TIMOKO 46
Mu bungu dia nti fweti tihana kwe Nzambi mpe fweti batusu?
Kwe Yehova tihanaka bu mu kanisinaka mu lusambulu ti ni Yandi kwa sarila, mpe sarila luzolo lwandi mbo tibâ tima tia ntete mu luzingu lwaku. (Mikunga 40:8) Ha manima, fweti batusu. Bu sila bo, kwe bantu songela ti kwe Yehova watiheni. Nzengolo yena yiyôkele mfunu, yisobesa luzingu lwaku. Nti bilendi ku tuma mu bonga nzengolo yo?
1. Nti bitumaka muntu mu tihana kwe Yehova?
Luzolo lweto lututumaka mu tihana kwe Yehova. (1 Za 4:10, 19) Bibila ditulombele: “Fweti zolo Yehova Nzambi’aku mu mutima’aku wawansoni, mu tilundi tiaku tiatiansoni, mu mabanza maku mamansoni na mu ngolo zaku zazansoni.” (Marke 12:30) Mbo tusongelaka ti Nzambi tuzololo mu mio mi tutâka na mio mi tuyirikaka. Ntiana kwa bantu bole batomono zolosono bakwelanaka, luzolo lweto mu Yehova mbo lututumaka mu tihana kwe Yandi na mu batusu.
2. Ntia tusakumunu Yehova kahanaka kwe Mbangi zandi za batusu?
Bu batusu, mbo kwizi bâ mu kanda dia Yehova die mu nsayi. Mbo kwizi mona luzolo lwandi mu nge mu mpila zazingi, mpe mbo kwizi tomo bâ penepene na Yandi, yôka lumbu ti. (Tanga Malaki 3:16-18.) Yehova mbo kabâ Tata’aku, kâ mpe mbo bâ na kanda dia timpeve dia bampangi mu nza yayansoni, bazololo Yehova mpe bakuzololo. (Tanga Marke 10:29, 30.) Kâ ntete wabatusu, misamu mie kô fweti sa. Fweti longoka mu tomo zaba Yehova, fweti mu zolo mpe fweti bâ na timinu mu Mwana’andi. Ha manima, fweti tihana kwe Yehova. Wamana yirika misamu mio, mpe ha manima wizi batusu, lendi bâ mu nsayi ntangu zazansoni. Zu dia Nzambi ditêle: “Bateme [. . .] mbo yita lu vukisa mpe.”—1 Piere 3:21.
YIKA NDILU
Taluzula mu bungu dia nti we mfunu kwe nge mu tihana kwe Yehova na mu batusu.
3. Beto bansoni tufweti sola nani tusarila
Ku Israele ya ntama, bantu bakaka beri banzaka ti lenda dia bâ nawu dia sambila Yehova na Baale, nzambi yimosi ya bungungu. Kâ Yehova watambika mbikuri’andi Eliya mu sungika mabanza mo ma mbi. Tangeno 1 Mitinu 18:21, mpe zonzeleno tiyuvu eti:
-
Ntia nsololo bala ba Israele bafweti sa?
Ntiana bala ba Israele, beto mpe tufweti sola nani tusarila. Tangeno Like 16:13, mpe zonzeleno biyuvu ebi:
-
Mu bungu dia nti tufweti lembo sambila Yehova ha timosi na muntu wakaka peleko tima tiakaka?
-
Bwe tusongela kwe Yehova ti ni Yandi tusolele mu sarila?
4. Dimbitila mu luzolo lwe na Yehova mu nge
Yehova watuhana makabu mamingi ma ntalu. Nti tulendi mu hana? Taleno VIDEO.
Bwe Yehova kakusongela luzolo lwandi? Tangeno Mikunga 104:14, 15 na 1 Za 4:9, 10, mpe zonzeleno biyuvu ebi:
-
Mu ntia makabu ma Yehova tomo tondaka?
-
Bwe mwinaka Yehova mu bungu dia makabu mo?
Bu tubakaka kabu di tutomono zolo, mbo tuzoloko mu tonda muntu wutuheni kabu dio. Tangeno Lubambu 16:17, mpe zonzeleno tiyuvu eti:
-
Bu banzaka misamu miamiansoni mia yirika Yehova mu nge, nti mikutumaka mu mu hana?
5. Tusakumunu twatwingi baka bu tihana kwe Yehova
Bantu babingi banzaka ti, bâ nsangu, tisalu tia mbote peleko mbongo, nkatika nsayi bibanatinaka. Ngano wa matieleka wena? Taleno VIDEO, mpe zonzeleno biyuvu bita landa.
-
Ni bu sa ti muntu wa mu video wazolo mu bula, mu bungu dia nti kabikila tisalu tio?
-
Yandi wasola mu tihana kwe Yehova, ka mu football’â ko. Mu nge, ngano nzengolo ya mbote kabonga? Mu bungu dia nti?
Ntete kabâ Mukristo, ntumwa Paulo wabâ na tisalu tia mbote. Yandi walongoka misiku mia Bayuda kwe mulongi wa nsangu. Kâ wabika bima bio mu kwizi bâ Mukristo. Ngano Paulo wanionga? Tangeno Bisi-Filipe 3:8, mpe zonzeleno biyuvu ebi:
-
Mu bungu dia nti Paulo katâ ti mio mi keri saka ntete kabâ Mukristo “mazala” meri, peleko mvindu?
-
Ntia ndandu kayizi baka?
-
Bwe lendi fwanakasa tisalu tia Yehova na makani makaka?
Bu kayizi bâ Mukristo, Paulo bima biabingi kabaka yôka bio bi kahombesa
TALA TI BAKUTÊLELE: “Ka wena wa delakana ko mu tihana kwe Yehova.”
-
Mu bungu dia nti bwe bubote kwe nge mu tihana kwe Yehova?
MU BUKUFI
Luzolo lututumaka mu tihana kwe Yehova na mu batusu.
Biyuvu bia mbambukulu
-
Mu bungu dia nti wufwanakane tazolo kwa Yehova mpe tasarila kwa Yandi?
-
Bwe Yehova kasendelaka Mbangi zandi za batusu?
-
Ngano zololo watihana kwe Yehova?
ZABA BIAKAKA
Tala mu bungu dia nti tisiki tia mizike timosi na muntu wusaka sport batihana kwe Yehova.
Biyuvu bia bantwenia—Bwe nisa mu luzingu lwani?—Mbambukulu (6:54)
Taluzula misamu miakaka misa ti watihana kwe Yehova.
“Mu bungu dia nti fweti tihana kwe Yehova?” (Nzo ya Zangama ya Munkengi, 15 janvier 2010)
Mu video, tala nsayi ye na bantu batihanaka kwe Yehova.
Mu tinsamu tia “Tûka mvula zazingi natiyula ‘mu bungu dia nti twe ku?’”, tala nti biatuma mukento wumosi mu taluzula misamu mia bâ mfunu kwe yandi.
“Bibila luzingu disobesaka” (Nzo ya Zangama ya Munkengi, 1er novembre 2012)
