ISAMBILILO 46
U Mulandu ci Uno Mulinzile Ukuipeelela nu Kubatiziwa?
Ukuipeela kuli Yeova u kupepa ipepo lya kumulaya ukuti, mumamupepanga wenga sile nu kukolezya ukulonda kwakwe umu umi winu. (Masamu 40:8) Pa cisila mulinzile ukubatiziwa. Nga mwacita vivyo ala mwalanga yauze ukuti mwaipeela. Ukuipeela kuli Yeova, ali cintu cicindamisye cino mungacita. I cani cingamikomelezya ukucita vivyo?
1. I cani cikalenga umwi aipeele?
Ukutemwa, u kukalenga tuipeele kuli Yeova. (1 Yoani 4:10, 19) Baibo ikatunena ukuti: “Uwatemwa Yeova Leza wako nu mwenzo wako onsi, nu umi wako onsi na mano yako yonsi na maka yako yonsi.” (Mako 12:30) Tukalanga ukuti twatemwa Leza asi sile muli vino tukalanda, lelo na muli vino tukacita. Wakwe vino mama nu monsi aatemwana yakasuka iyatwalana, a vino ukutemwa Yeova kungalenga tuipeele kuli aliwe nu kubatiziwa.
2. I visuma ci vino Yeova akapeela ya Nte aabatiziwa?
Nga mwabatiziwa, mulaya umu lupwa lwakwe Yeova umwaya antu aya ni nsansa. Mulalola vino Yeova alamulanga ukutemwa umu nzila izingi, nupya mulapalama sana kuli aliwe ukucila vino caya ndakai. (Belengini Malaki 3:16-18.) Nupya Yeova alaya a tata winu, mulakwata ulupwa lwa ina na ya nkazi umu nsi yonsi aatemwa Yeova nupya amutemwa. (Belengini Mako 10:29, 30.) Ukuya kwene kuli ivingi vino mulinzile ukucita lino mutatala mwabatiziwa. Mulinzile ukusambilila pali Yeova, ukumutemwa nu kutaila umwanakwe. Lyene mulinzile ukuipeela kuli Yeova. Ndi cakuti mwacita vyonsi vii nu kubatiziwa, mulaya umu nzila ya ku umi wa pe. Izwi lyakwe Leza likalanda ukuti: “Lubatizyo u lukumupususya.”—1 Petulo 3:21.
LONDELEZYINI NA VYUZE
Londelezyini umulandu uno cacindamila ukuipeela kuli Yeova nu kubatiziwa.
3. Swensi kwene tulinzile ukusoololapo wino tulinzile ukulaombela
Aina Izlaeli aaliko mpiti, yelenganyanga ukuti yali nu kulapepa Bali pa nsita ili yonga kwene ala yakupepa na Yeova. Lelo Yeova watumile kasesema Eliya ukuti akayalungike. Belengini 1 Yamwene 18:21, alino mulanzyanye iuzyo lii:
-
I vyani vino aina Izlaeli yali nu kupingulapo?
Wakwe vino cali uku ina Izlaeli naswe kwene tulinzile ukusoolola wino tulinzile ukulaombela. Belengini Luka 16:13, alino mulanzyanye mauzyo yaa:
-
U mulandu ci uno tutange tupepele Yeova nu muntu muze nanti cintu cuze pa nsita ili imwi kwene?
-
Uzye tukalanga uli Yeova ukuti twasoololapo ukulamupepa?
4. Mwaelenganya pali vino Yeova wamutemwa
Yeova watupeela mawila aingi asuma.I vyani vino tungamupeela? Tambini VIDYO.
U mu nzila ci zimwi muno Yeova wamulanga ukutemwa? Belengini Masamu 104:14, 15 na 1 Yoani 4:9, 10, alino mulanzyanye mauzyo yaa:
-
A mawila ci yano Yeova wamupeela yano mukataizya sana?
-
Uzye mawila yayo yakalenga mwayuvwa uli pali aliwe?
Nga twapokelela uwila uno twatemwa sana, tukalonda ukulanga ukutaizya uku muntu uwatatupeela uwila uwo. Belengini Malango 16:17, alino mulanzyanye iuzyo lii:
-
Nga mwelenganya pali vyonsi vino Yeova wamucitila, i vyani vino mukalondesya ukumupeela?
5. Nga mwaipeela kuli Yeova mulapaalwa umu nzila izingi
Antu aingi yazumila ukuti, ukulumbuka, incito isuma nanti mpiya i vingalenga yaye ni nsansa. Uzye ica cumi? Tambini VIDYO, alino mulanzyanye mauzyo atiyalondelelapo.
-
Nanti cakuti kateya wa vyangalo uwalali muli vidyo watemilwe sana ukuteya bola, u mulandu ci uno wateelile?
-
Wasoolwilepo ukuipeela kuli Yeova ukucila ukwika mano uku kuteya bola. Uzye mukwelenganya ukuti vino wacisile vyali sile ningo? U mulandu ci?
Lino umutumwa Paulo atatala waya umwina Klistu, walondesyanga ukwikala ningo. Wasambilile masunde ya Ayuda kuli kasambilizya uwamanyikwe sana. Nomba wasiile vii vyonsi pakuti sile aye umwina Klistu. Uzye Paulo walangulwike pali vino wacisile? Belengini Filipi 3:8, alino mulanzyanye mauzyo yaa:
-
U mulandu ci uno Paulo walandiile ukuti vino wacisile lino atatala waya umwina Klistu, vyali wa “vikoona”?
-
I vyani lyene vino wapokeliile?
-
Uzye tungakolanya uli ukuombela Yeova uku vintu vyuze vino tungaomba umu umi?
Lino Paulo wizile aya umwina Klistu, wakweti ivintu ivingi ukucila vino wasiile
YAMWI YAKALANDA UKUTI: “Iimanya ukuti cii ali cumi, nomba ntatala naipekanya ukubatiziwa.”
-
Uzye mukwelenganya ukuti u mulandu ci uno cacindamila ukuipeela kuli Yeova?
VINO TWASAMBILILA
Ukutemwa u kukalenga tuipeele kuli Yeova nu kubatiziwa.
I vyani vino mwasambilila?
-
U mulandu ci uno Yeova walingila ukutemwikwa nu kupepwa nu mwenzo onsi?
-
Uzye Yeova akapaala uli ya Nte aabatiziwa?
-
Uzye mungatemwa ukuipeela kuli Yeova?
LONDELEZYINI
Lolini umulandu uno kimba wa nyimbo na kateya wa vyangalo yapingwililepo ukuipeela kuli Yeova.
Lolini na vyuze ivingalenga muipeele.
“U Mulandu ci Uno Mulinzile Ukuipeelela Kuli Yeova?” (Lupungu Lwa Mulinzi, Januwale 15, 2010)
Muli vidyo ii iya nyimbo, lolini vino yayo aaipela kuli Yeova yaya sana nu luzango.
Lolini vino umwanaci umwi watandike ukwelenganya pali cino cali icicindame sana kuli aliwe umu cipande icatangi “Pa Myaka Iingi Nasakamalanga pa Mulandu Uno Twayelako.”
“Baibo Ikaavwa Antu Ukusenuka” (Lupungu Lwa Mulinzi, Novemba 1, 2012)
Limwi Mungatemwa Ukulolako na Vii
MAUZYO YANO ANTU YAKAUZYA SANA
Uzye Isambililo Lya Baibo Ali Cani?
Zanini masuko ku mauzyo pali vino tukasambilizya antu Baibo ukwaula ukuyalipilisya.
