ĨSOMO YA 46
Nĩkĩ Waĩle Kwĩyumya na Kũvatiswa?
Mũndũ eyumasya kwa Yeova kwa kũmwatha mboyanĩ kana akamũthaithaa e weka, na aivĩtasya kwenda kwake mbee thayũnĩ wake. (Savuli 40:8) Ĩtina wa ũu, nĩwʼo mũndũ ũvatisawa. Yĩla mũndũ wavatiswa ethĩawa oonyʼa andũ ala angĩ kana nĩwĩyumĩtye kwa Yeova. Kwĩyumya kwa Yeova nĩwʼo ũtwi ũla wa vata vyũ tũtonya kwĩka thayũnĩ witũ. Nĩ kyaũ kĩtonya kũkwĩkĩa vinya wĩke ũtwi ũsu wa vata na ũtonya kũalyũla thayũ waku?
1. Nĩ kyaũ kĩtonya kwĩkĩa mũndũ vinya eyumye kwa Yeova?
Kũmwenda Yeova nĩkwʼo kũtumaa twĩyumya kwake. (1 Yoana 4:10, 19) Mbivilia ĩtwĩĩte atĩĩ: “[Mwende] Yeova Ngai waku na ngoo yaku yonthe, na thayũ waku wʼonthe, na kĩlĩko kyaku kyonthe, na vinya waku wʼonthe.” (Maliko 12:30) Twonanasya kana nĩtũmwendete Ngai ti o kwa ndeto syoka, ĩndĩ o na kwĩsĩla meko maitũ. O tondũ andũ elĩ me ndũũ matwaanaa, nowʼo wendo witũ kwa Yeova ũtũsukumaa kwĩyumya kwake na kũvatiswa.
2. Nĩ moathimo meva Yeova ũnengae athũkũmi make ala avatise?
Yĩla wavatiswa, ũtwʼĩkaa ũmwe wa ala me nthĩnĩ wa mũsyĩ mũtanu wa Yeova. Na wĩthĩawa ũtonya kwĩyonea wendo mwingĩ wa Yeova kwa nzĩa syĩ kĩvathũkanyʼo, na kĩu kĩyĩũtetheesya kũmũthengeea mũnango. (Soma Malaki 3:16-18.) O vamwe na kwĩthĩwa na ngwatanĩo nzeo vamwe na Ĩthe waku wa ĩtunĩ, Yeova, ũkakwata mũsyĩ wa ana-a-asa na eĩtu-a-asa ĩũlũ wa nthĩ yonthe ala mamwendete Yeova na makwendete. (Soma Maliko 10:29, 30.) Ĩndĩ, ve matambya mana waĩle kwosa ũtanamba kũvatiswa. Nĩwaĩle kwĩmanyĩsya ĩũlũ wa Yeova, ũmwende, na ũyĩthĩwa na mũĩkĩĩo kũla kwĩ Mwana wake. Na mũthya, no nginya wĩyumye kwa Yeova. Woosa matambya asu na ũivatiswa, ũkeethĩwa wĩ nzĩanĩ ĩla ĩtonya kũũtongoesya thayũnĩ wa tene na tene. Ndeto ya Ngai yaĩtye: “Ũvatiso . . . o nawʼo yu nũũmũtangĩĩa.”—1 Vetelo 3:21.
ĨMANYĨSYE MŨNANGO
Ĩmanyĩsye wone nĩkĩ ne ũndũ wa vata wĩyumye kwa Yeova na ũivatiswa.
3. No nginya ithyonthe tũnyuve nũũ tũũmũthũkũma
Mbaĩnĩ ya tene ya Isilaeli ve andũ amwe masũanĩaa kana no mamũthaithe Yeova, na ĩvindanĩ o yĩu maithaitha ngai ya ũvũngũ Mbaali. Ĩndĩ Yeova nĩwatũmie mwathani wake Eliya akamatetheesye kũlũnga woni ũsu ũtaaĩle. Somai 1 Asumbĩ 18:21, na ĩndĩ mũineenea ĩkũlyo yĩĩ:
-
Aisilaeli maaĩle kwĩka ũtwi wĩva?
O ta Aisilaeli, no nginya tũnyuve nũũ tũũthũkũma. Somai Luka 16:13, na ĩndĩ mũineenea makũlyo aa:
-
Nĩkĩ tũtesa kũmũthaitha Yeova na tũithaitha mũndũ ũngĩ kana kĩndũ kĩngĩ?
-
Tũtonya kũmwonyʼa Yeova ata kana nĩwe tũtwʼĩte kũthaitha?
4. Vindĩĩsya ũndũ Yeova ũkwendete
Yeova nũtũnengete mĩthĩnzĩo mingĩ ya mwanya. Naitũ tũtonya kũmũnenga kyaũ? Ĩloelei VITIO.
Nĩ kwa nzĩa imwe ta syĩva Yeova wonanĩtye kana nũkwendete? Somai Savuli 104:14, 15 na 1 Yoana 4:9, 10, na ĩndĩ mũineenea makũlyo aa:
-
Nĩ mĩthĩnzĩo yĩva kuma kwa Yeova ũtũngaa mũvea kwondũ wayo?
-
Mĩthĩnzĩo ĩsu ĩtumaa wĩwʼa ata kũmwelekela?
Yĩla twanengwa mũthĩnzĩo wa kĩndũ twendete, nĩtwendaa kwonanyʼa kana nĩtũũtũnga mũvea kwa ũla watũnenga mũthĩnzĩo ũsu. Somai Kũtũngĩlĩlwa Kwa Mĩao 16:17, na ĩndĩ mũineenea ĩkũlyo yĩĩ:
-
Wasũanĩa maũndũ maseo ala Yeova ũkwĩkĩte, kĩu kĩtumaa wenda kũmũnenga kyaũ?
5. Kwĩyumya nĩkũetae moathimo maingĩ
Andũ aingĩ maĩkĩĩaa kana nguma, wĩa mũseo, kana mbesa, no imaetee ũtanu. Ĩndĩ ũu nĩwʼo? Ĩloelei VITIO, na ĩndĩ mũineenea makũlyo aa maatĩĩe:
-
O na kau mũthaũki ũsu nĩwendete kũthaũka mũvĩla, nĩkĩ watiie wĩa ũsu?
-
Nĩwatwie kũmwĩyumĩsya Yeova ĩndĩ ti kũthaũka mũvĩla. We nũkwona ta weekie ũtwi ũla waĩle? Nĩkĩ wasũngĩa ũu?
Mũtũmwa Vaulo atanamba kũtwʼĩka Mũklĩsto, aĩ na mwanya wa kũtwʼĩka mũndũ wĩ nguma mũno. Nĩweemanyĩĩtye mĩao ya Kĩyuti na mwalimũ ũmwe waĩ nguma. Ĩndĩ nĩwatiie maũndũ asu onthe nĩ kana atwʼĩke Mũklĩsto. We Vaulo nĩweelilaa nũndũ wa ũtwi ũsu weekie? Somai Avilivi 3:8, na ĩndĩ mũineenea makũlyo aa:
-
Nĩkĩ Vaulo waisye kana maũndũ ala weekaa atanamba kũtwʼĩka Mũklĩsto “[amonaa] ta mavuti” kana takataka?
-
Atethekie ata nũndũ wa ũtwi ũsu weekie?
-
We ũtonya kwasya ata waelekanyʼa kũmũthũkũma Yeova, na maũndũ angĩ ala ũtonya kwĩka thayũnĩ waku?
Yĩla Vaulo watwʼĩkie Mũklĩsto, akwatie moathimo maingĩ waelekanyʼa na maũndũ ala watiie
ANDŨ AMWE MAASYA: “Vai vata wa kwĩyumya ũmũthũkũme Ngai. Mũndũ aĩle kũtanĩa thayũ ũndũ ũkwenda.”
-
We wĩona nĩkĩ nĩ ũndũ waĩle wĩyumye kwa Yeova?
KĨLA TWEEMANYĨSYA
Twĩyumasya kwa Yeova na kũvatiswa nũndũ nĩtũmwendete.
Makũlyo ma Kũsyokeleela
-
Nĩkĩ Yeova wendaa tũmwende na tũimũthaitha na ngoo yitũ yonthe?
-
Yeova aathimaa ata athũkũmi make ala avatise?
-
We no wende kwĩyumya kwa Yeova?
MAŨNDŨ ANGĨ MA KWĨMANYĨSYA
Ĩloele vitio wone ũndũ mũndũ mũka ũmwe waĩ mwini, na mũndũũme ũmwe wathaũkaa mũvĩla manyuvie kwĩyumya kwa Yeova.
Andũ ma Mũika Makũlasya—Ndonya Kũtũmĩa Thayũ Wakwa Ata?—Kũsũanĩa Ĩvinda Ĩvĩtu (6:54)
Soma wone maũndũ angĩ matonya kũũtethya wĩyumye kwa Yeova.
“Nĩkĩ Waĩlĩte Kwĩyumya kwa Yeova?” (Mũsyaĩĩsya, Matukũ 15, Mwei wa 1, 2010)
Ĩloele wathi ũũ wone ũtanu ũla ala meyumasya mamũthũkũme Yeova methĩawa nawʼo.
Soma ngewa yĩ na kyongo, “Kwa Myaka Mingĩ Nĩneekũlasya, ‘Kĩeleelo kya Kwĩthĩwa Thayũ Nĩ Kyaũ?’” nĩ kana wone kĩla kyatetheeisye mũndũ mũka ũmwe amanya nĩ kyaũ waaĩle kũvĩtya mbee.
“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 11, 2012)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
