TLAMACHTIL 46
¿Tleka moneki timotemakaskej ixpan Jehová uan timoapolaktiskej?
Ijkuak ikaj motemaka ixpan Jehová motlatlaujtia uan kiluia nochipa kitekichiuilis uan kitlakamatis (Salmo 40:8). Ijkuak ikaj moapolaktia, inmixpan nochtin kiteititia san Jehová kitekichiuilis. Miak ipati timotemakaskej ixpan Jehová, ijkuak ijkon tikchiuaj tonemilis mopatla. ¿Tlen mitspaleuis ximoapolakti?
1. ¿Tleka timotemakaj ixpan toTajtsin Dios?
Timotemakaj ixpan Jehová porque tiktlasojtlaj (1 Juan 4:10, 19). Biblia techiluia: “Xiktlasojtla Jehová moDios ika nochi moyolo, ika nochi moyolilis, ika nochi motlayejyekol uan ika nochi mochikaualis” (Marcos 12:30). Ika tlen tikchiuaj uan tlen tikijtouaj tikteititiaj melauak tiktlasojtlaj Jehová. Ijkon ken se telpochtli uan se ichpochtli monamiktiaj porque motlasojtlaj, tejuan tiktlasojtlaj Jehová ikinon timotemakaj ixpan uan timoapolaktiaj.
2. ¿Ken kinteochiua Jehová itekipanojkauan tlen yomoapolaktijkej?
Ijkuak timoapolaktis tipouis iuan ifamilia Jehová uan tiyolpakis. Ijkon okachi kuali timouikas iuan Jehová uan tikitas ye mitstlasojtla (xiktlajtolti Malaquías 3:16-18). Jehová yetos moTajtsin uan miakej tokniuan tlen kitlasojtlaj noijki mitstlasojtlaskej (xiktlajtolti Marcos 10:29, 30). Pero achto moneki tikchiuas seki tlamantli uan ijkon uelis timoapolaktis. Moneki tikixmatis Jehová, tiktlasojtlas uan tikneltokas tlen okichi Jesús. Satepan moneki tikiluis Jehová nochipa tiktlakamatis. Tla tikchiuas tlen yotimomachtijkej uan timoapolaktis, uelis nochipa tiyoltos uan tiyolpakis. ITlajtol toTajtsin Dios kijtoua ijkuak ikaj moapolaktia: ‘Noijki kimakixtia’ (1 Pedro 3:21).
MATIMOMACHTIKAN
Matikitakan tleka moneki timotemakas ixpan toTajtsin Dios uan timoapolaktis.
3. Matikpejpenakan akin tiknekij tiktekichiuiliskej
Yiuejkika sekimej israelitas okiueyichiuayaj Jehová uan noijki Baal. Ikinon Jehová okintitlanili iprofeta Elías para makinmiluiti amo kuali tlen okichiuayaj. Xiktlajtoltikan 1 Reyes 18:21 uan satepan xikitakan tlen namechmachtia.
-
¿Tlen omonekiaya kipejpenaskej israelitas?
Tejuan noijki moneki tikpejpenaskej akin tiknekij tiktekichiuiliskej. Xiktlajtoltikan Lucas 16:13 uan satepan xikitakan tlen namechmachtia.
-
¿Tleka san Jehová moneki tiktlasojtlaskej?
-
¿Ken tikteititiskej san Jehová tiknekij tikueyichiuaskej?
4. Ximokuayejyeko ken kiteititia Jehová mitstlasojtla
Jehová otechtliokoli miak tlamantli, tejuan ¿tlen uelis tikmakaskej? Xikitakan VIDEO.
¿Ken kiteititia Jehová mitstlasojtla? Xiktlajtoltikan Salmo 104:14, 15 uan 1 Juan 4:9, 10 uan satepan xikitakan tlen namechmachtia.
-
Jehová techmaka miak tlamantli, ¿tlen okachi mitspaktia?
-
¿Ken timomachilia ijkuak tikita nochi tlen Jehová techtliokolia?
Ijkuak itlaj techtliokoliaj tiknekij tiktlasojkamatiskej. Xiktlajtoltikan Deuteronomio 16:17 uan satepan xikitakan tlen namechmachtia.
-
Ijkuak timokuayejyekoua itech nochi tlen Jehová mitsmaka, ¿tikneki noijki itlaj tikmakas? ¿Tlen mitspaktiskia tikmakas?
5. Tla timotemakas ixpan toTajtsin Dios, ye mitsteochiuas
Miakej kijtouaj okachi yolpakiskej tla kinmixmatiskej, tla kipiaskej se kuali tekitl noso kipiaskej miak tomin ¿pero melauak tlen yejuan kijtouaj? Xikitakan VIDEO uan satepan xikitakan tlen namechmachtia.
-
Maski tokni sapanoua okipaktiaya mauiltis fútbol ¿tleka ayakmo omauilti?
-
Ye okipejpenki kitekichiuilis Jehová uan ayakmo mauiltis, ¿tikita kuali tlen okichi? ¿Tleka ijkon tikijtoua?
Ijkuak Pablo ayamo okichiuaya ken Cristo okipiaya tomin. Okimachti se tlakatl tlen miakej okixmatiayaj uan okimatiaya tlen okijtouaya intlanauatil judíos. Pero okika nochi porque okinekiaya kichiuas ken Jesús. ¿Okiyolkoko tlen okika? Xiktlajtoltikan Filipenses 3:8 uan satepan xikitakan tlen namechmachtia.
-
¿Tleka Pablo okijto tlen okika yetoskia ken tlajsoli?
-
¿Ken okiteochi toTajtsin Dios?
-
¿Tikneltoka okachi tiyolpakis tla tiktekichiuilis Jehová? ¿Tleka ijkon tikijtoua?
Ijkuak Pablo opejki kichiua ken Cristo, toTajtsin Dios okiteochi.
SEKIMEJ KIJTOUAJ: “Amo ipati tiktekichiuiliskej toTajtsin Dios”.
-
¿Timokuayejyekoua melauak tiyolpakis tla timotemakas para tiktekichiuilis Jehová? ¿Tleka ijkon tikijtoua?
XIKILNAMIKTO
Tiktlasojtlaj Jehová ikinon timotemakaj ixpan uan timoapolaktiaj.
Matikojpauikan
-
¿Tleka moneki tikueyichiuaskej Jehová uan tiktlasojtlaskej?
-
¿Ken kinteochiua Jehová itekipanojkauan tlen yomoapolaktijkej?
-
¿Mitspaktiskia timotemakas ixpan Jehová?
NIN NOIJKI MITSPAKTIS
Xikita tleka sekimej okikajkej tlen achto okichiuayaj.
Xikita tleka miak ipati matimotemakakan ixpan Jehová.
“¿Tleka moneki timotemakaskej ixpan Jehová?” (Akin Tetlapouijtok, 15 de enero 2010)
Xikita ken yolpakij akinmej moapolaktiaj.
Xikita tlen okipaleui se siuatl mamokuayejyeko tlen omonekiaya kichiuas itech inemilis. Xiktlajtolti tlamachtil tlen itoka “Onimotlajtlaniaya tleka tiyoltokej”.
“Biblia okinpatili innemilis” (Akin Tetlapouijtok, 1 de noviembre 2012)
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
