɛ Jehovah dɔ wo paa, na anyɛnkofa a ɔda ɔwo na Jehovah ntamu no so bɛyɛ dzen akyɛn mbrɛ ɔtse seseiara no. (Kenkan Malachi 3:16-18.) Jehovah bɛba abɛyɛ w’Egya na afei so ebɛba ebohu dɛ ewɔ enuanom mbarimba na mbaa wɔ wiadze nyina a wɔdɔ Jehovah na wɔdɔ ɔwo so. (Kenkan Mark 10:29, 30.) Naaso ansaana wobonuma wo no, ɔwɔ dɛ eyɛ ndzɛmba ahorow bi. Ɔsɛ dɛ isua Jehovah ho adze, edɔ no, na inya ne Ba no mu gyedzi. Afei no korakora no, ɔwɔ dɛ ihyira woho do ma Jehovah. Sɛ eyɛ dɛm ndzɛmba yi nyina na wonuma wo a, ibotum atsena ase daa. Nyankopɔn n’Asɛm se: ‘Enuma na sesei ɔgye hom nkwa.’—1 Peter 3:21.
PƐNSAPƐNSA MU KƆ EKYIR
Ma yɛnhwɛ siantsir a no ho hia dɛ ihyira woho do ma Jehovah na wonuma wo.
3. Ɔsɛ dɛ hɛn nyina kyerɛ nyia yɛbɔsom no
Israelfo a wɔtsenaa ase tsetse no, nna hɔn mu binom dwen dɛ wobotum asom Jehovah, na ber kor no ara wɔasan so asom bosom bi a wɔfrɛ no Baal. Naaso Jehovah somaa no nkɔnhyɛnyi Elijah dɛ ɔmma Israelfo no ntse hɔnho ase dɛ sɛ wɔyɛ dɛm a, ɔrennyɛ yie. Ma yɛnkenkan 1 Ahemfo 18:21, na yensusu asɛmbisa yi ho:
-
Nna ebɛn gyinae na ɔsɛ dɛ Israelfo no si?
Nna ɔsɛ dɛ Israelfo no si gyinae dɛ wɔbɔsom Jehovah anaadɛ wɔbɔsom abosom, na dɛmara na ɔsɛ dɛ hɛn so yɛkyerɛ nyia yɛbɔsom no. Ma yɛnkenkan Luke 16:13, na yensusu nsɛmbisa yi ho:
-
Yerunntum nnsom Jehovah na ber kor no ara so yɛnnsom obi anaa adze fofor bi. Ebɛnadze ntsi a?
-
Yebesi dɛn ama Jehovah ehu dɛ ɔno na yɛpɛ dɛ yɛsom no?
4. Dwendwen ɔdɔ a Jehovah ada no edzi akyerɛ wo no ho
Jehovah ama hɛn akyɛdze a ɔsom bo pii. Ntsi, ebɛnadze na hɛn so yebotum ayɛ ama no? Ma yɛnhwɛ VIDEO yi.
Ebɛn ndzɛmba na Jehovah ayɛ ama wo dze akyerɛ dɛ ɔdɔ wo? Ma yɛnkenkan Ndwom 104:14, 15 na 1 John 4:9, 10, na yensusu nsɛmbisa yi ho:
-
Ndzɛmba a Jehovah dze akyɛ wo no, no mu hendze na w’enyi sɔ paa?
-
Dɛm ndzɛmba a Jehovah dze akyɛ wo no ma etse nka dɛn wɔ no ho?
Sɛ obi kyɛ hɛn adze bi a hɛn enyi gye ho paa a, yɛpɛ dɛ yɛyɛ biribi dze da no ase. Ma yɛnkenkan Deuteronomy 16:17, na yensusu asɛmbisa yi ho:
-
Sɛ ehwɛ ndzɛmba a Jehovah ayɛ ama wo no a, ebɛnadze na epɛ dɛ eyɛ dze da no ase?
5. Sɛ ihyira woho do ma Jehovah a, ibenya nhyira pii
Nkorɔfo pii gye dzi dɛ sɛ wɔgye dzin, wonya edwuma papa bi yɛ, anaa wonya sika a, ɔbɛma hɔn enyi agye. Aso dɛm asɛm yi yɛ nokwar? Ma yɛnhwɛ VIDEO yi, na yensusu nsɛmbisa a odzidzi do no ho.
-
Nna bɔɔlbɔ da ɔbarimba a ɔwɔ video no mu no n’akoma do paa, naaso ebɛnadze ntsi na ogyaae?
-
Osii gyinae dɛ ɔdze n’ahoɔdzen nyina bɛma Jehovah na mbom ɔremmfa mmbɔ bɔɔl. Ehwɛ a osii gyinae pa? Ebɛnadze ntsi na ereka dɛm?
Ansaana ɔsomafo Paul rebɛyɛ Christiannyi no, nna nkorɔfo pii bu edwuma a ɔyɛ no paa. Osuaa Jewfo mbra no, na ɔkyerɛkyerɛfo bi a nna ɔagye dzin paa na ɔkyerɛɛ no adze. Naaso ogyaa iyinom nyina too beebi, na ɔbɛyɛɛ Christiannyi. Aso Paul nuu noho dɛ ɔyɛɛ dɛm? Ma yɛnkenkan Philippifo 3:8, na yensusu nsɛmbisa yi ho:
-
Ebɛnadze ntsi na Paul kaa dɛ ndzɛmba a ogyaa mu too beebi na ɔbɛyɛɛ Christiannyi no nyina yɛ “efikyir” anaa bɔɔla?
-
Ɔdze dɛm ndzɛmba no nyina bɔɔ afɔr no, ebɛnadze na onyae?
-
Sɛ edze Jehovah a ibesi gyinae asom no no toto gyinae fofor biara ho a, ehwɛ a no mu hendze na ɔbɛma w’abrabɔ ayɛ papa?
Paul dze ndzɛmba pii bɔɔ afɔr ansaana ɔrebɛyɛ Christiannyi, naaso nhyira a onyae no dɔɔ so koraa sen ndzɛmba a ɔdze bɔɔ afɔr no
BINOM KA DƐ: “Minyim dɛ nokwar no ara nye yi, naaso mennyɛɛ m’adwen dɛ mubonuma.”
-
Ehwɛ a, ɔyɛ papa dɛ ibehyira woho do ama Jehovah? Ebɛnadze ntsi na ereka dɛm?
DZA ESUA
Yɛdɔ Jehovah, ntsi na yehyira hɛnho do ma no na yenuma no.
Mbobɔdo
-
Ebɛnadze ntsi na ɔsɛ dɛ yɛdze hɛn akoma nyina dɔ Jehovah na yɛsom no?
-
Hɔn a woenuma abɛyɛ Jehovah Adasefo no, ebɛn nhyira na Jehovah dze ma hɔn?
-
Aso epɛ dɛ ihyira woho do ma Jehovah?
HWEHWƐ PII KA HO
Hwɛ adze a ɔmaa ɔdwontofo bi na obi a nna ɔbɔ bɔɔl no sii gyinae dɛ wobehyira hɔnho do ama Jehovah.
Nsɛm A Mbabun Bisa—Ebɛnadze Na Medze M’abrabɔ Bɛyɛ?—Dza Yɛayɛ (6:54)
Hwɛ siantsir afofor ntsi a ɔwɔ dɛ ihyira woho do.
“Ebɛnadze Ntsi Na Ɔsɛ Dɛ Ihyira Wo Nkwa Do Ma Jehovah?” (Ɔweɔn-Aban, January 15, 2010)
Ndwom ho video yi mu no, ibohu mbrɛ hɔn a wohyira hɔnho do ma Jehovah no enyi gye.
Kenkan asɛm a wɔato dzin “Mibisaa Moho Mfe Pii Dɛ, ‘Ebɛnadze Koraa Ntsi Na Yɛwɔ Wiadze?’” no, na ibohu dza ɔboaa maame bi ma osii gyinae dɛ ɔdze Jehovah no som bedzi kan wɔ n’asetsena mu.
“Bible No Sesa Nyimpa N’abrabɔ” (Ɔweɔn-Aban, November 1, 2012)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
