LISON 46

Pamodi ki bu debe da bu vida pa Jeová i batiza?

TOKA

Bu ta da bu vida pa Jeová óras ki bu ta promete-l na un orason ma bu ta adora sô el i ma bu ta poi se vontadi na primeru lugar na bu vida. (Salmo 40:8) Dipôs di kel-li bu ta batiza. Óras ki bu faze asi, bu ta mostra otus algen ma dja bu da bu vida pa Jeová. Da nos vida pa Jeová é kel disizon más inportanti ki nu pode toma. Kuzê ki pode pô-u ta toma kel disizon inportanti li ki ta muda bu vida?

1. Kuzê ki ta poi un algen da se vida pa Jeová?

Nu ta da nos vida pa Jeová pamodi nu ta ama-l. (1 João 4:10, 19) Bíblia ta fla-nu: ‘Bu debe ama Jeová, bu Deus, di tudu bu korason, di tudu bu alma, di tudu bu menti i di tudu bu forsa.’ (Marcos 12:30) Nu ta mostra ma nu ta ama Deus ka sô pa kuzas ki nu ta fla, má tanbê pa kuzas ki nu ta faze. Sima dôs algen ki ta kaza pamodi es ta ama kunpanheru di verdadi, anos tanbê nu ta da nos vida pa Jeová i nu ta batiza pamodi nu ta ama-l.

2. Ki bensons Jeová ta da pa kes algen ki ta batiza?

Óras ki bu batiza, bu ta fika ta faze párti di família di Jeová. Dipôs, bu ta kumesa ta xinti se amor pa bo di txeu manera, i bu ta ba ta bira más se amigu. (Lé Malaquias 3:16-18.) Jeová ta bira sima un Pai pa bo i bu ta ganha un família di irmons ku irmans na mundu interu ki ta ama-l i ki ta ama-u tanbê. (Lé Marcos 10:29, 30.) É klaru ki bu meste faze alguns kuza antis di bu batiza. Bu meste prende sobri Jeová, ama-l i ten fé na se Fidju. Dipôs, bu debe da bu vida pa Jeová. Si bu faze kes kuza li i bu batiza, bu pode vive filís pa tudu ténpu. Bíblia ta fla: ‘Batismu tanbê ta salva nhos gósi’. — 1 Pedro 3:21.

SABE MÁS

Odja pamodi ki é inportanti bu da bu vida pa Jeová i batiza.

3. Nos tudu nu ten ki skodje ken ki nu ta sirbi

Na Israel antigu, alguns algen ta atxaba ma es podia adoraba Jeová i tanbê Baal, ki éra un deus falsu. Má Jeová manda se proféta Elias pa koriji ses manera di pensa. Lé 1 Reis 18:21, i dipôs pâpia sobri kel pergunta li:

Ki disizon israelitas tinha ki tomaba?

Sima israelitas, anos tanbê nu ten ki disidi ken ki nu ta sirbi. Lé Lucas 16:13, i dipôs pâpia sobri kes pergunta li:

Pamodi ki nu ka pode adora Jeová i omésmu ténpu adora otu algen ô otu kuza?
Modi ki nu ta mostra Jeová ma nu disidi adora-l?

4. Pensa na amor ki Jeová ten pa bo

Jeová dja da-nu txeu prezenti bunitu. Kuzê ki nu pode da-l? Odja VÍDIU.

VÍDIU: Da Deus bus prezenti (3:04)

Kal ki é alguns manera ki Jeová sta ta mostra se amor pa bo? Lé Salmo 104:14, 15 i 1 João 4:9, 10, i dipôs pâpia sobri kes pergunta li:

Ki prezentis di Jeová bu ta da más valor?
Kuzê ki kes prezenti ta pô-u ta xinti pa el?

Óras ki nu dadu un prezenti ki nu gosta txeu, nu ta krê mostra gratidon pa kel algen ki da-nu el. Lé Deuteronómio 16:17, i dipôs pâpia sobri kel pergunta li:

Óras ki bu ta para pa pensa na tudu kuza ki Jeová dja faze pa bo, kuzê ki bu ta krê faze pa el?

5. Óras ki bu da bu vida pa Jeová bu ta ten txeu benson

Txeu algen ta kridita ma ser famozu, ten un bon trabadju ô txeu dinheru ta pô-s ser filís. Má kel-li é verdadi? Odja VÍDIU, i dipôs pâpia sobri kes pergunta li:

VÍDIU: N ta viveba pa futibol (5:45)

Kel djugador na vídiu gostaba txeu di futibol, má pamodi ki el para di djuga?
El disidi da se vida pa Jeová envês di vive pa futibol. Bu ta atxa ma el toma un bon disizon? Pamodi?

Antis di apóstlu Polu bira un sigidor di Jizus, el staba npenhadu na ten un karera inportanti na mundu. El studa lei di judeus ku un instrutor ki éra famozu. Má, el dexa pa tras kes kuza la pa el pode bira un sigidor di Jizus. Polu rapende di algun kuza? Lé Filipenses 3:8, i dipôs pâpia sobri kes pergunta li:

Pamodi ki Polu fla ma kes kuza ki el fazeba antis di el bira un sigidor di Jizus éra ‘lixu’?
Kuzê ki el ganha ku disizon ki el toma?
Bu ta atxa ma bu vida ta ser mutu más midjór si bu skodje sirbi Jeová? Pamodi?