LÈSON 46
Poukwa fò-nou ba Jéova vi an nou é pran lèbatèm ?
Lè ou ka ba Jéova vi a-w, ou ka di-y adan on priyè kè sé yenki li ou ké adoré é kè ou ké fè volonté a-y pasé prèmyé douvan adan vi a-w (Sòm 40:8). Aprésa, ou ka pran batèm pou montré toutmoun kè ou ba Jéova vi a-w. Lè on moun désidé ba Jéova vi a-y, pa ni pon désizyon ki pi enpòwtan ki sila. Ka ki té’é pé ba-w fòs pou pran désizyon-lasa ?
1. Ki biten ki ka pousé on moun ba Jéova vi a-y ?
Sé lanmou ki ka pousé on moun ba Jéova vi a-y (1 Jan 4:10, 19). Mi sa Bib-la ka di : « Fò ou enmé Jéova Bondyé a-w èvè tout tchè a-w, èvè tout nanm a-w, èvè tout entélijans a-w é èvè tout fòs a-w » (Mawk 12:30). Nou ka montré kè nou enmé Bondyé grasa sa nou ka di, men osi grasa sa nou ka fè. Lè on misyé é on madanm enmé-yo fò, yonn ka mayé èvè lòt. Menmjan-la, si nou enmé Jéova, sa ké pousé-nou ba-y vi an nou é pran lèbatèm.
2. Ki bénédisyon Jéova ka vidé asi Témwen a-y ki batizé ?
Lè ou ké batizé, ou ké rantré adan fanmi a Jéova ; on fanmi ki ni tchè-kontan toubònman ! Jéova ké montré-w kè i enmé-w plizyè mannyè diféran é ou ké vin pibon zanmi èvè-y ankò (li Malaki 3:16-18). Jéova sé ké Pap’a-w é ou ké ni frè é sè toupatou si latè ; frè é sè ki enmé Jéova fò é ki enmé-w fò osi (li Mawk 10:29, 30). Kon nou ja ni lokazyon vwè, on moun ni plizyè biten a fè avan i pran lèbatèm. Adan on prèmyé tan, fò ou aprann konnèt Jéova, fò ou enmé-y é fò ou ni fwa an Gason a-y. Aprésa, fò ou ba Jéova vi a-w. Lè ou ké fè tousa, ou ké pé pran lèbatèm é ou ké asi chimen-la ki ké pèwmèt-vou viv èvè tchè-kontan pou touttan. Pawòl a Bondyé ka di : « Batèm-la [...] ka sové-zòt » (1 Pyè 3:21).
AN-NOU FOUYÉ PI FON
An-nou vwè poukwa sa enpòwtan kè ou ba Jéova vi a-w é kè ou pran lèbatèm.
3. Fò-noutout chwazi kimoun nou ké sèvi
An tan a Izrayèl, sèwten moun an pèp-la té ka konpranndèdi kè toupannan yo té ka adoré Jéova, yo té pé adoré on fo-dyé yo té ka kriyé Baal. Men Jéova voyé pwofèt a-y, Éli, pou fè-yo konprann kè sa yo té ka fè la pa té bon. Li 1 Wa 18:21 é fè on ti kozé asi kèsyon-lasa :
-
Ki chwa sé Izraélit-la té ni a fè ?
Menmjan ki sé Izraélit-la, nou osi, fò-nou chwazi kimoun nou ké adoré. Li Lik 16:13 é fè on ti kozé asi sé kèsyon-lasa :
-
Poukwa nou pé pa ka adoré Jéova toupannan nou ka adoré ondòt moun oben ondòt biten ?
-
Kijan nou ka montré Jéova kè sé-y nou vlé adoré ?
4. Jéova enmé-w. Pran tan réfléchi asi sa
Jéova ban-nou onlo bèl kado toubònman ! Ka nou pé ba-y anrètou ? Gadé VIDÉO-la.
Kijan Jéova fè-w vwè kè i enmé-w ? Li Sòm 104:14, 15 é 1 Jan 4:9, 10, é fè on ti kozé asi sé kèsyon-lasa :
-
Pawmi tout sé kado-la Jéova fè-w la, palé dè séla ou pi enmé la.
-
Lè ou ka sonjé sé bèl kado-lasa, ka ou ka rèsanti pou Jéova ?
Lè on moun fè-nou on kado kè nou ka aprésyé onlo, nou vlé montré-y kè sa i ban-nou la ka fè-nou plézi toubònman ! Li Détéwonòm 16:17 é fè on ti kozé asi kèsyon-lasa :
-
Lè ou ka sonjé tousa Jéova ja fè ba-w, ki kado ou anvi fè-y ?
5. Lè ou ka ba Jéova vi a-w, a pa tibwen bénédisyon ou ka risivwè !
Ni onlo moun ka konpranndèdi kè lè toutmoun konnèt-vou, lèwvwè ou ni on bon travay oben lè pòch a-w plen lajan, sa ka ba-w tchè-kontan. Men ès sé vré sa ? Gadé VIDÉO-la é fè on ti kozé asi sé kèsyon-la ki ka vin la.
-
Andreï té enmé jouwé foutbòl é i té ka jouwé adan on klèb, men i arété sa. Poukwa ?
-
Andreï lagé foutbòl é i désidé ba Jéova sa i ni dè méyè. Ès sé on bon désizyon i pran ? Poukwa ?
Avan i té vin on disip a Jézi, lapòt Pòl étidyé lwa a sé Juif-la èvè on pwofésè toutmoun té konnèt. Si i té kontinyé étid a-y, i té’é vin on gwotchak men i lagé sa pou i té vin on disip a Jézi. Ès i règrété ? Li Filipyen 3:8 é fè on ti kozé asi sé kèsyon-lasa :
-
Pou lapòt Pòl, sa i té ka fè avan i vin krétyen sé té « on pil zòdi ». Poukwa i di sa ?
-
Ka sa pòté dè bon ba-y ?
-
Ès ou ka di vi a-w ké pli bèl si ou ka sèvi Jéova ? Poukwa ou ka di sa ?
Lè Pòl vin krétyen, i rèsèvwa lontan plis ki sa i mèt dèyè do a-y.
MI SA MOUN KA DI : « An sav sé lavérité. Men an po’o paré pou pran lèbatèm. »
-
Ka ki dwètèt pousé-w ba Jéova vi a-w ?
ON TI RÉZIMÉ
Sé lanmou ki ka pousé-nou ba Jéova vi an nou é pran lèbatèm.
Ka ou woutyenn
-
Poukwa Jéova mérité kè nou enmé-y é kè nou sèvi-y èvè tout tchè an nou ?
-
Ki bénédisyon Jéova ka vidé asi Témwen a-y ki batizé ?
-
Ès ou té’é vlé ba Jéova vi a-w ?
AY GADÉ SA OSI
Poukwa on chantèz é on boug ki té ka jouwé foutbòl amériken désidé ba Jéova vi a yo ?
Kèsyon sé jenn-la ka pozé-yo... Ka an ké fè adan lavi ? – Lè an ka viré gadé dèyè (6:54)
Gadé pou ki dòt rézon fò-nou ba Jéova vi an nou.
« Pourquoi se vouer à Jéhovah ? » (Tou dè Gad a 15 janvyé 2010 an fransé)
On klip vidéo ki ka montré jan sé moun-la kontan lè yo ka ba Jéova vi a yo.
Ka ki édé on madanm sav ka pou i té mèt prèmyé douvan (gadé istwa a Rosalind John adan awtik-lasa : « Pendant des années, je me suis demandé pourquoi on existe »).
« La Bible transforme des vies » (Tou dè Gad a 1é novanm 2012 an fransé)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
