MPANTTA 46
Kontha isiyani nyuuva nhaana mwiivahereraka wa Yehova ni mpattisiyaka?
Itthu yootepa ukhalana ifayita inlamuliyeehu ulakela upanka muukumini wihu ukhanle wiivaherera wa Yehova. Hi nineevaherera wa Yehova nalompaka ninkhuluvelihaka wiira ninhala unswalela uyova paahi, ni upanka itthu inoncivela phi itthu inhaleehu uhoolelihera muukumini wihu. (Isaalimu 40:8) Napankaka iyo itthwiiyo, vano phimpattisiyeehu. Ukati umpattisiyeehu, ninawaathoonyera atthwaayo wiira hiivano niheevaherera wa Yehova. Wiivaherera wa Yehova unaarukunusa makhalelo a ntthu. Masi isiyani immwiiriha ntthu ulakela upanka iyo itthwiiyo?
1. Isiyani immwiiriha ntthu wiivaherera wa Yehova?
Itthu inniiriha wiivaherera wa Yehova ukhanle unfenta. (1 Joau 4:10, 19) Ibiiblya ineera: “Unfente Yehova, Nlukwaa, ninrimaa wotheene, nuukumyaa wotheene, nimoopuwelelwaa otheene ni niikuru caa cotheene.” (Markus 12:30) Hi ninthoonyihera wiira ninanfenta Yehova kahi paahi nimoolumacerweehu, masi ciicammo nicitthu cimpankeehu. Wootakihera, atthu eeli apakanelanne wakhalaka wiira khweeliini anaafentana, ayo anaalakela uthelana. Inanna imocaaru, unfenta wihu Yehova unaanikurumica wiivaherera ni upattisiya.
2. Ntthu apattisiyaka iparakhani cinvahiyaawe ni Yehova?
Nyuuva mwapattisiyaka, nnaahala upanka mphantte waamuci a Yehova. Vano, nnaahala woona mananna Yehova cinhalaawe uthoonyihera wuufentani ni nnaahala utepa umpatthanana. (Nsome Malakiya 3:16-18.) Uhiya paasi Yehova ukhala Apaapeenyu, nyuuva nnaahala ukhalana mayamunneenyu ni asirokorinyu amphwanyannya ntuninyani motheene, atthu anonfenta Yehova ni anoofentani nyuuva. (Nsome Markus 10:29, 30.) Masi nhinaaya upattisiya, cihaavo citthu cinlamuliyeenyu upanka. Nyuuva nhaana mwiitthucaka myaha ca Yehova, unfenta ni umwaamini Yesu Kristu khanle Mwanawe. Vano, nyuuva pooti wiivaherera wa Yehova. Mwapankaka nnya citthunnya, vano mpattisiyaka, nyuuva nnaahala ukhalana iparakha yoohala ukhala mpaka. Nuulumo na Nluku nineera: “Upattisiya . . . unaawoopolani nyuuva nenna co.”—1 Peturu 3:21.
MUNCERERE WIITTHUCA WINYU
Moone kontha isiyani ikhanlyaaya itthu yofayita nyuuva wiivaherera wa Yehova ni upattisiya.
3. Otheene cihu nihaana nilakelaka tipani ninhaleehu unswalela
Khalayi, iriyari ya apoovu o Isarayeli, ahaavo yoopuwela wiira pooti wanswalelaaya Yehova ni ciicammo unswalela nluku oohikhweeli eehaniya Bahaali. Masi Yehova ahonveleeliha porofeetaawe eehaniya Eliyasi wiira aahimyeere ayo atthwaayo wiira iyo itthwiiyo yaari itthu yoohinamaana. Nsome 1 Mamwene 18:21, ni mwamalihaka usoma, moopele mwaha nna nikohonna:
-
Isiyani asarayeli yaalamuliyaaya ulakela upanka?
Khampa asarayeli, hiiva ciicammo nihaana nilakelaka tipani ninhaleehu unswalela. Nsome Luka 16:13, ni mwamalihaka usoma, moopele mwaha ala makohwaala:
-
Atthu akhwaawe anoopuwela wiira pooti wanonswalelaaya Yehova ni ciicammo uswalela citthu cikhwaawe. Kontha isiyani khawankhitirya upanka iyo itthwiiyo?
-
Ninhala uthoonyihera cani wiira niholakela unswalela Yehova paahi?
4. Muupuwele mananna Yehova cinoofentaaweni
Yehova honivaha citthu cinci comaana. Isiyani hiiva ninlamuliyeehu unvaha? Moone IVIDIYU.
Manannani Yehova cinthoonyeraawe wiira nawuufentani? Nsome Isaalimu 104:14, 15 ni 1 Joau 4:9, 10. Mwamalihaka usoma, moopele mwaha ala makohwaala:
-
Citthuni Yehova cinivahilyaawe nyuuva cinooneenyu ukhala comaana cinene?
-
Waakhela citthu cinnivahaawe Yehova unaawiirihani upanka isiyani?
Nyuuva nhotoko uvahiya itthu yootteelihileni nrima cinene? Khweeliini nyuuva mwahopheela uthoonyihera unsukhuru ntthu oovahileni iyo itthwiiyo. Nsome Deuteronomiyu 16:17, ni mwamalihaka usoma, moopele mwaha nna nikohonna:
-
Wuupuwela citthu cotheene Yehova cuuvahilyaaweni, unaawiirihani nyuuva upheela umpankela isiyani?
5. Wiivaherera wa Yehova unamphwanyiha ntthu iparakha cinci
Atthu enci anoopuwela wiira ukhalana ifaama, nteko womaana awula nsurukhu phinhala waaphwanyiha utteeliya. Niireke iyo ikhanle ikhweeli? Moone IVIDIYU, ni mwamalihaka woona, moopele mwaha ala makohwaala:
-
Hataa ukhalaka wiira Andrey aanonciva mphira, nlattuni wanhiilyaawe unttikha?
-
Uyo aholakela wiivaherera wa Yehova, kahi mphira. Woonela winyu, aholakela upanka itthu yomaana? Kontha isiyani?
Apostolu Paulu hinaaya ukhala nkristau, ahaana citthu cotheene caahala umwiiriha ukhala ntthu oocuwelaciya. Uyo ahosomihiya malamulo aayuuta ninlopwana oocuwelaciya cinene. Masi apostolu Paulu ahohiya citthu cotheene wiira akhale nkristau. Niireke uyo ahottharuwa nlattu wo itthu yaalakenlyaawe? Nsome Afilipo 3:8, ni mwamalihaka usoma, moopele mwaha ala makohwaala:
-
Kontha isiyani apostolu Paulu enryaawe wiira citthu caapankaawe hinaaya ukhala nkristau ‘oona ukhala ikokhola’?
-
Isiyani apostolu Paulu yaaphwanyilyaawe waamini wawe uhiya citthu cotheene caarinaawe?
-
Woonela winyu, nyuuva nnaahala ukhala saana mwalakelaka unswalela Yehova? Kontha isiyani nneereenyu commo?
Ukhala nkristau wahomwiiriha Paulu ukhalana citthu cinci uvikana nnye caahiilyaawe uttuli
ATTHU AKIINA ANEERA: “Kinaacuwela wiira kihaana keettelaka itthu inhimyaaya Ibiiblya, masi akinaaya wiitthenkaca wiira kipattisiye.”
-
Nlattuni nyuuva nnooneenyu wiira unaareera wiivaherera wa Yehova?
UTHIKILELA
Unfenta Yehova unaanikurumica wiivaherera ni upattisiya.
Wuupuwela
-
Kontha isiyani Yehova unamphwanela hiivano unfenta ni unswalela?
-
Iparakhani Yehova cinaavahaawe ale apattisiye?
-
Nyuuva waanoocivelani wiivaherera wa Yehova?
MWAPHEELAKA UCUWELA CITTHU CIKIINA
Moone kontha isiyani nthiyana mmoca eepa macipo aneehaniya ópera ni nlopwana mmoca anciva unttikha mphira yaalakenlyaaya wiivaherera wa Yehova.
Amirawo Anaakoha—Kipankeke isiyani muukumini waka?—Wuupuwela (6:54)
Moone citthu cikhwaawe cinlamuliya uwiirihani wiivaherera wa Nluku.
“Kontha isiyani kihaana kiivahereraka wa Yehova?” (Ukhalenla, 15 yo Janeiro yo 2010)
Nhina ila ividiyu ila, moone utteeliya unkhalanaaya ale aneevaherera wa Yehova.
Nsome ihantisi irina muru uneera: “Mi kaaneekohaka ‘Nlattuni wariihu va walaponi va?’” wiira moone isiyani yaakurumicile athiyana amoca wuupuwela itthu yaateepaaya uhoolelihera muukumini waya.
“Ibiiblya inaarukunusa makhalelo aatthu” (Ukhalenla, 1 yo Novembro yo 2012)
