OSHILESHWA 46
Omolwashike wu na okwiiyapulila Kalunga nokuninginithwa?
Oho iyapulile Jehova moku mu uvanekela megalikano kutya oye awike to ka longela, na oye to ka tula pondondo yotango monkalamwenyo yoye. (Episalomi 40:8) Konima yaashono, oho ninginithwa. Mokuninga ngawo, oho ulukile yalwe kutya owi iyapulila Kalunga. Etokolo lyokwiiyapulila Jehova olyo limwe lya simanenena tatu vulu okuninga. Oshike tashi vulu oku ku inyengitha wu ninge etokolo ndika lya simanenena, ndyoka tali ka lundulula onkalamwenyo yoye?
1. Oshike hashi inyengitha omuntu i iyapulile Kalunga?
Ohole oyo hayi tu inyengitha tu iyapulile Jehova. (1 Johannes 4:10, 19) Ombiimbeli otayi tu ladhipike tayi ti: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe nonoonkondo dhoye adhihe.” (Markus 12:30) Ihatu ulike owala kutya otu hole Kalunga mokupopya, ihe ohatu shi ulike wo nomiilonga. Ngaashi owala omulumentu nomukiintu mboka ye holathane shili haya hokana, nohole yetu yokuhola Jehova ohayi tu inyengitha tu mu iyapulile notu ninginithwe.
2. Omayambeko geni Jehova ha gandja kaapiya ye mboka ya ninginithwa?
Uuna wa ninginithwa, oho ningi oshitopolwa shuukwanegumbo waJehova mboka wa nyanyukwa. Oto ka mona nkene te ku ulukile ohole ye momikalo odhindji noto ka hedha popepi lela naye. (Lesha Maleaki 3:16-18.) Kakele kokukala wu na Jehova e li Ho, oto ka kala wo wu na aamwaho naamwanyoko muuyuni awuhe mboka ye mu hole noye ku hole. (Lesha Markus 10:29, 30.) Odhoshili kutya owa pumbwa okukatuka oonkatu dhontumba, opo wu kale wa gwana okuninginithwa. Owa pumbwa okwiilonga kombinga yaJehova, okukala wu mu hole nokukala wi itaala mOmwana. Opo ihe to iyapulile Jehova nawa. Ngele owa ningi iinima mbyono, oto vulu oku ka kala nonkalamwenyo ombwanawa sigo aluhe. Oohapu dhaKalunga otadhi ti kutya eninginitho ‘otali mu hupitha ngashingeyi.’ — 1 Petrus 3:21.
ILONGA OSHINDJI
Tala kutya omolwashike sha simana wu iyapulile Jehova, e to ninginithwa.
3. Atuhe otu na okuhogolola kutya olye tatu longele
MuIsraeli shonale, aantu yamwe oya li taya dhiladhila kutya otaya vulu okulongela Jehova nosho wo oshikalunga Baal pethimbo limwe. Ihe Jehova okwa li a tumu omuhunganeki gwe Elia, e ya pukulule. Lesha 1 Aakwaniilwa 18:21, e tamu kundathana epulo tali landula:
-
Aaisraeli oya li ye na okuninga etokolo lini?
Ngaashi Aaisraeli, natse otu na okuhogolola kutya otatu longele lye. Lesha Lukas 16:13, e tamu kundathana omapulo taga landula:
-
Omolwashike itaatu vulu okulongela Jehova, tse pethimbo opo tuu mpoka otatu longele gulwe nenge oshinima shilwe?
-
Ohatu ulukile ngiini Jehova kutya oye twa hogolola okulongela?
4. Tedhatedha kunkene Jehova e ku hole
Jehova okwe tu pa omagano ogendji omawanawa. Mbela tse otatu vulu oku mu pa shike? Dhana OKAVIDIO.
Omomikalo dhimwe dhini Jehova e ku ulukila ohole? Lesha Episalomi 104:14, 15 nosho wo 1 Johannes 4:9, 10, e tamu kundathana omapulo taga landula:
-
Omagano geni wa pandula unene ngoka Jehova e tu pa?
-
Mbela omagano ngoka ohage ku ningitha wu kale wu mu uvitile ngiini?
Uuna twa pewa omagano omawanawa lela, ohatu kala twa hala okuulukila ngoka e ge tu pa kutya otwe mu pandula. Lesha Deuteronomium 16:17, e tamu kundathana epulo tali landula:
-
Uuna wa dhiladhila kukehe shimwe shoka Jehova e ku ningila, ohashi ku inyengitha wu mu pe shike?
5. Uuna twi iyapulile Jehova, ohatu mono omayambeko ogendji
Aantu oyendji oyi itaala kutya ngele owa simana, wu na iilonga iiwanawa, nenge wu na iimaliwa, oto kala wa nyanyukwa. Mbela shono oshoshili ngaa? Dhana OKAVIDIO, e tamu kundathana omapulo taga landula.
-
Nonando omulumentu ngoka a ulikwa mokavidio okwa li e hole okudhana etanga, omolwashike e li etha po?
-
Okwa tokola okwiiyapulila Jehova, pehala lyokukala a pititha komeho uudhano wetanga. Mbela sho to tala, okwa ninga ngaa etokolo lyomondjila? Omolwashike to tile ngawo?
Manga omuyapostoli Paulus inaa ninga Omukriste, okwa li ta lalakanene ondondo ya simana. Okwa li a longwa ompango yOshijuda komulongi a tseyika nawa. Ihe ayihe mbyoka okwe yi thigi po, e ta ningi Omukriste. Mbela Paulus okwa li i ipe uusama sho a ningi ngawo? Lesha Aafilippi 3:8, e tamu kundathana omapulo taga landula:
-
Omolwashike Paulus a ti kutya iinima mbyoka a li ha ningi manga inaa ninga Omukriste, “iiyagaya yowala”?
-
Pehala lyiinima mbyono okwa li i ilikolele shike?
-
Okulongela Jehova otaku vulu ngaa okuyelekanithwa niinima yilwe mbyoka wa li to vulu okuninga monkalamwenyo yoye?
Sho Paulus a ningi Omukriste, okwa likola oshindji shi vulithe pwaashoka a thigi po
AANTU YAMWE OHAYA TI: “Kashi li pandunge okwiiyapulila Kalunga.”
-
Sho to dhiladhila, omolwashike shi li pandunge okwiiyapulila Jehova?
OWI ILONGO SHIKE?
Ohole ohayi tu inyengitha tu iyapulile Jehova e tatu ninginithwa.
Omapulo geendululo
-
Omolwashike tu na okukala tu hole Jehova nomutima gwetu aguhe noku mu longela?
-
Jehova oha yambeke ngiini aapiya ye mboka ya ninginithwa?
-
Mbela ino hala okwiiyapulila Jehova?
UUYELELE WA GWEDHWA PO
Tala kutya omolwashike omuhikingalo nomudhanitanga gumwe ya tokola yi iyapulile Jehova.
Aagundjuka taya pula, onkalamwenyo yandje otandi ke yi longitha ngiini? — Onakuziwa (6:54)
Tala komatompelo ga gwedhwa po kutya omolwashike tu na okwiiyapulila Jehova.
“Omolwashike wu na okwiiyapulila Jehova?” (Oshungolangelo, 1 Januali 2010)
Mokaimbilo haka, tala nkene mboka yi iyapulila Jehova ya nyanyukwa.
Lesha ehokololo, “Uule womimvo onda kala nokwiipula kutya, ‘Omolwashike tu li kombanda yevi?’” wu uve shoka shi inyengitha omukiintu gumwe, a mone shoka sha simana kuye.
“Ombiimbeli ohayi lundulula onkalamwenyo yaantu” (Oshungolangelo, 1 Novomba 2012)
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
