LESON 46
Kifer Ou Bizin Donn Zeova Ou Lavi ek Pran Batem?
Kan ou vwe ou lavi ar Zeova ouswa ou donn Zeova ou lavi, ou promet Li dan enn lapriyer ki ou pou ador zis Li tousel, ek ki ou pou fer so volonte pas an premie dan ou lavi. (Psom 40:8) Apre sa, ou pran batem. Kan ou fer sa, ou montre lezot dimounn ki ou finn donn Zeova ou lavi. Kan enn kikenn donn Zeova so lavi, se samem desizion pli inportan ki li kapav pran dan so lavi. Ki kitsoz kapav motiv ou pou pran sa desizion bien inportan la?
1. Ki pous enn dimounn pou donn Bondie so lavi?
Se lamour ki pous nou pou donn Zeova nou lavi. (1 Zan 4:10, 19) Labib donn nou sa lankourazman-la: “Kontan Lesegner [“Zeova,” NW] to Bondie avek tou to leker, tou to lam, tou to lespri ek tou to lafors.” (Mark 12:30) Nou montre Bondie ki nou kontan Li, pa zis par seki nou dir me osi par seki nou fer. Parey kouma enn misie ek enn madam ki vremem kontan zot kamarad desid pou marye, nou lamour pou Zeova pous nou pou donn Li nou lavi ek pou pran batem.
2. Ki bann benediksion Zeova donn so bann Temwin ki batize?
Kan ou pran batem, ou pou form parti dan fami Zeova. Ou pou kapav trouv lamour Zeova dan diferan fason, ek ou pou vinn pli pros avek Li ankor. (Lir Malaki 3:16-18.) Zeova pou vinn ou Papa, ek ou pou gagn enn fami internasional ki kontan Li ek ki kontan ou. (Lir Mark 10:29, 30.) Ena bann diferan kitsoz ki ou pou bizin fer avan ki ou pran batem. Ou bizin aprann konn Zeova, kontan Li, ek ena lafwa dan so Garson. Ek finalman, ou bizin donn Zeova ou lavi. Si ou fer sa bann diferan kitsoz la ek pran batem, ou pou kapav viv ere pou touletan. Parol Bondie dir: “Batem ki pe sov zot asterla.”—1 Pier 3:21.
ANOU GET INPE PLIS
Gete kifer li inportan ki ou donn Zeova ou lavi ek pran batem.
3. Nou tou bizin swazir kisannla nou pou servi
Dan lepase, sertin Izraelit ti panse ki zot ti kapav servi Zeova ek anmemtan servi enn fos bondie ki apel Baal. Me Zeova ti avoy so profet Eli pou koriz zot move fason panse. Lir 1 Lerwa 18:21, ek apre sa, get sa kestion-la ansam:
-
Ki swa bann Izraelit ti bizin fer?
Parey kouma bann Izraelit, nou osi nou bizin swazir kisannla nou pou servi. Lir Lik 16:13, ek apre sa, get sa bann kestion-la ansam:
-
Kifer nou pa kapav ador Zeova ek enn lot dimounn ouswa enn lot kitsoz anmemtan?
-
Kouma nou montre Zeova ki nou swazir pou ador Li?
4. Medit lor lamour ki Zeova ena pou ou
Zeova finn donn nou bann kado ki ena boukou valer. Ki nou kapav donn Li? Zwe VIDEO-la.
Kouma Zeova finn montre ki Li kontan ou? Lir Psom 104:14, 15 ek 1 Zan 4:9, 10, ek apre sa, get sa bann kestion-la ansam:
-
Ki bann kado Zeova finn donn ou ki ou bien kontan?
-
Ki ou resanti pou Zeova kan ou pans lor sa bann kado-la?
Kan nou resevwar enn kado ki nou bien kontan, nou anvi montre nou rekonesans anver sa dimounn ki’nn donn nou sa kado-la. Lir Deteronom 16:17, ek apre sa, get sa kestion-la ansam:
-
Kan ou reflesi lor tou seki Zeova finn fer pou ou, ki sa pous ou pou donn Li?
5. Kan ou donn Zeova ou lavi ou pou gagn boukou benediksion
Boukou dimounn panse ki zot pou ere si zot popiler, si zot ena enn bon plas travay, ouswa si zot ena enn ta kas. Me eski sa li vre? Zwe VIDEO-la, ek apre sa, get sa bann kestion-la ansam:
-
Mem si sa misie-la ti bien kontan zwe football, kifer li’nn kit sa travay-la?
-
Li ti desid pou donn Zeova so lavi, olie ki li ti donn sa pou football. Eski ou panse ki li’nn pran enn bon desizion? Kifer?
Avan ki lapot Pol vinn enn Kretien, li ti ena posibilite pou vinn enn kikenn inportan dan so lepok. Li ti etidie lalwa Zwif avek enn gran profeser. Me li ti kit tousala pou vinn enn Kretien. Eski Pol ti regrete? Lir Filipien 3:8, ek apre sa, get sa bann kestion-la ansam:
-
Kifer Pol ti konsider bann kitsoz ki li ti pe fer avan ki li vinn enn Kretien kouma “bann salte”?
-
Ki li ti gagne dan plas tou sa bann kitsoz-la?
-
Eski ou lavi pou pli bon si ou swazir pou servi Zeova? Kifer ou pans sa?
Kan Pol inn vinn enn Kretien, li’nn gagn plis ki seki li’nn perdi
SERTIN DIMOUNN DIR: “Mo kone ki sa li laverite, me mo pankor pre pou pran batem.”
-
Kifer ou panse ki li bien inportan ki ou donn Zeova ou lavi?
SEKI NOU’NN APRANN
Lamour pous nou pou donn Zeova nou lavi ek pou pran batem.
Eski Ou Rapel?
-
Kifer Zeova merite ki nou kontan Li avek tou nou leker ek ki nou ador Li?
-
Kouma Zeova beni so bann Temwin ki batize?
-
Eski ou ti pou kontan donn Zeova ou lavi?
DEKOUVER
Gete ki’nn pous enn mizisien ek enn atlet pou donn Zeova zot lavi.
Bann Zenn Demande—Ki Mo Pou Fer ar Mo Lavi?—Zot Lexperyans (6:54)
Examinn bann lezot rezon ki pous nou pou donn Zeova nou lavi.
“Kifer nou bizin voué nou la vie ar Jéhovah?” (Latour Degard, 1e Zanvie 2010)
Dan sa klip-la, gete kouma bann ki’nn donn Zeova zot lavi inn gagn boukou lazwa.
Dan lartik « Pendant des années, je me suis demandé pourquoi on existe » gete ki’nn pous enn madam pou re-examinn so bann priorite.
“Labib Sanz Bann Dimounn” (Latour Degard, 1e Novam 2012, an Franse)
Ena Osi
KESTION KI POZE SOUVAN
Ki sa Inplike Etidie Labib Avek Bann Temwin Zeova?
Bann Temwin Zeova ofer bann letid Labib gratis, ek ou kapav servi ninport ki version Labib ki ou anvi. Santi ou lib pou invit bann manb ou fami ouswa bann kamarad ki ou anvi.
