AJUMTALÁB 46
¿Jaleʼ ti lej exbadh ki pidhaʼ i ejatal a Jehová ani ku pujan?
Tam ki pidhaʼ i ejatal a Jehová, i uchál al jun i oláb abal neʼets ki kʼakʼnaʼ expidh Jajáʼ ani abal neʼets ki eyendhaʼ i ejatal abal ki tʼajaʼ jawaʼ Jajáʼ in léʼ (Salmo 40:8). Tam ku pújanits, i tejwamédhanchal axi kʼeʼat abal i pidhámalits i ejatal a Dios. Tam ki pidhaʼ i ejatal a Jehová, u jálkʼunal i ejatal.
1. ¿Jantʼoj tu tólmiyal abal ki léʼnaʼ ki pidhaʼ i ejatal a Jehová?
An kʼanidhomtaláb játs axi in tʼajál ki léʼnaʼ ki pidhaʼ i ejatal a Jehová (1 Juan 4:10, 19). An Biblia in ulal: «Kwaʼal ka kʼanidhaʼ a Jehová kʼal patal a ichích, kʼal patal a ejatal ani kʼal patal a tsap» (Marcos 12:30). An kʼanidhomtaláb axi i koʼonchal a Jehová u tejwamél kʼal jawaʼ i ulal ani kʼal jawaʼ i tʼajál. Antsanáʼ jantʼiniʼ tsab i atikláb u tómkinal kom u kʼanidháx, jayetsej i tʼajál tam i kʼanidhál a Jehová, i pidhál i ejatal ani u pujnal.
2. ¿Jantʼoj tam alwataláb in bátsʼuwal jitaʼchik u pujnal?
Tam tatáʼ kit pujan, a Jehová neʼets ti tsuʼuw jantʼiniʼ in yanél, axi etsʼey kʼwajatchik kulbél. Neʼets ka tʼajaʼ ti kwéntaj abal a Jehová tu lej kʼanidhál ani neʼets ka atsʼaʼ abal it kʼwajat utat kʼal Jajáʼ (ka ajiy Malaquías 3:16-18). A Jehová neʼets kin bajuw jantʼiniʼ a lej Tátaj ani yan i epchal neʼets ka wenkʼon jantʼiniʼ a yanél. Jajáʼchik in kʼanidhál a Dios ani jayej neʼets ti kʼanidhaʼ tatáʼ (ka ajiy Marcos 10:29, 30). Abal ka ejtow kit pujan, kwaʼal ka exlaʼ a Jehová, ka kʼanidhaʼ ani ka belaʼ abal in bínaʼ in tsakámil abal tu ku kʼaniy. Jayej kwaʼal ka pidhaʼ a ejatal a Jehová. Max ka tʼajaʼ axéʼ ani kit pujan, neʼets ka ejtow kit kʼwajiy abal etsʼey. An Biblia in ulal: «An pujantaláb [...] kʼwajat ti kʼaniyalchik» (1 Pedro 3:21).
ABAL KA EXÓBNAʼ MÁS
Ka exóbnaʼ jaleʼ ti lej exbadh ka pidhaʼ a ejatal a Jehová ani kit pujan.
3. Patal kwaʼal ki takuy jitaʼ neʼets ki tʼojonchij
Ti biyál, an israelitas in tsalpay abal in éjtowalak kin tʼojonchij a Jehová ani kʼeʼat i dios axi in bij Baal. Pero nixéʼ yab tekedh, jaxtám a Jehová in abaʼ an kawlómej Elías abal kin uchaʼchik abal yab alwaʼ kin tʼajaʼ antsanáʼ. Ka ajiychik 1 Reyes 18:21 ani ka tsálpaychik kʼal axéʼ:
-
¿Jantʼoj kwaʼalak kin tʼajaʼ an israelitas?
Wawaʼ jayej, kwaʼal ki takuy jitaʼ neʼets ki tʼojonchij. Ka ajiychik Lucas 16:13 ani ka tsálpaychik kʼal axéʼ:
-
¿Jaleʼ ti yab in tomnál ki kʼakʼnaʼ a Jehová ani jayej kʼeʼat i dios?
-
¿Jantʼiniʼ i éjtowal ki tejwamédhanchij a Jehová abal i takuyámalits expidh ki kʼakʼnaʼ Jajáʼ?
4. Ka tʼajaʼ ti kwéntaj abal a Jehová ti lej kʼanidhál
A Jehová tu tsʼejwaliyámal yan jantʼoj alwaʼ. ¿Jantʼoj i éjtowal ki pidhaʼ wawáʼ? Ka tsuʼuwchik an VIDEO.
¿Jantʼiniʼ in tejwamedhámal a Jehová abal ti kʼanidhál? Ka ajiychik Salmo 104:14, 15 ani 1 Juan 4:9, 10 ani ka tsálpaychik kʼal axéʼ:
-
Kʼal patal jawaʼ a Jehová ti pidhámal, ¿jantʼoj játs axi más a kʼakʼnál?
-
¿Jantʼoj a atsʼál tam ka tsalpay kʼal jawaʼ ti pidhámal a Jehová?
Tam jun i jaʼúb tu ku tsʼejwaliy kʼal jantʼoj, i léʼ ki kʼakʼnanchij. Ka ajiychik Deuteronomio 16:17 ani ka tsálpaychik kʼal axéʼ:
-
Tam ka tsalpay kʼal jawaʼ a Jehová ti pidhámal, ¿a atsʼál abal a léʼ ka pidhaʼ jantʼoj? ¿Jantʼoj neʼets ka pidhaʼ?
5. Tam jun i atikláb kin pidhaʼ in ejatal a Jehová, in bátsʼuwal yan i alwataláb
Yan i atikláb in tsálpayal abal max kin ataʼ yan i tumín, kin koʼoy jun i alwaʼ tʼojláb o max ka lej exobláts, neʼets kin atsʼaʼ kulbél. ¿Walám chubax? Ka tsuʼuwchik an VIDEO ani ka tʼilaʼchik jawaʼ a tsuʼuw:
-
An inik axi i tsuʼuw ban video in lej kulbetnálak ti ubatʼ, ¿pero jaleʼ tin jilaʼ?
-
¿Walám tekedh jawaʼ in tʼajaʼ? ¿Jaleʼ?
An abatwálej Pablo in éjtowalak kin koʼoy jun i alwaʼ tʼojláb, kom lej exoblámadh. Pero tam ti wenkʼon ti aykol kʼal a Cristo in jilaʼ patal nixéʼ. Ka ajiychik Filipenses 3:8 ani ka tsálpaychik kʼal axéʼ:
-
¿Jaleʼ tin uluw an abatwálej Pablo abal patal jawaʼ in tʼajaʼ okʼxidh ka wenkʼon ti aykol kʼal a Cristo, ejtíl max «pel i amúl»?
-
¿Jantʼoj tam alwataláb in batsʼuw?
-
¿Walám neʼets ka atsʼaʼ más it kulbél max ka takuy ka tʼojonchij a Jehová? ¿Jaleʼ ta tsálpayal antsanáʼ?
JAWAʼ TALCHIK IN TSÁLPAYAL: «Yab jantʼoj a atál max expidh ka tʼojonchij a Dios».
-
¿A tsálpayal abal exbadh ki tʼojonchij a Jehová? ¿Jaleʼ?
JAWAʼ I EXOBNÁMAL
An kʼanidhomtaláb axi i koʼonchal a Jehová, neʼets kin tʼajaʼ ki léʼnaʼ ki pidhaʼ i ejatal ani ku pujan.
Ki tʼilaʼ jawaʼ i exóbnaʼ
-
¿Jaleʼ tin tomnál ki kʼanidhaʼ a Jehová kʼal patal i ichích ani ki kʼakʼnaʼ?
-
¿Jantʼoj in pidhál a Jehová patal jitaʼ ka pujan?
-
¿A léʼ ka pidhaʼ a ejatal a Jehová?
KA EXÓBNAʼ JANTʼOJ ÍT
Ka tsuʼuw jaleʼ ti jun i mimláb axi u ajatak ani jun i inik axi in kulbetnálak ti ubatʼ, in takuy kin pidhaʼ in ejatal a Jehová.
Ka tsuʼuw jaleʼ in tomnál ki pidhaʼ i ejatal a Jehová.
«¿Jaleʼ in tomnál ki pidhaʼ i ejatal a Jehová?» (La Atalaya, 15 de enero de 2010)
Ka tsuʼuw al axéʼ xi video, jaleʼ in atsʼál lej kulbél jitaʼchik in pidhámal in ejatal a Jehová
Ka ajiy axéʼ xi biografía abal ka exlaʼ jantʼoj in tʼajaʼ abal jun i mimláb, kin lej tsalpay jantʼiniʼ ti kʼwajat in eyendhál in ejatal «Etsʼey u léʼnaʼ ku exlaʼ jaleʼ tu kʼwajat ejat».
«Tólmiyatchik kʼal an Biblia abal kin jalkʼuy in ejatal» (La Atalaya, 1 de noviembre de 2012)