SOMO 46
Nidho ká ringani ni bbʉ ni Mungu dho ndirigoti ni ba batiso addudho?
Yova dho ni ni bbʉ ná saa na, ni ripo ke dho sala chulu nari kʉ ni si madha bbʉ ke ddiro dho dhé ndirigoti ni si ke li anziro nidhó maisha nǎ. (Zaburi 40:8) Føri goti ni ka ni ba batiso. Fø ni njiri nari na, ni dhori nja ndrŭ dho nari kʉ ni bbʉ ni bbʉ Mungu dho. Yova dho ko ko bbʉ ná føri kʉ bbo na mana kʉ ná longavʉdha. Føri kʉ bbo pli na mana kʉ ná longavʉdha maisha nǎ. Nde addui ká ka ndi cho ni ronga nja ni vʉ fø bbo na mana kʉ ná lo nanga d’e?
1. Addui ká adi le ronga cho ndiro le bbʉ le Mungu dho d’e?
Yova dho ko adi ko bbʉ jidha dzá lo dho. (1 Yohana 4:10, 19) Biblia ripo ko dho: “Aji Yova nidzá Mungu ni thí nǎ ro krʉ, nidzá nafsi na krʉ, nidzá ngaddidha na krʉ ndirigoti nidzá kpakpanga na krʉ.” (Marko 12:30) Ko nzɨ adi Yova ko ji nari dhǒ ko tso nǎ lo ró dhé ri, ro ko adi ri dhǒ nji ko nji ná lo ró maddi. Ddiddi bbʉbbʉ jini ndima kana ná kpetsi ke ma, isɨle ma na adi ndoa chi nari bbai, Yova ko ji nari adi ko ronga cho ko bbʉ ko ke dho ndirigoti ko ba batiso.
2. Yova ká adi b’lo ba batiso ná Dimu ronga lé ngbaribbai?
Batiso ni ba ná saa na, ni ka ni ngʉ Yova dzá hwè na kʉ ná familia kana ddi le. Ni si kedzá jidha nja ni lai djo njonjo kʉ ná chu nǎ, ndirigoti ni kana nga si ngʉ ke na chøchø pli. (Azø Malaki 3:16-18.) Føri kina, Yova sie nidzá Baba bbai ndirigoti ni si kiroho nǎ familia ba dz’ djolu gble ji ndima ji Yova ro ndirigoti nì ndima jidha dho ni dho ro. (Azø Marko 10:29, 30.) Bbʉbbʉ dhé, batiso ni ba nari njí, ni ka ni njí ná nja lo ma kʉ ddi. Ringani ni chulo Yova djo, ni ji ke ndirigoti ni é udha na kedzá Ngba djo. Føri goti ringani ni bbʉ nidhó maisha Yova dho. Njati ni njiri fø ndirigoti ni ba batiso ró, ri ka ndi kaka ni si maisha hwè nji theinga dho. Mungu dzá lo ripo: “Batiso . . . ni gøgø kpadjo maddi.”—1 Petro 3:21.
ANE LONANGA BBO
Aneri ni chu addudho ma ri kʉ bblo ni bbʉ ni Yova dho ndirigoti ni ba batiso nari.
3. Ko krʉ dho ringani ko vʉ ie dho ma ko njínji nari
Waizraeli bbá, nja ndrŭ ngʉ adi riddi nari kʉ ndima ka ndima bbʉ madha Mungu dho ndirigoti kali dhi mungu Baali dho maddi. Ro, Yova chongʉe ndidhó nabi Eliya ndi ra o o kpa na fø che kʉ ná ngaddidha djó. Azø 1 Wafalme 18:21, ndirigoti anitilo i ngadhudha djo:
-
Waizraeli dho ká ringʉngani ndima vʉ ngbá lo nga?
Waizraeli bbai, ringani ko vʉ ie dho ma ko ka ko njinjí nari. Azø Luka 16:13, ndirigoti anitilo i ngadhudha djo:
-
Ri nzá ka ndi ka ko má Yova ma, ndrŭ ma, inga nja ritsi ma na krʉ ddikpa saa na ri dho ná lo ká kʉ addu?
-
Ko vʉri ko bbʉ madha Yova dho nari ká ko ka ko dhǒ ngbaribbai?
4. Addinga Yova dho ni dho ná jidha djo
Yova bbʉ bblo kʉ ná kado bí ko dho. Ke dho ká ko ka ko bbʉ addu? Aninja VIDEO.
Yova ká dhorie jidha ni dho ngbá chulu? Azø Zaburi 104:14, 15 ndirigoti 1 Yohana 4:9, 10, ndirigoti anitilo i ngadhudha djo:
-
Yova bbʉ ni dho ná kado kana ro ká ni nanga adi jini ngbá ri dho?
-
Fø kado dho ká ni ni tso ngbaribbai ke djo?
Njati ddikpa le bbʉ ko jie ná kado ko dho ró, ko adi mbai po fø le dho. Azø Kumbukumbu la Torati 16:17, ndirigoti anitilo i ngadhudha djo:
-
Yova bbʉ ni dho ná ritsi krʉ ni di nja ná saa na, ká ri adi ni ronga cho ni bbʉ addu ke dho?
5. Yova dho lé le bbʉ nari adi rili le ba ledha bbo
Bí kʉ ná ndrŭ adi riddi nari kʉ, bbo le chuni nari ma, bblo kʉ ná njí ma, inga mbø ma na ka ndi liri le é hwè na. Nde føri ká kʉ bbʉbbbʉ? Aninja VIDEO, ndirigoti anitilo i ngadhudha djo.
-
Ngbà mai video tilo djo ná ke jie dja dhi kpà bbo ro, ke ká bbae ri tso addudho?
-
Ke vʉngʉeri ndi bbʉ ndi Yova dho, nga dja dhi kpà dho ri. Ni ká riddi ke vʉngʉe ndi njí ná fø lo kʉ bblo? Ká addudho?
Mutume Paulo ngʉ Mukristo nari nji, ke ngʉ bbo na mana kʉ ná njínji. Ke zøngʉe Wayaudi bbá sheria ndirigoti kedhó mwalimu ngʉe bbo chuni ná ke. Ro ke bbangʉe fø lo krʉ ndiro ndi ngʉ Mukristo d’e. Paulo nanga ká fø lo d’ongʉe ddi? Azø Wafilipi 3:8, ndirigoti anitilo i ngadhudha djo:
-
Ká addudho Paulo pongʉeri nzá ndi d’e ngʉ Mukristo ro, ndi ngʉ nji ná lo ndi nja “muchafu” bbai?
-
Føri rɨngana ká ke bangʉe addu?
-
Ni ká riddi addui ka ndi liri ni e hwè na maisha nǎ? Ri ká kʉ Yova dho ni njínji nari inga nja lo?
Mutume Paulo ngʉngʉe Mukristo ná saa na, ke bangʉe ritsi bbo, bba ndi bbae ná ritsi djolu
NJA NDRŬ ADI RIPO: “Mungu dho lé ledhó maisha bbʉ ná føri na mana ro nga kʉ ri.”
-
Ni ká riddi Mungu dho lé le bbʉ nari kʉ bblo addudho?
LO DZÁ DɄNGA
Jidha adi ko ronga cho ko bbʉ ko Mungu dho ndirigoti ko ba batiso.
Lo djolu le ngʉ nari
-
Addudho ká ringani ko ji Yova ko thí nǎ ro krʉ ndirigoti ko bbʉ madha ke ddiro dho dhé?
-
Yova ká adi b’lo ba batiso ná Dimu ronga le ngbaribbai?
-
Ni ká ka ni jiri ni bbʉ ni ddi Yova dho?
NI KA NI CHU NÁ NJA LO
Anja addudho ma miziki ngʉ adi be ná ddikpa le ma, bbo jingʉe kpà ná ke ma na bbʉe ndima Yova dho nari.
Aneri ni chu Yova dho ni ka ni bbʉ ni dho ná nja lo.
“Juu ya Nini Ujitoe kwa Yehova?” (Munara wa Mulinzi, 15 Mwezi wa 1, 2010)
I video miziki nǎ, anja Yova dho bbʉ ndima ná ndrŭ kʉ na ná hwè.
Anja ddikpa ɨsile ronga chongʉe ná lo ndiro ndi chu ngbá lo i ká kʉ mana na bbo ndidhó maisha nǎ d’e nari, i djǒ ripo ná lo nǎ “Kwa Miaka Mingi Nilijiuliza, ‘Sababu gani Tunaishi?’”
“Biblia Inabadilisha Maisha ya Watu” (Munara wa Mulinzi, 1 Mwezi wa 11, 2012)
