ƝAAKWƐLƐI 46
Lə mɛni ɓa maanɛɛ gu gu kpɔɔ tɛɛ Yálá pɔ ə lɛɛ gu batɛɛmu həɠə ?
Bələi nu ya ə kpɔɔ tɛɛ la Yálá pɔ bələ ka : ya mo ma hwɛliwoo hu yɛ ma yaa tɔnɔ gbən ɓə ə́ kaa bɔ ə́ matoo, ə́ niiɓa kɛ ə lɛɛ ə́ maamɛni tɛɛ tɔwɔ ə́ wɔ mɛni kəlee hu (Maatɛnɛ 40:9 [40:8, NWT]). Yili pulu, ə́ batɛɛmu həɠə ə́ nɛ nu kəlee ɲɛi ɓa yɛ́ ma yaa ə́ kpɔɔ tɛɛ Yálá pɔ. Mɛni wala-wala kpɔ nu ya pɛli gɛi ya ɓaa ə́i kpɔɔ tɛɛ Yálá pɔ. Lə kpɔ ɓə a pɛli ə gɛ nu yɛ gbɔɔ tɛɛ Yálá pɔ ?
1. Lə ɓə a gɛ nu yɛ gbɔɔ tɛɛ Yálá pɔ ?
Wɛlikɛmaa ɓə a gɛ nu yɛ gbɔɔ tɛɛ Zehova pɔ (Ɉaan dɔlɔɔ 4:10, 19). Biblə kaa kɛi guɔ : “ Ə namu Yálá wɛli la kɛ a ə́ lii kəlee, da ə́ kpini, ə ma kɛ, ə́ wɔ kiliŋahiɛ kəlee, da ə́ wɔ huwalawala kəlee ” (Markə 12:30). Maanɛɛ gu nɛ guɔ ma gwa Yálá wɛlilakɛ. Gu hwa yili lɛ lɔ gu hwaawoo hu, kəlaa gwa nɛ nwɔnɔ gu túwɔ́ pələ hu. Pələi lɔ wɛlikɛmaa kpɔkpɔ a gɛ hulɔnu da nɛɛnu diɛ húlulɔ la, bələ lɔ ɓə nwɛlikɛmaalaa gu yəi yɛ hwilɛn na Zehova ɓa a gɛ guɔ gu kpɔɔ tɛɛ la Zehova pɔ ə lɛɛ guɔ batɛɛmu həɠə.
2. Lúwɔ́ ləkɛɛɠaa ɓə Zehova a doo ŋɔ Kəlaɠaa daa batɛɛmu həɠə diɛ ?
Ya batɛɛmu həɠə, ya kɛ kea a Zehova ŋɔ kpɔn hu mun da diɛi kwəinɛɛ kaa di yəi. Pələi a ŋɔ wɛlikɛmaalaa lɛ la yɛ́ ə́ kaa pai yili kaai a kpaalə tamaa, ə lɛɛ yili kaa nwɔnɔ pai ə́ maa lɛɠɛi ma kpɔ nwɔnɔ kɛnɛ (Malasi 3:16-18 ɓo). Zehova kaa pai kɛi a ə́ Nan ə lɛɛ ya kɛ a ŋɔ kpɔn humun da. Zehova ŋɔ kpɔn kaa lɔi mɛi naa kəlee, ɉu nua da Zehova wɛlilakɛ, diɛ yɛ́ kpɛliman ə́ wɛlilakɛ (Markə 10:29, 30 ɓo). Kəlaa mɛniɠaa kaa laa yii maanɛɛ ə́ gbea gɛ toloo yɛ́ tɛɠa pa batɛɛmu hɔlɔɓoi. Maanɛɛ ə́ Zehova kɔlɔnŋaa maakwɛli, ə́ nwɛlilakɛ, ə lɛɛ ə́ laa non na. Ya mɛniɠaa tii kɛ ə lɛɛ ə́ batɛɛmu həɠə yili kaa pai yiipoo yii kpɛɛ ho ma ŋɔ pələ laaɓoi ə́ tɔwɔ. Yálá Lawoo kaa kɛi ma : “ Batɛɛmu a ka nwun maaɓo ” (Piɛrə dɔlɔɔ 3:21, NWT).
Ə́ WƆ MƐNIKƆLƆNŊAA TA PƐLƐ MA
Gaa lə mɛni ɓa mɛni wala-wala ɓaa ə́i kpɔɔ tɛɛ Zehova pɔ ə lɛɛ ə́ batɛɛmu həɠə.
3. Nui ə́ kaa pai kwɛli hwilɛn ɉii ma, yɛ́ kpinii ɓə maanɛɛ ə́ ɉəɠə ɉu
Toloo-toloo, ə kɛ Israɛlə lonnii taɠaa di wɔ kili ɓa da pɛli di Zehova ɓatoo, ə lɛɛ diɛ pənə nwɔnɔ diɛ Baalə ɓatoo yai kɛ a lɛɛ yálá. Zehova ə ŋɔ loloɓomun Eli tɔɔ ə gɛ ə di kiliŋahiɛ pələ haŋa. Tɔɔɓəlaa dɔlɔɔ 18:21 ɓo, ə lɛɛ ka lono kɛ gɛɛmaalən ŋɛi mɛi :
-
Mɛni tɔnɔ ləkɛɛ ɓə kɛ maanɛɛ kɛ Israɛlə lonnii di ɉəɠə ɉu ?
Yɛ pələi lɔ Israɛlə lonnii di gɛ la nui gu kaa bɔ gu kwɛli hwilɛn ma maanɛɛ gu ɉəɠə ɉu. Lukə 16:13 ɓo, ə lɛɛ ka lono kɛ gɛɛmaaləŋaa ŋɛi mɛi :
-
Lə mɛni ɓa gu hwa pɛli kwɛli hwilɛn ɉii Zehova ɓa guɔ nwɔnɔ kwɛli hwilɛn hɛn dakpɛli ɓa ?
-
Gwa pɛli nɛi ləi Zehova ɓa guɔ ma ya ɓə gwaa matoo mɛni həɠə ɉu ?
4. Nwɛlikɛmaalaai Zehova aa gɛ yɛ́, ə́ kiliŋahiɛ ma
Zehova aa mɛinɛɛ lɛlɛɛ tamaa kɛ guɔ. Guɔ kpɛliman lə ɓə gwa pɛli dɛɛ bɔ ? VIDIO kaa.
Mɛni ləkɛɛɠaa hu ɓə Zehova aa nɛ la yɛ́ yɛ ma ə́ wɛli kaa ma ? Maatɛnɛ 104:14, 15 da Ɉaan dɔlɔɔ 4:9, 10 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Zehova ŋɔ mɛinɛɛ ləkɛɛ kpɔ ɓə nwɛli kaa yɛ́ ?
-
Mɛinɛɛɠaai Zehova aa gɛ yɛ́ ya kɛi di kaa ya ə́ kiliŋahiɛ ləi yɛ hwilɛn na Zehova ɓa ?
Gwa mɛinɛɛ ta hɔlɔɓo yii nwɛlikaa guɔ nui mɛinɛɛ tii kɛ guɔ, gwa kɛ bɔ gu mɛinɛɛ hukɔlɔn ma. Dɔ́n ɉɛɓɛ 16:17 ɓo, ə lɛɛ ka lono kɛ gɛɛmaalən ŋɛi mɛi :
-
Mɛinɛɛɠaa Zehova aa gɛ yɛ́ ya ə́ kiliŋahiɛ diɛ, lə ɓə ya kɛ bɔ ə́ dɛɛ bɔ ?
5. Ya ə́ wɔ yɛnɛɛ tɛɛ Zehova pɔ gaa pai lúwɔ́ tamaa too yɛ́
A kɛ nu tamaa di wɔ kili ɓa, da kɛ a nui naa tɛɛ, kóló lɛlɛɛ yɛ ɓo ɲəi awala kɛtii wali yɛ ɓo ɲəi, yili ɓə pai gɛi di kwəinɛɛ hɔlɔɓo. Yili kaa mɔɔn a teɲa ? VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Pələi ma ballon gɛlɛɛ wɛli ə kɛ la Andreï ɓa, lə mɛni ɓa ə yili lɛɛ laa ?
-
Ə ɉəɠə ɉu yɛ ma gaa ŋɔ yɛnɛɛ tɛɛ Zehova pɔ, hɛnigɛ lɔ ŋɔ yɛnɛɛ ə lɛɛ ballon gɛlɛɛ hu. Ə́ wɔ kili ɓa mɛnii tii ə ɉəɠə ɉu mɛni lɛlɛɛ li ? Lə mɛni ɓa ə́ kaa moi tii ?
Gɛɛ Polə ho kɛ a kilistalon kalamɔɔ kɛnɛ ta ə maakwɛli a Ɉuifəɠaa di wɔ tɔn. Yili ɓa ŋɔ yɛnɛɛ tɔwɔ pɛliɛ kɛ a nɛlɛɛ, kəlaa ə bulu tɔɔ yili kəlee ɓa yii yaan yɛ pɛli kɛi a kilistalon. Pulu ɓa Polə lii ə too mɔɔn pulu ? Filipə 3:8 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Mɛniɠaa Polə ə gɛ yɛ tɛɠa pa kɛi a kilistalon, lə mɛni ɓa gaa di kɔɔn ɉii tulunŋa hɛnŋaa diɛ ?
-
Lə ɓə ə ɉɔlɔɓo naa pulu ?
-
Ə́ wɔ kili ɓa mɛni ləkɛɛ ɓə a pɛli ə kwəinɛɛ kɛnɛ tɛɛ ə́ pɔ ə́ wɔ yɛnɛɛ hu : ə́ kóló kɛ Zehova ɓa awala kɛtii ə́ mɛni takpɛliɠaa kɛ ə́ wɔ yɛnɛɛ hu ?
Ɓɛlowai Polə ə kɛ la a kilistalon, yii ə ɉɔlɔɓo gɛnɛi kpɔ kɛnɛ ə tɛɛ yii ə́ hwɛɠɛ ɉu ma.
NUTAƓA DA KƐ KƐI MA : “ Ə́ wɔ yɛnɛɛ kəlee ho lɛɛ lɔ a kalan mɛni. ”
-
Ə́ wɔ kili ɓa nu ya ə́ wɔ yɛnɛɛ kəlee tɛɛ Zehova pɔ yili kaa a mɛni lɛlɛɛ, lə mɛni ɓa ə́ kaa moi tii ?
YII GU GALAN
Wɛlikɛmaa ɓə a gɛ guɔ gu wɔ yɛnɛɛ tɛɛ Zehova pɔ ə lɛɛ guɔ batɛɛmu həɠə.
Nɛɛ ə́ kili pɔ
-
Lə mɛni ɓa Zehova ɓə maanɛɛ guɔ matoo ə lɛɛ guɔ nwɛlilakɛ a gu lii kəlee ?
-
Zehova ŋɔ Kəlaɠaai daa di batiisə, Zehova a di holakulɔ ləi ?
-
Ə́ kaa bɔ ə́i kpɔɔ tɛɛ Zehova pɔ ?
MƐNI TAKPƐLIƓAA
Lə ɓə gɛ wələtoomun, da ballon gɛlɛmun da, diɛ di wɔ yɛnɛɛ tɛɛ Zehova pɔ ?
Les jeunes s’interrogent... Que vais- je faire de ma vie ? - Souvenirs (6:54)
Mɛni takpɛliɠaai da gɛ nu yɛ gbɔɔ tɛɛ Yálá pɔ gaa.
“ Lə mɛni ɓa maanɛɛ ə́i wɔ yɛnɛɛ tɛɛ Zehova pɔ ? ” (La Tour de Garde, 15 janvier 2010)
Nua da di kpɔɔ tɛɛ Zehova pɔ pələi di kwəi a nɛɛ la gaa.
Mɛniɠaai di maamɛni wala-walaa yii gɛ nɛɛnu ta yɛ di tɛɛ tɔwɔ ŋɔ yɛnɛɛ hu gaa bɔlɔkilinŋaa ŋɛi hu yii mɛiwoo kaa kɛi ma : “ Kwəlan damaa yee mu, ŋi kɛi giliŋahiɛ ‘ lə mɛni ɓa gu kaa ɓɛ ? ’ ”
“ Biblə a nua di wɔ yɛnɛɛ maahwalən ” (La Tour de Garde, 1er novembre 2012)