MUTU 46
Ndaŵa yanji tufunika kulipeleka komasoti kubatiziwa?
Munthu olipeleka kwa Yehova akamulonjeza m’pemphelo kuti akolambila yove yeka komasoti kuti akoika vofuna va Mulungu pa malo oyamba pa moyo wake. (Salimo 40:8) Ndipo obatiziwa. Wamene uyu unkhala umboni wakuti elipeleka kwa Yehova. Tetyo, kulipeleka kwa Yehova ni chinthu chofunika ngako chakufunika kuchita munthu pa moyo wake. Lomba pakuti kulipeleka kwa Yehova n’kofunika ngako komasoti kungachinje moyo wanu, ni chinji chingakuchitisheni kusankha vamene ivi?
1. Ni chinji chuchitisha munthu kuti alipeleke kwa Yehova?
Tulipeleka kwa Yehova chifukwa chakuti tumukonda ngako. (1 Yohane 4:10, 19) Baibolo yutiuja kuti: “Ukokonda Yehova Mulungu wako na ntima wako wonse, moyo wako wonse, maganizo ŵako wonse na mphanvu zako zonse.” (Maliko 12:30) Tuwonesha kuti tukonda Mulungu na vatulaŵila komasoti mu vochita vasu. Vamene ivi tingavilinganije na mwanalume na mwanakazi amene alungulana chifukwa chokondana. N’chimozimozisoti na munthu okonda Yehova. Chikondi chamene icho chumuchitisha kuti alipeleke kuli yove komasoti nobatiziwa.
2. Kansi Yehova oŵadalisa tyani atumiki ŵake abatiziwa?
Mukezebatiziwa muzaloŵe m’banja iweme ngako ya Yehova ndipo muzawone kuti Yehova okukondani ngako munjila zosiyana-siyana ndipo muzankhale naye pa ushamwali wotang’a kupambana lomba teti. (Ŵelengani Malaki 3:16-18.) Muzayambe kuwona Yehova monga Atata ŵanu, ndipo muzankhale na abale na alongo pa chalo chonse amene okonda Yehova komasoti amene okukondani ngako. (Ŵelengani Maliko 10:29, 30.) Koma, pali vinthu viyakine vamufunika kuchita mukaliye batizika. Mufunika kuphunzila vokhuza Yehova, kumukonda, komasoti kukhulupilila mwana wake. Tetyo kulipeleka kwa Yehova, kutanthauza kuti mumuuje m’pemphelo kuti muzamutumikile na moyo wanu wonse. Mukachita vinthu vamene ivi nobatiziwa, muzankhale na mwayi wakuzankhala na moyo kosasila. N’chifukwa chake mawu a Mulungu onena kuti: “Ubatizo . . . upulumusha munthu.”—1 Petulo 3:21.
VATI TIPHUNZILE
Tiphunzile kuti muziŵe kufunika kwa kulipeleka kwa Yehova komasoti kubatiziwa.
3. Aliyense ofunika kusankha wakufuna kumutumikila
Kale ku Isiraeli, ŵanthu ayakine anzeganiza kuti angakwanishe kulambila Yehova ukusoti olambila mulungu wa wenye Baala. Koma Yehova etumija mneneli wake Eliya kuti akayavye ŵanthu amene awo kuzindikila kuti kuchita vamene ivi n’kosafunika. Ŵelengani 1 Mafumu 18:21, ndipo pavuli pake mukambilane konsho iyi:
-
Kansi Aisiraeli enzefunika kusankha kuchita chinji?
Molingana na Aisiraeli, sewo nase tufunikila kusankha watufuna kumutumikila. Ŵelengani Luka 16:13, Ndipo pavuli pake mukambilane makonsho aŵa:
-
Ndaŵa yanji ni vosakwanishika kulambila Yehova ukusoti tulambila munthu olo chinthu chiyakine?
-
Kansi tingamuwoneshe tyani Yehova kuti tisankha kutumikila yove yeka tyala?
4. Mukoganizila vakukuchitilani Yehova powonesha kuti okukondani
Yehova watipasa mphaso zinyinji za ntengo wapatali. Lomba kansi sewo tingamupase chinji? Lolelani VIDIYO.
Kansi Yehova wakuwoneshani chikondi mu njila zotyani? Ŵelengani Salimo 104:14, 15 na 1 Yohane 4:9, 10, ndipo pavuli pake mukambilane makonsho aŵa:
-
Kansi ni mphaso zotyani zechikupasani Yehova zamutembeja ngako?
-
Kansi mphaso zamene izo zukuchitishani kuti mukomuwona tyani Yehova?
Munthu akatipasa mphaso yamene yatikondwelesha ngako tumutembeja. Ŵelengani Deuteronomo 16:17, ndipo pavuli pake mukambilane konsho iyi:
-
Mukaganizila vonse vawakuchitilani Yehova, kansi muwona kuti mungamuchitile chinji?
5. Tufwana madaliso anyinji tikalipeleka kwa Yehova
Ŵanthu anyinji oganiza kuti angankhale osangalala keno angankhale otchuka, keno okata ntchito iweme komasoti keno ali na ndalama zinyinji. Koma kansi vamene ivi ni vachendi? Lolelani VIDIYO, ndipo pavuli pake mukambilane makonsho aŵa.
-
Ndaŵa yanji Andrey esankha kuleka kutchaya bola olo kuti enzeikonda ngako?
-
Kansi muganiza kuti echita bwino kuleka kutchaya bola nolipeleka kwa Yehova? Ndaŵa yanji mwayankha tetyo?
Ntumwi Paulo akaliye nkhala Nkhilisitu enzekata ntchito yapalulu ngako. Yove enze echita maphunzilo Achiyuda ndipo ephunzisiwa na ticha wamene enze wotchuka ngako pa nthawe yamene iyo. Koma evisiya vonse vamene ivi nonkhala Nkhilisitu. Kansi Paulo edandaula na vechisankha? Ŵelengani Afilipi 3:8, ndipo pavuli pake mukambilane makonsho aŵa:
-
Ndaŵa yanji Paulo elaŵila kuti venzechita poyamba akaliyenkhala Nkhilisitu venze monga ni “nthutu ya vinyanswa”?
-
Lomba efwana madaliso otyani chifukwa cha vinthu vechisankha?
-
Kansi muganiza kuti moyo wanu ungankhale uweme ngako keno mungasalule kutumikila Yehova?
ŴANTHU AYAKINE ONENA KUTI: “Munthu ofunikalini kuchita kulipeleka ngako kwa Mulungu, chikulu upemphela tyala.”
-
Ndaŵa yanji muwona kuti kulipeleka kwa Yehova nkofunika ngako?
MFUNDO ZACHIDULE
Tulipeleka kwa Yehova komasoti kubatizika chifukwa chakuti tumukonda.
Makonsho oweleja
-
Ndaŵa yanji sewo tuwamila kumukonda Yehova komasoti kumulambila?
-
Kansi Yehova oŵadalisa tyani atumiki ŵake amene abatizika?
-
Kansi mwewo mungakonde kupeleka moyo wanu kwa Yehova?
PHUNZILANI VINYINJI
Onani chifukwa chake woimba muyakine komasoti kaswili wotchaya bola esankha kulipeleka kwa Yehova.
Vakukonsha achilumbwana—Kansi nizachite votyani pa moyo wangu?—Vechisankha (6:54)
Onani vifukwa viyakinesoti vamene vingapanginshe munthu kuti alipeleke kwa Yehova.
“Ndaŵa yanji mufunika kulipeleka kwa Yehova?” (Nsanja ya Olonda, 15 January, 2010)
Lolelani vidiyo iyi ya nyimbo kuti muwone mwakusangalalila ŵanthu amene olipeleka kwa Yehova.
Mu nkhani yakuti “Kwa vyaka vinyinji nenzelikonsha kuti, ‘Kansi Mulungu etilengelanji sewo teŵanthu?’” onani chiyavya munthu muyakine kuganizilasoti vinthu vamene enzeviwona kuti n’vofunika ngako pa moyo wake.
“Baibolo yuchinja moyo wa ŵanthu” (Nsanja ya Olonda, 1 November, 2012)