ƐLĀ Ō NWU ƆMƐ 46
Ɔdiya Nɛ A Cika Ō Kwu Iyi Uwɔ I Gwɛɛya Klla Lɛ Ubatisim Ya A?
A gē je iyi uwɔ gwɛɛya lɛ Ujehofa eko duuma nɛ a lɛ okonu ce lɛ ɔ ipu ɔkɔ ō gba ka géē gba anu foofunu ɛ̄gbā klla lɛ ɔ ta aflɛyi ipu oyeeyi ku uwɔ. (Aíjē Kú Ɛ̄gbā 40:8) Igbihi ɔɔma, cɛɛ a lɛ ubatisim ya. O ŋma lɛ ubatisim nɛ a ya a, a yɔ i mafu lɛ ācɛ ɔhá ka a lɛ iyi uwɔ gwɛɛya lɛ Ujehofa ɛ. Ōmiya ō lɛ iyi alɔ gwɛɛya lɛ Ujehofa a wɛ ɛnɛɛnɛ ōmiya ofiyɛ duu nɛ alɔ lɔfu ya gla a. Ōmiya ocɛgbá nyā géē piya oyeeyi ku uwɔ abɔ. Ɔdi gáā cɛ gā uwɔ ya ɛnɛɛnɛ ōmiya nyā a?
1. Ɔdi gáā cɛ lɛ ɔcɛ lɛ iyi nu gwɛɛya a?
Alɔ gē je iyi alɔ gwɛɛya lɛ Ujehofa ohigbu ku alɔ yihɔtu nu. (1 Ujɔ́ni 4:10, 19) Ubáyíbu da alɔ kahinii: “Aá í yíihɔtū tá Óndú, Ɔwɔicō kú aá ŋmá ɛjɛ̄ɛ̄jī ɔtū kú aá, ŋmá ɛjɛ̄ɛ̄jī odo kú aá, ŋmá ɛjɛ̄ɛ̄jī ɛlā nɛ̄ [aa] gē gbo ā, mɛ́mla ɛjɛ̄ɛ̄ji ɔfú kú aá!” (Umáki 12:30) Alɔ gē mafu ku alɔ yihɔtu ku Ɔwɔico ŋma ɛlā nɛ alɔ gē ka mla ɔdā nɛ alɔ gē ya a duu. Ɛgɛ nɛ ɔcɛnyilɔ mla ɔcɛnya nōo yihɔtu iyi uwa ɔkwɔɔkwɛyi gē lɛ iyi uwa a, ihɔtu nɛ alɔ lɛ lɛ Ujehofa gē cɛ lɛ alɔ je iyi alɔ gwɛɛya lɛ Ujehofa klla ya ubatisim a.
2. Ɔhá nyá nɛ Ujehofa gē hɛ ce ācɛ nōo lɛ ubatisim ya ɛɛ ma?
Eko nɛ a lɛ ubatisim ya, a géē je piya ɔcɛ éyi ipu apɔlɛ ku Ujehofa nōo lɛ eeye. Ujehofa géē mafu ihɔtu gā uwɔ ɔwɛ alɛwa, a géē tubla Ujehofa fiyɛ ɛgɛ nɛ a kōo tubla ɔ icɛ a. (Jé Umálakāyi 3:16-18.) Ujehofa géē wɛ Adā uwɔ. Ó kē wɛ ɔɔma foofunu ŋ, a géē lɛ ayinɛ nɔnya mla ayinɛ nɔnyilɔ ipu oduudu ɛcɛ nōo yihɔtu Ujehofa klla yihɔtu uwɔ duu. (Jé Umáki 10:29, 30.) Ku ɛlā ɔkwɛyi a, ó lɛ ɔdā alɛwa nɛ a cika ya gbɔbu ɛɛ ku a ya ubatisim. A géē nwu ɛlā lɛyikwu Ujehofa klla yihɔtu nu. A kē géē kpɔtuce ɔyi nu nōo wɛ Ujisɔsi a. Amoomɛ, a géē je iyi uwɔ gwɛɛya lɛ Ujehofa. Ɔdaŋ ku a lɛ ɔdā nōo ba nyā ya klla lɛ ubatisim ya, a géē lɔfu jɔɔnyɛ oyeeyi nōó gáā mɛ gboogboo ŋ. Ɛlā ku Ɔwɔico kahinii: “Ubatísim . . . [yɔ i nya uwɔ] tá abālɔbányā á.”—1 Upíta 3:21.
JÉ GƆBU
Leyi yɛ ɔdā nōo ya ɛɛ nɛ ó cɛgbá ku a lɛ iyi uwɔ gwɛɛya lɛ Ujehofa klla lɛ ubatisim ya a.
3. Ɛjɛɛji alɔ géē fu ɔcɛ nɛ alɔ géē gba ɔ ɛ̄gbā
Ipu éwo ku Isrɛlu ikee, ācɛ ōhī gbɛla ka é géē gba Ujehofa mla ɔwɔ ɛkɛmgbɛ nōo wɛ Ubaalu a ɛ̄gbā tɔha gla. Amáŋ, Ujehofa lɛ ɔcomɛɛbɛ Ɛlayija tɛhɔ kóō lɛ ɛlá ō gbo obɔbi ɔɔma piyabɔ. Jé 1 Aɔ́cɛ́ 18:21, cɛɛ ku aa kɔka lɛyikwu ɔka nyā:
-
Ōmiya nyá nɛ ācɛ Isrɛlu lɛ ō ya a?
Lɛɛbɛka ācɛ Isrɛlu a, alɔ géē ya ōmiya lɛyikwu ɔcɛ nɛ alɔ géē gba ɔ ɛ̄gbā a. Jé Ulúku 16:13, cɛɛ ku aa kɔka lɛyikwu aɔka nōo ba nyā:
-
Ɔdiya nɛ alɔ i lɔfu gba Ujehofa mla ɔcɛ ɔhá amāŋ ɔdā duuma ɔhá ɛ̄gbā tɔha gla ŋ ma?
-
Ɛgɛnyá nɛ alɔ gáā mafu lɛ Ujehofa ku alɔ miya ō gba ɔ ɛ̄gbā a?
4. Gbɛla lɛyikwu ɛgɛ nɛ Ujehofa yihɔtu ku uwɔ a
Ujehofa je ɛnɛɛnɛ ɛhi alɛwa lɛ alɔ ɛ. Ɔdi nɛ alɔ lɔfu je lɛ Ujehofa gla a? Lɛ UVIDIO nyā mafu.
Ɔwɛ ōhī nyá nɛ Ujehofa mafu ihɔtu ku nu gā uwɔ ɛ ma? Jé Aíjē Kú Ɛ̄gbā 104:14, 15; mla 1 Ujɔ́ni 4:9, 10, cɛɛ ku aa kɔka lɛyikwu aɔka nōo ba nyā:
-
Ŋma ɛhi ɛyɛɛyɛyi nɛ Ujehofa je lɛ alɔ ɛ ma, ɛnyá jɛ uwɔ eyī fiyɛ duu a?
-
Ɛgɛnyá nɛ aɛhi nyā cɛ lɛ ɔtu ya uwɔ lɛyikwu Ujehofa a?
Ɔdaŋ ku alɔ miyɛ ɛhi nōo he alɔ ɔtu nɛhi, alɔ gē tine ō mafu lɛ ɔcɛ nōo je ɛhi a lɛ alɔ a kóō jɛ alɔ eyī nɛhi. Jé Oblatūkíne 16:17, cɛɛ ku aa kɔka lɛyikwu ɔka nyā:
-
Ɔdaŋ ku a leyi yɛ aɔdā doodu nɛ Ujehofa ya gā uwɔ ɛ ma, ɔdi nōó lɛ abɔ kwu uwɔ ɔtu ku a ya lɛ ɔ a?
5. Ō lɛ iyi ɔcɛ gwɛɛya lɛ Ujehofa gē bi ɔhā alɛwa wa
Ācɛ alɛwa gbɛla ka iyē oloofu, uklɔ olɔhi amāŋ ije géē ya kéē gweeye. Ɔɔma wɛ ɔkwɛyi nɛɛ? Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Naana nɛ ubɔlu ō ta he ɔcɛ nōo yɔ ipu uvidio a ɔtu nɛhi a, ɔdiya ɛɛ nɛ ó habɔ ō ta ubɔlu ta a?
-
Ó le miya ō je ofiyɛ duu ku nu lɛ Ujehofa ikɔkɔ ubɔlu ō ta. A gbɛla ka ōmiya nōo ya ɔɔma lɔhi? Ɔdiya?
Gbɔbu ɛɛ ku ɔcocɛhɔ Upɔlu kóō je piya Ɔcɛ O Yɛce Ukraist a, ó yɔ i dɔka ō kwu piya ɔcɛ ō loofu nɛhi. Ó klɔcɛ íne ku ācɛ Ujiyu ŋma ɛgiyi itica éyi nɛ ācɛ jé lɔɔlɔhi. Amáŋ, ó habɔ ɛjɛɛji nu ta o ya ɛɛ kóō kwu piya Ɔcɛ O Yɛce Ukraist. Upɔlu hijema ku ɔdā duuma a? Jé Ācɛ Ufílipāyi 3:8, cɛɛ ku aa kɔka lɛyikwu aɔka nōo ba nyā:
-
Ɔdiya ɛɛ nɛ Upɔlu ka ku aɔdā nɛ anuɔ ɔ yɔ i ya gbɔbu ɛɛ nɛ ó je piya Ɔcɛ O Yɛce Ukraist a wɛ “īmū icííci ā”?
-
Ɔdi nɛ ó kē lɛ kwɛyi aɔdā ɔɔma a?
-
A gbɛla ka oyeeyi ku uwɔ géē lɔhi fiyɛ ɔdaŋ ka le miya ō gba Ujehofa ɛ̄gbā? Ɔdiya nɛ a ka lɛ a?
Aɔdā nɛ Upɔlu lɛ abɔ ó kwu piya Ɔcɛ O Yɛce Ukraist a nwune lɔɔlɔhi fiyɛ aɔdā nɛ ó habɔ ta a
ĀCƐ ŌHĪ GĒ KA: “Ō je oyeeyi ku uwɔ lɛ Ɔwɔico i wɛ ɔdā ijeeyi ō ya ŋ.”
-
Ɔdiya nɛ a gbɛla ka ō lɛ oyeeyi ku uwɔ gwɛɛya lɛ Ujehofa wɛ ɔdā ijeeyi a?
ƆDI NƐ A NWU A?
Ihɔtu nɛ alɔ lɛ lɛ Ujehofa a ya nɛ alɔ gē je iyi alɔ gwɛɛya lɛ ɔ klla ya ubatisim a.
Aɔka ō tu alɔ ɛlá kwu ɔdā nɛ alɔ nwu
-
Ɔdiya ɛɛ nōó cɛgbá ku alɔ bi ɛjɛɛji ɔtu ku alɔ le yihɔtu ku Ujehofa klla gba ɔ ɛ̄gbā a?
-
Ɛgɛnyá nɛ Ujehofa gē hɔha ce ācɛ nōo lɛ ubatisim ya ɛ ma?
-
A géē dɔka ō lɛ iyi uwɔ gwɛɛya lɛ Ujehofa?
JILA ƐLĀ NYĀ MÁ TŌŌTƆ̄Ɔ̄
Má ɔdā nōo ya ɛɛ nɛ ɔcɛ ō gwiije éyi mla ɔcɛ ō ta ubɔlu cɛ ō lɛ iyi uwa gwɛɛya lɛ Ujehofa a.
Ɔka Nɛ Aɛdrɔ Gē Da—Ɔdi Nɛ Um Gáā Ya Mla Oyeeyi Ku Um A?—Ō Lɛ Eyī Má Ɔdā Nōo Ya Ŋma Igbihi A (6:54)
Má ɔdā ɔhá nōo ya ɛɛ nɛ a cika ō lɛ iyi uwɔ gwɛɛya lɛ Ujehofa a.
“Why Dedicate Yourself to Jehovah?” (The Watchtower, January 15, 2010)
Ipu uvidio ku ijé nyā a, má ɛgɛ nɛ ācɛ nōo yɔ i je iyi uwa gwɛɛya lɛ Ujehofa yɔ i gweeye a.
Ipu ɔka ku “For Years I Wondered, ‘Why Are We Here?’ ” má ɔdā nōo ta ɛ́nɛ́ éyi abɔ kóō gbɛla lɛyikwu ɔdā nōo cika ō cɛgbá lɛ ɔ fiyɛ duu ipu oyeeyi ku nu a.
“The Bible Changes Lives” (The Watchtower, November 1, 2012)
