មេរៀនទី៤៦
ហេតុអ្វីអ្នកគួរប្រគល់ខ្លួនជូនព្រះនិងទទួលការជ្រមុជទឹក?
ពេលអ្នកចង់ប្រគល់ខ្លួនជូនព្រះយេហូវ៉ា អ្នកត្រូវអធិដ្ឋានប្រាប់លោកថាអ្នកនឹងគោរពប្រណិប័តន៍តែលោកប៉ុណ្ណោះ ហើយចាត់ទុកបំណងប្រាថ្នារបស់លោកថាសំខាន់បំផុតក្នុងជីវិតអ្នក។ (ចម្រៀងសរសើរព្រះ ៤០:៨) បន្ទាប់មក អ្នកទទួលការជ្រមុជទឹក។ ដោយធ្វើដូច្នេះ អ្នកបង្ហាញមនុស្សឯទៀតថាអ្នកបានប្រគល់ខ្លួនជូនព្រះហើយ។ ការសម្រេចចិត្តប្រគល់ខ្លួនជូនព្រះយេហូវ៉ា គឺជាការសម្រេចចិត្តសំខាន់បំផុតមួយដែលយើងត្រូវធ្វើ។ តើអ្វីអាចជំរុញចិត្តអ្នកឲ្យធ្វើការសម្រេចចិត្តដ៏សំខាន់នេះ?
១. តើអ្វីជំរុញចិត្តបុគ្គលម្នាក់ឲ្យប្រគល់ខ្លួនជូនព្រះ?
សេចក្ដីស្រឡាញ់របស់យើងចំពោះព្រះយេហូវ៉ា ជំរុញចិត្តយើងឲ្យប្រគល់ខ្លួនជូនលោក។ (យ៉ូហានទី១ ៤:១០, ១៩) គម្ពីរលើកទឹកចិត្តយើងថា៖ «[ចូរ]ស្រឡាញ់ព្រះយេហូវ៉ាជាព្រះរបស់អ្នក ឲ្យអស់ពីដួងចិត្ត អស់ពីជីវិត អស់ពីសមត្ថភាពរិះគិត និងអស់ពីកម្លាំងកាយ»។ (ម៉ាកុស ១២:៣០) យើងបង្ហាញថាយើងស្រឡាញ់ព្រះមិនគ្រាន់តែតាមរយៈពាក្យសម្ដីប៉ុណ្ណោះទេ តែក៏តាមរយៈការប្រព្រឹត្តដែរ។ ជាឧទាហរណ៍ បើប្រុសនិងស្រីពិតជាស្រឡាញ់គ្នាមែន ពួកគេនឹងរៀបការជាមួយគ្នា។ ស្រដៀងគ្នាដែរ បើយើងស្រឡាញ់ព្រះយេហូវ៉ា យើងនឹងប្រគល់ខ្លួនជូនលោក ហើយទទួលការជ្រមុជទឹក។
២. ពេលអ្នកទទួលការជ្រមុជទឹកទៅជាសាក្សីព្រះយេហូវ៉ា តើលោកនឹងបន្ដឲ្យពរអ្វីខ្លះដល់អ្នក?
ពេលអ្នកទទួលការជ្រមុជទឹក អ្នកនឹងទៅជាសមាជិកក្នុងក្រុមគ្រួសារដ៏សប្បាយរបស់ព្រះយេហូវ៉ា។ បន្ទាប់មក អ្នកនឹងឃើញសេចក្ដីស្រឡាញ់ដែលលោកបង្ហាញចំពោះអ្នកតាមរបៀបជាច្រើន ហើយអ្នកនឹងមានចំណងមិត្តភាពកាន់តែជិតស្និទ្ធជាមួយនឹងលោក។ (សូមអាន ម៉ាឡាគី ៣:១៦-១៨) បន្ថែមទៅទៀត អ្នកនឹងមានព្រះយេហូវ៉ាដែលប្រៀបដូចជាបិតារបស់អ្នក។ អ្នកក៏នឹងមានបងប្អូនរួមជំនឿនៅទូទាំងពិភពលោកដែលប្រៀបដូចជាក្រុមគ្រួសារមួយ ដែលស្រឡាញ់ព្រះនិងស្រឡាញ់អ្នក។ (សូមអាន ម៉ាកុស ១០:២៩, ៣០) ប៉ុន្តែ មុនពេលដែលអ្នកអាចទទួលការជ្រមុជទឹក អ្នកត្រូវធ្វើតាមជំហានមួយចំនួន។ អ្នកត្រូវរៀនអំពីព្រះយេហូវ៉ា ហើយស្រឡាញ់លោក ព្រមទាំងបង្ហាញជំនឿលើបុត្ររបស់លោក។ ក្រោយមក អ្នកត្រូវប្រគល់ខ្លួនជូនព្រះយេហូវ៉ា។ បើអ្នកធ្វើតាមជំហានទាំងនេះ ហើយទទួលការជ្រមុជទឹក នោះអ្នកនឹងមានឱកាសរស់ជារៀងរហូត។ បណ្ដាំរបស់ព្រះចែងថា៖ ‹អ្វីដែលកំពុងសង្គ្រោះអ្នករាល់គ្នានៅឥឡូវនេះ គឺការទទួលការជ្រមុជទឹក›។—ពេត្រុសទី១ ៣:២១
បង្កើនចំណេះ
សូមពិចារណា ហេតុអ្វីជាការសំខាន់ដែលអ្នកត្រូវប្រគល់ខ្លួនជូនព្រះយេហូវ៉ា ហើយទទួលការជ្រមុជទឹក?
៣. យើងទាំងអស់គ្នាត្រូវសម្រេចចិត្តថាយើងនឹងបម្រើអ្នកណា
នៅអ៊ីស្រាអែលសម័យបុរាណ មនុស្សខ្លះគិតថាពួកគេអាចគោរពប្រណិប័តន៍ព្រះយេហូវ៉ាផង និងព្រះបាលដែលជាព្រះមិនពិតផង។ ប៉ុន្តែ ព្រះយេហូវ៉ាបានចាត់អេលីយ៉ាដែលជាអ្នកប្រកាសទំនាយរបស់លោក ឲ្យទៅកែតម្រង់ចិត្តគំនិតមិនត្រឹមត្រូវរបស់ពួកគេ។ សូមអាន បណ្ដាស្ដេចទី១ ១៨:២១ រួចពិភាក្សាសំណួរនេះ៖
-
តាមខគម្ពីរនេះ តើជនជាតិអ៊ីស្រាអែលត្រូវសម្រេចចិត្តអំពីអ្វី?
ដូចជនជាតិអ៊ីស្រាអែលដែរ យើងត្រូវសម្រេចចិត្តថាយើងនឹងបម្រើអ្នកណា។ សូមអាន លូកា ១៦:១៣ រួចពិភាក្សាសំណួរដូចតទៅ៖
-
ហេតុអ្វីយើងមិនអាចគោរពប្រណិប័តន៍ព្រះយេហូវ៉ាផង និងអ្នកណាម្នាក់ ឬអ្វីផ្សេងទៀតផង?
-
តើតាមរបៀបណាយើងបង្ហាញព្រះយេហូវ៉ាថាយើងសម្រេចចិត្តបម្រើលោក?
៤. ចូររំពឹងគិតអំពីសេចក្ដីស្រឡាញ់ដែលព្រះយេហូវ៉ាមានចំពោះអ្នក
ព្រះយេហូវ៉ាបានឲ្យអំណោយដ៏មានតម្លៃជាច្រើនដល់យើង។ តើយើងអាចឲ្យអ្វីដល់លោកវិញ? លេងវីដេអូ។
តើព្រះយេហូវ៉ាបានបង្ហាញសេចក្ដីស្រឡាញ់ចំពោះអ្នកតាមរបៀបណាខ្លះ? សូមអាន ចម្រៀងសរសើរព្រះ ១០៤:១៤, ១៥ និងយ៉ូហានទី១ ៤:៩, ១០ រួចពិភាក្សាសំណួរដូចតទៅ៖
-
ជាពិសេស តើអ្នកដឹងគុណព្រះយេហូវ៉ាចំពោះអំណោយអ្វីខ្លះ?
-
តើអំណោយទាំងនោះធ្វើឲ្យអ្នកមានអារម្មណ៍យ៉ាងណាចំពោះលោក?
ពេលយើងទទួលអំណោយមួយដែលយើងពេញចិត្ត យើងចង់បង្ហាញចិត្តដឹងគុណចំពោះអ្នកដែលឲ្យអំណោយនោះ។ សូមអាន ការបំភ្លឺច្បាប់ ១៦:១៧ រួចពិភាក្សាសំណួរនេះ៖
-
ពេលអ្នកពិចារណាអំពីអ្វីទាំងអស់ដែលព្រះយេហូវ៉ាបានធ្វើសម្រាប់អ្នក តើអ្នកចង់ជូនអ្វីដល់លោកវិញ?
៥. ការប្រគល់ខ្លួនជូនព្រះនាំឲ្យអ្នកទទួលពរជាច្រើន
មនុស្សជាច្រើនជឿថាការមានកេរ្តិ៍ឈ្មោះល្បី មានការងារល្អ ឬមានលុយច្រើន នឹងធ្វើឲ្យពួកគេមានសុភមង្គល។ តើនេះជាការពិតទេ? លេងវីដេអូ រួចពិភាក្សាសំណួរដូចតទៅ៖
-
ក្នុងវីដេអូ ទោះជាកីឡាករបាល់ទាត់នោះស្រឡាញ់អាជីពរបស់គាត់ខ្លាំងក៏ដោយ ហេតុអ្វីគាត់បានលះបង់អាជីពនោះ?
-
គាត់បានប្រគល់ខ្លួនជូនព្រះយេហូវ៉ា ហើយបានបោះបង់អាជីពដែលគាត់ស្រឡាញ់។ តើអ្នកគិតថាគាត់បានសម្រេចចិត្តត្រឹមត្រូវទេ? ហេតុអ្វី?
មុនដែលសាវ័កប៉ូលទៅជាអ្នកកាន់តាមគ្រិស្ត គាត់ខំព្យាយាមឲ្យបានអាជីពដែលមានមុខមាត់។ គាត់បានរៀនច្បាប់របស់ជនជាតិយូដាជាមួយនឹងគ្រូដ៏ល្បីម្នាក់។ ប៉ុន្តែ ក្រោយមកគាត់បានលះបង់អ្វីទាំងនោះដើម្បីទៅជាអ្នកកាន់តាមគ្រិស្ត។ តើប៉ូលធ្លាប់ស្ដាយក្រោយទេ? សូមអាន ភីលីព ៣:៨ រួចពិភាក្សាសំណួរដូចតទៅ៖
-
ហេតុអ្វីប៉ូលនិយាយថាអ្វីដែលគាត់ធ្លាប់ធ្វើមុនពេលគាត់ទៅជាអ្នកកាន់តាមគ្រិស្ត សុទ្ធតែជា«សំរាម»?
-
តើប៉ូលបានទទួលអ្វីមកវិញ?
-
តើអ្នកគិតថាការប្រើជីវិតដើម្បីបម្រើព្រះយេហូវ៉ា និងការប្រើជីវិតដើម្បីបម្រើអ្វីផ្សេងទៀត ខុសគ្នាយ៉ាងណា?
ពេលប៉ូលបានទៅជាអ្នកកាន់តាមគ្រិស្ត គាត់បានទទួលពរច្រើនជាងអ្វីដែលគាត់បានលះបង់ឆ្ងាយណាស់
មនុស្សខ្លះនិយាយថា៖ «គឺមិនសមហេតុផលទេ ដែលយើងគិតតែពីបម្រើព្រះប៉ុណ្ណោះ»។
-
ហេតុអ្វីជាការសមហេតុផល ដែលអ្នកគួរប្រគល់ខ្លួនជូនព្រះយេហូវ៉ា?
សេចក្ដីសង្ខេប
សេចក្ដីស្រឡាញ់ជំរុញចិត្តយើងឲ្យប្រគល់ខ្លួនជូនព្រះយេហូវ៉ានិងទទួលការជ្រមុជទឹក។
រៀនសាឡើងវិញ
-
ហេតុអ្វីព្រះយេហូវ៉ាសមទទួលសេចក្ដីស្រឡាញ់និងការគោរពប្រណិប័តន៍ដ៏ស្មោះពីយើង?
-
តើព្រះយេហូវ៉ាផ្ដល់រង្វាន់អ្វីខ្លះដល់អ្នកដែលទទួលការជ្រមុជទឹកទៅជាសាក្សីរបស់លោក?
-
តើអ្នកចង់ប្រគល់ខ្លួនជូនព្រះយេហូវ៉ាទេ?
ស្វែងយល់ថែមទៀត
សូមមើលមូលហេតុដែលសិល្បការិនីម្នាក់និងកីឡាករម្នាក់បានប្រគល់ខ្លួនជូនព្រះយេហូវ៉ា។
ពួកយុវជនសួរ តើខ្ញុំនឹងប្រើជីវិតរបស់ខ្ញុំយ៉ាងដូចម្ដេច? អតីតកាល (៦:៥៤)
សូមពិចារណាមូលហេតុថែមទៀតដើម្បីប្រគល់ខ្លួនជូនព្រះ។
ក្នុងចម្រៀងវីដេអូនេះ សូមសង្កេតមើលអំណររបស់អស់អ្នកដែលបានប្រគល់ខ្លួនជូនព្រះយេហូវ៉ា។
ក្នុងអត្ថបទ«អស់ជាច្រើនឆ្នាំ ខ្ញុំធ្លាប់ឆ្ងល់ថា‹ហេតុអ្វីយើងមានជីវិត?›»។ សូមកត់សម្គាល់អ្វីដែលបានជំរុញចិត្តស្ត្រីម្នាក់ឲ្យពិចារណាអំពីអ្វីដែលសំខាន់បំផុតក្នុងជីវិតនាង។
«គម្ពីរជួយមនុស្សឲ្យកែប្រែជីវិត» (ទស្សនាវដ្ដីប៉មយាម ថ្ងៃទី១ ខែវិច្ឆិកា ឆ្នាំ២០១២)
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើការរៀនគម្ពីរជាមួយសាក្សីព្រះយេហូវ៉ាគឺយ៉ាងណា?
ការរៀនគម្ពីរជាមួយសាក្សីព្រះយេហូវ៉ាគឺឥតគិតថ្លៃ។ លោកអ្នកអាចប្រើសេចក្ដីបកប្រែណាក៏បាន។ លោកអ្នកអាចអញ្ជើញមិត្តភក្ដិ ឬក្រុមគ្រួសារឲ្យចូលរួមរៀនជាមួយគ្នា។
