ANG ỌJẸ́JẸ 46
Ịyẹ Tị́ Du Ká Baba Nyọka Hu Ịlọng Ju IJihova ụ-Ụbwọ Bala ọ-ka Hu Enyi Ohe?
Ọngịnyị kaa hu ịlọmwụ ju iJihova ụ-ụbwọ bwula ọ-chọọ ehe ẹ-ẹpwụ nya abwọ ọrịrị nyori ọwa nyị ka gbịgba họọ kem bala ọ-ka hu irya nyamwụ kụ ịlahị ẹ-ẹpwụ nya ọhịhị. (Eje Ọnyịịla 40:8) Ụka kọ họ ịnyị kpá lẹ, ọ kaa hu enyi Ohe lẹlẹ. Ọọwa kaa mẹjẹ nyori o hu ịlọmwụ jwoo ụ-ụbwọ lẹ. Eje ọchịchị nyọka hu ịlọhị ju iJihova ụ-ụbwọ à ri ọlẹ kọ la kpọnchị gụgụ wuu lẹ. Eje ọchịchị ọtụka ọwẹ ka yẹ ọhịhị nyang da myị́. Lẹ ịyẹ à tị́ ka gung gbịla nyọka cheje ọwẹ?
1. Ịyẹ à tị́ kaa gu ọngịnyị gbịla nyọka hu ịlọmwụ ju iJihova ụ-ụbwọ?
Ọháha à kaa guhi gbịla nyọka hu ịlọhị ju iJihova ụ-ụbwọ lẹ. (1 ịJọn 4:10, 19) ỊBayịbụụ byihi yẹkẹẹ: “Ọngọlahị Ohe Oluhye nyang ka háng nya ịlẹhị-ịlẹhị bwu ẹpwụ nya ọkịlẹtụ nyang wuu, bwu ẹpwụ nya ugbodu okpukpuru nyang wuu, bwu ẹpwụ nya irya omeme nyang wuu, bwu ẹpwụ nya ọngịrị nyang wuu ịnyịnyị.” (ỊMakị 12:30) Ahị ka mẹjẹ nyori Ohe háahị bwula ẹla ọlẹ kahị kaa ya. Ọ́ tị ba ọọwa kem ka, ahị ka mẹjẹ nyori ọ háahị bwula ang ọlẹ kahị kaa họ. Jaabwọ ká ọnyang bala ọlẹng ịlẹ kị há awụlẹ yẹẹyẹẹ kaa ye awụlẹ, ịnyị ọháha ọlẹ kahị la ẹ-ẹga nya iJihova à kaa guhi gbịla nyọka hu ịlọhị jwoo ụ-ụbwọ bala ọ-ka hu enyi Ohe lẹ.
2. Ahị ọwawa iyina iJihova à tị́ nwụlanọ gbe Alibeenu nyamwụ ịlẹ kị hu enyi Ohe?
Ụka ká hu enyi Ohe, à ka ri ụpa nya ugbiyegu nya iJihova ọlẹ kọ myị̀ la ọkẹkẹnị. Ụka ọọwa, ọ ka mẹ ọháha nyamwụ jẹ ẹ-ẹga nyang a-agbẹyị lụmẹ-lụmẹ bala ọ-tụng ju ịlọmwụ chwẹẹ gụ abwọlẹ kọ la lẹẹlẹẹ. (Wa ịMalakayị 3:16-18.) IJihova ka ri Adang, ọ́ tị ba ọọwa ka, à ka la aanịna nya olegu ụpa nya odehe wuu, ịlẹ kị la ọháha ẹ-ẹga nya iJihova bala ẹga nyang ahụ ịnyịnyị. (Wa ịMakị 10:29, 30.) À tị baba nyọka hu ẹta ẹdịyẹ ịhyẹ ene á ka jẹ́-ẹ hu enyi Ohe. À baba nyọka jẹ́ ang u-uhye nya iJihova, la ọháha ẹ-ẹga nyamwụ, bala ọ-la ọmyịmyị ẹ-ẹga nya Ọnyị nyamwụ. Ọọwa lẹ, a ka hu ịlọng ju iJihova ụ-ụbwọ lẹlẹ. Kori ká hu ẹta ẹdịyẹ ịwẹ bala o-hu enyi Ohe lẹ aalẹ, à juwa ụ-ụgbẹyị nyọka yé ọkẹkẹnị gboyi myị́ oyi lẹ. Omyi Ẹla nya Ohe yẹkẹẹ: ‘Enyi Ohe ohuhu ri ang-ẹjẹẹ nya ọchịda,’ lee enyi Ohe ohuhu wẹẹ chịnụ da.—1 iPita 3:21.
JẸ́ GỤ ỌỌWA
Kụ ẹhị yẹ ang odudu ká baba nyọka hu ịlọng ju iJihova ụ-ụbwọ bala ọ-ka hu enyi Ohe.
3. Ahị wuu ka chụ ọngọlẹ kahị ka gbịgba ha pyii
Lụka onyogo ọ-ọpyị nya Isirẹlụ, angịhyẹ me nyori ịwa nyị ka jẹ́-ẹ gbịgba ha iJihova bala ịBaalụ ohe nya ọnọọkịla, ụka ookpokpo. Ma iJihova du Ịlayịja ọlọmwụ nyamwụ ẹrụ kele kaka nwụ irya ọtịpyọ ọwẹ rịrị. Wa 1 Ịdịrịhụ 18:21, kanụ ya ẹla u-uhye nya ịtọ ẹla ọlẹ:
-
Eje oyina ala Isirẹlụ à tị́ baba nyọka chị?
Lala ala Isirẹlụ ịwẹ, ahị baba nyọka cheje u-uhye nya ọngọlẹ kahị ka gbịgba ha. Wa iLuku 16:13, kanụ ya ẹla u-uhye nya ịtọ ẹla ịlẹ:
-
Ịyẹ tị́ du kahị ka jẹ́-ẹ tụ́ ịgba ọgbagba nya iJihova bala ịnya ọngọkịla lee ang ọkịla, bawụlẹ ka?
-
Ányị ahị tị́ ka bwu mẹjẹ iJihova nyori ahị chụ nyọka gbịgba họọ?
4. Kụ irya kpori-kpori ju ọháha ọlẹ ká iJihova la ẹ-ẹga nyang
IJihova ya āhị lụmẹ-lụmẹ hahị. Ịyẹ ahị à tị́ ka jẹ́-ẹ ya họọ? Yẹ IFIM ọwẹ.
Agbẹyị iyina iJihova à tị́ mẹ ọháha nyamwụ jẹ ẹ-ẹga nyang? Wa Eje Ọnyịịla 104:14, 15 bala 1 ịJọn 4:9, 10, kanụ ya ẹla u-uhye nya ịtọ ẹla ịlẹ:
-
Āhị oyina bwu ẹga nya iJihova à tị́ myịng lẹhị gụgụ wuu?
-
Ányị ẹla nyamwụ à tị́ lang chajị nya āhị ịwẹ?
Ụka ká ọngịnyị á ya āhị ọlẹ kọ háahị yẹẹyẹẹ hahị, ahị kaa tịtọ nyọka mẹjẹ ọngọọwa nyori nyị myịhị lẹhị. Wa Ehile Ọmada 16:17, kanụ ya ẹla u-uhye nya ịtọ ẹla ọlẹ:
-
Ụka ká kụ irya nya ang ịlẹ wuu ká iJihova họ hang, ọọwa tị́ kaa gung gbịla nyọka họ ịyẹ họọ?
5. Ịlọng o-hu ju iJihova ụ-ụbwọ ka kpa ahị ọwawa wang
Angịnyị lụmẹ-lụmẹ me nyori ohi oruru, ụkụrwọ ọnyịịla ọlala, bala okpoko ọlala nyị ka ya ọkẹkẹnị haa. Ẹlịlẹhị ịnyị? Yẹ IFIM ọwẹ, kanụ ya ẹla u-uhye nya ịtọ ẹla ịlẹ:
-
Nanana nyori olo ọdada há ọlẹng ọlẹpwụ nya ifim ọwẹ, ịyẹ tị́ du kọ tụụbwọ hi ụkụrwọ ọwẹ?
-
O cheje nyọka hu ịlọmwụ ju iJihova ụ-ụbwọ ọkọkọ nya olo ọdada. À me irya kọ cheje ọnyịịla? Ịyẹ tị́ du?
Ene ká ọlẹrụ ịPọlụ ri Ọngịnyị nya ịKịrayịsị, ọ la ụkụrwọ ọtụka-ọtụka. Ọ jẹ́ ehile nya ala iJuu e-ekpeleji nya ọngọmẹjẹ ọgbẹgbịlẹ ọhẹ. Ma, ọ tụụbwọ hi ọọwa beji nyọka ri Ọngịnyị nya ịKịrayịsị. ỊPọlụ chị ijẹma? Wa Ala iFilipayị 3:8, kanụ ya ẹla u-uhye nya ịtọ ẹla ịlẹ:
-
Ịyẹ tị́ du ká ịPọlụ ya nyori ang ịlẹ kọ họ ene kọọ ri Ọngịnyị nya ịKịrayịsị nyị ri “ang i-hi deeji ịlọtẹwụụ”?
-
Ịyẹ ọ tị́ yé kwiwa nya ang ịịwa?
-
Ịyẹ tị́ ka du ká ọhịhị nyang ka há gụ, ọ-ka gbịgba ha iJihova lee ọ-ka họ ang ịkịla ọ-ọhịhị tị́?
Ụka ọlẹ ká ịPọlụ ri Ọngịnyị nya ịKịrayịsị, ang ịlẹ ko yé gụ ang ịlẹ kọ tụụbwọ hi hwẹẹ
ANGỊHYẸ KAA YẸKẸẸ: “M̀ jẹ́ ká ẹlịlẹhị à lẹẹ lẹ, ma ḿ nwụlanọ nyọka hu enyi Ohe lẹka.”
-
Ịyẹ tị́ du kọ pwoku nyọka hu ịlọng ju iJihova ụ-ụbwọ?
ẸLỊYẸ A TỊ́ JẸ́?
Ọháha à kaa guhi gbịla nyọka hu ịlọhị ju iJihova ụ-ụbwọ bala ọ-ka hu enyi Ohe lẹ.
Ẹlịyẹ A Tị́ Yụbwọ Chị?
-
Ịyẹ tị́ du ká iJihova à chịla kọ ka háahị bwu ọkịlẹtụ bala ọ-ka gbịgba ha?
-
Ányị iJihova à tị́ kaa wahị kụrụ Alibeenu nyamwụ ịlẹ kị hu enyi Ohe?
-
À tịtọ nyọka hu ịlọng ju iJihova ụ-ụbwọ?
JẸ́ ANG ỊLẸ DỌỌ U-UHYE
Yẹ ang odudu ká ọngọmwẹjẹ bala ọngọ da olo nya ụbwọ chụ nyọka hu ịlaa ju iJihova ụ-ụbwọ.
Anjwo Kaa Tọ Wo—Ịyẹ M Tị́ ka Họ La Ọhịhị Nyam?—Ịtịya Ọkpụkpụ (6:54)
Yẹ ang ịkịla ịlẹ kị du ká baba nyọka hu enyi Ohe.
Ẹ-ẹpwụ nya ifim nya eje ọwẹ, yẹ ọkẹkẹnị nya angịlẹ kị chụ nyọka hu ịlaa ju iJihova ụ-ụbwọ.
O-oja ọlẹ ko ri, “Ẹ-Ẹpwụ nya Ẹka Lụmẹ-lụmẹ, M̀ Kaa Tịlọm Wo nya Ang Odudu ká Ohe Họhị,” yẹ ang ọlẹ kọ gu ọnyang ọhẹ gbịla nyọka kụ ẹhị yẹ ang ịlẹ kị baba gụ ọ-ọhịhị nyamwụ.
“ỊBayịbụụ Kaa Yẹ Ọhịhị Da” (Ẹpwang ọ-Kụ Gbeji nya ahyẹẹnụ 1 nya Ọya Ọkụrụ Ọhọhẹ, 2012)
