CILONGESA 46
Bika Bimunapande Kulikundikila Kuli Yehova na Kumimbwitika?
Mulikundika kuli Yehova nga mulombela kuli ikeye na kumuleka ngweni mulemesa lika ikeye na kutwameka cizango cendi mu kuyoya kweni kwoshe. (Myaso 40:8) Kutundaho, co bamimbwitika. Nga bamimbwitika, mumwesa ku mbunga ngweni mwalikundika kuli Yehova. Kulikundika kuli Yehova cikeco cuma ca seho manene citunasa kulinga mu kuyoya kwetu. Bika bimilingisa mulyangwile kulikundika kuli Yehova na kumimbwitika?
1. Bika binapande kulingisa munu alikundike kuli Yehova?
Kuzema Yehova kukekwo kutulingisa tulikundike kuli ikeye. (1 Yowano 4:10, 19) Mbimbiliya ngwayo: “Unapande kuzema Yehova Njambi yobe na mbunge yobe yoshe na mwonyo wobe woshe na bisinganyeka byobe byoshe na nzili yobe yoshe.” (Mako 12:30) Tumwesa ngwetu twazema Njambi mu byuma bitulinga, keti mu kwendeka lika. Cizemo cikeco cikalingisa munalume na munakazi balyambate. Mu ngila imolika, cizemo cikeco cinapande kutulingisa tulikundike kuli Yehova na kutumbwitika.
2. Bibezikiso muka bibawana Bakaleho ba Yehova ba kumbwitika?
Mubamimbwitika, mukala mu naanga ya Yehova ije yapwa ya kubwahelela. Mulimwena cizemo ca Yehova mu bingila bya kuliseza-seza, co lalo busamba bweni nendi bukanyama manene. (Tandeni Malakiya 3:16-18.) Mulikwatasana na bandolome na bandokazi ba ku sipilitu baje bazema Yehova, co lalo bamizema. (Tandeni Mako 10:29, 30.) Oloni kuli bimo bimunapande kulinga simbu kanda bamimbwitike. Munapande kulilongesa bya Yehova na kumuzema na kukulahela Munendi. Co lalo munapande kulikundika kuli Yehova. Nga munalingi ebi byuma, co bamimbwitika. Co kumimbwitika kumilingisa mwende mu ngila ije itwala ku kuyoya kwa myaka yoshe. Mbimbiliya ngwayo: ‘Cimbwitiko . . . cimyobola.’—1 Petulu 3:21.
TONDESESENI
Bika bimunapande kulikundikila kuli Yehova na kumimbwitika?
3. Tubaboshe tunapande kulyangwila itupangela
Baisalele bamo basinganyekele ngwabo basa kulemesa Yehova na kulemesa lalo Mbale, njambi wa makuli. Mukemwo Yehova watumine kapolofweto kendi Elinja mangana abanangule. Tandeni 1 Vimyene 18:21, na kusimutwiya ha cihula cinatako:
-
Baisalele bapandele kulyangwila kulinga bika?
Ngwe mwa Baisalele, netu tunapande kulyangwila itupangela. Tandeni Luka 16:13, na kusimutwiya ha bihula binatako:
-
Mwafwa bika kutwasa kulemesa Yehova na kulemesa lalo munu nambe cuma coshe-coshe?
-
Twasa kumwesa bati ngwetu twalyangwila kupangela lika Yehova?
4. Singanyekeseseni mwamizemena Yehova
Yehova natwana byuma byabingi byabibwa. Yetuco twasa kumwana bika? Kengeni VIDIO.
Yehova namwesa bati ngwendi wamizema? Tandeni Myaso 104:14, 15, na 1 Yowano 4:9, 10. Kutundaho, simutwiyeni ha bihula binatako:
-
Bwana muka bwa kuliseza-seza bwanamyana Yehova bumwazema manene?
-
Kusinganyekesesa ha bwana bwanamyana Yehova kukamilingisa mumumone bati?
Mutukatambula bwana buje bunatui ku mbunge, tukashaka kumwesa kukandelela kuli owo natwanabwo. Tandeni Kwituluka mu Mashiko 16:17, na kusimutwiya ha cihula cinatako:
-
Kusinganyekesesa ha byuma byanamilingila Yehova kumilingisa mulinge bika?
5. Kulikundika kuli Yehova kuminenela bibezikiso byabingi
Banu babangi bakasinganyeka ngwabo kutsimana, kukala na cipangi cacibwa nambe kukala na bimbongo byabingi kukekwo lika kubalingisa bapwe ba kubwahelela. Kuma mukemwo ndi? Kengeni VIDIO na kusimutwiya ha bihula binatako.
-
Bika byalingisile ndolome itunamono mu vidio ecele cipangi ca kweha bola?
-
Kuma walingile mwamubwa kwecela cipangi ca kweha bola na kulyangwila kulikundika kuli Yehova ndi? Mwafwa bika?
Simbu kanda apwe muka-Kilistu, kapositolo Paulu wakele na kulinga byuma bije byamutsimanesele. Walilongesele mashiko a Bayunda. Walilongeselewo kuli mulongesi umo wa kutsimana manene. Oloni wasezele byoshe obyo na kupwa muka-Kilistu. Kuma Paulu walibeyele ndi? Tandeni Filipu 3:8, na kusimutwiya ha bihula binatako:
-
Bika byalingisile Paulu endeke ngwendi byuma byalingile te kanda acipwe muka-Kilistu byapwile ngwe “mazilo”?
-
Bibezikiso muka byawanene?
-
Bubwa muka buli mu kupangela Yehova kutubakana kulinga byuma byeka?
Byuma byawanene Paulu mwapwile muka-Kilistu byapwile bya seho manene kutubakana byasezele
BAMO BAKENDEKA NGWABO: “Na seho ya kupangela Njambi bene yahi.”
-
Musinganyeka ngweni kulikundika kuli Yehova kunapu kwa seho ndi? Mwafwa bika?
SIMPI YAKAMA
Kuzema Yehova kutulingisa tulikundike kuli ikeye na kutumbwitika.
Kwitulukamo
-
Bika bitunapande kuzemena Yehova na mbunge yetu yoshe na kulemesa lika ikeye?
-
Bibezikiso muka bibawana Bakaleho ba Yehova ba kumbwitika?
-
Kuma neni mushaka kulikundika kuli Yehova ndi?
WANENI BIKWABO
Moneni byalingisile muka-kwimba umo na muka-kweha bweho bwa bola balikundike kuli Yehova.
Bibakehula Babaha—Bika Binjilinga mu Kuyoya Kwange?—Nga Njitala Kunima (6:54)
Byuma muka bikwabo bimilingisa mulikundike kuli Yehova?
“Bika Bimunapande Kulikundikila Kuli Yehova?” (Kaposhi ka Kukengela ka January 15, 2010)
Omwo muyongola vidio ya mwaso inatako, nangukeni kubwahelela kukaija mwafwa ya kulikundika kuli Yehova.
Tandeni ñanda ya “Ha Myaka Yaingi Njalihwile Ngwange, ‘Bika Bituli na Kuyoyela?’” mangana muzibe byalingisile munakazi umo aseze byuma byamwene ngwendi bya seho manene.
“Mbimbiliya Ikatengulula Buyoye bwa Banu” (Kaposhi ka Kukengela ka November 1, 2012)
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
