FAKAAKOAGA 46
Ko e Ha kua Tukulele mo e Papatiso?
Kua tukulele, po ke fakatapu a koe ki a Iehova he mavehe he liogi ke tapuaki hokoia ni ki a ia mo e tuku fakamua e finagalo haana he moui haau. (Salamo 40:8) Ka oti ia, ti papatiso a koe. He taute pihia, fakakite e koe ke he falu kua tukulele e moui haau. Ko e fifiliaga ke tukulele a tautolu ki a Iehova kua mua atu e aoga. Ko e heigoa kua liga omoomoi a koe ke taute e fifiliaga uho ia ne hiki e moui haau?
1. Ko e heigoa kua omoomoi e tagata ke tukulele e moui?
Ko e tukulele ha tautolu ki a Iehova kua omoomoi he fakaalofa. (1 Ioane 4:10, 19) Tomatoma mai e Tohi Tapu: “Kia fakaalofa atu foki a koe ke he Iki hāu a Atua mo e hāu a loto katoa, mo e hāu a agaga katoa, mo e hāu a manatu katoa, mo e hāu a malolo katoa.” (Mareko 12:30) Fakakite e tautolu kua fakaalofa a tautolu ke he Atua he tau kupu mo e tau mena ne taute e tautolu. Tuga e hoa kua fefakaalofaaki mooli ti mau, ko e fakaalofa ha tautolu ki a Iehova kua omoomoi a tautolu ke tukulele ki a ia mo e papatiso.
2. Ko e heigoa e tau monuina ne foaki e Iehova ke he tau fekafekau papatiso haana?
Ka papatiso a koe, to eke a koe mo taha he magafaoa fiafia ha Iehova. To logona e koe e fakaalofa haana ma haau he tau puhala loga, mo e to fakatata lahi a koe ki a ia mogonei. (Totou Malaki 3:16-18.) He eke foki a Iehova mo Matua haau, moua e koe e magafaoa fakaagaaga he tau matakainaga he lalolagi katoa kua fakaalofa ki a Ia mo e fakaalofa ki a koe. (Totou Mareko 10:29, 30.) Ka e lata ia koe ke taute e tau lakaaga pauaki ato papatiso. Lata a koe ke fakaako ki a Iehova, fakaalofa ki a ia, mo e tua ke he Tama haana. Fakahiku ai, lata a koe ke tukulele e moui haau ki a Iehova. Ka taute e koe e tau lakaaga ia mo e papatiso, ko koe he puhala ke moua e moui tukulagi. Pehē e Kupu he Atua: “Ko e papatisoaga, kua fakamoui ai ainei a tautolu.”—1 Peteru 3:21.
KUMIKUMI FAKAHOKULO
Kumikumi e kakano kua aoga ma haau ke tukulele e moui ki a Iehova mo e papatiso.
3. Kua lata a tautolu oti ke fifili a ia ke fekafekau ki ai
I Isaraela i tuai, falu tagata ne manatu kua maeke a lautolu ke tapuaki ki a Iehova mo e atua fakavai ko Paala. Ka e fakafano e Iehova e perofeta ko Elia ke fakahako e manatu hepe nei. Totou 1 Tau Patuiki 18:21, ti tutala ke he hūhū nei:
-
Ko e heigoa e fifiliaga ne lata e tau Isaraela ke taute?
Tuga e tau Isaraela, lata foki a tautolu ke fifili a ia ke tapuaki ki ai. Totou Luka 16:13, ti tutala ke he tau hūhū nei:
-
Ko e ha kua nakai lata a tautolu ke tapuaki ki a Iehova mo e taha tagata po ke taha mena?
-
Fakakite fēfē e tautolu ki a Iehova kua fifili a tautolu ke tapuaki ki a ia?
4. Manamanatu fakahokulo ke he fakaalofa ha Iehova ki a koe
Foaki mai e Iehova ki a tautolu loga e mena fakaalofa uho. Ko e heigoa ha tautolu ka foaki ki a ia? Tā e VITIŌ.
Ko e heigoa falu puhala kua fakakite e Iehova e fakaalofa ki a koe? Totou Salamo 104:14, 15 mo e 1 Ioane 4:9, 10, ti tutala ke he tau hūhū nei:
-
Ko e heigoa e tau mena fakaalofa ha Iehova kua fakaaue pauaki a koe ki ai?
-
Fēfē e logonaaga haau ki a ia ha ko e tau mena fakaalofa nei?
Ka moua e tautolu e mena fakaalofa kua fiafia mooli ki ai, manako a tautolu ke fakakite e loto fakaaue ki a ia ne foaki mai. Totou Teutaronome 16:17, ti tutala ke he hūhū nei:
-
Ka manamanatu a koe ke he tau mena oti ne taute e Iehova ma haau, ko e heigoa kua omoomoi a koe ke foaki ki a ia?
5. Ka tukulele a koe, to loga e monuina ka moua
Tokologa e tagata ne talitonu ko e talahaua, gahua mitaki, po ke tupe ka moua e fiafia. Mooli kia e mena ia? Tā e VITIŌ, ti tutala ke he tau hūhū nā.
-
Pete ko e tagata sipote he vitiō ne fiafia ke pelē soka, ko e ha ne toka e feua ia haana?
-
Fifili a ia ke tukulele e moui haana ki a Iehova, ka e nakai ke he pelē soka. Manatu nakai a koe kua hako e fifiliaga haana? Ko e ha?
Ato eke e aposetolo ko Paulo mo Kerisiano, foli a ia ke he gahua talahaua. Fakaako e ia e fakatufono Iutaia mo e faiaoga fakaako tokoluga. Ka e toka e ia e fakaakoaga ia ke eke mo Kerisiano. Tokihala nakai a Paulo? Totou Filipi 3:8, ti tutala ke he tau hūhū nei:
-
Ko e ha ne talahau e Paulo ko e tau mena ne taute e ia fakamua to eke mo Kerisiano “ko e otaota”?
-
Ka ko e heigoa ne moua e ia?
-
Fakatatai fēfē e koe e fekafekau ki a Iehova ke he ha puhala ka fakaaoga e moui haau ki ai?
He eke a Paulo mo Kerisiano, mua atu e mena ne moua e ia ke he mena ne tiaki e ia
PEHĒ FALU TAGATA: “Nakai hako ke foaki katoatoa e moui haau ke he Atua.”
-
Ko e ha he manatu haau kua hako ke tukulele e moui haau ki a Iehova?
MANATU KATOA
Omoomoi he fakaalofa a tautolu ke tukulele e tau momoui ki a Iehova mo e papatiso.
Liu Fakamanatu
-
Ko e ha kua lata a Iehova ke moua e fakaalofa katoatoa mo e tapuakiaga ha tautolu?
-
Puhala fe ne palepale e Iehova e tau fekafekau papatiso haana?
-
Manako nakai a koe ke tukulele e moui haau ki a Iehova?
KUMI FOKI
Kitia e kakano ne fifili e tagata uhu lologo mo e tagata sipote ke tukulele a laua ki a Iehova.
Hūhū he Tau Fuata—Ko e Heigoa Haaku ka Taute he Moui Haaku?—Liu Ono ki Tua (6:54)
Manamanatu ke he falu kakano ke tukulele e moui.
“Ko e Ha kua Tukulele a Koe ki a Iehova?” (Ko e Kolo Toko, Ianuari 15, 2010)
He vitiō he lologo nei, mailoga e fiafia ha lautolu ne tukulele e tau momoui ki a Iehova.
He tala “Totou Tau ne Manamanatu Au, ‘Ko e Ha ne Ha Ha i Ai a Tautolu Hinei?’” ne mailoga e kakano ati liu e fifine kitekite ke he tau mena ne mua e aoga.
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
