പാഠം 46
സമർപ്പണത്തിന്റെയും സ്‌നാനത്തിന്റെയും പ്രാധാന്യം എന്താണ്‌?
യഹോവയെ മാത്രമേ ആരാധിക്കൂ എന്നും ജീവിതത്തിൽ യഹോവയുടെ ഇഷ്ടത്തിനേ ഒന്നാം സ്ഥാനം കൊടുക്കൂ എന്നും നിങ്ങളുടെ പ്രാർഥനയിൽ യഹോവയ്‌ക്കു വാക്കുകൊടുക്കുന്നതാണു സമർപ്പണം. (സങ്കീർത്തനം 40:8) അതിനു ശേഷം നിങ്ങൾ സ്‌നാനമേൽക്കുന്നു. സ്‌നാനപ്പെടുമ്പോൾ നിങ്ങളുടെ ജീവിതം യഹോവയ്‌ക്കു സമർപ്പിച്ചെന്ന്‌ മറ്റുള്ളവരെ അറിയിക്കുകയാണ്‌. ജീവിതം യഹോവയ്‌ക്കു സമർപ്പിക്കുക എന്നതാണ്‌ നമുക്ക്‌ എടുക്കാവുന്ന ഏറ്റവും നല്ല തീരുമാനം. നിങ്ങളുടെ ജീവിതം മാറ്റിമറിക്കുന്ന ഒരു തീരുമാനമായിരിക്കും അത്‌. അങ്ങനെയൊരു തീരുമാനമെടുക്കാൻ നിങ്ങളെ പ്രേരിപ്പിക്കുന്നത്‌ എന്തായിരിക്കും?
1. ഒരാളെ സമർപ്പണത്തിന്‌ പ്രേരിപ്പിക്കുന്ന കാര്യം എന്താണ്‌?
യഹോവയോടുള്ള സ്‌നേഹംകൊണ്ടായിരിക്കണം നമ്മൾ യഹോവയ്‌ക്കു ജീവിതം സമർപ്പിക്കേണ്ടത്‌. (1 യോഹന്നാൻ 4:10, 19) ബൈബിൾ ഇങ്ങനെ നമ്മളെ പ്രോത്സാഹിപ്പിക്കുന്നു: “നിന്റെ ദൈവമായ യഹോവയെ നീ നിന്റെ മുഴുഹൃദയത്തോടും നിന്റെ മുഴുദേഹിയോടും നിന്റെ മുഴുമനസ്സോടും നിന്റെ മുഴുശക്തിയോടും കൂടെ സ്‌നേഹിക്കണം.” (മർക്കോസ്‌ 12:30) ദൈവത്തെ നമ്മൾ സ്‌നേഹിക്കുന്നുണ്ടെന്ന്‌ വാക്കുകളിലൂടെ മാത്രമല്ല പ്രവൃത്തികളിലൂടെയും കാണിക്കണം. പരസ്‌പരം സ്‌നേഹിക്കുന്ന ഒരു സ്‌ത്രീയും പുരുഷനും വിവാഹിതരാകാൻ തീരുമാനിക്കുന്നതുപോലെ യഹോവയോടുള്ള സ്‌നേഹം, ജീവിതം യഹോവയ്‌ക്കു സമർപ്പിച്ച്‌ സ്‌നാനമേൽക്കാൻ നമ്മളെ പ്രേരിപ്പിക്കുന്നു.
2. സ്‌നാനമേൽക്കുന്നവർക്ക്‌ എന്തൊക്കെ അനുഗ്രഹങ്ങളാണ്‌ യഹോവ കൊടുക്കുന്നത്‌?
നിങ്ങൾ സ്‌നാനമേറ്റുകഴിയുമ്പോൾ യഹോവയുടെ സന്തോഷമുള്ള കുടുംബത്തിന്റെ ഭാഗമായിത്തീരുന്നു. യഹോവയ്‌ക്കു നിങ്ങളോടുള്ള സ്‌നേഹം അപ്പോൾ നിങ്ങൾ പല വിധങ്ങളിൽ അനുഭവിച്ചറിയും. അങ്ങനെ യഹോവയോടു മുമ്പെന്നത്തെക്കാൾ നിങ്ങൾ അടുക്കും. (മലാഖി 3:16-18 വായിക്കുക.) സ്‌നേഹമുള്ള ഒരു പിതാവിനെ സമീപിക്കുന്നതുപോലെ നിങ്ങൾക്ക്‌ യഹോവയോട്‌ അടുക്കാൻ കഴിയും. മാത്രമല്ല യഹോവയെയും നിങ്ങളെയും സ്‌നേഹിക്കുന്ന, ലോകമെങ്ങുമുള്ള സഹോദരീസഹോദരന്മാരുടെ ഒരു കുടുംബവും നിങ്ങൾക്കു കിട്ടും. (മർക്കോസ്‌ 10:29, 30 വായിക്കുക.) സ്‌നാനമേൽക്കുന്നതിനു മുമ്പ്‌ നിങ്ങൾ ചില കാര്യങ്ങൾ ചെയ്യേണ്ടതുണ്ട്‌. അത്‌ എന്തൊക്കെയാണ്‌? നിങ്ങൾ യഹോവയെക്കുറിച്ച്‌ പഠിക്കണം, യഹോവയെ സ്‌നേഹിക്കണം, പുത്രനായ യേശുവിൽ വിശ്വസിക്കണം, ജീവിതം യഹോവയ്‌ക്കു സമർപ്പിക്കുകയും വേണം. ഇതിനെല്ലാം ശേഷം സ്‌നാനമേൽക്കുന്നതോടെ എന്നേക്കും ജീവിതം ആസ്വദിക്കാനാകുന്ന വഴിയിലൂടെ നിങ്ങൾ സഞ്ചരിക്കുകയാണെന്നു പറയാം. ദൈവവചനം പറയുന്നു: ‘സ്‌നാനം നിങ്ങളെ രക്ഷിക്കുന്നു.’—1 പത്രോസ്‌ 3:21.
ആഴത്തിൽ പഠിക്കാൻ
നിങ്ങൾ യഹോവയ്‌ക്കു ജീവിതം സമർപ്പിച്ച്‌ സ്‌നാനമേൽക്കേണ്ടത്‌ എന്തുകൊണ്ടാണെന്നു നോക്കാം.
3. നമ്മൾ ആരെ ആരാധിക്കുമെന്ന്‌ തീരുമാനിക്കണം
ഇസ്രായേലിൽ പണ്ട്‌ ജീവിച്ചിരുന്ന ചില ആളുകൾ വിചാരിച്ചിരുന്നത്‌, അവർക്ക്‌ യഹോവയെയും വ്യാജദൈവമായ ബാലിനെയും ഒരുമിച്ച്‌ ആരാധിക്കാൻ കഴിയും എന്നായിരുന്നു. എന്നാൽ പ്രവാചകനായ ഏലിയയെ ഉപയോഗിച്ച്‌ യഹോവ അവരുടെ തെറ്റായ ആ ചിന്താഗതി തിരുത്തി. 1 രാജാക്കന്മാർ 18:21 വായിക്കുക. എന്നിട്ട്‌ ഈ ചോദ്യം ചർച്ച ചെയ്യുക:
-
ഇസ്രായേല്യർ എന്തു തിരഞ്ഞെടുപ്പു നടത്തണമായിരുന്നു?
ആരെ ആരാധിക്കണം എന്ന കാര്യത്തിൽ ഇസ്രായേല്യരെപ്പോലെ നമ്മളും ഒരു തിരഞ്ഞെടുപ്പ്‌ നടത്തണം. ലൂക്കോസ്‌ 16:13 വായിക്കുക. എന്നിട്ട്‌ ഈ ചോദ്യങ്ങൾ ചർച്ച ചെയ്യുക:
-
യഹോവയോടൊപ്പം മറ്റ്‌ ആരെയെങ്കിലുമോ എന്തിനെയെങ്കിലുമോ ആരാധിക്കാൻ കഴിയില്ല എന്നു പറയുന്നത്‌ എന്തുകൊണ്ടാണ്‌?
-
നിങ്ങൾ യഹോവയെ മാത്രമാണ്‌ ആരാധിക്കാൻ ആഗ്രഹിക്കുന്നതെന്ന്‌ എങ്ങനെ തെളിയിക്കാം?
4. യഹോവയ്‌ക്ക്‌ നിങ്ങളോടുള്ള സ്‌നേഹത്തെക്കുറിച്ച്‌ ആഴത്തിൽ ചിന്തിക്കുക
വിലയേറിയ പല സമ്മാനങ്ങളും യഹോവ നമുക്കു തന്നിട്ടുണ്ട്‌. എന്നാൽ നമ്മൾ യഹോവയ്‌ക്ക്‌ എന്തു കൊടുക്കും? വീഡിയോ കാണുക.
യഹോവ നിങ്ങളോടു സ്‌നേഹം കാണിച്ച ചില വിധങ്ങൾ പറയാമോ? സങ്കീർത്തനം 104:14, 15; 1 യോഹന്നാൻ 4:9, 10 എന്നീ വാക്യങ്ങൾ വായിക്കുക. എന്നിട്ട്‌ ഈ ചോദ്യങ്ങൾ ചർച്ച ചെയ്യുക:
-
യഹോവ തന്ന ഏതെല്ലാം സമ്മാനങ്ങൾക്കുവേണ്ടിയാണ്‌ നിങ്ങൾ പ്രത്യേകം നന്ദി പറയാൻ ആഗ്രഹിക്കുന്നത്‌?
-
ആ സമ്മാനങ്ങളെപ്പറ്റി ചിന്തിക്കുമ്പോൾ നിങ്ങൾക്ക്‌ യഹോവയോട്‌ എന്താണു തോന്നുന്നത്‌?
നമുക്ക്‌ വളരെ ഇഷ്ടമുള്ള ഒരു സമ്മാനം കിട്ടിയാൽ അതു തന്ന വ്യക്തിയോട്‌ തീർച്ചയായും നമ്മൾ നന്ദി കാണിക്കും. ആവർത്തനം 16:17 വായിക്കുക. എന്നിട്ട്‌ ഈ ചോദ്യം ചർച്ച ചെയ്യുക:
-
യഹോവ നിങ്ങൾക്കു ചെയ്‌തുതന്ന എല്ലാ കാര്യങ്ങളെക്കുറിച്ചും ചിന്തിക്കുമ്പോൾ യഹോവയ്‌ക്കുവേണ്ടി എന്തു ചെയ്യാനാണു നിങ്ങൾക്കു തോന്നുന്നത്‌?
5. സമർപ്പണത്തിലൂടെ ധാരാളം അനുഗ്രഹങ്ങൾ നേടാം
നല്ല ജോലി, പണം, പ്രശസ്‌തി ഇതൊക്കെ ഉണ്ടെങ്കിൽ സന്തോഷം ഉണ്ടാകുമെന്നാണു പല ആളുകളും വിശ്വസിക്കുന്നത്‌. എന്നാൽ അതു സത്യമാണോ? വീഡിയോ കാണുക. അതിനു ശേഷം ഈ ചോദ്യങ്ങൾ ചർച്ച ചെയ്യുക:
-
ഫുട്‌ബോൾ കളിക്കുന്നത്‌ ഒരുപാട്‌ ഇഷ്ടമായിരുന്ന ഒരു വ്യക്തി കളിക്കളത്തോട്‌ വിടപറഞ്ഞത്‌ എന്തുകൊണ്ടാണ്‌?
-
ഫുട്‌ബോളിനുവേണ്ടി തന്റെ ജീവിതം സമർപ്പിക്കാതെ അദ്ദേഹം യഹോവയ്‌ക്കുവേണ്ടി ജീവിതം സമർപ്പിച്ചു. അദ്ദേഹത്തിന്റെ തീരുമാനം ശരിയായിരുന്നു എന്നു തോന്നുന്നുണ്ടോ, എന്തുകൊണ്ട്‌?
ഒരു ക്രിസ്‌ത്യാനിയാകുന്നതിനു മുമ്പ്‌ അപ്പോസ്‌തലനായ പൗലോസിന്‌ അന്നത്തെ സമൂഹത്തിൽ ഉന്നതസ്ഥാനത്ത്‌ എത്താനുള്ള എല്ലാ അവസരങ്ങളും ഉണ്ടായിരുന്നു. അന്നത്തെ പേരുകേട്ട ഒരു അധ്യാപകന്റെ കീഴിലാണ്‌ അദ്ദേഹം ജൂതനിയമം പഠിച്ചത്‌. എന്നാൽ ഒരു ക്രിസ്‌ത്യാനി ആകുന്നതിനുവേണ്ടി അദ്ദേഹം അതെല്ലാം ഉപേക്ഷിച്ചു. വിട്ടുകളഞ്ഞ കാര്യങ്ങളെക്കുറിച്ച്‌ ഓർത്ത്‌ അദ്ദേഹത്തിന്‌ എന്തെങ്കിലും വിഷമം തോന്നിയോ? ഫിലിപ്പിയർ 3:8 വായിക്കുക. എന്നിട്ട്‌ ഈ ചോദ്യങ്ങൾ ചർച്ച ചെയ്യുക:
-
ക്രിസ്‌ത്യാനിയാകുന്നതിനു മുമ്പ്‌ നേടിയ കാര്യങ്ങൾ ‘വെറും ഉച്ഛിഷ്ടമാണ്‌’ അഥവാ ചവറാണ്‌ എന്നു പൗലോസ്‌ പറയുന്നത്‌ എന്തുകൊണ്ടാണ്‌?
-
ഉപേക്ഷിച്ച കാര്യങ്ങൾക്കു പകരമായി പൗലോസ്‌ എന്തൊക്കെയാണു നേടിയത്‌?
-
നമ്മുടെ ജീവിതം യഹോവയെ സേവിക്കുന്നതിനുവേണ്ടി ഉപയോഗിക്കുന്നതാണോ അതോ മറ്റ്‌ എന്തിനെങ്കിലുംവേണ്ടി ഉപയോഗിക്കുന്നതാണോ നല്ലത്‌? എന്തുകൊണ്ട്‌?
പൗലോസ്‌ ഒരു ക്രിസ്‌ത്യാനി ആയപ്പോൾ താൻ വിട്ടുകളഞ്ഞതിനെക്കാൾ ഏറെ കാര്യങ്ങൾ നേടി
ആരെങ്കിലും ഇങ്ങനെ പറഞ്ഞാൽ: “നമ്മൾ എന്തിനാ ദൈവത്തിനു ജീവിതം സമർപ്പിക്കുന്നത്‌?”
-
ജീവിതം യഹോവയ്‌ക്കു സമർപ്പിക്കുന്നതാണ്‌ ഏറ്റവും നല്ല തീരുമാനം എന്നു പറയുന്നത്‌ എന്തുകൊണ്ടാണ്‌?
ചുരുക്കത്തിൽ
യഹോവയോടുള്ള സ്‌നേഹമാണു സമർപ്പണം നടത്താനും സ്‌നാനപ്പെടാനും നമ്മളെ പ്രേരിപ്പിക്കുന്നത്‌.
ഓർക്കുന്നുണ്ടോ?
-
നമ്മുടെ മുഴുഹൃദയത്തോടെയുള്ള സ്‌നേഹവും ആരാധനയും യഹോവ അർഹിക്കുന്നത്‌ എന്തുകൊണ്ട്‌?
-
സ്‌നാനമേറ്റ തന്റെ ദാസരെ യഹോവ എങ്ങനെയാണ്‌ അനുഗ്രഹിക്കുന്നത്‌?
-
നിങ്ങളുടെ ജീവിതം യഹോവയ്‌ക്കു സമർപ്പിക്കാൻ നിങ്ങൾ ആഗ്രഹിക്കുന്നുണ്ടോ?
കൂടുതൽ മനസ്സിലാക്കാൻ
ഒരു കായികതാരവും ഒരു സംഗീതജ്ഞയും ജീവിതം യഹോവയ്‌ക്കു സമർപ്പിക്കാൻ തീരുമാനിച്ചത്‌ എന്തുകൊണ്ടാണ്‌?
യുവജനങ്ങൾ ചോദിക്കുന്നു— ജീവിതംകൊണ്ട്‌ ഞാൻ എന്തു ചെയ്യും?—പിന്തിരിഞ്ഞുനോക്കുമ്പോൾ (6:54)
സമർപ്പണം നടത്തേണ്ടതിന്റെ മറ്റു കാരണങ്ങൾ.
“നിങ്ങളെത്തന്നെ യഹോവയ്‌ക്കു സമർപ്പിക്കേണ്ടത്‌ എന്തുകൊണ്ട്‌?” (വീക്ഷാഗോപുരം 2010 ജനുവരി 15)
ജീവിതം യഹോവയ്‌ക്കു സമർപ്പിച്ചവരുടെ സന്തോഷം ഈ ചിത്രഗീതത്തിലൂടെ കാണാം.
ജീവിതത്തിലെ ലക്ഷ്യങ്ങളെക്കുറിച്ച്‌ മാറിച്ചിന്തിക്കാൻ ഒരു സ്‌ത്രീയെ സഹായിച്ചത്‌ എന്താണെന്ന്‌ അറിയാൻ “ജീവിതത്തിന്റെ ശരിക്കുമുള്ള ഉദ്ദേശ്യം എന്താണെന്ന്‌ ഒടുവിൽ ഞാൻ കണ്ടെത്തി” എന്ന ലേഖനം വായിക്കുക.
“ബൈബിൾ ജീവിതത്തിനു മാറ്റം വരുത്തുന്നു” (വെബ്‌സൈറ്റിലെ ലേഖനം)
ഇതും ഇഷ്ടപ്പെട്ടേക്കാം
സാധാരണ ചോദിക്കാറുള്ള ചോദ്യങ്ങൾ
യഹോവയുടെ സാക്ഷികൾ തയ്യാറാക്കിയിരിക്കുന്ന ബൈബിൾപഠന പരിപാടി എന്താണ്‌?
യഹോവയുടെ സാക്ഷികൾ നിങ്ങൾക്കുവേണ്ടി രസകരമായ ബൈബിൾപഠന പരിപാടി തയ്യാറാക്കിയിരിക്കുന്നു. നിങ്ങൾക്ക്‌ ഇഷ്ടമുള്ള ഏത്‌ ബൈബിൾഭാഷാന്തരം ഉപയോഗിച്ചും പഠിക്കാം. കുടുംബത്തെ മുഴുവനോ കൂട്ടുകാരെയോ ആരെ വേണമെങ്കിലും പഠിക്കുമ്പോൾ കൂടെക്കൂട്ടാം.
