46 NU GÈ NÒ
Éé Ní Ea Náa Vaá À Bọ́ló Kọ Ó Kìn Lóó Nè Jìhóvà Vaá Dììa Múú Ẽ́?
Ò kiǹ lóó nè Jìhóvà tṍó eo zigà nèe mm̀ tã̀àgã ló kọ òó fãè áá ẹlẹ vaá tú gè naa a bùlà gyààma sĩ́ mm̀ o dùm. (Psalm 40:8) Tṍó e níá ni nááá lọ̀l, òé gbóó láá dììa múú. Tṍó eo diìa múú ní e dõòna gbò é nyímá kọọ̀ o beè kìn lóó nè Bàrì e. Ge kìn lóó nè Jìhóvà ní ea dú béèlàfùl ea bọọ lọ̀l vaá à lee èé láá nèe. Éé ní ea é náa kọ ó nè nakà agẹbá béèlàfùl ea é nyááná o dùmí ẽ́?
1. Éé ní ea ólò naa kọọ̀ nen á kìn lóó nè Bàrì e?
Bẹẹ vulè kilma ló Jìhóvà ní ea ólò naa kọ é kìn lóó nèe ẽ́. (1 Jọ́ọ̀n 4:10, 19) Kpá Káí kọ́ọ̀: “Vùlè Jìhóvà ea dú o Bàrì lọa mm̀ dénè o nyíe, nè dénè o dùm, nè dénè o bùlà, nè dénè o kói.” (Máàk 12:30, NW) È zógè kọ è vulèè Bàrì tení dú ló nú e náà, níì áá nú e kọ́ọ̀ nì. Dì belí bé e bàà nen e bà vulè ene ólò ilá naaá, vulè e íè kilma ló Jìhóvà ní ea ólò naa kọ é kìn lóó nèe vaá dììa múú ẽ́.
2. Mókà gbò tã́áná dee bá ní e Jìhóvà ólò nè pá a Gbò Neǹ Ditõ̀ò e ba ni diìa múú ẽ́?
Tṍó eo diià múú, òé gbóó dũunà pá tọọ̀ Jìhóvà e bà íe ẹ́ẹ́ nyíé. Òó dé kpéè ló a vulè mm̀ gã́bug sĩ́deè, vaá kpáá palàge tõo bã̀é kpàn èlmà bé ea dì naa kátogóí. (Bugi Málakaì 3:16-18.) Gbá ló gè kọọ̀ Jìhóvà é dú o Tẹ̀, òó íe nagé gbò vígà págbálà nè pábia e bà dì beeá ló bàlà booí e bà vulè Jìhóvà vaá vùlè ni. (Bugi Máàk 10:29, 30.) Náa kal ló béè vó, à íe gbò nú ea é dú bíi kọ ó naa besĩ́ ò kálá dììa múú. Àé dú bíi kọ ó nó nú ea kil ló Jìhóvà, vùlèe, vaá ié zìgà mm̀ a Sã́áná. Dee deè nvée, òé gbóó kìn lóó nè Jìhóvà. Be ò náa gbò nuí vaá dììa múú, àé náa kọ á valí ní ló gè ié nèà deè ge bã boo èèlè dùm e bè náa tá. Kpá Káí kọ́ọ̀: “[Dììa múú] . . . dú nu ea gé duulà boolo kátogóí.”—1 Pítà 3:21.
KPÁÁ NÓ BỌ̀Ọ̀VẸ̀
Nyimá nú ea náa vaá à dú bíi kọ ó kìn lóó nè Jìhóvà vaá dììa múú.
3. Buù bẹ̀ì é sa nen eé fã
Mm̀ Ízràẹ̀l deè kéléá, sìgà gbò beè dòòmà kọọ̀ bàé láá fãè Jìhóvà gbá ló kyáá ńbàlì Béèl. Sõò Jìhóvà beè lẹ̀ẹ̀là a neǹ kọ́ọ̀ bùlà Bàrì Èláíjà má va mm̀ ge lele dee bá ba lọ̀ bug. Bugi 1 Kíǹg 18:21, vaá ò gbóó aalai nakà bíbví:
-
Éé ní ea beè dú bíi kọ pá Ízràẹ̀l á sà ge naa ẽ́?
Dì belí pá Ízràẹ̀l, beele é íè ge sà nàgé nen eé fã. Bugi Lúùk 16:13, vaá ò gbóó aalai gbò bíbví:
-
Éé ní ea náa vaá née é láá gbá fã̀ Jìhóvà nè nen àbèè dõòna kà nu ẽ́?
-
Mósĩ́ deè ní eé láá naa kọọ̀ Jìhóvà á nyimá kọọ̀ e beè sà ge fã̀e ẽ́?
4. Bugi togó boo bé e Jìhòvà vulè ni naa
Jìhóvà a néi gã́bug lé nu. Éé ní e beele é láá nè ẹlẹ ẹ́? Bìlà VÍDIÒÍ.
Mókà gbò sĩ́deè ní e Jìhóvà ni zógè kọ à vulèè ni ẽ́? Bugi Psalm 104:14, 15 nè 1 Jọ́ọ̀n 4:9, 10, vaá ò gbóó aalai gbò bíbví:
-
Mókà dõ̀ònù ea aa bá Jìhóvà ní ea palàge leemá ni ẽ́?
-
Gbò dõ̀ònùí náa kọ ó ẹ̀bvie naa vàẹ?
Tṍó e bà dõo nú ea palàge leemái nèi, è ólò zogè kọ è nveè ka ló nen ea dõo nuá nèi. Bugi Dìtolónomì 16:17, vaá ò gbóó aalai nakà bíbví:
-
Tṍó eo bugì togó boo dénè nu e Jìhóvà ni náa nè ni, éé ní ea léémá ni gè nèe ẽ́?
5. Ge kìn lóó nè ólò domà gã́bug tã́áná dee bá
Gã́bug nen zigà kọọ̀ tṍó e gbò nen nyímàè va ló, ge sí lé tóm, àbèè ge ié kpègè ní ea é náa kọọ̀ nyíé va á ẹẹlìẹ̀ ẹ. É kọọ̀ níá dú kà kà? Bìlà VÍDIÒÍ, vaá ò gbóó aalai gbò bíb ea nyoone.
-
Náa kal ló béè kọọ̀ ge bìlà bọ́ọ̀l beè palàge leemá nen ea di mm̀ vídiòá, éé ní ea beè naa kọ á òòà aa ló é?
-
A beè beeláfùl ge tú gã́bug a tṍó nvee mm̀ ge siimá tóm nè Jìhóvà, tãa vó ea nvee mm̀ ge bìlmà bọ́ọ̀l. É kọ ò bùlà kọọ̀ a beè nè lé béèlàfùl? Ló éé?
Besĩ́ì neǹ tóm Pọ́ọ̀l à kálá nyoone nvéè Kráìst, a beè gbĩ́ gè ié pọ̀b dọ̀. A beè nó log pá Júù lọl bá neǹ dòbá e bà palàge nyimá ló. Sõò a beè òòà aa ló a tàn ge ié pọ̀b dọ̀ kọbé à láá nyoone nvéè Kráìst. É kọọ̀ Pọ́ọ̀l beè ọgá ló a béèlàfùl? Bugi Fílipaì 3:8, vaá ò gbóó aalai gbò bíbví:
-
Éé ní ea beè naa kọọ̀ Pọ́ọ̀l á kọọ̀ gbò nú ea sọẹ̀ bá gbẹẹ́ kẽ gé nyoonìè nvéè Kráìst dú “zọ̀là pọ́ì,” àbèè kpá kẽ ẽ́?
-
Éé ní ea beè gbóó ié é?
-
Éé ní eo bulà kọọ̀ àé né ni ẹ́ẹ́ nyíe mm̀ dùm ẽ, é kọọ̀ ge sí tóm nè Jìhóvà sẹ̀ ge naa dõòna kà gbò nu ẽ́?
Tṍó e Pọ́ọ̀l dú neǹ Kráìst, a beè ié gã́bug nú ea el gbò nú ea beè sọ̀bá
SÌGÀ GBÒ KỌ́Ọ̀: “Náa bọ́ló kọọ̀ neǹ á kìn lóó nè Bàrì.”
-
Éé ní ea náa vaá ò bugi togó kọọ̀ nyìmànù di mm̀ ge kìn lóó nè Jìhóvà ẹ?
NÚ E NI NÓ
Bẹẹ vulè kilma ló Jìhóvà ólò naa kọ é kìn lóó nèe vaá dììa múú.
Ge Òòa Boo
-
Éé ní ea náa vaá à bọ́ló kọ é vùlè vaá fã̀ Jìhóvà lọa mm̀ dénè bẹẹ nyíe ẽ́?
-
Mósĩ́ deè ní e Jìhóvà ólò nè kpẽ́ pá a Gbò Neǹ Ditõ̀ò e ba ni diia múú ẽ́?
-
É kọ àé léémá ni gè kìn lóó nè Jìhóvà?
KPÁÁ GBĨ́ TẼ́ LÓ
Ẹ̀b nú ea beè naa kọọ̀ enè neǹ ọ́lì sọ́l nè nen ea ólò bìlà bọ́ọ̀l á sà ge kìn lóó nè Jìhóvà.
Bíb E Gbò Nvín Ãa Bĩ́íná—Éé Ní Em É Tú Nà Dùm Naamá Ẽ́?—Ge Kpáá Bugi Togó Boo Nú Ea Beè Naaá (6:54)
Bugi togó boo dõòna kà gbò nú ea é náa kọ ó kìn lóó nè Bàrì.
“Why Dedicate Yourself to Jehovah?” (Kpá Tọ Kùdẽe Ló, January 15, 2010)
Mm̀ nakà sọ́lí, nvèè kpíí ló íb zààvà e gbò e bà kìn lóó nè Jìhóvà íe.
Mm̀ nòòtẽ́ ea kọ́ọ̀ “For Years I Wondered, ‘Why Are We Here?’” nvèè kpíí ló nú ea beè siè kpóó ló ene kà ńnváá kọ á nyaaná nú ea beè palàge bọọẹ́ ló mm̀ dùm.
“The Bible Changes Lives” (Kpá Tọ Kùdẽe Ló, November 1, 2012)
