TUTO 46
Ki Kabakalañi Hamuswanela Kuineela ni Kukolobezwa?
Mwakona kuineela ku Jehova ka kumusepisa mwa tapelo kuli mukalapela feela yena ni kueza zatokwa pili mwa bupilo bwamina. (Samu 40:8) Hasamulaho, mwakona kukolobezwa. Hamukolobezwa, mubonisa batu babañwi kuli muineezi ku Jehova. Katulo ya kuineela ku Jehova ki yona katulo ya butokwa hahulu mwa bupilo bwa mutu. Ki nto mañi yekona kutahisa kuli mueze katulo yetuna cwalo ili yekona kucinca bupilo bwamina?
1. Ki nto mañi yeswanela kususueza mutu kuineela ku Jehova?
Luineelanga ku Jehova bakeñisa kuli lwamulata. (1 Joani 4:10, 19) Bibele ilususueza kuli: ‘Ulate Jehova Mulimu wahao ka pilu yahao kaufela ni ka moyo wahao kaufela ni ka munahano wahao kaufela ni ka maata ahao kaufela.’ (Mareka 12:30) Lwakona kubonisa kuli lwalata Mulimu ka zelubulela ni ka zelueza. Sina feela muuna ni musali babalatana luli habanyalananga, lilato laluna ku Jehova lika lususueza kuineela ku yena ni kukolobezwa.
2. Ki limbuyoti mañi zafanga Jehova kwa Lipaki bahae babakolobelizwe?
Hamuka kolobezwa, mukaba mwa lubasi lwa batanga ba Jehova babatabile. Mukaiponela mwamilatela Jehova ka linzila zeñata, mi mukasutelela hahulu ku yena. (Mubale Malaki 3:16-18.) Kwandaa kuli Jehova ukaba Ndataa mina, mukaba mwa lubasi lwa mizwale ni likaizeli babalata Jehova ni baba milata. (Mubale Mareka 10:29, 30.) Kono kunani zemutokwa kueza pili musika kolobezwa kale. Mutokwa kuituta ka za Jehova, kumulata, ni kubonisa tumelo ku Mwanaa hae. Mi kihona cwale mukaineela ku Jehova. Haiba mueza lika zeo ni kukolobezwa, mukaba ni sepo ya kuto ikola bupilo kuya kuile. Linzwi la Mulimu libulela kuli: “Kolobezo . . . yamipilisa cwale.”—1 Pitrosi 3:21.
MUBATISISE
Munyakisise libaka hamutokwa kuineela ku Jehova ni kukolobezwa.
3. Kaufelaa luna luswanela kuketa yeluka sebeleza
Mwa Isilaele wa kwaikale, batu babañwi nebaanga kuli bakona kusebeleza Jehova ni kusebeleza mulimu wa buhata Baale ka nako iliñwi. Kono Jehova naalumile mupolofita wahae Elia kuto hakulula mubonelo ofosahezi wo. Mubale 1 Malena 18:21, mi kihona mukanyakisisa puzo yelatelela:
-
Maisilaele nebatokwa kueza katulo mañi?
Ka kuswana ni Maisilaele, ni luna luswanela kuketa Mulimu yeluka sebeleza. Mubale Luka 16:13, mi kihona mukanyakisisa lipuzo zelatelela:
-
Ki kabakalañi hakufosahalile kulapela Jehova ni kulapela mutu kamba nto yeñwi ka nako iliñwi?
-
Lukona kubonisa cwañi Jehova kuli lulapela feela yena?
4. Munahanisise mwamilatela Jehova
Jehova ulufile limpo zeñata zende. Luna lukona kumufañi? Mubuhe VIDIO.
Ki mwa linzila mañi mwabonisize Jehova kuli wamilata? Mubale Samu 104:14, 15 ni 1 Joani 4:9, 10, mi kihona mukanyakisisa lipuzo zelatelela:
-
Ki limpo mañi zamifile Jehova zemuitumela hahulu?
-
Limpo zeo litahisa kuli muikutwe cwañi ka za Jehova?
Halufiwa mpo yelulata hahulu, lubatanga kubonisa buitumelo bwaluna ku yalufile yona. Mubale Deuteronoma 16:17, mi kihona mukanyakisisa puzo yelatelela:
-
Hamunyakisisa lika kaufela zamiezelize Jehova, mususuezwa kumufañi?
5. Mukafuyaulwa hahulu haiba muineela ku Jehova
Batu babañata baanga kuli lika zecwale ka libubo, musebezi omunde, kamba masheleñi zakona kubatahiseza tabo. Kana taba yeo ki ya niti? Mubuhe VIDIO, mi kihona mukanyakisisa lipuzo zelatelela.
-
Ki kabakalañi muuna ya mwa vidio mo hanaatuhezi kulaha mbola kusina taba kuli naailata hahulu?
-
Naaikatulezi kuineela ku Jehova isiñi kwa mbola. Kana mubona kuli naaezize katulo yende? Ki kabakalai hamualaba cwalo?
Muapositola Paulusi asikaba kale Mukreste, naabata kueza musebezi one uka mufumanisa masheleñi. Naalutilwe mulao wa Majuda ki muluti yanaazibahala hahulu. Kono naasiile zeo kaufela kuli abe Mukreste. Kana Paulusi naainyazize? Mubale Mafilipi 3:8, mi kihona mukanyakisisa lipuzo zelatelela:
-
Ki kabakalañi Paulusi hanaabulezi kuli lika zanaaezize pili asikaba kale Mukreste neli “manyalala,” kamba matakala?
-
Naafumaniñi ka kusiya lika zeo?
-
Kana kunani nto yekona kufita kusebeleza Jehova mwa bupilo bwa mutu?
Paulusi hanaabile Mukreste, naaikozi limbuyoti zeñata kufita lika zanaasiile
BATU BABAÑWI BABULELANGA KULI: “Mutu hatokwi kuneela bupilo bwahae kaufela ku Mulimu.”
-
Ki kabakalañi hamubona kuli kuineela ku Jehova ki kwa butokwa ku mina?
LITABA KA BUKUSWANI
Kulata Jehova kulususueza kuineela ku yena ni kukolobezwa.
Mulundulule
-
Ki kabakalañi haluswanela kulapela feela Jehova ka pilu yaluna kaufela?
-
Jehova ufuyaulanga cwañi Lipaki zahae babakolobelizwe?
-
Kana mwatabela kuineela ku Jehova?
MUBONE LITABA ZEÑWI
Mubone libaka muopeli yomuñwi ni mubapali wa papali yeñwi hane baikatulezi kuineela ku Jehova.
Babanca Babuza Kuli— Nikaezañi Mwa Bupilo Bwaka?—Haniiheta (6:54)
Munyakisise mabaka amañwi akona kutusa mutu kuineela ku Jehova.
“Ki Kabakalañi Hamuswanela Kuineela ku Jehova?” (Tawala ya Mulibeleli, January 15, 2010)
Mwa vidio ya pina yelatelela, mubone tabo yebanani yona batu babaineela ku Jehova.
Mwa likande lelili, “Neniipuzanga ka Lilimo Zeñata Kuli, ‘Lupilelañi?’” mulemuhe zenetusize musali yomuñwi kubeya lika za butokwa mwa sibaka sapili.
“Bibele Yacincanga Bupilo Bwa Batu” (Tawala ya Mulibeleli, November 1, 2012)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
