LEKSION 46
Ngatta Mawag i Dedikasion Anna Bawtismo?
Maddedika ka kani Jehova gukaban na pakimallo. Itabbam nisa nga yayya laman i dayawammu anna i prayoridad mu ta pattolem. (Salmo 40:8) Kabalinna, awayyam ngana i mabawtisowan. Nu kuammu yatun, mepasingammu ta tanakuan nga naddedika ka ngana. I paddedika kani Jehova i pinaka-importante nga desision nga makuam anna pakastanna i pattolem. Anni i mamaguyu nikaw nga kuan yatun?
1. Anni i mamaguyu ta tadday nga maddedika?
I aya i mamaguyu nittam nga maddedika kani Jehova. (1 Juan 4:10, 19) Ipagaram na Biblia: “Ayatam-mu i Yafu nga Dios mu ta interu futum, interu nga ikararuam, interu nga nono mu anna interu nga sikam-mu.” (Marcos 12:30) Mepasingattam nga ayatattam i Dios gukaban na kakkagian anna kukukuattam. Mappakasal i mannobio megafu ta ayada ta kataggi-tadday. Maddedika anna mappabawtiso ittam gapa megafu ta aya tam kani Jehova.
2. Anni ira nga bendision i iyawa ni Jehova ta bawtisadu ira nga Saksina?
Nu mabawtisowakka, mabbalikka tu parte na magayayya nga familia ni Jehova. Aru gapa i maekspiriensam nga pangipasinganna tu ayana nikaw, anna mas mabbalikka tu madukko nisa. (Bibbigan i Malakias 3:16-18.) Ari laman nga mabbalin tu Yamam si Jehova, mapeggakka gapa tu familia, i wawwaragi ta interu mundo nga mangaya nisa anna nikaw. (Bibbigan i Marcos 10:29, 30.) Ngem egga ira i mawag nga kuammu, nige mu mabawtisowan. Mawag nga gigiammuammu i meyannung kani Jehova, ayatammu yayya, anna mangurug ka ta Anana. Kabalinna, mawag nga idedikam i baggim kani Jehova. Nu kingnguam ngana yatun ira anna mappabawtiso ka, awayyam i magayayya nga mattolay tu mannanayun. Nakagi ta Uvovug na Dios: ‘I bawtismo i mamaliag sangoye nikamu.’—1 Pedro 3:21.
GIGIAMMUAN I ARU PAGA
Ammuan nu ngatta importante nga maddedika ka kani Jehova anna mappabawtiso.
3. Mawag nga piliattam nu sinni i passerbiattam
Abbo na karuan nga Israelita nga awayyada passerbian si Jehova anna i falsu nga dios nga si Baal. Ngem zinog ni Jehova si profeta Elias tapenu itunung ira. Bibbigan i 1 Patul Ira 18:21, anna paguvovugan yaw nga pakkiavu:
-
Anni nga desision i mawag nga kuan na Israelita ira?
Kagitta na Israelita ira, mawag nga piliattam nu sinni i passerbiattam. Bibbigan i Lucas 16:13, anna paguvovugan yaw ira nga pakkiavu:
-
Ngatta ariattam awayya nga paggiddanan nga passerbian si Jehova anna i tanakuan?
-
Kunnasi tam mepasingan nga si Jehova i piliattam nga passerbian?
4. Monag nga pannonopan i aya ni Jehova nikaw
Aru i niyawa ni Jehova nittam tu mabalor ira nga regalu. Anni gapa i meyawa tam nisa? Girawan i VIDEO.
Kunnasi nipasingan ni Jehova i ayana nikaw? Bibbigan i Salmo 104:14, 15 anna 1 Juan 4:9, 10, anna paguvovugan yaw ira nga pakkiavu:
-
Anni ira i ipappabalo mu nga regalu ni Jehova nikaw?
-
Anni i makagim nisa megafu tatun ira nga regalu?
Nu makalawa ittam tu regalu nga kakayà tam, kayà tam nga mappabalo ta nangiyawa tatun. Bibbigan i Deuteronomio 16:17, anna paguvovugan yaw nga pakkiavu:
-
Nu nononopammu i ngamin nga niyawa ni Jehova para nikaw, anni i kayà mu nga iyawa nisa?
5. Aru nga bendision i malawa mu nu dedikadu ka ta Dios
Aru i mangurug nga i pabbalin tu sikat, makasta nga karera, onu kinariku i mamagayayya nira. Kurug kari yatun? Girawan i VIDEO, anna paguvovugan yaw ira nga pakkiavu:
-
Ta video, maski nu kakayà na tadday nga atleta i paggayam tu soccer, ngatta pinanawanna yatun?
-
Naddesision yayya nga idedika i baggina kani Jehova, ari nga ta soccer. Para nikaw, fustu kari i desisionna? Ngatta?
Nige nabbalin nga Cristiano si apostol Pablo, egga i prominente nga sekular nga karerana. Ginigiammuna i dob na Judio. Sikat i mestru nga nanuddu nisa. Ngem pinanawanna yatun tapenu mabbalin tu Cristiano. Egga kari i nabbabawyan ni Pablo? Bibbigan i Filipos 3:8, anna paguvovugan yaw ira nga pakkiavu:
-
Ngatta nibilang ni Pablo tu “basura” i ngamin nga kingnguana nigena nabbalin tu Cristiano?
-
Anni nga bendision ira i nalawana?
-
Anni i makagim ta passerbim kani Jehova nu ikumparam ta tanakuan paga nga awayyam pangiyusan ta pattolem?
Turi ta nabbalin nga Cristiano si Pablo, mas aru i nalawana nga bendision anne ta nisakrifisiona
I KAGIAN NA KARUAN: “Awan tu mala mu ta passerbi ta Dios.”
-
Ngatta importante i paddedika kani Jehova?
ANNI I NAGIGIAMMUM?
I aya i mamaguyu nittam nga maddedika kani Jehova anna mappabawtiso.
Review
-
Ngatta mepangngo nga napafutuan nga ayatattam anna dayawattam si Jehova?
-
Kunnasi bendisionan ni Jehova i bawtisadu ira nga Saksina?
-
Kayà mu kari idedika i baggim kani Jehova?
I AWAYYAM PAGA KUAN
Girawan nu ngatta pinili na tadday nga musician anna tadday nga atleta i maddedika kani Jehova.
Pakkiavu na Kabataan Ira—Anni i Kuakku ta Pattolè?—Pannono ta Nappasa (6:54)
Ammuan paga i karuan nga rason nu ngatta maddedika ka.
“Ngatta Maddedika Ka Kani Jehova?” (Passifusifutan, Enero 15, 2010)
Girawan ta music video i pagayayya nga natageno na naddedika ira kani Jehova.
Ammuan ta istoria nga “Nabayag Ku Ngana Nononopan, ‘Ngatta Naparatu Ittam?’” nu anni i namaguyu ta tadday nga babay nga pannonopan i prayoridadna.
“Pakastan na Biblia i Pattolay” (Passifusifutan, Nobiembre 1, 2012)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
