EHONGWA 46
Omena raye tji twa sokuriyandja ku Mukuru nokupapitisiwa?
Ove u riyandja ku Jehova mokumukwizikira mongumbiro kutja mo rikotamene ku ye erike, nokutwa po ombango ye poruveze orutenga mehupo roye. (Epsalme 40:8) Okuzambo, otji u papitisiwa. Mokutjita nao, u raisa kovandu varwe kutja we riyandja ku Mukuru. Okuriyandja ku Jehova oondando onanḓengu tjinene ndji matu yenene okutjita. Nu hapo otjikwaye tji mape ya atji ku hingi okutjita ondando onanḓengu ndji?
1. Otjikwaye tji tji hinga omundu okuriyandja ku Mukuru?
Orusuvero rwetu ku Jehova ru tu hinga kutja tu riyandje ku ye. (1 Johanes 4:10, 19) Ombeibela i tja: “Suvera Muhona Ndjambi woye nomutima woye auhe, nomuinyo woye auhe, nozondunge zoye azehe, nomasa woye aehe!” (Markus 12:30) Tu raisa kutja twa suvera Mukuru momambo wetu na wina movitjitwa vyetu. Tjimuna ovandu mba suverasana tji ve kupasana, orusuvero rwetu ku Jehova wina ru tu hinga kutja tu riyandje ku ye nokupapitisiwa.
2. Ozondaya zeṋe Jehova nḓe yandja kovakarere ve mba papitisiwa?
Indu tji wa papitisiwa, ove mo rire okaṋepo keṱunḓu ra Jehova rondjoroka. Okuzambo, ove mo munu orusuvero rwe momiano omingi pekepeke, nu mo kara noupanga wopopezu ku na ye, pu imbwi mbu na wo nai. (Lesa Maleaki 3:16-18.) Nu kombanda yokukara na Jehova otja Iho, ove mo kara neṱunḓu rovakambure ovakweṋu mbe mu suvera nu mbe ku suvera wina. (Lesa Markus 10:29, 30.) Otjiperi kutja ove mo sokutoora omikambo tjiva ngunda au hi ya papitisiwa. Ove mo hepa okurihonga ohunga na Jehova, okumusuvera, nokukara nongamburiro mOmuna we. Nu korusenina ove mo sokuriyandja ku Jehova. Indu tji wa toora omikambo mbyo nu okuzambo opapitisiwa, ove mo yenene okuyorokera ehupo nga aruhe. Embo ra Mukuru ri tja: ‘Ombapitisimo nambano mai mu yama.’—1 Petrus 3:21.
KONḒONONA OUKOTO
Konḓonona kutja ongwaye tje ri ounanḓengu kove okuriyandja ku Jehova nokupapitisiwa.
3. Atuhe matu sokutoorora kutja matu karere uṋe
MoIsrael otjikuru, ovandu tjiva aave munu kutja mave yenene okurikotamena ku Jehova na ku mukuru wovisenginina Baal. Posi ya, Jehova wa hinda omuprofete we Elia okukaṱuna ongaro ndja ri posyo ndjo. Lesa 1 Ozombara 18:21, nu okuzambo hungirira kepuriro ndi:
-
Ovaisrael aave sokutjita ye?
Tjimuna Ovaisrael, eṱe wina matu sokutoorora kutja matu karere uṋe. Lesa Lukas 16:13, nu okuzambo hungirira komapuriro nga:
-
Ongwaye tji tu ha sora okurikotamena ku Jehova ngunda amatu rikotamene komundu poo kotjiṋa tjarwe?
-
Matu raisa vi ku Jehova kutja twa toorora okurikotamena ku ye?
4. Ripurira komuano Jehova me ku suvera
Jehova we tu pa oviṋa ovingi oviwa. Ovikwaye mbi matu yenene okuyandja ku ye? Nyanda OKAVIDIO.
Omomiano viṋe tjiva Jehova me ku raisira kutja we ku suvera? Lesa Epsalme 104:14, 15 na 1 Johanes 4:9, 10, nu okuzambo hungirira komapuriro nga:
-
Oviyandjewa viṋe okuza ku Jehova mbi u nondangi ko tjinene?
-
Hapo oviyandjewa mbyo, vi tjita kutja u fule vi ohunga na ye?
Indu tji twa pewa otjiyandjewa tji twa suvera, tu vanga okuraisa ondangi ku ingwi ngwe tu pe. Lesa 1 Ekuruhungi 29:14, nu okuzambo hungirira kepuriro ndi:
-
Indu tji mo tara koviṋa avihe Jehova mbye ku ungurira, otjikwaye tji u vanga okumutjitira?
5. Okuriyandja ku Jehova ku eta ozondaya ozengi
Ovandu ovengi ve kambura kutja okurira omutjiukwa, okukara noviungura oviwa, nokukara novimariva maku ve etere ondjoroka. Hapo imbwo ouatjiri? Nyanda OKAVIDIO, nu okuzambo hungirira komapuriro ngu maye kongorere mba.
-
Nandarire kutja omunyande wotjimbere mokavidio wa suverere okunyanda otjimbere, omena raye tja isa enyando ndo?
-
Eye wa tya okuriyandja omuini ku Jehova nu kakotjimbere. Hapo mo munu kutja eye wa toora omukambo omusemba? Omena raye?
Ngunda omuapostele Paulus e hi ya rira Omukriste, eye aa vanga okuungura oviungura vyokombanda. Eye wa hongwa omatwako wOvajuda i yomundu ngwa ri omutjiukwa. Posi ya, eye wa isa oviṋa mbyo kongotwe kokutja ma rire Omukriste. Hapo Paulus wa ri nomuhihamwatima? Lesa Ovafilipi 3:8, nu okuzambo hungirira komapuriro nga:
-
Omena raye Paulus tja tja oviṋa mbyaa tjiti ngunda e hi ya rira Omukriste, vya ri “oviyaya porwavyo”?
-
Eye wa muna ye moruveze rwanao?
-
Mo sasaneke vi okukarera Jehova ku noviṋa vyarwe mbi mo yenene okutjita mehupo roye?
Indu Paulus tja rira Omukriste, eye wa muna ovingi pu imbi mbya isa kongotwe
OVANDU TJIVA VE TJA: “Me tjiwa kutja me sokuhupa otja komirari vyOmbeibela, posi ya ngunda hi ya yenena okupapitisiwa.”
-
Mo munu ko vi?
OKUYARUKIRA PO OUSUPI
Orusuvero ru tu hinga kutja tu riyandje oveni ku Jehova nokupapitisiwa.
Okurizemburukisa
-
Ongwaye tji twa sokurikotamena ku Jehova nokumusuvera nomutima wetu auhe?
-
Omomuano uṋe Jehova me yandja oviṋa oviwa kovakarere ve mba papitisiwa?
-
Hapo mo vanga okuriyandja omuini ku Jehova?
RIHONGA OVINGI
Tara kutja omena raye omunyande womizumbi nomunyande womanyando tji va toorora okuriyandja oveni ku Jehova.
Omitanda vi pura kutja—Hapo me toora omuhunga uṋe mehupo?—Okutara kombunda (6:54)
Tara komapu warwe ngu maye ku hingi okuriyandja ku Jehova.
“Ongwaye tji mo sokuriyandja omuini ku Jehova?” (Oruhungu, 15 ku Januari, 2010)
Mokavidio komizumbi nga, tara kondjoroka yaimba mbe riyandja oveni ku Jehova ndji ve na yo.
Tara kutja otjikwaye tji tja hinga omukazendu umwe okuripurira koviṋa mbya ri ovinanḓengu ku ye, mehungi ndi “Oure wozombura ee ripura kutja, ‘Ongwaye tji tu nomuinyo?’”
“Ombeibela i rundurura omiinyo vyovandu” (Oruhungu, 1 ku Novemba, 2012)
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
