LEKSION 46
Apay nga Agdedikar ken Agpabautisarka?
No idedikarmo ti biagmo ken Jehova, ikarim kenkuana babaen ti kararag nga isu laeng ti dayawem ken iyun-unam nga aramiden ti pagayatanna iti biagmo. (Salmo 40:8) Kalpasanna, mabalinmon ti agpabautisar. No aramidem dayta, ipakpakitamon iti publiko a nagdedikarkan. Ti panangidedikartayo iti biagtayo ken Jehova ti kapatgan a desision a maaramidtayo. Ania ti mabalin a mangtignay kenka a mangaramid iti dayta a serioso a desision a mangbalbaliw iti biagmo?
1. Ania ti mangtignay iti maysa nga agdedikar?
Agdedikartayo gapu ta ay-ayatentayo ni Jehova. (1 Juan 4:10, 19) Iparparegta ti Biblia: “Ayatem ni Jehova a Diosmo iti amin a pusom ken amin a kararuam ken amin a panunotmo ken amin a pigsam.” (Marcos 12:30) Maipakitatayo nga ay-ayatentayo ni Jehova iti sao ken aramid. Kasla dayta iti dua nga agin-innayat a tao. Agkasarda ta talaga nga ay-ayatenda ti maysa ken maysa. Kasta met, agdedikar ken agpabautisartayo gapu ta ay-ayatentayo ni Jehova.
2. Ania dagiti bendision nga ipaay kenka ni Jehova no mabautisaranka?
No mabautisaranka, agbalinka a paset ti naragsak a pamilia ni Jehova. Gapu iti dayta, mariknam ti ayatna iti adu a pamay-an, ken agbalinka pay a nadekdekket kenkuana. (Basaen ti Malakias 3:16-18.) Agbalin nga Amam ni Jehova. Ngem saan la a dayta. Maaddaanka met iti pamilia iti intero a lubong a mangay-ayat kenkuana ken mangay-ayat kenka. (Basaen ti Marcos 10:29, 30.) Siempre, adda dagiti masapul nga aramidem sakbay a mabautisaranka. Masapul nga am-ammuem ni Jehova, ayatem, ken mamatika iti Anakna. Ken siempre, masapul nga idedikarmo ti biagmo ken Jehova. No aramidem dagita, sa agpabautisarka, posible nga agbiagkanto nga agnanayon. Kuna ti Sao ti Dios: “Ti bautismo . . . ti mangisalakan met kadakayo ita.”—1 Pedro 3:21.
AMMUEM TI AD-ADU PAY
Kitaem no apay nga importante nga agdedikarka ken Jehova ken agpabautisarka.
3. Masapul a pilientayo no asino ti pagserbiantayo
Impagarup idi ti dadduma nga Israelita a mabalinda a paggiddanen a dayawen ni Jehova ken ti ulbod a dios a ni Baal. Ngem inusar ni Jehova ni propeta Elias tapno mailinteg ti kamali a kapanunotanda. Basaen ti 1 Ar-ari 18:21, sa pagsaritaan daytoy a saludsod:
-
Ania idi a desision ti masapul nga aramiden dagiti Israelita?
Kas kadagiti Israelita, masapul a pilientayo no asino ti pagserbiantayo. Basaen ti Lucas 16:13, sa pagsaritaan dagitoy a saludsod:
-
Apay a saantayo a mabalin a paggiddanen a dayawen ni Jehova ken ti asinoman wenno aniaman a banag?
-
Kasanotayo a maipakita ken Jehova nga isu ti kayattayo a pagdayawan?
4. Panunotem ti ayat ni Jehova kenka
Nakaad-adu ti nagsasayaat nga inted ni Jehova kadatayo. Ania met ti maitedtayo kenkuana? I-play ti VIDEO.
Kasano nga impakita ni Jehova nga ay-ayatennaka? Basaen ti Salmo 104:14, 15 ken 1 Juan 4:9, 10, sa pagsaritaan dagitoy a saludsod:
-
Ania dagiti regalo ni Jehova a pagyamyamanam unay?
-
Ania ti mariknam kenkuana gapu kadagita a regalona?
No magustuantayo unay ti nairegalo kadatayo, kayattayo nga ipakita nga ap-apresiarentayo ti nagregalo. Basaen ti Deuteronomio 16:17, sa pagsaritaan daytoy a saludsod:
-
No panunotem ti amin nga inaramid ni Jehova para kenka, ania met ti kayatmo nga ited kenkuana?
5. Adu ti maawatmo a bendision no agdedikarka ken Jehova
Patien ti adu a naragsakda no sikatda, napintas ti trabahoda, wenno adu ti kuartada. Agpayso kadi dayta? I-play ti VIDEO, sa pagsaritaan dagiti sumaruno a saludsod.
-
Iti video, apay a tinallikudan ti maysa nga atleta ti soccer uray pagay-ayatna unay dayta?
-
Imbes nga agpokus iti soccer, indedikarna ti biagna ken Jehova. Panagkunam, husto kadi ti desisionna? Apay?
Sakbay a nagbalin a Kristiano ni apostol Pablo, nangato ti propesionna. Inadalna ti linteg dagiti Judio ket sikat a mannursuro ti nangisuro kenkuana. Ngem tinallikudanna dayta tapno agbalin a Kristiano. Adda kadi nagbabawyanna? Basaen ti Filipos 3:8, sa pagsaritaan dagitoy a saludsod:
-
Apay nga imbilang ni Pablo “kas adu a basura” dagiti inar-aramidna idi saan pay a Kristiano?
-
Ania ti naawatna gapu kadagiti insakripisiona?
-
Adda kadi mapanunotmo a nasaysayaat pay a pangusaram iti biagmo no di ti panagserbi ken Jehova?
Idi nagbalin a Kristiano ni Pablo, adayo nga ad-adu ti naawatna a bendision ngem iti insakripisiona
KUNA TI DADDUMA: “Ammok a daytoy ti kinapudno, ngem saanak pay a nakasagana nga agpabautisar.”
-
Panagkunam, apay a nakapatpateg nga idedikarmo ti biagmo ken Jehova?
SUMARIO
Idedikartayo ti biagtayo ken Jehova ken agpabautisartayo gapu ta ay-ayatentayo isuna.
Rebiu
-
Apay a maikari ni Jehova a dayawen ken ayatentayo iti amin a pusotayo?
-
Ania dagiti bendision nga ipaay ni Jehova kadagiti bautisado a Saksina?
-
Kayatmo kadi nga idedikar ti biagmo ken Jehova?
AGDISKOBREKA PAY
Kitaem no apay a pinili ti maysa a musician ken maysa nga atleta nga idedikar ti biagda ken Jehova.
Saludsod Dagiti Agtutubo—Ania ti Aramidek iti Biagko?—Pananglagip iti Napalabas (6:52)
Kitaem ti dadduma pay a rason no apay nga agdedikarka.
“Apay nga Idedikarmo ti Biagmo ken Jehova?” (Ti Pagwanawanan, Enero 15, 2010)
Iti daytoy a music video, kitaem no apay a naragsak dagidiay mangidedikar iti biagda ken Jehova.
Iti artikulo nga “Adu a Tawen a Pinampanunotko No, ‘Apay nga Agbibiagtayo?’” kitaem no ania ti nakatulong iti maysa a babai a mangpanunot no ania ti kapatgan kenkuana.
“Ti Biblia Balbaliwanna ti Biag” (Ti Pagwanawanan, Nobiembre 1, 2012)
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
