ISIFUNDO 46

Kubayini Kufuze Uzinikele BewuBhajadiswe?

IDLALE

Uzinikela kuJehova ngokuthandaza umthembise ukuthi uzokulotjha yena kwaphela begodu uzombeka qangi ekuphileni kwakho. (IRhubo 40:8) Ngemva kwalokho, ubhajadiswe. Nawenza njalo, utjengisa abanye ukuthi uzinikele kuye. Isiqunto sokuzinikela kuJehova siqakatheke khulu ekuphileni kwethu. Yini ekukhuthaza bona wenze isiqunto esiqakathekilekwesi nesizokutjhugulula ukuphila kwakho?

1. Khuyini ekhuthaza umuntu bona azinikele?

Lithando elenza bona sifune ukuzinikela kuJehova. (1 Jwanisi 4:10, 19) IBhayibheli lithi: “uthande uJehova uZimakho ngehliziywakho yoke nangomphefumulwakho woke nangomkhumbulwakho woke nangamandlakho woke.” (Markosi 12:30) Sitjengisa bona siyamthanda uJehova ngalokho esikwenzako nesikutjhoko. Njengombana abantu ababili abathandanako batjhada, yeke ithando lethu ngoJehova lisenza sizinikele kuye begodu sibhajadiswe.

2. Ngiziphi iimbusiso uJehova azinikela aboFakazi bakhe ababhajadisiweko?

Nawubhajadiswako uzokuba lilunga lomndeni kaJehova othabileko. Kulapho uzokubona ithando lakhe ngeendlela ezinengi, uzokutjhidelana naye khulu ukudlula indlela otjhidelene naye nje. (Funda uMalaki 3:16-18.) Ngaphezu kokuba noJehova njengoBabakho, uzokuba nomndeni wabafowethu nabodade abathanda uJehova nabakuthandako. (Funda uMarkosi 10:29, 30.) Liqiniso, kufuze uthathe amagadango athileko bona ubhajadiswe. Kufuze ufunde ngoJehova bona umthande begodu ukholelwe eNdodanenakhe. Emaswapheleni kufuze unikele ukuphila kwakho kuJehova. Nange wenza izintwezi begodu ubhajadiswe, uzokuba semathubeni wokufumana ukuphila okungapheliko. IliZwi lakaZimu lithi: “Ibhabhadiso . . . kwanje liyanisindisa.”—1 Pitrosi 3:21.

FUNDA NGOKUNGENELELEKO

Hlolisisa bona kubayini kuqakathekile ukuzinikela kuJehova begodu ubhajadiswe.

3. Soke kufuze sikhethe bona sizokulotjha ubani

Kwa-Israyeli abanye abantu bebacabanga ukuthi bangalotjha uJehova nozimu wamala uBhali. Kodwana uJehova wathumela umphorofidi u-Eliya bona alungise indlela ebebacabanga ngayo. Funda yoku-1 yamaKhosi 18:21, bese nicoca ngombuzo lo:

Ngiziphi iinqunto ama-Israyeli ebekufuze azithathe?

Nathi kufuze sikhethe bona sizokulotjha bani njengombana kwenza ama-Israyeli. Funda uLukasi 16:13, bese nicoca ngemibuzo le:

Kubayini singekhe sikghone ukulotjha uJehova khisibe ngapha silotjha omunye umuntu namkha into ethileko?
Singamtjengisa njani uJehova bona sikhetha ukulotjha yena?

4. Zindla ngendlela uJehova akuthanda ngayo

UJehova usipha izipho ezinengi eziligugu. Khuyini thina esingamupha yona? dlala IVIDIYO.

IVIDIYO: Ukupha UJehova Izipho (3:04)

Ngiziphi ezinye iindlela uJehova akutjengise ngazo ithando? Funda iRhubo 104:14, 15 neyoku-1 kaJwanisi 4:9, 10, bese nicoca ngemibuzo le:

Eziphweni uJehova akuphe zona ngisiphi esikuthabisa khulu?
Iziphwezo zikwenza uzizwe njani ngaye?

Nasifumene isipho esisithandako sifuna ukutjengisa umuntu osiphileko bona siyathokoza. Funda uDuteronomi 16:17, bese nicoca ngombuzo lo:

Nawucabanga ngazo zoke izinto uJehova akuphe zona, uzimisele ukumenzelani?

5. Ukuzinikela kuletha iimbusiso ezinengi

Abantu abanengi bakholelwa ukuthi idumo, ibizelo elihle namkha imali kungabenza bathabe. Liqiniso lelo na? Dlala IVIDIYO, bese nicoca ngemibuzo elandelako.

IVIDIYO: Bengiphilela Ukudlala Ibholo (5:45)

Nanyana ubaba lo bekakuthanda ukudlala ibholo, kubayini alisa?
Waqunta ukuzinikela kuJehova ingasi ebholweni. Ucabanga ukuthi sihle isiqunto asenzako? Kubayini?

Ngaphambi kobana umpostoli uPowula abe mKrestu, bekafuna ibizelo elizomenza avelele. Wafundela zomthetho wamaJuda afundiswa mfundisi odumileko. Kodwana wakutjhiya koke lokho waba mKrestu. Kghani wazisola ngalokho? Funda kwebeFilipi 3:8, bese nicoca ngemibuzo le:

Kubayini uPowula athi ngaphambi kokuthi abe mKrestu lokho ebekakwenza ‘bekuziinzibi ezinengi’?
Khuyini ayifumanako esikhundleni sakho?
Khuyini ongayenza ekuphileni kwakho engadlula ukulotjha kwakho uJehova?