WANGƆ 46
Nda mɛ ayɔ ya mɔ hɛ̃ tɛrɛ mɔ hɛ̃ Nzapa wa mɔ mu batisimɔ nɛ?
Hɛ̃ngɔ tɛrɛ hɛ̃ Nzapa adu kongɔ hɛ̃ lo kapa na ya sambela ya mɔ na vɔrɔngɔ bo lo, wa mɔ na kpãngɔ gwɛ̃ tɛ lo na ndo ti uzu na ya dungɔ lɛ ngɛ̃́ tɛ mɔ. (Nzembo 40:8) Na gesi, mɔ lengbi ti mungɔ batisimɔ na gbɛ lɛ azi zu so fangɔ ya mɔ hɛ̃ tɛrɛ mɔ hɛ̃ Nzapa. Mungɔ ekateli ti hɛ̃ngɔ tɛrɛ mɔ hɛ̃ Nzapa la du ye ti ngbondoni mɛ ayɔ ya mɔ li. Ye mɛ lengbi ti tongɔ mɔ ya, mɔ mu ekateli niko ti ngbondoni mɛ alengbi ti gbinyangbingɔ dungɔ lɛ ngɛ̃́ tɛ mɔ nɛ?
1. Ye mɛ lengbi ti tongɔ zo ya lo hɛ̃ tɛrɛ lo hɛ̃ Nzapa nɛ?
Songo la ndo to zo ya lo hɛ̃ tɛrɛ lo hɛ̃ Yehova. (1 Yoanɛ 4:10, 19) Ngbangɔ tɛnɛ hɛ̃ e ya: “Ale mɔ ye Gbia Nzapa tɛ mɔ na bɛ mɔ kɔi, na tɔrɔ tɛrɛ mɔ zu, na kɔdɛ tɛ mɔ zu, nga na nguru tɛ mɔ zu.” (Marko 12:30) Ta e ndo fa ya e ndo ye Nzapa bo na pɔrɔ nyɔ e ma, kanda na ya kwa tɛ e. Nga ma se mɛ songo ndo to kɔli na wali ya ala li libala ko, se mɛ nga songo mɛ e na ni ka mbage tɛ Yehova ndo to nga e ya e hɛ̃ tɛrɛ e hɛ̃ lo wa e mu batisimɔ la.
2. Nzɔ̃ sulu mɛ Yehova ndo hɛ̃ awakwa tɛ lo mɛ mu batisimɔ nɛ?
Mungɔ batisimɔ na lingɔ ya mɔ li kaya ndasewa tɛ awakwa tɛ Yehova mɛ na dengɔ bɛ. Na ngoi mɛ mɔ na hũngɔ se mɛ lo ndo fa na songo ka mbage tɛ mɔ na ya alo ndɛ̃ ndɛ̃ ndɛ̃ ko, mɔ nga na tingɔ na mangbi ti kpengbani na lo ɔngɔ omɛ mɔ na ni ndɛ. (Di Malaki 3:16-18.) Yehova na tingɔ To mɔ, wa mɔ nga na lingɔ ka ndasewa tɛ ayata kɔli na ayata wali mɛ ndo ye lo wa ala ndo ye nga mɔ. (Di Marko 10:29, 30.) Nga ma se mɛ e mandandó na ni, ayɔ ya mɔ li aye mɛndɛ̃ uzu ti nɛngɔ ya mɔ mu batisimɔ. Ayɔ ya mɔ manda hĩngangɔ Yehova, yengɔ lo wa mɔ fa nga loyengɔ ka mbage tɛ Nyi lo Yezo. Na gesi mɔ lengbi ti hɛ̃ngɔ dungɔ lɛ ngɛ̃́ tɛ mɔ hɛ̃ Yehova. Na ngoi mɛ mɔ li alo olo zu ko, mɔ lengbi ti mungɔ batisimɔ wa mɔ na bandangɔ dɔ̃ngɔ nɔ na ya ta lége ti dungɔ lɛ ngɛ̃́ bwai na bwai. Ngbangɔ tɛnɛ ya: “Batisimɔ aso ĩ.”—1 Petro 3:21.
GI HĨNGANGƆ LO MƐNDƐ̃
Gi hĩngangɔ nda mɛ hɛ̃ngɔ tɛrɛ hɛ̃ Yehova nga na mungɔ batisimɔ la du ye mɛ ngbondoni.
3. E zu elengbi ti pɔnangɔ zo mɛ e ye vɔrɔngɔ lo
Na ngoi ti gã aya Izraɛlɛ mɛndɛ̃ ndo dandó bɛ la ya ani lengbi ti vɔrɔngɔ Yehova na Baala ndoni kɔi. Yehova tondó prɔfɛta tɛ lo Eliya ya lo lonzi siɔ dangɔ bɛ niko. Di 1 Bakonzi 18:21, wa na pɛni hɛ̃ gbinya ti hũnda olo mɛ:
-
Ye mɛndó ayɔ ya aya Izraɛlɛ pɔna nɛ?
Nga ma aya Izraɛlɛ elengbi nga ti pɔnangɔ zo mɛ e li kwa hɛ̃ lo. Di Luka 16:13, wa na pɛni hɛ̃ gbinya ti ahũnda olo mɛ:
-
Nda mɛ ta elengbi ti bombingɔ Yehova na ye mɛndɛ̃ vɔrɔngɔ ma nɛ?
-
Ye mɛ e li ti fangɔ ya e pɔna vɔrɔngɔ bo Yehova nɛ?
4. Gbɔ̃ li mɔ na ndo songo mɛ Yehova na ni na lo tɛ mɔ
Yehova hɛ̃ e anzɔ̃ ye gba. Ye mɛ elengbi nga ti hɛ̃ngɔ lo nɛ? Ba VIDEO.
Yehova fa songo tɛ lo ka mbage tɛ mɔ ngasia? Di Nzembo 104:14, 15 nga na 1 Yoanɛ 4:9, 10, wa na pɛni hɛ̃ gbinya ti ahũnda olo mɛ:
-
Nzɔ̃ ye mɛ Yehova hɛ̃ e mɛ mɔ ndo sepala na ni gba nɛ?
-
Ni li ya mɔ ma tɛrɛ mɔ ngasia na lo tɛ Yehova nɛ?
Se zo hɛ̃ mɔ ye kɔi mɛ mɔ sepala na ni gba ko, mɔ na gingɔ lége ti hɛ̃ngɔ lo siakɔli. Di Kolimbola Mibeko 16:17, wa na pɛni hɛ̃ gbinya ti hũnda olo mɛ:
-
Se mɔ gbɔ̃ li mɔ na ndo aye zu mɛ Yehova li na lo tɛ mɔ, ye mɛ mɔ na sepalangɔ hɛ̃ngɔ lo nɛ?
5. Hɛ̃ngɔ tɛrɛ hɛ̃ Yehova ndo hɛ̃ zo anzɔ̃ sulu gba
Azi gba ndo da bɛ la ya dungɔ na ndima gba, kwa ti nzɔ̃ni bere lingɔ kalasi gba nga na dungɔ na falanga gba alengbi ti hɛ̃ngɔ dengɔ bɛ. Ni du bɛta tɛnɛ? Ba VIDEO, wa na pɛni hɛ̃ gbinya ti ahũnda olo mɛ.
-
Abɛse du ya wa tangɔ ndɛmbo mɛ atɛnɛ tɛnɛ tɛ lo so ya video mɛ ndo sepalandó na tangɔ ndɛmbo gba, nda mɛndó lo zia ni nɛ?
-
Lo mundó ekateli ti hɛ̃ngɔ dungɔ lɛ ngɛ̃́ tɛ lo hɛ̃ Yehova kanda ta ndɛmbo ma. Mɔ da bɛ mɔ ya lo mundó ekateli ti nzɔ̃ni? Nda mɛ mɔ tɛnɛ ngaso nɛ?
Kalasi mɛndó toma Polo li uzu ti nɛngɔ ya lo ti wakristo ko, alengbindó ti lingɔ ya lo ti zo ti ndima. Lo mandandó ndia tɛ ayuda ka gbɛ ti zo kɔi mɛ na ndima gba. Kanda lo ziandó aye niko zu, wa lo tindó wakristo. Polo mandó vundu na ndenge mɛndó lo pɔna tingɔ wakristo? Di Filipɛ 3:8, wa na pɛni hɛ̃ gbinya ti ahũnda olo mɛ:
-
Nda mɛndó Polo tɛnɛ ya aye zu mɛ ni zia ti nɛngɔ ya ni ti wakristo adu nga ma “ambumbusɛ ye,” nɛ?
-
Wa nzɔ̃ sulu mɛndó lo lua nɛ?
-
Ye mɛ ndo hɛ̃ mɔ dengɔ bɛ gba nɛ, lingɔ kwa hɛ̃ Yehova bere lingɔ ye mɛndɛ̃ na ya dungɔ lɛ ngɛ̃́ tɛ mɔ?
Nzɔ̃ sulu mɛndó Polo lua aɔ aye zu mɛndó lo zia ni
AZI MƐNDƐ̃ NDO TƐNƐ YA: “Ta du nzɔ̃ni ya, zo hɛ̃ dungɔ lɛ ngɛ̃́ tɛ lo zu kaya kwa tɛ Nzapa ma.”
-
Mɔ da bɛ mɔ ya nɛ, nda mɛ du nzɔ̃ni ya zo hɛ̃ dungɔ lɛ ngɛ̃́ tɛ lo hɛ̃ Yehova nɛ?
NA NDUNU NI
Songo la ndo to e ya e hɛ̃ dungɔ lɛ ngɛ̃́ tɛ e hɛ̃ Yehova wa e mu batisimɔ.
Bozongeli
-
Nda mɛ ayɔ ya e ye Yehova na bɛ e zu wa e vɔrɔ bo lo nɛ?
-
Nzɔ̃ sulu mɛ Yehova ndo hɛ̃ awakwa tɛ lo mɛ mu batisimɔ nɛ?
-
Mɔ na yengɔ hɛ̃ngɔ dungɔ lɛ ngɛ̃́ tɛ mɔ hɛ̃ Yehova?
AYE MƐNDƐ̃ MƐ MƆ LI
Ba se mɛndó wa yengɔ bia kɔi na wa tangɔ ndɛmbo kɔi pɔnandó hɛ̃ngɔ dungɔ lɛ ngɛ̃́ tɛ la hɛ̃ Yehova.
Mituna oyo bilenge batunaka—Nakosala nini na bomoi na ngai?—Kokanisa makambo eleká (6:54)
Ba aye mɛndɛ̃ mɛ lengbi ti tongɔ mɔ ya mɔ hɛ̃ dungɔ lɛ ngɛ̃́ tɛ mɔ hɛ̃ Nzapa.
“Mpo na nini osengeli komipesa na Yehova?” (Linɔngi ti Sinzili ti 15/01/2010)
So ya video ti bia mɛ, ba dengɔ bɛ mɛ azi mɛ ndo hɛ̃ dungɔ lɛ ngɛ̃́ tɛ la hɛ̃ Yehova ndo ma.
Ba bɛli tɛnɛ mɛ “Ndo gã mbi ndo hũndandó tɛrɛ mbi ya ‘Nda mɛ e ge lɛ sese nɛ?’” ti nɛngɔ ya mɔ hĩnga se mɛndó wali kɔi gbɔ̃ li lo na ndo ye mɛ ngbondoni na ya dungɔ lɛ ngɛ̃́ tɛ lo.
“Ngbangɔ ndo gbinyangbi dungɔ lɛ ngɛ̃́” (Linɔngi ti Sinzili ti 01/11/2012)
