Ku lihana kuli Yehova ca lomboloka ku mu kulahesa ku hitila mu civundilo nguenu, mu ka pangela lika Ikeye na ku mu tuameka mu muono. (Visamo 40:8) Mu nima ya ntsimbu, va ka mi mbatiza. Ku mi mbatiza ce ku muesa ku vakuenu ngecize mua lihana kuli Yehova. Kaha cihangula ca ku lihana kuli Yehova, cikeco ca pua cihangula ca seho ya kama ha vihangula viose mu muono. Vika vi hasa ku mi vuisa cizango ca ku linga eci cihangula ca seho kaha ce ku alulula muono?

1. Vika vie ku vuisa muntu cizango ca ku lihana kuli Yehova?

Ku lema Yehova cikeco ce ku tu vuisa cizango ca ku lihana kuli ikeye. (1 Yoano 4:10, 19) Mbimbiliya ya tu mamuna nguayo: “U ka lema [Yehova] Njambi yove na mutima uove uose, na muono uove uose, na mana ove ose, na ngolo yove yose.” (Mako 12:30) Tue ku muesa ngecize tua lema Njambi, kati lika mu vihandeka vunoni na mu vilinga. Va mpuevo na yala va lilema mu vusunga ve ku liambata. Na vuno vene, cilemo cetu kuli Yehova ca pande ku tu vuisa cizango ca ku lihana kuli ikeye na ku tu mbatiza.

2. Vivezikiso vika Yehova ue ku hana ku Vakaleho veni va ku mbatiza?

Mu va ka mi mbatiza mu ka pua mutamba ua vusoko vua Yehova vua ndzolela. Kaha mu ka limuena cilemo ca Yehova hali yenu mu vinjila via vingi. Cikuavo naua, vusamba vuenu na Yehova vu ka kaniama ku hiana na ku ntsimbu ino. (Tandenu Malakiya 3:16-18.) Ku tundisako civezikiso ca Yehova ku pua Isuenu, mu ka pua naua mutamba ua vusoko vua mu lutsilielo vua vamuanoko mu mavu ose, vaze va lema Yehova kaha va ka mi lema nenu. (Tandenu Mako 10:29, 30.) Vunoni kua kala vimo vinanga vi mu na pande ku puisamo ntsimbu kanda va mi mbatize. Mua pande ku lilongesa via Yehova, ku mu lema kaha na ku tsiliela muli Muaneni. Mu ku manusuila, mua pande ku hana muono uenu kuli Yehova. Nga mu puisamo evi vinanga na ku mi mbatiza, mu ka kala mu njila ya ya ku muono ka ue ku hua ua ya-ye mu ndzolela. Mbimbiliya ya muesa ngecize, ‘mbatizimu i li na ku mi ohiela vuovuno.’—1 Petulu 3:21.

 TANTEKEYENU VIKUAVO

3. Tu vose tua pande ku lihanguila iya tu pangela

Mu Isaleli ya laza, vamo vantu va singaniekele ngecize citava ku pangela Yehova na njambi ua makuli Mbale ha ntsimbu imo lika. Vunoni Yehova ua tumine kapolofeto keni Eliya, linga a ka sungamese visinganieka viavo. Tandenu 1 Vamiangana 18:21, kaha simutuilenu ha cihula eci:

• Cihangula cika va pandele ku linga vaIsaleli?

Ngeci mua vaIsaleli, netu tua pande ku hangula iya tu pangela. Tandenu Luka 16:13, kaha simutuilenu ha vihula evi:

• Omo lia vika ka ci tava ku lemesa Yehova na muntu ueka ni cuma ceka?

• Vati tu hasa ku muesa kuli Yehova ngecize tua hangula ku mu pangela?

4. Hilulenu ha cilemo ca Yehova kuli yenu

 5. Ku lihana ce ku neha vivezikiso via vingi

 VI MU NA LILONGESA

Cilemo ce ku tu vuisa cizango ca ku lihana kuli Yehova na ku tu mbatiza.

Mpupulule

• Omo lia vika Yehova ua fuila ku mu lema na ku mu lemesa na mutima uetu uose?

• Omo lia vika Yehova ue ku vezikisa Vakaleho veni va ku mbatiza?

• Nenu mu tonda ku lihana kuli Yehova ni?