ISAMBILILO 46
Amulandu ci Wuno uzipizile Ukuyipa nu Kubatizwa?
Tukayipa kwe Yehova nga twamulaya swenga mwi pepo ukuti twandi twamupepa wenganye swinya awino twandi twacindamika mu wumi witu. (Amalumbo 40:8) Nga twacita wo-o apano tukaya mukubatizwa. Wonye uwanda apano wonsinye wakakwiza mukumanya ukuti twayipa kaali kwe Yehova. Ukupingulapo ukuyipa kwe Yehova acintu icicindame nkaninye cino wumwi angacita. Co-o cacindama nkaninye swinya cilipilula nu wumi wako. Nomba acani cino cingalenga usolepo ukuyipa?
1. Acani cino cikalenga wumwi asolepo ukuyipa?
Ulukundo aluno lukalenga wumwi ukupa uwumi wakwe kwe Yehova. (1 Yohani 4:10, 19) E Baibolo ikatunena ukuti: “Uwakunda e Yehova Leza wako nu mwezo wako wonsi, nu muzimu wako wonsi, ni njelu [amano] zyako zyonsi, na maka yako yonsi.” (Marko 12:30) Tukalanjizya ukuti twakunda e Leza mwe vino tukalanda nu kucita. Wulyanye vino umonsi nu mwanaci wano wakundana wakasolapo ukutwalana, avino nasweswenye nga twakunda Yehova tukasolapo ukuyipa kwe weliwe nu kubatizwa.
2. Avilambu ci vino e Yehova akapa wano wasolapo ukubatizwa?
Nga wiza wabatizwa, uliwa mu lupwa lwa kwe Yehova muno mwawa awantu wa nsansa. Cinji acakuti uliyilolela vino Yehova wakukunda, swinya ulipalamila nkaninye kwe weliwe ukucila vino cawa pe yo-o impindi. (Wazya Malakayi 3:16-18.) Ukulunda pakuwa ne Yehova ngati amukwasi wako, uliwa mu lupwa ulwa wanawitu na wankazi ukuzinguluka insi yonsinye wano wakunda Yehova ukuwikako nawewenye. (Wazya Marko 10:29, 30.) Lelo nanti ciwe wo-o, kwawa vino uzipizile ukucita pano utani ubatizwe. Uzipizile ukusambilila pe Yehova, ukumukunda nu kusuwila mu Mwana wakwe. Icakulecelezya, uzipizile ukuyipa kwe Yehova. Nga wacita vyo-o vyonsinye nukubatizwa, apano ungiza uyikale amanda pe. Izwi lyakwe Leza likati: “Nibatizyonye . . . likuwatula kanonzi.”—1 Peter 3:21.
SAMBILILA IVICILE PA-A
Lola umulandu wuno uzipizile ukuyipa kwe Yehova nu kubatizwa.
3. Swensinye tuzipizile ukusolapo wino tukulonda twawombela
Mu mpindi zya wina Israeli awantu wamwi walolanga ngati wangapepa e Yehova ponga ne leza wa wufi e Baali. Lelo e Yehova watumile kasesema e Eliya ukuti akawavwe ukumanya ukuti aciluwo cino wamanyile. Wazyani 1 Izyamfumu 18:21, nu kulanzyanya lyo-o iwuzyo:
-
Acani cino awina Israeli wazipizile ukusolapo?
Wulyanye vino calinji ku wina Israeli, nasweswenye tuzipizile ukusolapo wino tukulonda twawombela. Wazyani Luka 16:13, nu kulanzyanya ya-a amawuzyo:
-
Amulandu ci wuno tutange tuwombele e Yehova impindi iyili yonganye tuwombele nu muntu nanti icintu cinji?
-
Uzye tukalanjizya wuli ukuti twasolapo ukupepa vye Yehova?
4. Uwakwelenganya pe vino Yehova wakukunda
E Yehova watupa ivintu ivivule nkaninye. Nga sweswe acani cino tungamupa? Tambani e VIDYO.
Amwinye mumwi muno e Yehova walanjizizyamo ukuti wakukunda? Wazyani Amalumbo 104:14, 15 ne 1 Yohani 4:9, 10, nu kulanzyanya ya-a amawuzyo:
-
Pa vyawila vyonsinye vino Yehova wakupa, avili kwinye vino ukasalifizyapo nkani?
-
Uzye vikalenga uwayivwa wuli pe Yehova?
Nga wumwi watupa cimwi cino twakunda nkaninye, tukalonda ukulanjizya ukusalifya. Wazyani Amasundo 16:17, nu kulanzyanya lyo-o iwuzyo:
-
Nga welenganya pe vyonsinye vino Yehova wakucitila, acani cino ukalondesya ukumupa?
5. Nga wayipa kwe Yehova alikulambula nkaninye
Awantu awavule wamanya ukuti ndi walumbuka, wakuwomba incito inzima nanti nga wakulema indalama apano wangawa ni nsansa. Uzye co-o acisinka? Tambani e VIDYO, nu kulanzyanya ya-a amawuzyo.
-
Nanti acakuti wino twafuma mukutamba wakunzile nkaninye ukuteya bola, amulandu ci wuno walecezile?
-
Wasozilepo ukuyipa kwe Yehova ukucila kwe bola. Uzye ukwelenganya ukuti vino wasozilepo vyalinji icetenye? Amulandu ci wuno wasucila wowo?
Pano e Paulo atani awe amwina Klistu, wavwambisyanga nkaninye incito iyilumbuke. Wasambilizile sana Isundo lya ciYuda swinya wino wamusambilizyanga wamanyisilwe nkaninye. Lelo wasile vyonsinye vyo-o nu kuwa umwina Klistu. Uzye watalisile ukulanguluka ukuti vino wasozilepo ukucita vitazifile? Wazyani Wafilipi 3:8, nu kulanzyanya ya-a amawuzyo:
-
Amulandu ci wuno e Paulo walolanga imilimo yonsinye yino wawombanga pano atani awe umwina Klistu ukuti “avyavye” nanti iviko?
-
Acani cino wazanile pa mulandu wakusya vyonsinye vyo-o?
-
Ukwelenganya ukuti acani cino cingalenga uwumi wako ukuzipa, pakuwombela Yehova nanti ukucita ivintu vinji mu wumi?
Pano Paulo wizile awa amwina Klistu, wazanile ivivule ukucila na pe vino wasile
WAMWI WAKATI: “Namanya ukuti co-o acili icisinka, nomba ntani njipekanye ukubatizwa.”
-
Ungati amulandu ci wuno uzipizile ukupa uwumi wako kwe Yehova?
IVISINKA VIKULU
Ukukunda Yehova akuno kukalenga tupe uwumi witu kwe weliwe nu kubatizwa.
Avyani Vino Wasambilila?
-
Amulandu ci wuno Yehova wayanila ukumupepa nu kumukunda nu mwezo witu wonsinye?
-
Uzye e Yehova akalambula wuli wino wasolapo ukubatizwa?
-
Uzye ungakunda ukupa uwumi wako kwe Yehova?
MANYILAPO NA VINJI
Lola cino calenzile e wino wimbilanga indwimbo na wino wasamalanga uluwilo lwa kucimvyanya ukusolapo ukuyipa kwe Yehova.
Awacitici Wakawuzya Ukuti—Acani Cino Ndicita mu Wumi?—Ukwizuka Vino Calinji (6:54)
Lola imilandu na yinji yino uzipizile ukuyipa.
“Amulandu ci Wuno Uzipizile Ukuyipa kwe Yehova?” (Ulupungu lwa kwa Kalinda, January 15, 2010)
Mwe yo-o e vidyo ya ndwimbo, lola insansa zino wano wakuyipa kwe Yehova wakawa nazyo.
Lola cino calenzile umwanaci wumwi ukwelenganya cino calinji acicindamisye mu wumi wakwe mwi lyasi lya kuti “Pa Myaka Imivule Nayiwuzyanga ukuti, ‘Amulandu ci Wuno Twawela Munsi?’”
“Baibolo Ikapilula Awantu” (Ulupungu lwa kwa Kalinda, November 1, 2012)
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
