LYNNONG 46
Balei Ngi Dei ban Aiti Ïalade bad Ïoh Baptis?
Phi aiti ïalade ha U Jehobah da kaba kular ïa u ha ka jingduwai ba phin mane tang ïa u bad phin buh nyngkong eh ïa u ha ka jingim jong phi. (Salm 40:8) Hadien kata, phi lah ban ïoh baptis. Da kaba leh kumta phi pyni ïa kiwei ba phi la aiti ïalade. Ka rai kaba kongsan tam kaba ngi dei ban shim ka long ban aiti ïalade ha U Jehobah. Kaei kaba pynlong ïa phi ban shim ïa kane ka rai kaba kongsan tam kaban pynkylla ïa ka jingim jong phi?
1. Kaei kaba pynlong ïa u briew ban aiti ïalade ha U Jehobah?
Ka jingieid ka pynlong ïa ngi ban aiti ïalade ha U Jehobah. (1 Ïoannis 4:10, 19) Ka Baibl ka ong ïa ngi: ‘Ieid ruh ïa U Jehobah U Blei jong me da ka dohnud jong me baroh, bad da ka mynsiem jong me baroh, bad da ka jingmut jong me baroh, bad da ka bor jong me baroh.’ (Markos 12:30) Ngi pyni ba ngi ieid ïa U Blei ym tang da ka ktien hynrei da ki kam ruh. Kum u briew bad ka briew kiba ïa ieid shisha iwei ïa iwei ki ïathoh shongkurim, kumta ruh ka jingieid jong ngi ïa U Jehobah ka pynlong ïa ngi ban aiti ïalade ha u bad ban baptis.
2. Kumno U Jehobah u kyrkhu ïa kito kiba la dep baptis bad kiba shakri ïa u?
Ynda phi la ïoh baptis phin sa long iwei na ki dkhot jong ka ïing ka sem kaba kmen jong U Jehobah. Phin sa mad ïa ka jingieid jong u ha bun ki liang, bad phin sa kham jan shuh shuh sha u ban ïa kaba mynta. (Pule Malakhi 3:16-18.) Nalor ba U Jehobah un long u Kpa jong phi, phin sa long ruh iwei na ki dkhot jong ka ïing ka sem jong u kaba dap da ki parabangeit na kylleng ka pyrthei kiba ieid ïa u bad kiba ieid ïa phi. (Pule Markos 10:29, 30.) Hynrei, phi dei ban shim katto katne ki sienjam shuwa ba phin ïoh baptis. Phi donkam ban tip bad pule shaphang U Jehobah, ban ieid ïa u, bad ban ngeit ha u Khun jong u. Ha kaba khatduh, phi dei ban aiti ïalade ha U Jehobah. Hadien ba phi la leh ïa kine bad shim ïa ka jingbaptis, phin sa ïoh ïa ka lad ban im junom. Ka Ktien U Blei ka ong: ‘Ka jingpynbaptis . . . ka pyllait im ïa phi mynta.’—1 Petros 3:21, CL BAIBL.
WAD SHUH SHUH
Peit bniah balei ka long kaba kongsan ïa phi ban aiti ïalade ha U Jehobah bad ban ïoh baptis.
3. Ngi baroh ngi dei ban jied ïano ngin shakri
Ha ri Israel mynshuwa, don kiba pyrkhat ba ki lah ban shakri lang ïa U Jehobah bad ïa uwei u bleithaw, u Baal. Hynrei U Jehobah u la phah ïa u Elijah u nongïathuhlypa ban pynbeit ïa kane ka jingpyrkhat bakla jong ki. Pule 1 Syiem 18:21, bad nangta sa peit lang ïa kane ka jingkylli harum:
-
Ka rai kaba kumno ba ki nong Israel ki la dei ban jied?
Kum ki nong Israel ngi ruh ngi dei ban jied ïano ngin shakri. Pule Loukas 16:13, bad nangta sa ïa peit lang ïa kine ki jingkylli harum:
-
Balei ngim lah ban mane lang ïa U Jehobah bad ïano ïano, ne bad ïa kaei kaei?
-
Kumno ngi pyni ïa U Jehobah ba ngi jied ban shakri ïa u?
4. Puson ha ka jingieid U Jehobah ïa phi
U Jehobah u la ai ïa ngi shibun kiei kiei kiba bha. Kaei kaba mangi pat ngi lah ban ai ïa u? Peit ïa ka VIDEO.
Ha kino ki rukom U Jehobah u la pyni jingieid ïa phi? Pule Salm 104:14, 15 bad 1 Ïoannis 4:9, 10, bad nangta sa ïa peit lang ïa kine ki jingkylli harum:
-
Kiei ki jingaiei na U Jehobah kiba phi sngewnguh bha?
-
Kumno kita ki jingai sngewbha ki pynlong ïa phi ban sngew shaphang jong u?
Haba ngi ïoh ka jingai sngewbha kaba ngi itynnad bha, ngi kwah ban pyni jingsngewnguh ïa ita iba ai ïa ngi. Pule Deuteronomi 16:17 bad nangta sa ïa peit lang ïa kane ka jingkylli harum:
-
Haba phi pyrkhat ïa kiei kiei baroh ba U Jehobah u la leh na ka bynta jong phi, ka pynlong ïa phi ban ai aïu ïa u?
5. Ka jingaiti ka wallam shibun ki jingkyrkhu
Bun ki briew ki ngeit ba ka nam, ka kam ka jam kaba biang, ne ka pisa kan pynkmen ïa ki. Hato kata ka dei shisha? Peit ïa ka VIDEO, bad nangta sa ïa peit lang ïa kine ki jingkylli harum:
-
Ha ka video, watla u nongïalehkai u sngewtynnad ban lehkai phutbol, balei pat u la iehnoh ïa kane ka kam ïalehkai?
-
U la rai ban aiti ïalade, ym ha ka jingïalehkai phutbol, hynrei ha U Jehobah. Hato phi tharai u la shim ïa ka rai kaba dei? Balei?
Shuwa ba u apostol Paul un kylla long u Khristan, u la pule ha ka kyrdan kaba heh bha. U la pule ïa ki aiñ ki Jew bad u la long u nonghikai uba pawnam. Hynrei u la iehnoh ïa kata shadien khnang ban long u Khristan. Hato u Paul u la babe? Pule Philippi 3:8, bad nangta sa ïa peit lang ïa kine ki jingkylli harum:
-
Balei u Paul u la ñiew ïa kaei kaba u la leh mynshuwa kum ka “synrum,” ne ka ñiut?
-
Pynban u la ïoh ïa kaei?
-
Kaei kaban kham pynbha ïa ka jingim jong phi, ka jingshakri ïa U Jehobah ne ban leh ïa kaei kaei?
Mynba u Paul u la long u Khristan, u la ïoh shibun ki jingkyrkhu ban ïa kaei kaba u la iehnoh
DON KIBA ONG: “Kam long kaba suk ban aiti ïa la ka jingim ha U Jehobah.”
-
Balei phi tharai ka jingaiti ka long kaba donkam?
KI MAT BAKONGSAN
Ka jingieid ka pynlong ïa ngi ban aiti ïalade ha U Jehobah bad ban ïoh jingbaptis.
Peit Biang
-
Balei U Jehobah u dei hok ban ïoh ïa ka jingieid bad ka jingmane ba pura na ngi?
-
Kumno U Jehobah u kyrkhu ïa ki shakri jong u kiba la ïoh baptis?
-
Hato phi kwah ban aiti ïalade ha U Jehobah?
PULE SHUH SHUH
Peit balei uwei u nongtem bad u nongïalehkai ki la jied ban aiti ïalade ha U Jehobah.
Peit ïa kiwei de ki daw ba balei ngi dei ban aiti ïalade ha U Jehobah.
“Balei dei ban Aiti Ïalade ha U Jehobah?” (Ka Kutphira, Kyllalyngkot 15, 2010, Phareng)
Ha kane ka video, peit ïa ka jingkmen jong kito kiba la aiti ïalade ha U Jehobah
Ha ka jingïathuhkhana “Da ki Snem Nga la Pyrkhat, ‘Balei Ngi Don Hangne?’” peit kaei kaba la ïarap ïa kawei ka briew ban tip ïa kaei kaba kongsan tam ha ka jingim jong ka.
“Ka Baibl ka Pynkylla ïa ka Jingim” (Ka Kutphira, Naiwieng 1, 2012, Phareng)
