ບົດທີ 46
ເປັນຫຍັງເຈົ້າຄວນອຸທິດຕົວແລະຮັບບັບເຕມາ?
ກ່ອນທີ່ເຈົ້າຈະຮັບບັບເຕມາໄດ້ ເຈົ້າຕ້ອງອຸທິດຕົວໃຫ້ກັບພະເຢໂຫວາໂດຍການອະທິດຖານສັນຍາກັບເພິ່ນວ່າເຈົ້າຈະນະມັດສະການເພິ່ນຜູ້ດຽວແລະໃຫ້ຄວາມຕ້ອງການຂອງເພິ່ນເປັນເລື່ອງສຳຄັນທີ່ສຸດໃນຊີວິດ. (ຄຳເພງ 40:8) ແລະຕອນທີ່ເຈົ້າຮັບບັບເຕມາ ເຈົ້າກໍກຳລັງເຮັດໃຫ້ຄົນອື່ນຮູ້ວ່າເຈົ້າໄດ້ອຸທິດຕົວໃຫ້ພະເຢໂຫວາແລ້ວ. ການອຸທິດຕົວໃຫ້ກັບພະເຢໂຫວາເປັນເລື່ອງສຳຄັນຫຼາຍ. ແຕ່ອັນໃດຄວນເປັນສິ່ງທີ່ເຮັດໃຫ້ເຈົ້າຢາກອຸທິດຕົວໃຫ້ເພິ່ນ?
1. ເປັນຫຍັງເຮົາຈຶ່ງຢາກອຸທິດຕົວໃຫ້ກັບພະເຢໂຫວາ?
ເຮົາຮັກພະເຢໂຫວາ ເຮົາເລີຍຢາກອຸທິດຕົວໃຫ້ກັບເພິ່ນ. (1 ໂຢຮັນ 4:10, 19) ຄຳພີໄບເບິນບອກວ່າ: “ເຈົ້າຕ້ອງຮັກພະເຢໂຫວາພະເຈົ້າຂອງເຈົ້າສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງ.” (ມາຣະໂກ 12:30) ເຮົາສະແດງໃຫ້ເຫັນວ່າເຮົາຮັກພະເຢໂຫວາບໍ່ແມ່ນຈາກຄຳເວົ້າຂອງເຮົາເທົ່ານັ້ນແຕ່ຈາກການກະທຳຂອງເຮົານຳ. ຄືກັບຜູ້ຊາຍຜູ້ຍິງຄູ່ໜຶ່ງທີ່ຮັກກັນຫຼາຍ ເຂົາເຈົ້າບໍ່ໄດ້ພຽງແຕ່ບອກຮັກກັນເທົ່ານັ້ນ ແຕ່ເຂົາເຈົ້າຈະຕັດສິນໃຈແຕ່ງດອງກັນ ຖ້າເຮົາຮັກພະເຢໂຫວາແທ້ໆເຮົາຄືຊິບໍ່ໄດ້ພຽງແຕ່ບອກວ່າເຮົາຮັກເພິ່ນ ແຕ່ເຮົາຈະຕັດສິນໃຈອຸທິດຕົວໃຫ້ເພິ່ນແລະຮັບບັບເຕມານຳ.
2. ພະເຢໂຫວາສັນຍາວ່າຈະໃຫ້ສິ່ງດີໆຫຍັງແດ່ກັບຄົນທີ່ຮັບບັບເຕມາ?
ເມື່ອເຈົ້າຮັບບັບເຕມາ ເຈົ້າກໍຈະໄດ້ເຂົ້າມາຢູ່ໃນຄອບຄົວທີ່ມີຄວາມສຸກຂອງພະເຢໂຫວາ. ພະເຢໂຫວາຈະເປັນພໍ່ຂອງເຈົ້າ ເຈົ້າຈະໄດ້ເຫັນວ່າເພິ່ນຮັກເຈົ້າຫຼາຍແລະເຈົ້າກໍຈະແຮ່ງໃກ້ຊິດກັບເພິ່ນຫຼາຍຂຶ້ນ. (ອ່ານມາລາກີ 3:16-18) ນອກຈາກນັ້ນ ໃນຄອບຄົວນີ້ຍັງມີພີ່ນ້ອງຄລິດສະຕຽນທົ່ວໂລກທີ່ຮັກພະເຢໂຫວາແລະເຂົາເຈົ້າກໍຮັກເຈົ້ານຳ. (ອ່ານມາຣະໂກ 10:29, 30) ແຕ່ເຈົ້າຕ້ອງເຮັດບາງຢ່າງກ່ອນເພື່ອຈະຮັບບັບເຕມາໄດ້. ເຈົ້າຕ້ອງຮຽນຮູ້ເລື່ອງພະເຢໂຫວາ ຮັກເພິ່ນ ເຊື່ອໃນພະເຢຊູ ແລະອຸທິດຕົວໃຫ້ກັບພະເຢໂຫວາ. ເມື່ອເຈົ້າເຮັດສິ່ງເຫຼົ່ານີ້ທັງໝົດແລ້ວເຈົ້າກໍສາມາດຮັບບັບເຕມາໄດ້ ແລ້ວເຈົ້າກໍຈະມີໂອກາດມີຊີວິດທີ່ມີຄວາມສຸກຕະຫຼອດໄປ. ຄຳພີໄບເບິນບອກວ່າ: “ການຮັບບັບເຕມາຊ່ວຍພວກເຈົ້າໃຫ້ລອດ.”—1 ເປໂຕ 3:21
ຮຽນຮູ້ຫຼາຍຂຶ້ນ
ເປັນຫຍັງຈຶ່ງເປັນເລື່ອງສຳຄັນທີ່ເຈົ້າຈະອຸທິດຕົວໃຫ້ກັບພະເຢໂຫວາແລະຮັບບັບເຕມາ.
3. ເຮົາທຸກຄົນຕ້ອງເລືອກວ່າຈະນະມັດສະການໃຜ
ຄົນອິດສະຣາເອນບາງຄົນໃນສະໄໝກ່ອນຄິດວ່າເຂົາເຈົ້າຈະນະມັດສະການພະເຢໂຫວາແລະນະມັດສະການພະບາອານທີ່ບໍ່ແມ່ນພະເຈົ້າທ່ຽງແທ້ໄປພ້ອມໆກັນໄດ້. ແຕ່ພະເຢໂຫວາສົ່ງຜູ້ພະຍາກອນເອລີຢາໃຫ້ໄປບອກເຂົາເຈົ້າວ່າສິ່ງທີ່ເຂົາເຈົ້າຄິດບໍ່ຖືກຕ້ອງ. ອ່ານ 1 ກະສັດ 18:21 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຄົນອິດສະຣາເອນຕ້ອງຕັດສິນໃຈເລື່ອງຫຍັງ?
ຄືກັບຄົນອິດສະຣາເອນ ເຮົາກໍຕ້ອງຕັດສິນໃຈວ່າຈະນະມັດສະການໃຜ. ອ່ານລູກາ 16:13 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເປັນຫຍັງເຮົາຕ້ອງນະມັດສະການພະເຢໂຫວາຜູ້ດຽວ?
-
ເຮົາຈະເຮັດໃຫ້ພະເຢໂຫວາເຫັນໄດ້ແນວໃດວ່າເຮົາເລືອກທີ່ຈະນະມັດສະການເພິ່ນ?
4. ຂໍໃຫ້ຄິດເບິ່ງວ່າພະເຢໂຫວາຮັກເຈົ້າຫຼາຍສ່ຳໃດ
ພະເຢໂຫວາໃຫ້ຂອງຂວັນທີ່ດີຫຼາຍຢ່າງກັບເຮົາ. ແຕ່ເຮົາຈະເຮັດຫຍັງໄດ້ເພື່ອສະແດງວ່າເຮົາຂອບໃຈເພິ່ນ? ເປີດວິດີໂອ.
ພະເຢໂຫວາສະແດງຄວາມຮັກຕໍ່ເຈົ້າແນວໃດແດ່? ອ່ານຄຳເພງ 104:14, 15 ແລະ 1 ໂຢຮັນ 4:9, 10 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ມີຂອງຂວັນຫຍັງແດ່ທີ່ມາຈາກພະເຢໂຫວາທີ່ເຈົ້າປະທັບໃຈເປັນພິເສດ?
-
ແລ້ວຂອງຂວັນດີໆເຫຼົ່ານີ້ເຮັດໃຫ້ເຈົ້າຮູ້ສຶກແນວໃດກັບພະເຢໂຫວາ?
ຖ້າມີຄົນເອົາຂອງຂວັນມາໃຫ້ເຮົາແລະເຮົາກໍມັກຂອງຂວັນນັ້ນຫຼາຍ ເຮົາຄືຊິຢາກເຮັດບາງຢ່າງເພື່ອສະແດງວ່າເຮົາຂອບໃຈລາວແທ້ໆ. ອ່ານພະບັນຍັດ 16:17 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ພະເຢໂຫວາເຮັດຫຼາຍຢ່າງເພື່ອເຈົ້າ ເມື່ອຮູ້ແບບນີ້ແລ້ວເຈົ້າຢາກຈະເຮັດຫຍັງເພື່ອເພິ່ນ?
5. ເຈົ້າຈະໄດ້ຮັບພອນຫຼາຍຖ້າເຈົ້າອຸທິດຕົວໃຫ້ກັບພະເຢໂຫວາ
ຫຼາຍຄົນຄິດວ່າການມີຊື່ສຽງ ວຽກອາຊີບທີ່ດີ ຫຼືເງິນຄຳຈະເຮັດໃຫ້ເຂົາເຈົ້າມີຄວາມສຸກ. ແຕ່ເປັນແບບນັ້ນແທ້ບໍ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ອັນໃດເຮັດໃຫ້ນັກເຕະບານຄົນໜຶ່ງທີ່ມີຊື່ສຽງຫຼາຍເຊົາຫຼິ້ນເຕະບານ?
-
ແທນທີ່ລາວຈະທຸ່ມເທທັງຊີວິດໃຫ້ກັບກິລາເຕະບານ ແຕ່ລາວພັດຕັດສິນໃຈອຸທິດຕົວໃຫ້ກັບພະເຢໂຫວາ. ເຈົ້າຄິດວ່າລາວຕັດສິນໃຈຖືກບໍ? ຍ້ອນຫຍັງເຈົ້າຈຶ່ງຄິດແບບນັ້ນ?
ກ່ອນທີ່ອັກຄະສາວົກໂປໂລຈະເຂົ້າມາເປັນຄລິດສະຕຽນ ລາວເປັນຄົນທີ່ມີໜ້າມີຕາໃນສັງຄົມ. ແລະລາວຍັງເຄີຍຮຽນກົດໝາຍຂອງຄົນຢິວກັບອາຈານທີ່ມີຊື່ສຽງຫຼາຍນຳ. ແຕ່ລາວຍອມຖິ້ມສິ່ງເຫຼົ່ານີ້ເພື່ອຈະເຂົ້າມາເປັນຄລິດສະຕຽນ. ໂປໂລເສຍດາຍບໍທີ່ລາວເຮັດແບບນັ້ນ? ອ່ານຟີລິບປອຍ 3:8 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເປັນຫຍັງໂປໂລບອກວ່າສິ່ງທີ່ລາວເຄີຍມີກ່ອນຈະເຂົ້າມາເປັນຄລິດສະຕຽນເປັນຄື “ຂີ້ເຫຍື້ອ”?
-
ເມື່ອໂປໂລສະລະສິ່ງເຫຼົ່ານັ້ນ ລາວໄດ້ຫຍັງທີ່ມີຄ່າຫຼາຍ?
-
ເຈົ້າຄິດວ່າເຈົ້າຈະມີຊີວິດທີ່ມີຄວາມສຸກຫຼາຍຂຶ້ນບໍຖ້າເຈົ້າຕັດສິນໃຈຮັບໃຊ້ພະເຢໂຫວາ? ເປັນຫຍັງເຈົ້າຄິດແບບນັ້ນ?
ບາງຄົນເວົ້າວ່າ: “ບໍ່ຈຳເປັນຕ້ອງໄປທຸ່ມເທໃຫ້ສາສະໜາຫຼາຍປານນັ້ນດອກ.”
-
ເຈົ້າຄິດວ່າການອຸທິດຕົວໃຫ້ພະເຢໂຫວາເປັນການຕັດສິນໃຈທີ່ດີບໍ? ເປັນຫຍັງເຈົ້າຈຶ່ງຄິດແບບນັ້ນ?
ສະຫຼຸບ
ເຮົາຮັກພະເຢໂຫວາ ເຮົາກໍເລີຍຢາກອຸທິດຕົວໃຫ້ເພິ່ນແລະຮັບບັບເຕມາ.
ຄຳຖາມທົບທວນ
-
ເປັນຫຍັງເຮົາຄວນຮັກພະເຢໂຫວາສຸດຫົວໃຈແລະນະມັດສະການເພິ່ນ?
-
ພະເຢໂຫວາຈະໃຫ້ສິ່ງດີໆຫຍັງແດ່ກັບຄົນທີ່ຮັບບັບເຕມາ?
-
ເຈົ້າຢາກຈະອຸທິດຕົວໃຫ້ພະເຢໂຫວາບໍ?
ເບິ່ງເພີ່ມເຕີມ
ເປັນຫຍັງນັກຮ້ອງຄົນໜຶ່ງແລະນັກກິລາຄົນໜຶ່ງຈຶ່ງຕັດສິນໃຈອຸທິດຕົວໃຫ້ກັບພະເຢໂຫວາ.
ໜຸ່ມສາວຖາມວ່າ—ຂ້ອຍຈະເຮັດຫຍັງກັບຊີວິດຂອງຂ້ອຍ?—ຍ້ອນມອງອະດີດ (6:54)
ມີເຫດຜົນຫຍັງອີກທີ່ຊ່ວຍໃຫ້ເຮົາຢາກອຸທິດຕົວໃຫ້ພະເຢໂຫວາ.
“ເປັນຫຍັງເຈົ້າຈຶ່ງອຸທິດຕົວໃຫ້ພະເຢໂຫວາ?” (ຫໍສັງເກດການ 15 ມັງກອນ 2010)
ໃນມິວສິກວິດີໂອນີ້ ເຮົາຈະໄດ້ເຫັນວ່າຄົນທີ່ໄດ້ອຸທິດຕົວໃຫ້ກັບພະເຢໂຫວາມີຄວາມສຸກຫຼາຍສ່ຳໃດ.
ອ່ານເລື່ອງ “ຂ້ອຍສົງໄສມາຕະຫຼອດວ່າ ‘ເຮົາເກີດມາເຮັດຫຍັງ?’” ເພື່ອເບິ່ງວ່າເປັນຫຍັງຜູ້ຍິງຄົນໜຶ່ງຕັດສິນໃຈໃຫ້ການນະມັດສະການພະເຢໂຫວາເປັນສິ່ງສຳຄັນທີ່ສຸດໃນຊີວິດ.