TOLUMỌYE 46

Tetuu Kị Duonị Angọdịẹpaamọ Jehovah Pịrị Dá Benibilemọ Agbẹị Emi A O?

FARỊ

Iné angọdịẹpaamọ Jehovah pịrịmụ yọ kị yelaa dẹịn ye nị ị́mịnị sẹlẹ angọ pịrị a paaemi ye. Ị́mịnị Jehovah bẹtịbị kị karịmịnị, má wo dọụbara kị mịẹmịnị bara akị tẹẹbịbị mịẹ kị angọdịẹpaamọ. (Psalm 40:8) Ị́ bịsẹ bara mịẹ daba, kịrị ị́mịnị benibile a paa dẹ. Benibile mị, ị́mịnị angọdịẹpaamo Jehovah pịrịdẹ bara kị mịẹ gaan paamọ kịmịsẹ dịamịnị. Teeki baratụa ị́ pịrị wẹrị iné angọdịẹpaamọ akị Jehovah pịrịmịnị a o?

1. Teeki baratụa kịmị pịrị wẹrị angọdịẹpaamọ akị Jehovah pịrịmịnị a o?

Wó akị Jehovah ghọ nana wẹrị emi tarị kị baratụa wó pịrị wẹrị angọdịẹpaamo Jehovah pịrịmịnị. (1 John 4:10, 19) Bible gbaa bara mị: “Iné adụdụsẹ, iné angọsẹ, iné ịkịọụsẹ má iné kụrọsẹ akị Jehovah iné Ọkpọnanaowei tarị.” (Mark 12:30) Wó mịẹmịnị yebo mọ, bá ẹrẹ mịnị egberibo mọ, Jehovah wó mọ tarị emi bara mịẹdịa mịnị. Tarị baratụa owei mọ ere mọ pịrị wẹrị zọzọ nana mịnị bara kị, wó akị Jehovah a nana wẹrị emi tarị mị, baratụa wó pịrị wẹrị angọdịẹpaamo Jehovah pịrị wẹrị benibile mịnị.

2. Jehovah te tarịama ka kị benibile dẹ kịmịama pịrịmịnị a o?

Ị́ benibile daba, ị́mịnị bo Jehovah warịbolou kịmị a paa dẹ. Jehovah ị́ tarị wẹrị emi bara ị́ mọ nimi mịnị, má ị́mịnị bo Jehovah mọ naịn dẹịn mịnị. (Malachi 3:16-18 goo.) Jehovah bo ị́ daụ ka paamịnị. Akpọyọrẹịsẹ ị́mịnị bo Jehovah tarị bá ị́ tarị emi bịna-otuama nanamịnị. (Mark 10:29, 30 goo.) Gesii bara mị, ị́mịnị zụa yeama mịẹ dẹ kị benibile mịnị. Jehovah emi bara, ụ tarị mụ bara, má peibolou akị Jesus a tụa mụ bara bị, ị́ mọ tolumọ nimi mịnị. Fatu mị, ị́mịnị angọdịẹpaamọ Jehovah pịrị mịnị. Bei yebosẹ ị́ mọ mịẹ siin wẹrị benibile daba, ị́mịnị inyenrintimi beseri beseri laa a paa emi. Bible gbaa mị: “Benibile . . . kpọ bei tịẹkiri mị a zụọ mịnị.”—1 Peter 3:21.

EBIBARA TUUDỌỤ

Angọdịẹpaamọ Jehovah pịrị wẹrị benibilemụ yọmị, yelaa ị́ pịrị emi tuu diitụa.

3. Wó kịmịsẹ wó karị mụ kịmị sẹlẹ angọ pịrị mịnị

Oruseri ifie mị, zụa Israel-otuama amịnị laa Jehovah mọ Baal mọ akị kẹnị karịmọ a paa emi bara kị tọn wẹrị mị. Anịa Jehovah wo bụrụ-owei Elijah fịrịmọ mú bịsẹ sei iroroye bị kịrịịgha bara gbaa a pịrị mị. 1 Kings 18:21 goo dá, mị biibịbị kẹrị ẹrẹtei:

Israel-otubo teeki sẹlẹ angọ pịrị dọụtimi ma o?

Israel-otu paamọ bara bị, omịnị kpọ wó karị mụ ụbọ sẹlẹ angọ pịrịmịnị. Luke 16:13 goo dá, bei biibịbịmọ kẹrị ẹrẹtei:

Tetuu kị duonị omịnị Jehovah mọ zịnị ye anịghakpọ zịnị kịmị mọ akị kẹnị karịmọ a paagha o?
Omịnị tebara ka kị Jehovah kị wó mọ karị dọụ emi bara mịẹdịa mịnị a o?

4. Jehovah ị́ tarị wẹrị emi bara kẹrị iroro

Jehovah biin yelaa dịẹpịrịyeama ka kị wó pịrị dẹ. Omịnị bá te ye ka kị Jehovah pịrị a paa emi a o? VIDIO farị.

VIDIO: Iné Dịẹpịrịyebo Akị Jehovah Pịrị (3:04)

Jehovah te ụwọụama ka kị ị́ tarị emi bara mịẹdịa dẹ a o? Psalm 104:14, 15 má 1 John 4:9, 10 goo dá, mị biibịbịbo kẹrị ẹrẹtei:

Jehovah akị wó pịrị yebosẹ teeki ị́ dịsẹ dẹịn emi a o?
Jehovah bei yemọ akị ị́ pịrịdẹ mị, omịnị te paa kịmị bara kị ị́mịnị mọ tọn ma o?

Kịmị wó dịsẹ emi dịẹpịrịye akị wó pịrị daba, omịnị tọrụkẹrị emi bara mịẹ akị ụbọ dịa mịnị. Deuteronomy 16:17 goo dá, mị biibịbị kẹrị ẹrẹtei:

Jehovah mịẹ ị́ pịrị dẹ yemọse ị́ mọ keri iroro bị, ị́mịnị ba te ye ka kị Jehovah pịrị mịnị a o?

5. Angọdịẹpaamọ Jehovah pịrịmịnị yọmị biin tarịama k’emi

Biin kịmịama tọn wẹrị emi bara mị, amịnị oroupa, opu school a mú anịghakpọ sịlị nana daba amịnị pọwẹị mịnị. Bịsẹ bara kị emi a o? VIDIO farị dá, bei biibịbịmọ kẹrị ẹrẹtei.

VIDIO: Ball Gbọlụ Kị Iné Akpọ Bọọ Yelaa Dẹịn Mị (5:45)

Vidio bolou bị, ball gbọlụtimi kịmị mị, ball gbọlụ dịsẹ emi kị gbaa kpọ, tetuu kị duonị omịnị ball gbọlụ ghọ barasin ma o?
Kịmị bị ball gbọlụ a barasin wẹrị wo angọdịẹpaamọ Jehovah kị pịrị mị. Omịnị ebiye kị sẹlẹ angọ pịrị ma? Tetuu a o?

Fịrịmọpaa-owei Paul naa Christtuuduo kịmị a paaghatimi ifie mị, omịnị opu fun goo-owei a paa dọụtim’mị. Omịnị kẹnị oroupaa Jew oloko tolumọ-owei kirikonu ka oloko tolumọtim’mị. Anịa omịnị bịsẹ yebosẹ a barasin wẹrị bo Christtuuduo kịmị a paa mị. Ị nimi wẹrị a omịnị mọ gbaa ma? Philippians 3:8 goo dá, bei biibịbịmọ kẹrị ẹrẹtei: