REIREI 46

Bukin Tera Bwa Ko na Katabua Maium ao ni Bwabetitoaki?

KAMAIUA

Ko katabua maium nakon Iehova, n arom ni berita nakoina rinanon te tataro, bwa ko na taromauria n tii ngaia ao ni moanibwaia ni maium. (Taian Areru 40:8) Imwini karaoan anne, ko a bwabetitoaki naba. Ni bwabetitoam ko a kaotia nakoia aomata bwa ko a tia ni katabua maium. Ara motinnano ae te kabanea ni kakawaki boni katabuani maiura nakon Iehova. Tera ae kairiko bwa ko na karaoa te motinnano ae rangi ni kakawaki aei ae bita maium?

1. Tera ae kaira temanna bwa e na katabua maiuna?

Bon te tangira ae kairira bwa ti na katabua maiura nakon Iehova. (1 Ioane 4:10, 19) E kaumakira te Baibara ni kangai: “Tangira Iehova ae Atuam ma nanom ni kabane, maium ni kabane, am iango ni kabane, ao korakoram ni kabane.” (Mareko 12:30) Ti kaota tangiran te Atua iroura tiaki tii n ara taeka ma ni baika ti karaoi naba. N aron te mwaane ao te aine ae a mareaki ibukina bwa a rangi n tangiriia, ai aron naba tangiran Iehova iroura bwa e kairira bwa ti na katabua maiura nakoina ao ni bwabetitoaki.

2. Baikara kakabwaia aika e katauraoi Iehova ibukia ana taani Kakoaua aika bwabetitoaki?

Ngkana ko bwabetitoaki, ko a kaaina iai ana utu Iehova ae kakukurei. Ko nang namakina tangiram irouna n itera aika bati, ao ko nang kaaniaki riki nakoina nakon ae ko namakinna n te bong aei. (Wareka Maraki 3:16-18.) E aki tii riki Iehova bwa Tamam, ma e a reke naba am utu aika taari ni katobibia te aonnaba, aika tangira Iehova ao a tangiriko naba. (Wareka Mareko 10:29, 30.) Ni koauana, iai mwaneka aika ko riai ni karaoi, imwain ae ko bwabetitoaki. Ko riai n reiakina taekan Iehova, n tangiria, ao n onimakina Natina. Imwina, ko a kona ngkanne ni katabua maium nakon Iehova. Ngkana ko karaoi mwaneka akanne ao ni bwabetitoaki, ko a toua iai te kawai nakon te maiu n aki toki ae kakukurei. E kangai Ana Taeka te Atua: “E kamaiuingkami naba ngkai te bwabetito.”—1 Betero 3:21.

REIAKINA AE BATI RIKI

Neneria bwa bukin tera ngkai e kakawaki bwa ko na katabua maium nakon Iehova ao ni bwabetitoaki.

3. Ti riai ni bane n rineia bwa antai ae ti na toro irouna

N aia tai tibun Iteraera rimoa, a iangoia tabeman bwa a kona n taromauria Iehova ao te atua ni kewe ae Baara. Ma e kanakoa ana burabeti are Eria Iehova bwa e na kaeta te iango ae kairua aei. Wareka 1 Uea 18:21, ao maroroakina te titiraki aei:

Tera te rinerine ae a riai ni karaoia tibun Iteraera?

N aroia tibun Iteraera, ti riai naba n rineia bwa antai ae ti na toro irouna. Wareka Ruka 16:13, ao maroroakin titiraki aikai:

Bukin tera bwa ti aki kona ni kaai n taromauria Iehova ao te aomata ke te bwai riki teuana?
Ti na kangaa ni kaotia nakon Iehova ae ti rineia bwa ti na taromauria?

4. Kananoa am iango i aon ana tangira Iehova ibukim

A bati bwaintangira aika kakawaki aika e anganira Iehova. Tera ae ti kona n anganna? Kaota te TAAMNEI.

TAAMNEI: Angan te Atua Am Bwaintituaraoi (3:04)

Baikara aanga tabeua aika e kaota iai tangiram Iehova? Wareka Taian Areru 104:14, 15 ao 1 Ioane 4:9, 10, ao maroroakin titiraki aikai:

Baikara bwaai n tituaraoi mairoun Iehova aika ko kakaitau riki iai?
Tera am namakin ibukin Iehova mani bwaai n tituaraoi akanne?

Ngkana ti anganaki te bwaintituaraoi ae ti rangi n tangiria, ti kani kaota ara kakaitau nakon are e anganira. Wareka Te Tua-Kaua 16:17, ao maroroakina te titiraki aei:

Ngkana ko iaiangoi baika e karaoi Iehova ibukim, tera ae ko kona n anganna?

5. E uotii kakabwaia aika bati te katabu

A bati aika kakoaua bwa ngkana ko rangi ni kinaaki, e reke am mwakuri ni kareketianti ae tamaroa, ke am mwane, ao ko na boni kukurei. E koaua anne? Kaota te TAAMNEI, ao maroroakin titiraki aikai.

TAAMNEI: Te Butibooro Bon te Bwai ae Moan te Kakawaki ni Maiu (5:45)

E ngae ngke e rangi n tangira te butibooro teuaei, ma tera are e kairia bwa e na kitana ana takaakaro ae rereke iai ana mwane?
E a motinnanoia bwa e na katabua maiuna nakon Iehova, ma tiaki ana butibooro. N am iango, e karaoa te motinnano ae eti teuaei? Bukin tera?

Imwain rikin te abotoro Bauro bwa te Kristian, e uaiakina te nakoa ae rietata. E reirei te tua n Iutaia iroun te tia reirei ae kinaaki. Ma e kitanna ao e riki bwa te Kristian. E uringaaba Bauro? Wareka I-Biribi 3:8, ao maroroakin titiraki aikai:

Bukin tera Bauro ngke e taekini bwa “maange” baike e karaoi imwain rikina bwa te Kristian?
Tera ae e karekea?
N am iango, e na nakoraoi riki maium ngkana ko rineia bwa ko na beku iroun Iehova? Bukin tera?

Ngke e a riki Bauro bwa te Kristian, a a bati riki baika e karekei nakoni baika e kabuai

A TAKU TABEMAN: “I ataia ae I riai ni maiuakini baika taekinaki n te Baibara, ma I tuai moa tauraoi ni bwabetitoaki.”

Tera ngkoe am iango?

KAKIMOTOTOANA

E kairira te tangira bwa ti na katabui maiura nakon Iehova ao ni bwabetitoaki.

Kauring

Bukin tera ngkai bon tii Iehova ae ti riai n tangiria ma nanora ni kabane ao n taromauria?
E na kangaa Iehova ni kakabwaiaia ana taani Kakoaua aika bwabetitoaki?
Ko kani katabua maium nakon Iehova?

E bane te reirei aei n:

Kataia

Ngkana ko katauraoi nakon te reirei are imwina, iangoi bwaai tabeua aika tutukiko man am katabu.

Tabeua riki:

Your other goal

NORI NABA AIKAI

Noria bwa bukin tera ngke a kitani baika a tatangiri ao aika reke iai aia mwane, te tia katangitang ao te tia takaakaro aei, ao ni katabua maiuia nakon Iehova.

Aia Titiraki Rooro n Rikirake—Tera ae N na Karaoia ni Maiuu?—Arou Rimoa (6:54)