PƐ MƐDÃPIA 46
Mɛ E Kɛ Lɛ Laa Mɔ Ii Dienɔ Wala Lɛɛ ɛ̃ɛ̃ O I Batai Kɛ?
Ii i dienɔ Zihova lɛɛ i weɓele sɛnɛɓoo ka kelɛ a doo kpãã lɛ nɔ i lo gbini a lɛɛ, ɛ̃ɛ̃ a naa-ka-wɔ̃ lɛɛ lo kɛɛ wɔ̃ beĩzɛ ka ɓa kɛɓe yi. (Sãã 40:8) Ye aa kɛ gbaa to o i batai kɛ. A kɛ kilia laa zɔ̃ɔ̃ mia ye o toa lɛɛ kelɛ ɓaa i dienɔ Zihova lɛɛ. Kɛ ko ya ko ge ko ko dienɔ Zihova lɛɛ, lɛ wɔ̃ kpanazɛ kpokpo ka kɛɛ ko kɛ. Mɛ e lo paa i mɔ kɛɛ i wɔ̃ kpanazɛ lɛ e lo ɓa kɛɓe mɛvɔɔ ya i ge ɓa kɛ?
1. Mɛ e pa mi mɔ kɛ e e dienɔ Zihova lɛɛ?
Pɛ e pa ko mɔ ko ko dienɔ Zihova lɛɛ, lɛ e lɔkɛamɔ kaa. (1 Zɔ̃ɔ̃ 4:10, 19) Baaboa laa gee ko lɛɛ kelɛ: “I Daami lɛ e ɓa Wala kaa zi lɔkpɔ i mɔɔ, lɛ a mɔ e go i zo gbaa pie seĩ mɔ, ɛ̃ɛ̃ i ge lɛ seĩ mɔ, e bɛi, i yɛlɛtaapie seĩ mɔ, zeniia, ɓa yikɛgaa seĩ yi.” (Maa 12:30) Ye wa nɔ wɔ̃ ko geea doo ka kɛɛ a zɔ̃ɔ̃ kelɛ Wala lɔkpɔɔ lɛ ko mɔ, kɛɛ wɔ̃ ko kɛɛ laa zɔ̃ɔ̃ nɔ kili. Lɛ zi nɔ mia lɛ o lɔkɛ kpokpo ɓo o kie kaa o o kiesia, zi nɔ dooa, lɛ Zihova zi lɔkpɔ ko mɔ a kɛ kɔaa ko dienɔ a lɛɛ ɛ̃ɛ̃ waa ko batai kɛɛ.
2. Wɔ̃ yie yie kpɛɛ lɛ Zihova a kɛ la Kelavɔ lɛ waa o batai kɛɛ lɛɛ?
Ye waa i batai kɛɛ, ii lo kɛɛ Zihova kɔpiemia gelizɛɛ do ka. Ii lo zi lɛ e lɔkɛamɔ zɔ̃ɔ̃a i lɛɛ zi gbɛɛ gbɛɛ kaa gɛ̃ɛ ɛ̃ɛ̃ bɛi lɛɛ lo kɛɛ i mɔ i nyɔɔ a ka kɔɛ kpokpo ɓo. (Malaka 3:16-18 gee.) E kã Zihova kɛ i Daa ka mɔɔ, ii lo kɛɛ i leege vɔ lɛ o kpoula lɛ seĩ mɔ, lɛ o lɔkɛ Zihova ka ɛ̃ɛ̃ i kaa fĩã. (Maa 10:29, 30 gee.) E kɛ bɛ̃ɛ̃ kilia, laa mɔ i wɔ̃ do kɛ kɛɛ o tĩã i batai kɛ. Laa mɔ i wɔ̃ mɛdã e gbɛ̃a Zihova mɔ, i lɔkɛ a ka, ɛ̃ɛ̃ i i zodɔ a Gbe mɔ. Ye aa kɛɛ, laa mɔ i i dienɔ gbaa Zihova lɛɛ. Ye ɓaa wɔ̃ nia kɛ ɛ̃ɛ̃ lɛ waa i batai kɛɛ, bɛi lɛɛ lo kɛɛ i mɔ i kɛɓe kɛ geli ka toakili ka. Wala Lewe laa gee: “Yii e kilia lɛ mia batai kɛɛ lɛ e ka la gbaa gɔ̃ã ka.”—1 Pilɛ 3:21.
A PIE FOO
Pɛ a kɛ kpanazɛ kɛɛ i i dienɔ Zihova lɛɛ ɛ̃ɛ̃ o i batai kɛɛ gɛ̃.
3. Laa mɔ ko seĩ ko mi lɛ ko lo gbini a lɛɛ kũ ko zɔ̃ɔ̃ ka
Mɔ Eezɛlɛɛ, mia do o kɛ a gɛ̃pia kelɛ oo bɛi gbini Zihova lɛɛ to waa gbini kɛɛwɛlɛ lɛ e Bio kaa lɛɛ. Kɛɛ Zihova e la dɔlelami lɛ e kɛ Ilaya kaa vɔ kɛ e o gbɛ̃ zi kpeĩ pie. Ko 1 Kĩĩ 18:21 gee, ɛ̃ɛ̃ kɛ ko wɛĩlɔɔ e kea yiɓo:
-
Deĩ lɛ e kɛ a mɔ Eezɛlɛmia o kũ o zɔ̃ɔ̃ ka?
Lɛ Eezɛlɛmia lɛ ɓea, laa mɔ ko mi lɛ ko lo gbini a lɛɛ kũ ko zɔ̃ɔ̃ ka. Ko Luu 16:13 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛ e kɛ lɛ ye waa mɔ ko kɛ gbinipia Zihova lɛɛ to kɔaa gbini mido ɛ̃ɛ̃ pɛdo gbɛɛ lɛɛ?
-
Zi kpɛɛ lɛ ko zɔ̃ɔ̃a Zihova lɛɛ kelɛ kɔaa kũ ko zɔ̃ɔ̃ ka ko gbini a lɛɛ?
4. I yɛlɛtaa zi i lɔkpɔɔ lɛ a ka Zihova mɔɔ yi
Zihova aa gbaapɛ kpanazɛ bunuzɛ nɔ kɔa lɛɛ. Mɛ ko bɛi a nɔɔ a lɛɛ? Ko VILOA gɛ̃.
Zi bunuzɛ kpɛɛ lɛ Zihova aa lɔkɛamɔ zɔ̃ɔ̃a i lɛɛ? Ko Sãã 104:14, 15 wa Zɔ̃ɔ̃ 4:9, 10 gee, ɛ̃ɛ̃ kɛ ko wɛĩlɔɔ ni o kea yiɓo:
-
Gbaapɛ lɛ e go Zihova kɛlɛɛ ye kpɛɛ kpokpo lɛ i a zuo ɓo a wɛĩ?
-
Zi kpɛɛ lɛ gbaapɛ nia a kɛ ɓaa i yɛlɛtaa e gbɛ̃a Wala mɔ?
Ye kɔaa gbaapɛ lɛ ko naa ka kpokpo ɓoa sɔlɔɓoa, koo naa ko mi a nɔ ko lɛɛ zuo ɓo a wɛĩ. Ko Ditɔlɔnɔme 16:17 gee, ɛ̃ɛ̃ kɛ ko wɛĩlɔɔ e kea yiɓo:
-
Ye ɓaa i yɛlɛtaa wɔ̃ seĩ lɛ Zihova aa kɛ i lɛɛ yia, mɛɛ wɔ̃ lɛ i naa ɓa kɛ a lɛɛ kili?
5. Ye ɓaa i dienɔ Zihova lɛɛ, lɛɛ lo lua kpɔɔ i mɔ zi bunuzɛ ka
Mia bunuzɛ oo gɛ̃ kelɛ tɔɓɔ, yɛɓo kpanazɛ kɛɛ, wa pɛlee lɛɛ lo o kɛɛ gelizɛ. Kea lɛ wana ka? Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o toa piea yiɓo.
-
Viloa yia, ye bɛ̃ɛ̃ lɛ gɔ̃ɔ a lɔkɛ bɔɔ mɛɛ kaa, mɛ e kɛ lɛ e kãa lɛɛ?
-
A ya e ge e e dienɔ Zihova lɛɛ, ye wa bɔɔ kpo mɛɛ ka. Ɓaa i yɛlɛtaaa, wɔ̃ kpeĩ lɛ a kɛɛ? Mɛɛ wɔ̃ wɛĩ?
Kɛ Apɔsɔlɔ Pɔɔ e tĩã kɛɛ Tokɛlɛipiemi kaa, e kɛ kɛkpanazɛla naapia. E Zuumia wa lɔɔ mɛdã pɛzɔ̃ɔ̃mi kpanazɛ kɔ wi. Kɛɛ, e wɔ̃ nia to e mɛi kɛɛ e kɛ Tokɛlɛipiemi ka. Kea Pɔɔ zo e da zizaa? Ko Felepĩã 3:8 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛ e kɛ lɛ Pɔɔ a gee kelɛ, wɔ̃ a kɛ kɛɛ e tĩã kɛɛ Tokɛlɛipiemi kaa e o seĩ o gɛ̃ nɔ lɛ gboo lɛ ɓe?
-
A kɛ a ɓo kilia, mɛ wɔ̃ yie lɛ a sɔlɔɓo?
-
Zi kpɛɛ lɛ i bɛi gbini Zihova lɛɛ gɔ̃ɔ a ka zi nɔɔfe lɛ i bɛi ɓa kɛɓe kɛɛ a kaa mɔ?
Lɛ Pɔɔ e kɛ Tokɛlɛipiemi kaa, pɛ a sɔlɔɓoa e die pɛ seĩ lɛ a to e mɛia la
MIA DO OO GEE: “Dienɔ Wala lɛɛ yi waa mɔ.”
-
Mɛ e kɛ lɛ i i yɛlɛtaa kelɛ lɛ gikã kpeĩ ka kɛɛ i i dienɔ Zihova lɛɛ?
WƆ̃Ɔ WŨ
Lɔkɛamɔ laa kɛ kɔaa kɔa dienɔ Zihova lɛɛ ɛ̃ɛ̃ waa ko batai kɛ.
Zovuo Wɔ̃
-
Mɛ e kɛ lɛ laa mɔ ko gbini Zihova lɛɛ ko zo seĩ ka?
-
Zi kpɛɛ lɛ Zihova e la Kelavɔ lɛ waa o batai kɛɛ gɛ̃ a ka?
-
I loa naa i i dienɔ Zihova lɛɛ?
I NYIƐ KPƆ
I pɛ e kɛ lɛ tãɓomi doo wa bɔɔmɛmi doo, o dienɔ Zihova lɛɛ kũ o zɔ̃ɔ̃ kaa gɛ̃.
Wɛĩlɔɔ Lɛ Mia Dɛɛ O Kɛɛ—Mɛ M Lo A Kɛɛ M Kɛɓe Yi?—Ye Maa Lɛ Gɛ̃ M Mɛia (6:54)
Pɛ e kɛ lɛ laa mɔ i i dienɔ Zihova lɛɛ do gɛ̃.
“Mɛ E Kɛ Lɛ I I Dienɔ Zihova Lɛɛ?” (Wɔ̃lagɛ̃kamaa, Luelue 15, 2010)
Tã vilo e kea yia, i mia o o dienɔ Zihova lɛɛ, ɛ̃ɛ̃ zi o kɛa gelizɛɛ gɛ̃.
I wɔ̃ lɛ e gbũ lee do mɔ kɛ e wɔ̃ lɛ lɛ kpanazɛ la kɛɓe yia yimaa gɛ̃ wɔ̃ e kea yi, “Maa M Yɛlɛtaa Wɔ̃ E Kea Yi Kɛɛ Bunuzɛ Pie, ‘Mɛ E Kɛ Lɛ Ko Zee?’”
“Baaboa Lɛɛ Mia Wa Kɛɓe Mɛvɔɔ” (Wɔ̃lagɛ̃kamaa, Wiipieto 1, 2012)